A ngbâ ti fa nzoni tënë ti Royaume ti Nzapa na ndö ti sese kue, tâ gï tongana ti so Jésus atene lani (Matthieu 24:14). Mbeti ti Daniel afa na e so Royaume ni so ayeke gouvernement ti Nzapa. Na chapitre 2 ti mbeti ni so, a fa mbeni prophétie so afa molongo ti angangu gouvernement ti azo, wala aroyaume, so akomande na peko ti terê ti londo na Babylone ti ândö juska ti si na ngoi ti e. Prophétie ni afa ye so ayeke si ande na pekoni, versê 44 atene tongaso:

“Nzapa ti yayu ayeke sigi na mbeni royaume so a yeke futi ni lâ oko pëpe. Royaume ni ayeke gue na ambeni zo nde pëpe. Royaume ni so ayeke neka aroyaume so kue nga ayeke futi ala biaku biaku, na gï royaume so oko la ayeke ngbâ lakue lakue.”

Prophétie ti Bible so nga na ambeni nde atene so Royaume ti Nzapa ayeke mû ande place ti gouvernement ti azo, ayeke ga na siriri nga ayeke sara si aye atambela na lege ni. Gigi ayeke duti ande tongana nyen na gbe ti Royaume ni so? Zia e bâ ambeni pendere zendo so ayeke ga ande tâ tënë na yâ ti kete ngoi.

• BIRA AYEKE DUTI ANDE DÄ APE

  Psaume 46:9: “[Nzapa ayeke] sara si abira ahunzi na ndö ti sese kue. Lo fâ yâ ti kokora, nga lo fâ yâ ti likongo kete kete; lo zö apuse ti mbarata ti sarango na bira.”

  Tara ti imaginé tongana nyen la dunia ayeke duti pendere tongana nginza, ndara nga na angoi kue so azo ayeke mû ti leke na angombe, ala mû ni kue asara na aye so alingbi ti ga na nzoni na azo ahon ti fâ azo! Zendo so ayeke ga ande tâ tënë na gbe ti Royaume ti Nzapa.

• KOBELA AYEKE DUTI ANDE DÄ APE

  Ésaïe 33:24: “Zo ti kodro ni ayeke tene ande pëpe: ‘Terê ti mbi ason.’”

  Tara ti pensé na ndö ti mbeni pendere dunia so azo ayeke bâ pasi ande pëpe na kobela ti bê, cancer, palu nga na ambeni kobela ni nde. Azo ayeke encore na bezoin ti hôpital nga na ayorö ape. Azo ayeke duti na nzoni seni nga na pendere gigi ti kekereke.

• KOTA NZARA AYEKE DUTI ANDE DÄ APE

  Psaume 72:16: “Alê ti kobe ayeke dü mingi na ndö ti sese; a yeke sigi gbani gbani na li ti ahoto.”

  Sese ayeke dü ande gbâ ti alê ti kobe ndali ti azo kue, nga azo kue ayeke wara ni. Kota nzara nga na kobela so ayeke gbu azo ndali ti so ala te kobe nzoni ape ayeke duti ande dä ape.

• PASI, VUNDU NGA NA KUÂ AYEKE DUTI ANDE DÄ APE

  Apocalypse 21:4: “[Nzapa ayeke] mbô ande ngu ti lê kue na lê ti ala, kuâ ayeke duti ande dä mbeni pëpe; mua, wala toto, wala pasi ayeke duti dä mbeni pëpe. Angbene ye ni ahon ti ala awe.”

  Bâ ye so aye ti tene ti duti na fini ti lakue lakue na ndö ti sese so ayeke ga Paradis! A yeke zendo so Nzapa ti e ti ndoye, Jéhovah, amû na e la.

Eskê aye so kue ayeke gï tënë ti bango li la? Atâa so azo mingi ayeke diko na yâ ti Bible tënë ti fini so a mû zendo ni so nga ala yeda so ayeke tâ tënë, me ndali ti araison nde nde mingi ti azo ni abâ so tënë ti fini ti lakue lakue so ayeke ngangu na ala ti yeda na ni. A étonné e ape ndali ti so zo oko ade ti vivre tongaso ape ti tene lo sara tënë na ndö ni na e.

Azo kue ayeke na siokpari na terê ti ala na ala yeke kui. Nga teti so ngbene ye giriri la azo avivre gï na yâ ti vundu, pasi nga na aye ti ngangu kirikiri, a sara si ambeni zo apensé so dunia ni ayeke gï tongaso. Me ye ni so ayeke tâ nde mingi na ye so Jéhovah Nzapa, Zo so acréé e aleke lani teti azo.

Nzapa atene mbeni tënë ti aidé e ti duti biani na confiance na azendo kue so lo mû, lo tene: “[Tënë ti mbi] a yeke kiri na mbi senge pëpe, me a yeke sara biani ye kue so mbi ye; nyen na nyen tënë ti mbi ayeke sara ye so mbi tokua lo ti sara.”—Ésaïe 55:11.

Bible atene so Jéhovah ayeke Nzapa so “alingbi ti tene mvene pëpe”. (Tite 1:2). Teti so lo mû azendo so aye ni so kue ayeke si ande biani, a yeke nzoni e mû ngoi ti gbu li na ndö ti atënë so: Eskê biani azo apeut ti ngbâ na fini kpu na kpu na yâ ti paradis na ndö ti sese so Nzapa amû zendo ni so? Nyen la e lingbi ti sara ti wara aye ti nzoni so? Na yâ ti ambage so e yeke gue ti bâ na yâ ti mbeti so, a yeke aidé ande mo ti wara akiringo tënë na ahunda so.