“Ye kue so ala hunda na Babâ, lo yeke mû ni na ala na iri ti mbi.”​—Jean 16:23.

Atënë ti Jésus so afa polele so Jéhovah aye si e sambela lo, na lege ti a-image ape, asaint ape, a-ange ape, akotara ape me na iri ti Jésus Christ. Tongana e sambela Nzapa na iri ti Jésus, e yeke fa so e hinga so Nzapa ayeke mä asambela ti e ndali ti ye so Jésus asara ndali ti e. Jésus atene: “Zo oko alingbi ti ga na Babâ na mbeni lege nde pëpe, gï na lege ti mbi.”—Jean 14:6.

“Ala zi bê ti ala kue na lo.”​—Psaume 62:8.

Tongana e yeke sambela Jéhovah, e doit ti sara tënë na lo tongana ti so e yeke tene tënë na mbeni babâ ti ndoye. A hon ti diko gï atënë so ayeke na yâ ti mbeni mbeti wala e tene asambela so e bata na li, e doit ti sara tënë na lo na nengo lo nga atënë ni adoit ti londo na bê.

“Atâa ye wa la e hunda, tongana a gue oko na ye so bê ti lo aye, lo yeke mä e.”​—1 Jean 5:14.

Na yâ ti Bible, Jéhovah Nzapa afa na e ye so lo yeke sara ande ndali ti e nga ye so lo ye ti tene e sara na lo. Nzapa ayeke yeda na asambela ti e “tongana a gue oko na ye so bê ti lo aye”. Ti sara ni, a lingbi e manda Bible tongaso si e hinga lo nzoni. Tongana e sara ni, asambela ti e ayeke nzere ande na lo.

Sambela ndali ti abezoin ti mo. E peut ti sambela Nzapa ndali ti abezoin ti e ti lango oko oko, so ti tene ti wara kobe, bongo nga na ndo ti lango. E peut nga ti sambela lo ti mû na e ndara ti mû anzoni desizion, nga ti mû na e ngangu ti hon ndö ti akpale ti e. E peut ti sambela ti tene lo mû na e mabe, lo pardonné e nga lo aidé e.​—Luc 11:3, 4, 13; Jacques 1:5, 17.

Sambela ndali ti amba ti mo. Ababâ na amama ayeke ye amolenge ti ala mingi tongana amolenge ni aye terê na popo ti ala. E yeke amolenge ti Jéhovah, na lo ye si e pensé na amba ti e nga e bâ lege ti ala. A yeke na lege ni ti sambela ndali ti koli wala wali ti e, amolenge ti e, sewa ti e, nga ndali ti akamarade ti e. Disciple Jacques atene: “Ala sambela ndali ti amba ti ala.”​—Jacques 5:16.

Kiri merci na Nzapa. Nzapa la acréé e, na Bible atene: “Na lege ti anzoni ye so lo sara na mungo na ala ngu-nzapa so alondo na nduzu, angoi so alê ti kobe ayeke lë dä mingi nga na akobe mingi mingi na lo sara si ngia asi bê ti ala.” (Kusala 14:17). Tongana e gbu li ti e na ndö ti aye kue so Nzapa asara ndali ti e, a yeke pusu ande e ti sambela lo ti kiri merci na lo. Na mbage, e doit ti fa so e kiri merci na Nzapa na lege so e yeke mä yanga ti lo.​—aColossien 3:15.

Na ambeni ngoi, mawa apeut ti sara e ndali ti so Nzapa akiri tënë hio pëpe na asambela ti e so e tene ni na lo na bê ti e kue. Eskê a ye ti tene so Nzapa ayeke pensé na e ape? Ên-ën. Zia e bâ ambeni ye so asi na ambeni zo so afa so alingbi e zia ti sambela ape.

Stève, so e sara tënë ti lo fade atene: “Tongana lani mbi ngbâ ti sambela ape, andâ lâ oko mbi yeke kiri ti duti na ngia ape.” Nyen la asara si lo duti na ngia? Lo manda Bible nga lo manda so a yeke kota ye ti ngbâ ti sambela. Lo tene: “Mbi sambela Nzapa ti kiri merci na lo ndali ti amungo maboko kue so mbi wara na mbage ti akamarade ti mbi. Mbi yeke na ngia fadeso mingi.”

Ka ti Jenny? Lo tene: “Na angoi so lani mbi bâ so mbi yeke ye oko ape, mbi toto na Nzapa ti aidé mbi ti comprendre ndani so mbi bâ terê ti mbi tongaso.” Eskê ye ni so a-aidé lo? Lo tene: “Sambela a-aidé mbi ti duti na nzoni pensé na ndö ti mbi wani nga ti bâ so atâa so bê ti mbi afâ ngbanga na ndö ti mbi, Nzapa afâ ngbanga na ndö ti mbi ape. A sara si mbi ti découragé ape.” Nyen la asi na pekoni? Lo tene: “Sambela a-aidé mbi ti bâ so Jéhovah ayeke dä biani, lo yeke na ndoye, lo yeke bâ lege ti zo, lo yeke mbeni nzoni Babâ, mbeni Kamarade so ayeke aidé mbi lakue na ngoi so mbi yeke sara kue ti sara ye so bê ti lo aye.”

Bâ nga ye so asi na Isabel. Na temps so lo yeke lani na ngo, adocteur atene na lo so lo yeke dü ande mbeni molenge so mbage ti terê ti lo abuba. Tënë ni asara lo vundu mingi. Ambeni zo même atene na lo ti tuku ngo ni. Lo tene: “Vundu asara lani mbi ngangu mo bâ mo tene mbi ye ti kui kuingo.” Nyen lo sara? Lo tene: “Mbi sambela Nzapa fani mingi ti aidé mbi.” Na pekoni, lo dü molenge ti koli so iri ti lo ayeke Gérard, so mbage ti terê ti lo abuba. Eskê Isabel abâ so Nzapa akiri tënë na asambela ti lo? En! Na lege wa? Lo tene: “Molenge ti mbi ayeke fadeso na ngu 14, na lo yeke na ngia na yâ ti gigi ti lo atâa so mbage ti terê ti lo abuba. Lo la yeke kota cadeau so Nzapa amû na mbi. Tongana mbi bâ lo kpô, mbi bâ so Jéhovah akiri tënë na asambela ti mbi nzoni mingi.”

Apendere tënë tongaso asara si e pensé na tënë so mbeni zo ti sungo Psaume atene: “Jéhovah, mo yeke mä azo so abâ terê ti ala kete tongana ala hunda ye na mo. Mo yeke sara si bê ti ala awara ngangu nga mo yeke bi bê ti mo mingi na ala.” (Psaume 10:17). Atënë ni so apusu e ti ngbâ lakue ti sambela!

Na yâ ti Bible, e yeke wara gbâ ti asambela so Jésus atene. Mbeni sambela ni so azo ahinga ni mingi ayeke ti so lo fa ni na adisciple ti lo lani. Nyen la e peut ti manda dä?