“Mbeni trône ayeke na yayu, na mbeni zo aduti na ndo ti trône ni. Lo so aduti na ndo ti trône ni, tere ti lo akpa tênë so a iri ni jaspe nga mbeni tênë ti nginza mingi so ayeke bengba bengba; na mbeni kongö angoro tere ti trône ni si na bango ni kongö ni akpa mbeni tênë so a iri ni émeraude.”​—Apocalypse 4:2, 3.

“Sungo ye angoro Lo. Sungo ye so ayeke na tere ni kue akpa kongö so ayeke na yâ mbinda na lâ ni so ngu-nduzu apika. So ayeke ye so abâ tongana gloire ti L’Éternel.”​—Ézéchiel 1:27, 28.

Na yâ ti avision so, so a fa ni na bazengele Jean nga na prophète Ézéchiel, a fa gloire ti Jéhovah, Nzapa so ayeke na nduzu na ndo ti aye kue, na lege ti apendere ye so e lingbi ti bâ ni na yâ ti li ti e nzoni, na tapande, atênë ti ngangu ngere, mbeni kongö, wala arc-en-ciel, nga na pendere ti mbeni trône. Aye ni so afa na e so ndo so Jéhovah aduti dä ayeke tâ pendere mingi nga ayeke ndo so siriri ayeke dä.

Fason so a fa na gloire ti Nzapa so, a gue oko na tënë ti zo ti sungo Psaume, so a tene: “L’Éternel ayeke kota, na a lingbi azo asepela Lo mingi. A lingbi azo akpe mbeto ti Lo ahon anzapa kue. Biani, anzapa kue ti amara ayeke ayanda senge, me L’Éternel asara ayayu. Gloire na yango-iri ayeke na gbele Lo, ngangu na gloire ayeke na yâ Ndo ti Nzoni-kue ti Lo.”​—Psaume 96:4-6.

Atâa so Jéhovah ayeke Nzapa so ayeke na nduzu na ndo ti aye kue, lo tisa e ti ga nduru na lo na lege ti sambela nga lo dë bê ti e so lo yeke mä e (Psaume 65:3). Nzapa aye e nga lo yeke bata e, a sara si bazengele Jean atene tënë so na bê ti lo kue, lo tene: “Nzapa ayeke ndoye.”​—1 Jean 4:8.

“[Disciple] Étienne, so asi singo na yingo vulu, ayeke bâ ndo gi na yayu, na lê ti lo atï na ndo ti gloire ti Nzapa nga Jésus so ayeke luti na koti ti Nzapa, na lo tene: ‘Ala bâ, mbi bâ yayu azi na Molenge ti zo ayeke luti na koti ti Nzapa.’”​—Kusala 7:55, 56.

Ngoi kete kozo si Étienne awara vision ni so, akota zo ti nzapa ti aJuif, so lo ngbâ ti sara tënë na ala so, afâ Jésus. Vision ni so afa biani so Jésus ayeke na fini, a zingo lo na kuâ awe nga a mû nengo mingi na lo. Na ndo ti tënë so, bazengele Paul atene: “[Jéhovah azingo Jésus] na kuâ na Lo zia lo na mbage ti maboko ti Lo ti koli na yayu, na nduzu kâ na ndo ti ngorogbia kue, komandema kue, ngangu kue, na  ndo ti ala kue so akomande nga na ndo ti airi kue so a yeke di ni, gi na yâ ti aye ti ngoi so pëpe, me nga na yâ ti aye ti ngoi so ayeke ga.”​—aÉphésien 1:20, 21.

Na ndo ti so Bible afa kota ndo ti Jésus, a fa nga so legeoko tongana Jéhovah, lo yeke bi bê ti lo mingi na azo. Lani na ngoi ti kusala ti Jésus na sese ge, lo sava azo ti kobela, ala so mbage ti tere ti ala abuba nga lo zingo akuâ. Na lege ti fini ti lo so lo mû na sandaga, lo fa tâ kota ndoye ti lo teti Nzapa nga teti azo kue (aÉphésien 2:4, 5). So Jésus ayeke luti na tere ti Nzapa na mbage ti koli, lo yeke fadeso nduru awe ti sara kua na komandema ti lo, ti ga na gbâ ti aye ti nzoni na azo so amä yanga, so ayeke na ndo ti dunia kue.

“Mbi [prophète Daniel, mbi] bâ juska a zia trône nde nde na place ni, na Lo Ti Giriri [Jéhovah] aduti . . . [saki] mingi ti a[saki] mingi mingi asara na Lo, na [saki] bale-oko lege [saki] bale-oko aluti na gbele Lo.”​—Daniel 7:9, 10.

Na yâ ti vision ti yayu so, Daniel abâ pëpe gi mbeni ange oko, me gbâ ti a-ange. Bê ti lo adoit ti dö lani mingi na bango vision ni so! A-ange ayeke azo so tere ti ala ayeke ti yingo, ala hinga ndo nga ala yeke na ngangu. Na popo ti ala a yeke wara aséraphin na achérubin. Bible asara tënë ti a-ange ahon fani 250 tongaso.

A-ange ayeke pëpe angbene zo so ândö a leke ala na ndo ti sese ge. Nzapa acréé a-ange angu mingi kozo si lo créé azo. Na ngoi so a sara gere ti sese, a-ange ayeke lani dä ti bâ ni nga ti dekongo ti sepela Nzapa.​—Job 38:4-7.

Mbeni lege so a-ange be-ta-zo so ayeke sara na kua ti Nzapa ayeke so ala yeke sara kota kua so laso a yeke sara ni na ndo ti sese ge, so ayeke ti fa nzoni tënë ti Royaume ti Nzapa (Matthieu 24:14). A fa mungo mbage ti ala na kua ni so na yâ ti vision so bazengele Jean abâ ni lani, so lo tene: “Mbi bâ mbeni ange nde so ayeke huru kâ na lê ti nduzu, lo yeke na mbeni nzoni tene ti lakue lakue ti fa ni tongana nzoni sango na azo so asara kodoro na sese, na amara kue, akete mara kue, azo ti ayanga ti kodoro kue nga na azo ti kodoro kue.” (Apocalypse 14:6). Atâa so a-ange ni ayeke sara tënë na azo laso pëpe, tongana ti so ala sara ândö na ambeni ngoi, ala yeke aidé azo so ayeke fa nzoni tënë na fango lege na ala ti gue na mbage ti azo so ayeke na nzoni bê.

“Bira alondo na yayu: Michel [wala Jésus Christ] na a-ange ti lo atiri bira na sioni nyama so akpa ngbo so, na sioni nyama ni na a-ange ti lo nga atiri na ala, me sioni nyama ni asö benda pëpe, nga ndo angbâ mbeni pëpe ndali ti ala na yayu. Tongaso a bi kota sioni nyama so akpa ngbo so, ngbo ti giriri, lo so a iri lo Zabolo na Satan, lo so ayeke handa sese kue so azo ayeke dä; a bi lo na sese, na a bi nga a-ange ti lo ni legeoko na lo.”​—Apocalypse 12:7-9.

Na mbeni ngoi lani, siriri ayeke na yayu kâ ape. Gi na tongo nda ti mbaï ti azo, mbeni oko ti a-ange, so aye ti tene a voro lo, ake yanga ti Jéhovah, na lo ga Satan, so aye ti tene “Wato.” Ambeni ange nga kue amû peko ti lo na yâ ti kpengba-li ti lo ni na a iri ala asioni yingo. Teti so ala yeke sioni mingi, ala ke yanga ti Jéhovah ngangu nga ala handa mingi ti azo ti sara ye nde na fango lege so Jéhovah ayeke fa ni na ndoye.

Satan na asioni yingo ti lo ayeke tâ sioni mingi. Ala yeke awato ti azo nga ala kue ayeke mû mbage mingi na yâ ti pasi so azo ayeke bâ na ndo ti sese ge. Na tapande, Satan afâ lani akundu ti anyama nga na azo ti kua ti Job, so ayeke be-ta-zo na Nzapa. Na pekoni, lo fâ amolenge bale-oko ti Job na lege ti “kota pupu” so akungbi da so ala yeke na yâ ni. Na pekoni encore, Satan apika Job na mbeni “kä ti sioni mingi so asara sanzo, a komanse na gere ti lo juska li ti lo.”​—Job 1:7-19; 2:7.

A ga nduru awe ti futi Satan. Teti so a bi lo na sese ge awe, lo hinga so “lo yeke na ngoi mingi pëpe.” (Apocalypse 12:12). A fâ ngbanga ti kuâ na li ti Satan awe, na a yeke biani mbeni nzoni tënë!

“Mo [Jésus, mo] vo na mênë ti mo azo na Nzapa, azo ti kete mara kue, azo ti yanga ti kodoro kue, azo ti kodoro kue nga na azo ti amara kue, na mo sara si ala ga mbeni royaume na aprêtre ti Nzapa ti e, na ala yeke komande tongana agbia na ndo ti sese.”​—Apocalypse 5:9, 10.

Legeoko tongana ti so a zingo lani Jésus na kuâ na sese ge ti gue na yayu, a yeke zingo ande ambeni zo nga kue ti gue na yayu. Jésus atene na abazengele ti lo, so ayeke lani be-ta-zo na lo, lo tene: “Mbi yeke gue ti leke mbeni ndo ndali ti ala. Nga, . . . mbi yeke kiri ti ga na mbi yeke yamba ala na ndo ti mbi, si na ndo so mbi yeke dä ala nga ala lingbi ti duti dä.”​—Jean 14:2, 3.

Azo so ayeke gue ande na yayu ague kâ ndali ti mbeni kua. Ala na Jésus ayeke bungbi oko ti ga gouvernement  ti mbeni Royaume, so ayeke komande ande na ndo ti azo na ndo ti sese kue nga ala yeke ga na aye ti nzoni na azo ni. A yeke Royaume ni so la Jésus ahunda na adisciple ti lo ti sambela ndali ni, lo tene: “Babâ ti e so mo yeke na yayu, zia a sara si iri ti mo aga nzoni-kue. Zia royaume ti mo aga. Zia a sara ye so bê ti mo aye, na yayu legeoko nga na ndo ti sese.”​—Matthieu 6:9, 10.

“Mbi [bazengele Jean, mbi] mä mbeni go so asara tënë na kota go na so alondo na mbage ti trône ni, a tene: ‘Bâ, tente ti Nzapa ayeke na azo. . . . Lo yeke mbô ngu ti lê kue na lê ti ala, kuâ ayeke duti ande dä mbeni pëpe; mua, wala toto, wala pasi ayeke duti dä mbeni pëpe. Angbene ye ni ahon ti ala awe.’”​—Apocalypse 21:3, 4.

Vision ti prophétie so asara tënë ti ngoi so Royaume ti Nzapa, so na yâ ni a yeke wara Jésus nga na azo so a zingo ala na kuâ na sese ge ti gue na yayu kâ, ayeke futi ande komandema ti Satan nga ayeke sara si sese aga mbeni paradis. Aye so aga na pasi nga na vundu mingi na azo ayeke duti ande dä ape. Même kuâ kue ayeke duti ande dä ape.

Ka ti azo mingi mingi so akui, nga so a yeke zingo ala pëpe ti gue na yayu so, ayeke duti ande tongana nyen? Na yâ ti angoi so ayeke ga, a yeke kiri ande na ala na fini ti duti lakue lakue na yâ ti Paradis na ndo ti sese ge.​—Luc 23:43.