Bazengele Paul atene na aChrétien ti Thessalonique, lo tene: “Tongana mbeni zo ake ti mä tënë ti e so ayeke na yâ ti mbeti so, ala zia lê ti ala na ndö ti lo nzoni.” (2 aThes. 3:14). Ândö, e tene so a sû tënë so ndali ti a-ancien. Tongana mbeni zo angbâ ti sara sanka ti amama-ndia ti Bible atâa so fani mingi a mû na lo wango, a-ancien apeut ti mû mbeni diskur ti gboto mê ti aita ti congrégation. Na pekoni, aita ayeke sara songo na lo gï na ngoi ti abungbi nga na fango tënë.

Me a hunda ti tene e changé fason so e mä na yâ ti tënë so. Fadeso, e comprendre so wango ti Paul so aye ti sara tënë ti desizion so Chrétien oko oko adoit ti mû alingbi na ambeni ye so asi. Tongaso, a-ancien abezoin ape ti mû mbeni diskur ti gboto mê ti aita na ndö ti mbeni zo. Ngbanga ti nyen la e sara changement so? Gbu li na ndö ti ye so Paul ayeke sara tënë ni na ngoi so lo mû lani wango so.

Paul atene so ambeni ita ti yâ ti congrégation “atambela kirikiri”. Ala yeke sara lani sanka ti wango ti Mbeti ti Nzapa so a mû na ala. Na ngoi ti mbeni vizite so lo sara lani kozo na ala, lo mû yanga, lo tene: “Tongana mbeni zo aye ti sara kua pëpe, zia lo te nga ye pëpe.” Me ambeni angbâ lani ti ke ti sara kua ti bâ lege ti ala wani, atâa so ala peut ti sara ni. Nga, ala yôro yanga ti ala na yâ ti atënë ti amba ti ala so abâ ala ape. A-Chrétien adoit ti sara ye tongana nyen na mbage ti mara ti azo tongaso?—2 aThes. 3:​6, 10-12.

Paul atene: “Ala zia lê ti ala na ndö ti lo nzoni.” Tënë ti Grec so lo sara kua na ni aye ti tene ti bâ zo ni nzoni si mo sara hange na lo. Paul amû wango so na congrégation ni kue, me gï na a-ancien ape (2 aThes. 1:1; 3:6). Tongaso, tongana mbeni Chrétien abâ so mbeni ita ayeke sara ye ague nde na wango ti Mbeti ti Nzapa, lo yeke soro ti “zia ti sara songo na” lo.

So aye ti tene a yeke sara ye na zo ni tongana ti so a yeke sara ye na mbeni zo so a zi lo na yâ ti congrégation? Ên-ën, ndali ti so Paul akiri atene: “Ala ngbâ ti gboto mê ti lo tongana mbeni ita.” Tongaso, Chrétien oko oko ayeke ngbâ ti sara songo na lo na ngoi ti abungbi nga na fango tënë, me lo yeke sara ngia legeoko na lo ape. Ngbanga ti nyen? Paul atene: “Tongaso si kamene asara lo.” Tongana e zia ti sara ngia na lo, kamene apeut ti sara lo ndali ti ye so lo yeke sara na lo peut ti changé.— 2 aThes. 3:​14, 15.

Tongana nyen la aChrétien apeut ti sara ye alingbi na wango so laso? Kozo ni, a yeke nzoni e duti sûr so ita ni ayeke sara mbeni ye ti “kirikiri” so Paul asara tënë ni. Paul ayeke sara lani pëpe tënë ti aita so conscience ti ala apeut ti pusu ala ti mû mbeni desizion nde na ti so e yeke mû me so ague oko na amama-ndia ti Bible. Lo ye nga pëpe ti sara tënë ti aita so aye so agbu bê ti ala ayeke nde na ti e. Lo yeke sara nga pëpe tënë ti aita so asara mbeni ye so ason bê ti e. Me Paul ayeke sara tënë ti aita so asoro ti ke na mbana wango so a mû na ala so alondo na yâ ti Mbeti ti Nzapa.

Laso, tongana e bâ so mbeni ita angbâ ti sara sanka ti awango so alondo na Bible, a e yeke mû desizion ti tene e na lo e bungbi ti sara ngia ape. So ayeke mbeni desizion so e oko oko e doit ti mû, e yeke sara lisoro na ndö ni gï na asewa ti e so e na ala e lango da oko. E yeke ngbâ ti sara songo na lo na ngoi ti abungbi nga na fango tënë. Tongana lo changé awe, e na lo e peut ti kiri ti bungbi ti sara ngia.