Mo hunda terê ti mo awe wala kekereke ti mo nga na ti afami ti mo ayeke duti ande tongana nyen? Eskê mo yeke ga ande zo ti mosoro wala wayere? Mo yeke duti ande na ngia wala na vundu? Mo yeke te gigi wala mo yeke kui ande gï gbagburu tongaso? Depuis la azo ayeke hunda terê ti ala na mara ti ahunda tongaso.

Laso, awandara ayeke bâ aye so ayeke si na yâ ti dunia na ala yeke tara ti fa ambeni ye so ayeke si kekereke. Même si mingi ti ambeni ye so ala fa asi biani, ambeni asi ape, ti ambeni ala fâ tâ kamba ngangu na yâ ti tënë ti ala ni. Na tapande na ngu 1912, Guglielmo Marconi, so asigi na mbeni télégraphe sans fil, atene: “Bira ayeke hunzi ande tongana e si na mbeni ngoi so azo akomanse ti sara kua mingi na communication sans fil.” Nga, na ngu 1962, mbeni kota zo ti mbeni ndokua ti sigingo na abia (Decca Record Company) ake ti sigi na abia ti groupe Beatles ndali ti so lo pensé so azo ayeke ngbâ ande ti ye groupe ni so ape.

Mingi ti azo atourné na mbage ti aye so andu aye ti ndima ti gi ti hinga aye so ayeke si kekereke. Ambeni ayeke hunda wango na azo ti gingo nda ti aye na lege ti atongoro. A yeke zia ka na yâ ti ambeti nga na ambeti-sango ye so a iri ni horoscope. Ambeni ayeke bâ azo ti bango mbadi, so atene ala yeke na ngangu ti “diko” aye so ayeke si kekereke na lege ti acarte, anuméro wala aligne ti yâ ti maboko ti zo.

Ândö, ambeni zo ayeke sara kue ti gi ti hinga aye so ayeke si kekereke. Ala yeke hunda ambeni prêtre so atene ala yeke sara kua na iri ti ambeni nzapa. Na tapande, a tene so Gbia Crésus ti kodro so a iri ni lani Lydie atokua acadeau ti ngangu ngere na prêtre ti Delphes, na Grèce, ti hunda lo wala tongana lo gue ti sara bira na Cyrus so ayeke Gbia ti Perse, zo wa la ayeke sö benda na pekoni. Prêtre ni atene so tongana Crésus ague atiri bira na Cyrus, “mbeni kota kodro-togbia” ayeke tï. Crésus ague atiri bira ni lo pensé so lo yeke sö benda, me kota kodro-togbia ni so atï lani so ayeke gï ti ti lo wani.

Tënë ti prêtre ni ayeke mbeni senge senge tënë ndali ti so zo apeut ti comprendre ni na afason nde nde. Na bango ni a peut ti pensé so lo tene tâ tënë, atâa zo wa la asö benda na yâ ti bira ni. Crésus aperdre ye kue ndali ti tënë ti handa so a tene na lo so. Ka ti azo so laso ayeke gi ti hinga ye so ayeke si kekereke na lege ti akode so azo ahinga ni mingi so, mara ti ye ni so arisqué ti si na ala ape?