Na ngu 1949, babâ ti mbi alondo na Allemagne ague asara kodoro na Australie. Lo gue lani ti gi kua na ando so ayeke bâ lege ti gbotongo amosoro ti gbe ti sese nga ti wâ ti dada, na lo gue lo sara kodoro na mbeni kete kodoro ti Victoria. Kâ, lo sara mariage na mama ti mbi, na ala dü mbi na ngu 1953.

Gi akete ngu na pekoni, aTémoin ti Jéhovah akomanse ti manda Bible na mama ti mbi. Ye so asara si afango ye ti Bible aga akozo ye so mbi ngbâ ti dabe ti mbi na ni na ngoi so mbi ngbâ kete. Me, babâ ti mbi aye tënë ti bungbi ti Nzapa kete ape. Lo komanse ti sara ye na mbage ti mama na ngangu, lo yeke zia mbeto na yâ ti lo nga mama ayeke sara mbeto ti lo mingi. Mama ti mbi angbâ ti manda Bible lani me na hondengo ni nga lo komanse ti ye afango ye ti Bible ni. Na ngoi so papa ahon, lo yeke fa na mbi nga na ngambe ti mbi ti wali ye so lo manda. Lo sara lani na e tënë ti mbeni paradis so ayeke duti ande na ndo ti sese nga lo fa so tongana e sara ye ague oko na afango ye ti Bible, e yeke duti na ngia mingi.—Psaume 37:10, 29; Ésaïe 48:17.

Na ngoi so mbi wara ngu 18, mbi bâ so a yeke nzoni mbi quitté yanga-da ngbanga ti sarango ye ti ngangu ti papa. Atâa so mbi mä na bê na ye so mama afa na mbi na yâ ti Bible, mbi bâ lani aye ni so na nene ni ape. Ni la, mbi sara ye alingbi na ni ape. Mbi komanse ti sara kua lani tongana zo ti lekengo wâ na mbeni place so ayeke gboto amosoro ti gbe ti sese dä. Na ngoi so mbi wara ngu 20, mbi sara mariage. Ngu ota na pekoni, e dü mbeni molenge-wali, na mbi kiri mbi gbu li ti mbi ti bâ nyen la ayeke kota ye na yâ ti gigi ti mbi. Mbi hinga lani so Bible alingbi ti mû maboko na sewa ti e, tongaso mbeni Témoin ti Jéhovah akomanse ti manda Bible na mbi. Me, wali ti mbi aye tënë ti ala ape. Tongana mbi gue na mbeni bungbi ti ala, lo hunda na mbi ti soro: ti zia ti manda Bible wala ti quitté sewa ni. Teti so mbi hinga ye ti sara ape, mbi sara ye alingbi na ye so lo hunda na mbi, na mbi zia ti bâ aTémoin ti Jéhovah ni. Me na pekoni, mbi regretté so mbi sara pëpe mbeni ye so mbi hinga so ayeke nzoni.

Mbeni lâ, mbeni mba ti mbi ti place ti kua afa na mbi mbeni film ti porno. Ye ni agboto lê ti mbi me nga asara mbi nzoni ape, na a sara lani si bê ti mbi afâ ngbanga na ndo ti mbi mingi. Tongana mbi dabe ti mbi na aye so mbi manda lani na yâ ti Bible, mbi pensé biani so Nzapa ayeke punir mbi. Me, teti so mbi yeke bâ lani asioni limon ni so mingi, bango ndo ti mbi na ndo ti porno achangé. Tongana angoi ayeke hon, mbi ga ngbâa ni.

 Teti angu 20, yeke yeke mbi komanse ti sara ye ague nde na aye so mama ti mbi atara lani ti fa na mbi. Sarango ye ti mbi ayeke fa lani aye so ayeke na yâ ti li ti mbi. Mbi yeke lani na sioni yanga, nga mbi ye ti tene abuba tënë mingi. Mbi komanse ti duti na mbeni sioni bango ndo na ndo ti tënë ti bungbingo ti koli na wali. Atâa so mbi yeke lani na wali na da, mbi yeke nga na ambeni wali na gigi. Ngonzo asara mbi na tere ti mbi wani. Mbi bâ so nengo ti mbi ayeke dä encore ape.

Na nda ni, mbi sara divorce, nga gigi ti mbi abuba kue. Mbi sambela Jéhovah na bê ti mbi kue. Mbi kiri mbi manda Bible atâa so a sara ngu bale-use la mbi zia lege ni. Na yâ ti angu ni so, babâ ti mbi akui nga mama ti mbi awara batême, lo ga Témoin ti Jéhovah.

Kota kangbi ayeke lani na popo ti sarango ye ti mbi na afango ye ti Bible so ayeke nzoni mingi. Me na ngoi ni lani, mbi ye ti wara siriri ti bê so Bible asara tënë ni. Mbi komanse ti zia lege ti sioni yanga nga ti changé sioni sarango ye ti mbi. Mbi décidé nga ti zia lege ti vie ti kirikiri, ti zia lege ti sarango ngia ti nginza, ti nyongo samba ahon ndo ni nga ti nzingo patron ti mbi.

Akamarade ti mbi agi li ti ala gbä na raison so apusu mbi ti sara mara ti akota changement so. Teti ngu ota, ala zia ape ti pusu mbi ti kiri na ngbene vie ti mbi. Tongana ala bâ gi so mbi sara ngonzo kete wala mbi tene mbeni buba tënë kete, ala dekongo na nzerengo tere, ala tene: “Ah, Joe so e hinga lo lani so la!” Atënë ni so ason tâ mbi! Fani mingi mbi sara vundu ndali ni.

Na place ti kua, aye ti porno ahon ndo ni mingi, atâa a yeke na téléphone, na ordinateur wala na afoto. Lakue, amba ti mbi ni ayeke tokua asioni foto na mba na ndo ti ordinateur, tongana ti so mbi yeke sara ni kozo. Mbi sara kue ti kpe ti tï na yâ ni, me ala leke na bê ti ala kue ti sara si mbi tï dä. Mbi gue na mbage ti zo so ayeke manda Bible na mbi si lo aidé mbi nga lo kpengba mbi. Lo duti lani kpô lo mä mbi na ngoi so mbi yeke fa tënë ti bê ti mbi. Na sarango kua na ambeni versê so alingbi na ni, lo fa na mbi tongana nyen ti hon ndo ti sioni nzara ti mbi ni, nga lo wa mbi ti gi mungo maboko ti Jéhovah na sambelango lakue.—Psaume 119:37.

Mbeni lâ, mbi hunda na azo so mbi na ala e yeke sara kua ti tene e sara mbeni bungbi. Tongana ala kue aga, mbi hunda ti tene a mû bière na ambeni use so ala wani afa so ala yeke angbâa ti samba. Atanga ni kue alondo ake, ala tene: “Mo peut ti sara tongaso ape! Akoli so ayeke sara ngangu mingi ti zia lege ti nyongo samba ahon ndo ni!” Mbi ngbâ mbi tene na ala: “En, na mbi kue mbi yeke sara tongaso.” Ngbene ye na ngoi ni so ti ga na ni, amba ti mbi ni aga ti hinga fadeso angangu so mbi yeke sara ti zia lege ti bango porno, na ala zia lege ti pusu mbi ti kiri na ngbene sarango ye ti mbi.

Tongana ngoi ayeke hon, nga grâce na mungo maboko ti Jéhovah, mbi zia lege ti bango porno. Na ngu 1999, mbi wara batême, mbi ga Témoin ti Jéhovah. Tere ti mbi anzere so a kiri a mû na mbi pasa ti duti na mbeni fini so anzere na mbi nga so mbi yeke na ngia na yâ ni.

Mbi hinga fadeso ngbanga ti nyen la Jéhovah ake aye so mbi ye ni lani mingi teti angu mingi so. Tongana Babâ ti ndoye, lo ye ti bata mbi na akpale so bango porno aga na ni. Aversê ti aProverbe 3:5, 6 ayeke biani tâ tënë! A tene: “Zia bê ti mo kue na L’Éternel, na zia bê ti mo na hingango ye ti mo mveni pëpe. Mo bi bê ti mo na Lo na lege ti mo kue, na fade Lo sara si lege ti mo aga mbilimbili.” Afango ye ti Bible ayeke bata zo na ayeke sara si aye so e yeke sara aga nzoni.—Psaume 1:1-3.

Ândö, ngonzo ayeke sara mbi na tere ti mbi wani, me fadeso mbi bâ so mbi ne na lê ti mbi wani nga mbi yeke na siriri ti bê. Gigi ti mbi ayeke nzoni nga mbi bâ so Jéhovah apardonné mbi nga lo yeke mû maboko na mbi. Na ngu 2000, mbi sara mariage na Karolin, mbeni pendere wali Chrétien so aye Jéhovah mingi tongana mbi. Yanga-da ti e ayeke mbeni ndo so siriri ayeke dä. E bâ so a yeke pasa la e yeke na ni ti duti na popo ti nzoni sewa ti aita ti e Chrétien, so ayeke na ndoye na yâ ti dunia kue.