Tâ tënë na ndö ti Nzapa nga na Christ

JOUÉ NI

Atâa so azo avoro anzapa mingi, tâ Nzapa ayeke gï oko (Jean 17:3). Lo yeke “Nzapa so ayeke na nduzu na ndö ti aye kue,” Zo so asara aye kue nga lo la aye kue so ayeke na fini alondo na lo. Gï lo oko la lo lingbi ti tene e voro lo.—Daniel 7:18; Apocalypse 4:11.

Nzapa ayeke zo wa?

Iri ti Nzapa asigi na yâ ti angbene mbeti ti Bible FANI 7 000 TONGASO

JÉHOVAH ayeke iri ti Nzapa

SEIGNEUR, NZAPA, BABÂ: Ambeni iri ti Jéhovah

Iri ti Nzapa ayeke nyen? Nzapa lo wani lo tene: “Mbi yeke Jéhovah. So ayeke iri ti mbi la.” (Ésaïe 42:8). Tâ iri ti Nzapa asigi fani 7 000 tongaso na yâ ti Bible. Ye oko, mingi ti atraduction ti Bible azi iri ti Nzapa ni so na ala zia mbeni iri nde na place ni, na tapande “Seigneur”. Me Nzapa aye si e duti akamarade ti lo, ni la lo hunda na e ti “di iri ti lo.”—Psaume 105:1.

Ambeni iri so a mû na Jéhovah. Na yâ ti Bible, a iri Jéhovah na ambeni iri tongana “Nzapa,” “Lo so ngangu ti lo ahon angangu kue,” “Wasarango ye,” “Babâ,” nga “Seigneur.” Na yâ ti mingi ti asambela so ayeke na yâ ti Bible, a iri Jéhovah na vrai iri ti lo nga na ambeni iri ti lo ni kue.—Daniel 9:4.

Nzapa ayeke tongana nyen? Nzapa ayeke mbeni yingo (Jean 4:24). Bible afa so “mbeni zo ade abâ Nzapa pëpe.” (Jean 1:18). A fa nga so azo apeut ti zia vundu na bê ti lo, wala ala peut ti ‘sara ye [so] anzere na lo.’—aProverbe 27:11; Psaume 78:40, 41.

Apendere sarango ye ti Nzapa. Nzapa ayeke sara kangbi pëpe na popo ti azo, atâa mara ti ala wala dutingo ti ala ayeke so wa (Kusala 10:34, 35). Nga lo sara ‘nzoni bê na zo nga lo bâ mawa ti zo, lo sara ngonzo hio hio pëpe, lo si singo na tâ ndoye nga na tâ tënë.’ (Exode 34:6, 7). Me, ambeni sarango ye ti Nzapa osio la andu bê mingi.

Ngangu. So lo yeke “Nzapa so ngangu ti lo ahon angangu kue,” lo yeke na ngangu so katikati ni ayeke dä ape; lo peut ti sara ye kue so lo mû zendo ni.—Genèse 17:1.

Ndara. Ndara so Nzapa ayeke na ni ahon ndara ti azo kue. A yeke ye so Bible aye ti tene la tongana lo tene so “gï lo oko ayeke zo ti ndara.”—aRomain 16:27.

Mbilimbili. Nzapa ayeke sara ye lakue na lege ni. Aye kue so lo sara ayeke “mbilimbili-kue,” nga lo “sara ye ti kirikiri lâ oko ape.”—Deutéronome 32:4.

Ndoye. Bible atene so “Nzapa ayeke ndoye.” (1 Jean 4:8). Nzapa ayeke sara gï ye na ndoye ape, me lo wani lo yeke ndoye. Kota ndoye so lo yeke na ni la ayeke na gunda ti aye kue so lo sara, na e wara aye ti nzoni mingi grâce na ni.

Songo ti Nzapa na azo. Nzapa ayeke Babâ ti e so ayeke na yayu (Matthieu 6:9). Tongana e mä na bê na lo, e peut ti ga akamarade ti lo (Psaume 25:14). Ni la, Nzapa atisa e ti ga nduru na lo na yâ ti sambela nga ti “mû agingo bê ti [e] kue [ti] bi ni na ndö ti lo, ngbanga ti so lo yeke bi bê ti lo na ndö ti [e].”—1 Pierre 5:7; Jacques 4:8.

Kangbi wa la ayeke na popo ti Nzapa na Christ?

Jésus la ayeke Nzapa ape. Jésus ayeke nde mingi; gï lo oko la Nzapa wani asara lo na maboko ti lo. Ndani la Bible airi lo Molenge ti Nzapa (Jean 1:14). Na peko ti so Nzapa asara Jésus, lo sara kua na kozo molenge ti lo so tongana “mbeni wakode-kua” ti créé tanga ti aye kue nga na tanga ti azo kue.—aProverbe 8:30, 31; aColossien 1:15, 16.

Jésus atene lâ oko ape so ni yeke Nzapa. Me, lo tene: “Mbi yeke zo so aga na iri ti [Nzapa], na a yeke Lo si atokua mbi.” (Jean 7:29). Na temps so lo yeke sara tënë na mbeni oko ti adisciple ti lo, lo iri Jéhovah “Babâ ti mbi nga Babâ ti ala, na Nzapa ti mbi nga Nzapa ti ala.” (Jean 20:17). Na peko ti so Jésus akui lani, Jéhovah azingo lo ti wara fini na yayu na lo mû na Jésus kota komandema nga lo zia lo na mbage ti maboko ti Lo ti koli.—Matthieu 28:18; Kusala 2:32, 33.

Jésus Christ apeut ti aidé e ti ga nduru na Nzapa

Jésus aga lani na sese ti fa ye na e na ndö ti Babâ ti lo. Jéhovah wani atene na ndö ti Jésus atene: “So ayeke Molenge ti mbi, lo so mbi ndoye lo mingi. Ala mä lo.” (Marc 9:7). Jésus ahinga Nzapa nzoni mingi ahon azo kue. Lo tene: “Mbeni zo ti hinga Babâ ni ayeke pëpe, gï Molenge ni nga na zo kue so Molenge ni aye ti fa Babâ ni na lo.”—Luc 10:22.

Jésus amû tapande ti asarango ye ti Nzapa tâ mbilimbili. Jésus ayeke sara ye lani tâ gï tongana Babâ ti lo, ni la lo tene: “Zo so abâ mbi abâ nga Babâ awe.” (Jean 14:9). Jésus agboto azo na mbage ti Nzapa na lege so lo sara tënë nga lo sara ye na ndoye tongana ti Babâ ti lo. Lo tene: “Mbi yeke lege ni, tâ tënë na fini. Zo oko alingbi ti ga na Babâ na mbeni lege nde pëpe, gï na lege ti mbi.” (Jean 14:6). Lo kiri lo tene: “Atâ zo ti vorongo Nzapa ayeke voro Babâ na yingo nga na tâ tënë, ndali ti so, biani, Babâ ni ayeke gi mara ti azo tongaso ti voro lo.” (Jean 4:23). Bâ ye so si! Jéhovah ayeke gi azo tongana mo so, so aye ti hinga tâ tënë na ndö ti lo.