1. Nyen la apeut ti si na peko ti so mbeni zo asara mbeni kota siokpari?

 NA YÂ ti article so ahon, e bâ ye so bazengele Paul atene na congrégation ti Corinthe ti sara ti bâ tënë ti mbeni zo so asara mbeni kota siokpari. Zo ni achangé bê ti lo ape tongaso a zi lo na yâ ti congrégation. Me, tongana ti so versê so ayeke mama-tene ti article so afa, Nzapa apeut ti gue na mbeni zo so asara mbeni kota siokpari ti changé bê ti lo (aRom. 2:4). Tongana nyen la lo yeke sara kua na a-ancien ti mû maboko na mbeni zo ti changé bê ti lo?

2-3. Tongana e hinga so mbeni mba ti e Chrétien asara mbeni kota siokpari, a yeke nzoni e sara nyen? Ngbanga ti nyen?

² Tongana a-ancien ahinga ape so mbeni zo asara mbeni kota siokpari, ala peut ti aidé lo ape. Tongaso, nyen la a yeke nzoni e sara tongana e hinga so mbeni ita asara mbeni siokpari so apeut ti sara si a zi lo na yâ ti congrégation? A yeke nzoni e wa lo ti gue ti bâ a-ancien ti mû maboko na lo.—És. 1:18; Kus. 20:28; 1 Pi. 5:2.

³ Ka tongana lo ke ti sara tënë ni na a-ancien? E la e yeke gue ti bâ a-ancien tongaso si zo ni awara mungo maboko so lo bezoin ni. Tongana e sara tongaso, e fa so e ye ita ti e ni ndali ti so e hinga so a-ancien apeut ti aidé lo. Tongana lo ngbâ ti sara sioni ye ni, lo yeke buba songo ti lo na Jéhovah. Lo peut nga ti buba iri ti congrégation. Tongaso, so e ye Jéhovah nga na ita ti e, sân mbeto e yeke gue ti bâ a-ancien.—Ps. 27:14.

 LEGE SO A-ANCIEN AYEKE AIDÉ AZO SO ASARA AKOTA SIOKPARI

4. Nyen la a-ancien ayeke gi ti sara na ngoi so ala wara terê na mbeni zo so asara mbeni kota siokpari?

⁴ Tongana mbeni zo na yâ ti congrégation asara mbeni kota siokpari, bungbi ti a-ancien ayeke soro a-ancien ota na popo ti ala ti wara terê na zo ni. a Akoli so adoit ti bâ terê ti ala kete nga ti sara terê ti ala kete. Atâa so ala yeke gi ti aidé mbeni zo so asara siokpari ti changé bê ti lo, ala hinga so ala lingbi pëpe ti forcé mbeni zo ti changé (Deut. 30:19). A-ancien ahinga so a yeke pëpe azo kue la ayeke changé bê ti ala tongana ti Gbia David (2 Sam. 12:13). Ambeni zo so asara asioni ye apeut ti soro ti sara sanka ti awango ti Jéhovah (Gen. 4:​6-8). Atâa so kue, ye so a-ancien ayeke gi ayeke ti sara kue ti gue na mbeni zo so asara sioni ye ti changé bê ti lo. Amama-ndia wa la ayeke fa lege na ala na ngoi so ala wara terê na mbeni zo so asara siokpari?

5. Wango wa la a-ancien ayeke bata na li ti ala na ngoi so ala wara terê na mbeni zo so asara sioni ye? (2 Timothée 2:​24-26). (Bâ nga foto.)

⁵ A-ancien ayeke bâ zo so asara sioni ye tongana mbeni taba ti ngangu ngere so agirisa (Luc 15:​4, 6). Tongaso, na ngoi so ala wara terê na zo ni, ala yeke suku sukungo na lo ape nga ala yeke sara ye na lo na nzoni bê. A-ancien ayeke pensé ape so ye so ala doit ti sara ayeke gï ti hunda atënë nga ti hinga ye nzoni na ndö ti ye so asi. Me ala yeke sara ye tongana ti so a fa na 2 Timothée 2:​24-26. (Diko ni.) Na ngoi so a-ancien ayeke gi ti ndu bê ti zo so asara sioni ye, ala yeke ngbâ ti sara ye na ngangu ape nga na nzoni bê.

6. Nyen la a-ancien ayeke sara ti wara fango lege ti Jéhovah kozo ti wara terê na mbeni zo so asara sioni ye? (aRomain 2:4).

⁶ A-ancien ayeke mû ngoi ti gi fango lege ti Jéhovah. Ala yeke dabe ti ala na tënë ti Paul so, so lo tene: “Nzobe ti Nzapa ayeke gi ti gue na mo ti changé bê ti mo.” Tongaso, ala yeke gi ti sara ye tongana Jéhovah na yâ ti sarango ye ti ala na mbage ti wasiokpari ni. (Diko aRomain 2:4.) A-ancien adoit ti girisa ape so ala yeke kozoni kue aberger so Christ ayeke fa lege na ala (És. 11:​3, 4; Mat. 18:​18-20). Kozo ti tene komite ni awara terê na zo ni, ala yeke sambela nga ala yeke gbu li na ndö ti ye so ala yeke gi ti si dä so ayeke ti gue na zo ni ti changé bê ti lo. Ala yeke sara recherche na yâ ti Bible nga na yâ ti ambeti ti e nga ala yeke sambela ti tene Jéhovah aidé ala ti bâ yâ ti ye nzoni. Ala yeke gbu li na ndö ti dutingo ti zo ni so peut-être asara si lo wara  pensé so lo yeke na ni nga so ague na lo ti sara ye so lo sara.—aProv. 20:5.

7-8. Tongana nyen la a-ancien apeut ti mû tapande ti kangango bê ti Jéhovah na ngoi so ala wara terê na mbeni zo so asara siokpari?

⁷ A-ancien ayeke mû tapande ti kangango bê ti Jéhovah. Ala yeke dabe ti ala na fason so ândö Jéhovah asara ye na azo so asara siokpari. Na tapande, Jéhovah akanga bê lani na Caïn, lo fa na lo ye so ayeke si tongana lo changé ape nga so lo yeke sara tufa na ndö ti lo tongana lo mä yanga ti lo (Gen. 4:​6, 7). Jéhovah atokua lani prophète Nathan ti mû wango na David. Nathan asara kua na mbeni tapande so a-aidé David ti changé bê ti lo (2 Sam. 12:​1-7). Jéhovah ‘angbâ lani ti tokua’ aprophète ti lo “fani mingi” na azo ti Israël na ngoi so ala ke yanga ti lo (Jér. 7:​24, 25). Lo ku lani pëpe ti tene azo ti lo achangé bê ti ala awe si lo aidé ala. Me lo mû li ni ti voro yanga na ala ti changé bê ti ala.

⁸ A-ancien ayeke mû tapande ti Jéhovah na ngoi so ala yeke gi ti aidé azo so asara mbeni kota siokpari. Ala yeke sara ye na ala “na kangango bê kue ti ku” tongana ti so 2 Timothée 4:2 afa. Tongaso, a-ancien adoit lakue ti sara ye na ngangu ape nga ti kanga bê tongaso si ala aidé zo so asara siokpari ti sara ye na lege ni. Tongana bê ti mbeni ancien ason, zo ni apeut ti mä wango ti lo ape wala lo peut ti ke ti changé bê ti lo.

9-10. Tongana nyen la a-ancien apeut ti aidé zo so asara siokpari ti bâ so adesizion so lo mû awoko songo ti lo na Jéhovah nga asara si lo sara siokpari?

⁹ A-ancien ayeke gi ti hinga aye so ague na zo ni ti sara siokpari. Na tapande, eskê yeke yeke songo ti zo ni na Jéhovah awoko ndali ti so lo yeke manda ye wala lo yeke fa tënë tongana ti kozo ape? Eskê lo yeke sambela Jéhovah lakue ape wala lo yeke sambela gï tongaso? Eskê lo zia ti dö sese na asioni nzara ti bê ti lo? Eskê lo soro akamarade wala angia ti lo na lege ni ape? Akamarade wala angia so lo soro asara nyen na ndö ti bango ndo ti lo nga na anzara ti bê ti lo? Eskê lo hinga ye so adesizion so lo mû nga na aye so lo sara asara na ndö ti Babâ ti lo Jéhovah?

¹⁰ A-ancien apeut ti hunda na zo ni atënë so ayeke aidé lo ti gbu li na ndö ti aye so awoko songo ti lo na Jéhovah nga apusu lo ti sara siokpari (aProv. 20:5). A-ancien apeut nga ti sara kua na mbeni tapande ti aidé zo ni ti gbu li na ndö ti aye so lo sara nga ti bâ ndani so ayeke sioni, gï tongana ti so Nathan asara lani na David. Peut-être na ngoi ti kozo warango terê ti lo na a-ancien, lo yeke komanse ti regretté adesizion so lo mû nga na bango ndo so lo yeke na ni. Lo peut même ti changé bê ti lo.

11. Tongana nyen la Jésus asara ye lani na awasiokpari?

¹¹ A-ancien ayeke gi ti mû tapande ti Jésus. Jésus a-aidé lani Paul na lege so lo hunda lo na pendere hunda so: “Saul, Saul, mo yeke sara ye ti ngangu na mbi ngbanga ti nyen?” Na lege ti hunda so, Jésus a-aidé Paul ti hinga so ye so lo sara ayeke sioni (Kus. 9:​3-6). Jésus atene nga tënë so na ndö ti “wali Jézabel,” lo tene: “Mbi zia ngoi na lo ti tene lo changé bê ti lo.”—Apoc. 2:​20, 21.

12-13. Tongana nyen la a-ancien apeut ti zia ngoi na mbeni zo so asara siokpari ti changé bê ti lo? (Bâ nga foto.)

¹² Na mungo tapande ti Jésus, a-ancien ayeke tene hio ape so mbeni zo so asara siokpari ayeke changé bê ti lo ape. Ambeni zo apeut ti changé bê ti ala na ngoi ti kozo tingbingo terê ti ala na a-ancien, me ti ambeni zo ala bezoin gbâ ti ngoi. Tongaso, a-ancien apeut ti leke ti wara terê na zo so asara siokpari ni fani mingi. Peut-être na peko ti kozo tingbingo terê ni, wasiokpari ni ayeke komanse  ti gbu li nzoni na ndö ti atënë so a-ancien atene na lo. Lo peut ti sara terê ti lo kete nga lo hunda Jéhovah ti pardonné lo (Ps. 32:5; 38:18). Tongaso, na ngoi so a-ancien akiri awara terê na zo ni, bango ndo ti lo apeut ti duti nde na ti kozo.

¹³ A-ancien ayeke zia terê ti ala na place ti mbeni zo so asara siokpari nga ala yeke sara ye na lo na nzoni bê ti aidé lo ti changé bê ti lo. Ala yeke sambela Jéhovah ti sara tufa na ndö ti a-effort so ala sara nga ala yeke na beku so li ti ita ti ala ni ayeke kiri dä nga lo yeke changé bê ti lo.—2 Tim. 2:​25, 26.

14. Tongana mbeni zo so asara siokpari achangé bê ti lo, ti vrai ni, zo wa la a-aidé lo? E tene tongaso ngbanga ti nyen?

¹⁴ Tongana mbeni zo so asara siokpari achangé bê ti lo, a nzere na e mingi (Luc 15:​7, 10). Ti vrai ni, zo wa la a-aidé lo? Eskê a yeke a-ancien? Girisa ape tënë so Paul atene na ndö ti awasiokpari, lo tene: “Hinga ape Nzapa asara si ala changé bê ti ala.” (2 Tim. 2:25). Tongaso, a yeke Jéhovah la a-aidé zo ni ti changé bê ti lo, me a yeke mbeni zo ape. Paul afa anzoni ye so aga na peko ti so mbeni zo achangé bê ti lo. Zo ni apeut ti hinga tâ tënë nzoni ahon ti kozo, li ti lo akiri dä nga lo peut ti zi terê ti lo na yâ ti kûkû ti Satan.—2 Tim. 2:26.

15. Tongana nyen la a-ancien apeut ti ngbâ ti aidé mbeni zo so asara sioni ye so achangé bê ti lo?

¹⁵ Tongana mbeni zo achangé bê ti lo, a-ancien ayeke ngbâ ti sara vizite na lo ti aidé lo ti kpengba mabe ti lo nga ti aidé lo ti ngbâ ti dö sese na atara so Satan ayeke ga na ni na lo nga ti sara ye na lege ni (aHéb. 12:​12, 13). Ti vrai ni, a-ancien ayeke fa na mbeni zo ape anzene nzene ye na ndö ti siokpari so zo ni asara. Me nyen la peut-être aita ti congrégation abezoin ti hinga?

“SUKU NA ALA NA LÊ TI AZO KUE”

16. Ti gue oko na 1 Timothée 5:​20, “azo” wa la Paul atene a suku na zo na lê ti ala?

¹⁶ Diko 1 Timothée 5:20. Paul atene lani na Timothée, so ayeke mba ti lo ancien, ti  suku na ‘azo so angbâ na yâ ti siokpari’. Lo ye lani ti tene nyen la? Lo ye lani ti tene ape so a doit gï ti suku na azo ni na lê ti aita kue ti congrégation. Me lo ye lani ti sara tënë ti kete wungo ti azo so peut-être ahinga tënë ti siokpari ni. A peut ti duti azo so abâ ye ni na lê ti ala wala azo so zo so asara sioni ye ni asara tënë ni na ala. Gï azo so la a-ancien ayeke tene na ala so a kiri na zo ni na nzoni lege awe.

17. Tongana gbâ ti aita ti congrégation ahinga tënë ti mbeni kota siokpari so mbeni zo asara wala peut-être ala yeke hinga ande ni, tokua wa la a doit ti tene ni? Ngbanga ti nyen?

¹⁷ Na yâ ti ambeni ye, gbâ ti aita ti congrégation apeut ti hinga tënë ti mbeni kota siokpari so mbeni zo asara wala peut-être ala yeke hinga ande ni. Tongana a si tongaso, “azo” so a yeke suku na zo ni na lê ti ala ayeke duti aita kue ti congrégation. Tongaso, mbeni ancien ayeke tene tokua na congrégation atene a suku na zo ni. Ngbanga ti nyen? Paul akiri tënë, atene: “Si tanga ti azo ni nga asara mbeto” si ala sara siokpari ape.

18. Tongana mbeni maseka so awara batême awe so ade awara ngu 18 ape asara mbeni kota siokpari, nyen la a-ancien ayeke sara? (Bâ nga foto.)

¹⁸ Ka tongana mbeni maseka so awara batême awe so ade awara ngu 18 ape asara mbeni kota siokpari? Bungbi ti a-ancien ayeke leke ti tene a-ancien use awara terê na ita ni nga na babâ na mama ti lo so ayeke aChrétien. b A-ancien ni ayeke gi ti hinga aye so babâ na mama ni asara awe ti aidé molenge ti ala ti changé bê ti lo. Tongana molenge ni  amä wango ti babâ na mama ti lo nga lo changé bango ndo ti lo nga na sarango ye ti lo, a-ancien ni apeut ti mû desizion ti zia babâ na mama ni ti ngbâ ti aidé lo. A-ancien ahinga so Jéhovah amû na ababâ na amama kua ti kiri na amolenge ti ala na nzoni lege na ndoye (Deut. 6:​6, 7; aProv. 6:20; 22:6; aÉph. 6:​2-4). Na pekoni, na ambeni ngoi, a-ancien ayeke hunda babâ na mama ni ti bâ wala ala mû maboko biani na molenge ni. Me, ka tongana molenge ni angbâ ti sara sioni ye ni? Tongana a yeke tongaso, mbeni komite ti a-ancien ayeke wara terê na molenge ni nga na babâ na mama ti lo wala zo so ayeke bata lo.

“JÉHOVAH AYEKE TÂ NA NDOYE MINGI NGA LO YEKE SARA NZONI BÊ NA ZO”

19. Tongana nyen la a-ancien ayeke sara ngangu ti mû tapande ti Jéhovah na ngoi so ala wara terê na mbeni zo so asara mbeni kota siokpari?

¹⁹ Jéhovah ahunda na a-ancien ti bata congrégation si azo so ake ti bata acommandement ti lo asara sioni na ni ape (1 aCor. 5:7). Ala yeke sara nga kue ti aidé azo so asara siokpari ti changé bê ti ala. Na ngoi so ala yeke aidé mbeni zo, ala yeke ngbâ ti duti na beku so lo yeke changé. Ngbanga ti nyen? Ngbanga ti so ala ye ti sara ye tongana Jéhovah so ayeke “tâ na ndoye mingi nga lo yeke sara nzoni bê na zo.” (Jacq. 5:11). Bazengele Jean asara lani ye na aita ti lo na ndoye. Lo tene: “Amolenge ti mbi so mbi ndoye ala mingi, mbi yeke sû aye so na mbeti na ala si ala tï pëpe na yâ ti mbeni siokpari. Me, tongana a si so mbeni zo atï na yâ ti mbeni siokpari, e yeke na mbeni zo ti mungo maboko so ayeke na terê ti Babâ ni. A yeke Jésus Christ, zo ti mbilimbili.”—1 Jean 2:1.

20. Nyen la e yeke bâ na yâ ti ndangba article ti molongo ti a-article so?

²⁰ Mawa ni ayeke so a yeke si so mbeni Chrétien ake ti changé bê ti lo. Tongana a yeke tongaso, a doit ti zi lo na yâ ti congrégation. Nyen la a-ancien ayeke sara tongana ye tongaso asi? E yeke sara tënë na ndö ni na yâ ti ndangba article ti molongo ti a-article so.