1-2. (a) Siokpari ayeke nyen? Tongana nyen la e peut ti sö benda na ndö ni? (Bâ nga “Nda ti mbeni tënë.”) (b) Nyen la e yeke bâ na yâ ti article so nga na a-article kue so ayeke na yâ ti Tour ti Ba Ndo so? (Bâ nga “Mo so mo yeke diko mbeti so” na yâ ti Tour ti Ba Ndo so.)

 MO YE ti hinga tongana nyen la Jéhovah Nzapa aye e mingi? Mo peut ti hinga kiringo tënë ni tongana mo manda ye na ndö ti ye so lo sara ti zi mo na gbe ti siokpari na kuâ. Siokpari a ayeke mbeni sioni wato so mo peut ti sö benda na ndö ti lo na ngangu ti mo wani ape. E kue e yeke sara siokpari lâ na lâ, nga e yeke kui ndali ti so e yeke mbilimbili-kue ape (aRom. 5:12). Me mbeni nzoni tënë ayeke dä. Grâce na mungo maboko ti Jéhovah, e peut ti sö benda na ndö ti siokpari. Ti vrai ni, nyen na nyen e yeke sö benda.

² Jéhovah Nzapa a-aidé azo ti tiri na siokpari a sara ngu 6000 tongaso. Ngbanga ti nyen? Ngbanga ti so lo ye e. Jéhovah andoye azo ngbene ye na ngoi so lo créé ala. So lo ye e mingi, lo yeke sara aye mingi ti aidé e tongana e sara siokpari. Nzapa ahinga so siokpari ayeke ga na kuâ na lo ye ti tene e kui ape. Lo ye ti tene e ngbâ na fini lakue lakue (aRom.  6:23). Ye so lo ye ndali ti mo la. Na yâ ti article so, e yeke kiri tënë na ahunda ota: (1) Beku wa la Jéhovah amû na azo so siokpari ayeke na terê ti ala? (2) Nyen la azo so siokpari ayeke na terê ti ala, so Bible asara tënë ti ala, asara ti zia ngia na bê ti Jéhovah? (3) Nyen la Jésus asara ti zi azo na gbe ti siokpari na kuâ?

BEKU WA LA JÉHOVAH AMÛ NA AWASIOKPARI?

 3. Kozo babâ na mama ti e aga awasiokpari tongana nyen?

³ Na ngoi so Jéhovah acréé kozo koli na kozo wali, lo ye lani ti tene ala duti na ngia. Lo mû lani na ala mbeni pendere ndo na mbeni pendere kua nga lo sara si ala sara mariage so ayeke mbeni cadeau. Ala doit lani ti dü amolenge ti mû ndö ti sese kue nga ti sara si sese kue aga pendere Paradis tongana yaka ti Éden. Lo lu lani na ala gï mbeni ndia oko so akpengba ape. Lo gboto nga mê ti ala so tongana ala doro ndia so na mbana, ala yeke kui. E hinga ye so asi lani. Mbeni sioni ange so aye Nzapa nga na ala ape apusu ala ti ke yanga ti Nzapa. Adam na Ève asara ye so sioni ange so, Satan, aye. So ala sara confiance pëpe na Babâ ti ala so aye ala, ala sara siokpari. Tongana ti so e hinga, tënë so Jéhovah atene lani aga tâ tënë. Ti londo na lango ni so ti gue na ni, ala yeke ga mbakoro nga na nda ni, ala kui.—Gen. 1:​28, 29; 2:​8, 9, 16-18; 3:​1-6, 17-19, 24; 5:5.

 4. Ngbanga ti nyen la Jéhovah ake siokpari nga lo aidé e ti tiri na ni? (aRomain 8:​20, 21).

⁴ Jéhovah azia mbaï so na yâ ti Bible tongaso si e peut ti comprendre mbeni ye so ayeke kota mingi. A aidé e ti hinga ndani so lo ke siokpari mingi. Siokpari ayeke kangbi e na Babâ ti e nga ayeke gue na e na kuâ (És. 59:2). Ndani la Satan, sioni ange so aga na siokpari, aye ni mingi nga lo yeke gi ti maï ni. Tongaso, na ngoi so Adam na Ève asara siokpari, peut-être Satan apensé so lo buba yâ ti ye so Jéhovah aleke na bê ti lo ti sara ndali ti azo awe. Me lo comprendre ape so Jéhovah aye azo mingi. Nzapa achangé lâ oko ape ye so lo leke na bê ti lo ti sara ndali ti ahale ti Adam na Ève. Lo ye sewa ti azo mingi ni la hio lo mû beku na azo kue. (Diko aRomain 8:​20, 21.) Jéhovah ahinga so ambeni hale ti Adam ayeke soro ti ye lo nga ala yeke gi ti tene lo aidé ala ti tiri na siokpari. So lo yeke Babâ ti ala nga lo la lo créé ala, lo sara si lege ayeke dä ti tene ala ga nduru na lo nga ti tene lo zi ala na gbe ti siokpari na kuâ. Jéhovah ayeke sara aye so kue tongana nyen?

 5. Na ngoi wa la ti kozoni Jéhovah amû beku na awasiokpari? Fa ndani so mo tene tongaso. (Genèse 3:15).

⁵ Diko Genèse 3:15. Jéhovah amû lani beku na azo ti kozoni na ngoi so lo dë ngbanga na ndö ti Satan. Nzapa asara tënë ti mbeni “hale” so ayeke sö azo. Hale so ayeke neka li ti Satan nga lo yeke leke akpale kue so lo ga na ni na Éden (1 Jean 3:8). Me kozoni, Satan ayeke dë peko ti gere ti hale ni, wala lo yeke sara si lo kui. Ye so ayeke zia vundu mingi na bê ti Jéhovah. Me vundu so asara lo ayeke ga na ye ti nzoni ndali ti so a yeke zi gbâ ti azo na gbe ti siokpari na kuâ.

TONGANA NYEN LA AWASIOKPARI SO BIBLE ASARA TËNË TI ALA AZIA NGIA NA BÊ TI JÉHOVAH?

 6. Nyen la akoli so ayeke na mabe, na tapande Abel na Noé, asara ti ga nduru na Jéhovah?

⁶ Yeke yeke, Jéhovah afa polele tongana nyen la azo so siokpari ayeke na terê ti ala apeut ti ga nduru na lo. Abel, use molenge ti Adam na Ève, ayeke lani kozo zo so amä na bê na Jéhovah na peko ti kengo yanga na yaka ti Éden. So Abel aye Jéhovah, lo gi ti zia  ngia na bê ti Lo nga ti ga nduru na Lo, lo mû na Lo mbeni sandaga. Abel ayeke lani berger, tongaso lo mû ambeni kete taba ti lo, lo fâ ala nga lo mû ala na sandaga na Jéhovah. Jéhovah abâ ni lani tongana nyen? Lo ‘bâ Abel nga na sandaga ti lo na nzoni lê’. (Gen. 4:4). Jéhovah abâ lani na nzoni lê asandaga so azo so aye lo nga asara confiance na lo amû, na tapande Noé (Gen. 8:​20, 21). So Jéhovah ayeda na asandaga so afa so azo so siokpari ayeke na terê ti ala apeut ti zia ngia na bê ti lo nga ti ga nduru na lo. b

 7. Nyen la e manda na lege ti tapande ti Abraham so ayeke lani nduru ti mû molenge ti lo na sandaga?

⁷ Jéhovah ahunda lani na Abraham, mbeni koli so ayeke na kpengba mabe, ti sara mbeni ye so ayeke ngangu mingi: ti mû molenge ti lo Isaac na sandaga. A doit lani ti zia vundu mingi na bê ti Abraham. Me lo mä yanga ti Jéhovah. Na ngoi so Abraham aye ti fâ molenge ti lo, Nzapa akanga lege na lo. Tapande ti lo afa ye so Jéhovah ayeke sara ande. Jéhovah ayeke duti nduru ti mû Molenge ti lo so lo ye lo mingi na sandaga. Jéhovah aye azo mingi.—Gen. 22:​1-18.

 8. Nyen la e manda na lege ti asandaga ti anyama so Ndia ahunda lani? (Lévitique 4:​27-29; 17:11).

⁸ Na ngoi so Jéhovah amû Ndia ti lo na azo ti Israël, lo tene na ala ti mû anyama na sandaga ti tene a pardonné asiokpari ti ala. (Diko Lévitique 4:​27-29; 17:11.) Asandaga so aye ti sara tënë ti mbeni sandaga so ayeke kota mingi so ayeke zi azo na gbe ti siokpari biani biani. Nzapa atene na aprophète ti lo ti sû atënë na ndö ti hale so a mû zendo ti lo. Ala tene so lo yeke mbeni Molenge ti Nzapa so ayeke nde, so adoit ti bâ pasi nga a yeke fâ lo (És. 53:​1-12). Lo yeke duti tongana mbeni taba so a mû ni na sandaga. Imaginé ye so: Jéhovah aleke ti mû Molenge ti lo so lo ye lo mingi na sandaga ti zi azo, mo nga kue, na gbe ti siokpari na kuâ.

NYEN LA JÉSUS ASARA TI SÖ AZO?

 9. Jean Baptiste atene lani nyen na ndö ti Jésus? (aHébreu 9:22; 10:​1-4, 12).

⁹ Na ngu 29, Jean Baptiste abâ Jésus ti Nazareth na lo tene: “Ala bâ, so Kete taba ti Nzapa la, lo so azi siokpari ti dunia so!” (Jean 1:29). Atënë so afa so Jésus ayeke hale ni so a sara tënë ti lo aninga mingi awe. Lo yeke mû fini ti lo tongana sandaga. Na nda ni, hale ti Jéhovah so aga ti zi azo na gbe ti siokpari biani biani.—Diko aHébreu 9:22; 10:​1-4, 12.

10. Tongana nyen la Jésus afa so lo “ga ti iri” awasiokpari?

¹⁰ Jésus agi lani kozoni kue ti aidé azo so vundu asara ala ndali ti so ala yeke awasiokpari. Lo tisa ala ti mû peko ti lo. Lo hinga so vrai raison so ndali ni azo ayeke bâ pasi ayeke siokpari. Tongaso, lo gi mbilimbili ti aidé akoli na awali so abâ pasi ndali ti asiokpari so ala sara. Na yâ ti mbeni toli, lo tene: “Azo so ayeke na nzoni terê ayeke na bezoin ti wanganga pëpe, me gï azo ti kobela.” Lo kiri lo tene: “Mbi ga ti iri azo ti mbilimbili pëpe, me awasiokpari.” (Mat. 9:​12, 13). Na a yeke ye so Jésus asara la. Na ngoi so mbeni wali asukula gere ti lo na ngu ti lê ti lo, lo sara tënë na lo yeke nga lo pardonné asiokpari ti lo (Luc 7:​37-50). Lo fa akpengba tâ tënë na wali ti Samarie na yanga ti dû ti ngu, atâa so lo hinga so wali ni ayeke vivre na koli so ayeke ti lo ape (Jean 4:​7, 17-19, 25, 26). Nzapa amû même ngangu na Jésus ti zi kuâ, so aga na  peko ti siokpari. Lo sara ni tongana nyen? Jésus azingo azo na kuâ, akoli, awali nga na amolenge.—Mat. 11:5.

11. Ngbanga ti nyen la azo so siokpari ayeke na terê ti ala aye lani ti ga na terê ti Jésus?

¹¹ Li ti e akpe ape so azo so asara asioni ye aye lani ti ga na terê ti Jésus. Lo bâ lani mawa ti ala nga lo zia terê ti lo na place ti ala. Mbeto asara ala ape ti sara tënë na Jésus (Luc 15:​1, 2). Jésus agonda nga lani ala nga lo sara nzoni na ala ndali ti so ala fa so ala yeke na mabe na lo (Luc 19:​1-10). Sarango ye ti Jésus afa so Jéhovah ayeke sara nzoni bê mingi na zo (Jean 14:9). Atënë nga na sarango ye ti Jésus afa so Babâ ti lo, so abâ mawa ti zo nga asara nzoni bê na zo, aye azo na lo ye ti aidé azo kue ti sö benda na ndö ti siokpari. Jésus asara lani si awasiokpari aye ti changé sarango ye ti ala na ti mû peko ti lo.—Luc 5:​27, 28.

12. Jésus atene nyen na ndö ti fason so lo yeke kui na ni?

¹² Jésus ahinga lani so lo yeke mû fini ti lo na sandaga. Lo tene na adisciple ti lo fani mingi so a yeke kä lo nga a yeke fâ lo na ndö ti keke (Mat. 17:22; 20:​18, 19). Lo hinga so sandaga ti lo ayeke zi siokpari ti dunia so, tongana ti so Jean nga na aprophète atene lani. Jésus atene nga so na peko ti kuâ ti lo, lo yeke “gboto mara ti azo nde nde kue” na mbage ti lo (Jean 12:32). Azo so siokpari ayeke na terê ti ala apeut ti zia ngia na bê ti Jéhovah tongana ala yeda so Jésus ayeke  Seigneur ti ala nga ala gi ti sara ye tongana lo. Tongana ala sara ni, na nda ni a yeke “zi ala na gbe ti siokpari”. (aRom. 6:​14, 18, 22; Jean 8:32). Tongaso, sân mbeto Jésus ayeke lani nduru ti kui mbeni sioni kuâ.—Jean 10:​17, 18.

13. Jésus akui lani tongana nyen? Kuâ ti lo afa na e nyen na ndö ti Jéhovah Nzapa? (Bâ nga foto.)

¹³ A kä lani Jésus, a gbu lo, a zonga lo, a fâ ngbanga ti kuâ na li ti lo nga a sara même sioni na lo. Aturugu ague na lo na ndo so a yeke fâ lo dä nga a pika lo na pointe na ndö ti keke. Jésus agbu ngangu na yâ ti apasi so kue, me Jéhovah abâ pasi même ahon lo na ngoi so lo bâ Molenge ti lo ayeke gue ti kui. Jéhovah ayeke lani na ngangu ti zi Molenge ti lo na yâ ti pasi ni me lo sara ni ape. So Jéhovah aye Molenge ti lo mingi, ngbanga ti nyen la lo zia si lo bâ pasi nga lo kui? A yeke ngbanga ti so Jéhovah aye e. Jésus atene: “Nzapa andoye tâ azo ti dunia so mingi si lo mû gï oko Molenge ti lo si zo kue so amä na bê na lo, a lingbi ti futi lo pëpe, me lo yeke na fini ti lakue lakue.”—Jean 3:16.

14. Sandaga ti Jésus afa na mo nyen?

¹⁴ Sandaga ti Jésus ayeke kota ye so afa so Jéhovah aye mingi ahale ti Adam na Ève. A fa tongana nyen la Jéhovah aye mo mingi. Lo mû Molenge ti lo so lo ye lo mingi na sandaga nga Lo kanga bê na yâ ti vundu so asara lo ti zi mo na gbe ti siokpari na kuâ (1 Jean 4:​9, 10). Biani, lo ye ti aidé e oko oko kue ti tiri na siokpari nga ti sö benda na ndö ni.

15. Nyen la e doit ti sara ti bâ nzoni na lege ti sandaga so Jésus amû ti zi e, so ayeke cadeau so Nzapa amû na e?

¹⁵ Cadeau so Nzapa amû na e, so ayeke sandaga so oko Molenge ti lo amû ti zi e, amû lege na lo ti pardonné asiokpari ti e. Me ti tene Nzapa apardonné e, e doit ti sara mbeni ye. Nyen la e doit ti sara? Jean Baptiste nga na pekoni Jésus Christ lo wani afa na e ye so e doit ti sara. Ala tene: “Ala changé bê ti ala, ngbanga ti so Royaume ti yayu aga nduru awe.” (Mat. 3:​1, 2; 4:17). Tongaso, tongana e ye biani ti tiri na siokpari nga ti ga nduru na Babâ ti e so aye e, e doit ti changé bê ti e. Me e yeke changé bê ti e tongana nyen? Tongana e sara ni, tongana nyen la a yeke aidé e ti zia ngia na bê ti Jéhovah atâa so siokpari ayeke na terê ti e? Article ti peko ayeke kiri tënë na ahunda so.