TONGANA mbeni zo so mo ye lo akui, mo kue vundu ayeke sara mo, mo bâ so mo yeke gï mo oko nga mo hinga ye ti sara ape. Peut-être ngonzo asara mo, mo bi tënë ni na li ti mo nga mbeto asara mo. Mo peut même ti pensé wala a yeke bien ti ngbâ na fini.

Hinga so a yeke sioni ape ti sara vundu, même si vundu ni aninga. A ye ti fa so mo ye zo ni mingi. Me eskê lege ayeke dä ti wara dengo bê kete na yâ ti vundu ti mo ni?

Atâa so peut-être na lê ti mo vundu ti mo ni ayeke hunzi ape, awango so ge alingbi ti dë bê ti mo:

KANGA VUNDU TI MO NI APE

Fason ti sarango vundu ti azo ayeke legeoko ape, nga temps so ala yeke mû ti sara na vundu ayeke nde nde. Me, tongana zo atoto, bê ti lo ayeke dë kamême kete. Vanessa, so e sara tënë ti lo fade, atene: “Mbi ye lani gï ti toto; mbi ye si vundu so ayeke na bê ti mbi so asigi.” Sofía, so ita ti lo ti wali akui tâ gï tongaso, atene: “Tongana mbi pensé na ye so asi so, a son mbi sioni; a yeke mo bâ mo tene mbeni kä so a zi lê ni si a yeke sukula ni ti soigné ni. A son ngangu, me a yeke sara si kä ni amü.”

FA ATËNË TI BÊ TI MO NA MBENI ZO

A yeke sioni ape si na ambeni temps mo ye ti duti  gï mo oko. Me vundu ayeke tongana mbeni nengo kungba so zo ayô. Jared, mbeni molenge-koli ti ngu bale-oko na mbasambala, so aperdre babâ ti lo atene: “Mbi fa lani avundu ti bê ti mbi na ambeni zo. Peut-être mbi tene lani atënë ni nzoni kue ape, me a nzere na mbi ti fa atënë ti bê ti mbi.” Janice, so e sara tënë ti lo fade, atene nga atene: “So mbi sara lani tënë na ambeni zo, bê ti mbi adë. Mbi bâ so azo acomprendre mbi, na so mbi yeke mbi oko ape.”

YEDA TI TENE A AIDÉ MO

Mbeni wanganga atene so mingi ni tongana azo so aperdre mbeni zo ti ala ayeda si akamarade nga na afami a-aidé ala hio, a yeke sara si a yeke duti ande ngangu na ala ape ti kanga bê na yâ vundu ti ala ni nga ti hon ndö ni. Tongaso, fa na akamarade ti mo aye so ala peut ti sara ti aidé mo; ala ye peut-être ti aidé mo, me ala hinga pëpe tongana nyen ti sara ni.​—aProverbe 17:17.

GA NDURU NA NZAPA

Tina atene: “Na temps so koli ti mbi akui tâ gï tongaso na kobela ti cancer, mbi bâ so mbi peut ti fa atënë ti bê ti mbi na lo encore ape, tongaso mbi zi tâ bê ti mbi kue na Nzapa! Lango oko oko, mbi yeke hunda lani na Lo ti aidé mbi ti kanga bê. Nzapa a-aidé lani mbi na alege mingi so mbi peut ti fa kue ape.” Tarsha, so aperdre mama ti lo na temps so lo yeke na ngu 22, atene: “So mbi diko lani Bible lâ oko oko adë bê ti mbi mingi. Na yâ ni, mbi wara apendere tënë so mbi peut ti gbu li dä.”

IMAGINÉ NGOI SO ZO NI AYEKE ZINGO ANDE

Tina atene: “Na début ni, beku ti zingongo ti akuâ so Bible afa adë bê ti mbi ape, ndali ti so mbi bezoin koli ti mbi, nga amolenge ti mbi abezoin babâ ti ala. Me, ngu osio fadeso na pekoni, tënë ti beku ni so agbu tâ bê ti mbi ngangu. A aidé mbi mingi. Mbi imaginé tongana nyen la mbi yeke kiri ti bâ lo ande, ye so asara si mbi yeke na siriri ti bê nga na ngia!”

Peut-être a yeke duti gï na lê ni lê ni la mo yeke wara dengo bê ape. Me, ye so asi na Vanessa apeut ti dë bê ti mo. Lo tene: “Mbi pensé lani so mbi peut lâ oko ande ti sentir terê ti mbi nzoni ape, me yeke yeke na pekoni vundu so asara mbi adiminué.”

Grisa ape, gigi apeut ti nzere na mo, même si mo yeke ngbâ ande lakue ti rappelé na zo ti mo ni. Grâce na mungo maboko ti Nzapa so aye e mingi, mo peut ti wara akamarade so akpengba mo, nga mo peut ti hinga ndani so mo yeke na fini. Nga na yâ ti kete ngoi, Nzapa ayeke zingo ande akuâ. Lo ye si mo wara ande lege ti gbu zo ti mo ni na kate. Na pekoni, vundu so ayeke na bê ti mo so ayeke hon biani biani!