A dü mbi na ngu 1955, mbi la mbi yeke tanga ti amolenge ti koli ota. Mbi kono na yanga ti ngu na mbage ti sud ti Finlande, ndo so laso a hinga ni na gbata ti Vantaa.

Mama ti mbi awara lani batême na lo ga Témoin ti Jéhovah angu mingi ape kozo si lo dü mbi. Ye oko, babâ ti mbi aye lani tâ tënë ape nga lo mû lege ape na mama ti mbi ti fa ye na e amolenge ti lo wala ti gue na e na abungbi. Tongaso Mama ayeke fa na e akozo tâ tënë ti Bible na ngoi so babâ ti mbi ayeke dä ape.

Ngbene ye na kete ti mbi, mbi leke na bê ti mbi ti mä yanga ti Jéhovah. Na tapande, mbeni lâ, na ngoi so mbi yeke na ngu mbasambala, zo so ayeke fa mbeti na mbi asara ngonzo ngangu na terê ti mbi ndali ti so mbi ke ti te verilättyjä (gateau ti Finlande so a sara ni na mênë). Lo gbu ngbangba ti mbi, lo pete ni ti tene yanga ti mbi azi na lo gi ti pete gateau ni na fourchette ti tene alï na yanga ti mbi. Mbi wara lani lege ti pika fourchette ni na maboko ti lo, atï.

Na ngoi so mbi yeke na ngu 12, babâ ti mbi akui. Na pekoni, mbi peut ti gue na abungbi. Na nzoni bê aita ti congrégation afa so ala apensé na mbi na a-aidé mbi ti ga nduru mingi na Jéhovah. Mbi komanse ti diko Bible lâ na lâ nga ti manda ambeti ti e nzoni. So mbi sara tongaso amû lege na mbi ti wara batême na ngu 14 na lango 8 ti août ngu 1969.

 Kete na peko ti so mbi hunzi ekole, mbi komanse kua ti pionnier. A sara ayenga mingi ape, mbi gue ti fa tënë na ndo so a bezoin awafango tënë mingi dä na Pielavesi nduru na centre ti Finlande.

Na Pielavesi, mbi wara Sirkka molenge-wali so ayeke ga wali ti mbi so mbi ye lo mingi. Mbi ye lo biani ndali ti so lo sara terê ti lo kete nga lo ye Jéhovah mingi. Lo gi lani ti wara yango iri wala aye ti sese ape. E use kue e ye lani ti sara ye kue so e peut ti sara ti sara na Jéhovah nga e yeke lani nduru ti sara akua kue so a mû na e. E sara lani mariage na lango 23 ti mars ngu 1974. Ahon ti tene e gue na mbeni ndo ti wu terê na peko ti mariage ti e, e gue lani na Karttula, ndo so a bezoin awafango tënë ti Royaume mingi dä.

Na peko ti mariage ti e, Jéhovah afa na e so lo la lo yeke bâ lege ti abezoin ti e tongana e gi kozo ni Royaume ti lo (Mat. 6:33). Na tapande, na Karttula, e yeke lani na oto ape. Na tongo nda ni, e yeke voyagé lani na vélo. Ye oko, na ngoi ti dê, dê ayeke sara mingi. Ti fa tënë na yâ ti territoire ti congrégation ni so akono mingi, e bezoin lani oto. Me e yeke lani na nginza ti vo ni ape.

Sân ti tene e ku terê ti e na ni, yaya ti mbi ti koli aga ti bâ e. Na nzoni bê, lo mû na e oto ti lo. Lo futa lani assurance ni awe. Ye so angbâ na e ayeke ti vo essence dä. Na pekoni, e wara oto so e yeke lani na bezoin ni.

Jéhovah afa na e so lo sara kua ti lo so ayeke ti bâ lege ti abezoin ti e. Ti e ayeke lani ti zia aye ti Royaume kozo.

Na ngoi so e yeke sara lani Ekole ti apionnier na ngu 1978, Raimo Kuokkanen, a mbeni oko ti aita so ayeke fa ye na e, awa e ti sû demande ti gue na Ekole ti Galaad. Tongaso, e komanse lani ti manda Anglais ti mû lege na e ti gue. Ye oko, na ngu 1980, kozo si e sû demande ni, a tisa e ti sara kua na Béthel ti Finlande. Na ngoi ni so, a mû lani lege pëpe na aita so ayeke sara kua na Béthel ti sû demande ti Ekole ti Galaad. Me e ye lani ti sara kua ti Jéhovah na ndo so lo pensé ayeke nzoni, me pëpe na ndo so e la e pensé ayeke nzoni. Tongaso, e yeda na tisango ndo ni. Atâa so kue, e ngbâ lani ti manda Anglais, hinga ape mbeni lâ lege apeut ti zi na e ti sû demande ti ekole ti Galaad.

 A sara angu mingi ape na pekoni, Bebungbi amû lege na aita so ayeke sara kua na Béthel ti sû demande ti Ekole ti Galaad. Hio e sû demande ni, e sû ni pëpe ndali ti so e yeke na ngia na Béthel ape. A yeke tongaso ape. E ye lani ti duti nduru ti tene a sara kua na e na ndo so kota bezoin ayeke dä tongana e lingbi na ni. A yeda lani na demande ti e ni na e wara diplôme ti klase 79 ni na septembre 1985. A tokua e lani na Colombie.

Na Colombie, a tokua e kozo ni na Béthel. Mbi gi lani ti sara akua ti mbi nzoni, me ngu oko na pekoni, mbi bâ so e bezoin ti sara mbeni changement. Ti kozo ni na yâ ti gigi ti mbi ti tene mbi hunda ti tene a mû na mbi mbeni kua nde la, na tanga ni la. Tongaso, a tokua e ti sara kua ti missionnaire na gbata ti Neiva, na Huila.

Mbi ye ka kua ti fango tënë mingi. Na ngoi so mbi yeke lani pionnier si mbi yeke kumbamba na Finlande, na ambeni ngoi mbi yeke komanse ti fa tënë hio na ndapre juska l’heure ahon na lakui. So e sara mariage fini fini, mbi na Sirkka e yeke mû nga lani ngoi mingi ti fa tënë. Na ngoi so e yeke fa tënë na yâ ti aterritoire so ayo mingi, na ambeni ngoi, e yeke lango na yâ ti oto ti e. So e yeke lango na lege a-aidé e ti wara ngangu ti komanse mbeni fini lango.

So e yeke amissionnaire, e kiri e yapu na fango tënë tongana ti kozo. Congrégation ti e amaï, aita ti Colombie ayeke azo so ane zo, ala sara ye na ndoye nga ala kiri singila.

Akete gbata so aTémoin ayeke dä ape ayo ape na Neiva ndo so e yeke sara kua dä. Mbi yeke gi lani bê ti mbi mingi na ndö ti fason so nzoni tënë apeut ti si na ando ni so. Me ndali ti bira so ayeke na yâ ti agbata ni so ndo ni ayeke lani nzoni ape ndali ti azo so aga gango. Tongaso, mbi sambela lani ti tene mbeni zo ti yâ ti agbata so aga Témoin. Mbi pensé lani so mara ti zo tongaso adoit ti lango na Neiva si lo manda tâ tënë. Tongaso, mbi sambela nga lani ti tene na peko ti batême ti lo, lo ga biazo na lo kiri na kodro ti lo ti fa tënë. Mbi hinga lani so Jéhovah apeut ti sara ni na mbeni lege so ayeke tâ nzoni mingi.

Kete na pekoni, mbi komanse ti manda Bible na mbeni maseka-koli so iri ti lo ayeke Fernando González. Lo lango na Algeciras, mbeni oko ti akete gbata so Témoin oko ayeke dä ape so. Fernando ayeke sara akilomètre ahon 50 ti ga na Neiva ti sara kua. Lo yeke leke lani terê ti lo nzoni mingi ndali ti étude ti lo oko oko kue nga hio lo komanse ti ga na abungbi kue. A komanse na kozo yenga so Fernando akomanse ti manda na Bible, lo yeke bungbi azo ti gbata ti lo na lo yeke fa na ala aye so lo manda na yâ ti Bible.

Fernando awara lani batême na janvier 1990, nze omene na peko ti so lo komanse ti manda Bible. Na pekoni, lo ga pionnier permanent. So mbeni zo ti Algeciras aga Témoin, Béthel apeut fadeso ti tokua apionnier spécial kâ senge. Na février 1992, mbeni congrégation abâ gigi na yâ ti gbata ni.

Eskê Fernando ayeke fa lani tënë gï na yâ ti gbata ti lo awe? Ên-ën. Na peko ti so lo sara mariage, lo na wali ti lo ague na San Vicente del Caguán, mbeni gbata so Témoin oko ayeke dä ape. Kâ, ala sara si mbeni congrégation abâ gigi.  Na 2002, Fernando aga surveillant ti circonscription, lo na wali ti lo Olga angbâ ti sara kua ti guengo na ando nde nde juska laso.

Ye so asi so asara si mbi hinga so a yeke kota ye mingi ti sambela ndali ti ambilimbili ye so andu kua ti e. Jéhovah asara ye so e peut ti sara ape. Kozoni kue, kongo lê ti kobe ni ayeke ti lo, me ayeke ti e ape.—Mat. 9:38.

Na 1990 a mû na e kua ti guengo na ando nde nde. Kozo circonscription so a mû na e ayeke na Bogotá, li-kodro ni. Mbeto ti kua ni asara lani e. Mbi na wali ti mbi, e yeke asenge zo, e yeke na akota kode ape. E habitué ape na gbata so azo ayeke dä mingi. Me Jéhovah asara ye alingbi na zendo ti lo so ayeke na aPhilippien 2:13 so atene: “Nzapa la, a lingbi na ye so anzere na bê ti lo, asara si ala yapu, na lege so lo zia na yâ ti bê ti ala nzara ti sara ye nga na ngangu ti sara ye ni so.”

Na pekoni, a tokua e na mbeni circonscription so ayeke na Medellín, gbata so mbi sara tënë ni fade na tongo nda ni. Teti so a yeke sara ka aye ti ngangu na azo mingi na ndö ti lege kâ, a sara si asara mbeto encore ape na azo ti ndo ni. Na tapande, mbeni lâ na ngoi so mbi ngbâ ti manda Bible na mbeni zo na yâ ti da, azo akomanse ti pika ngombe na ndö ti mba na gigi. Mbi ye lani ti kuku na sese, me zo so mbi yeke manda Bible na lo angbâ ti diko mbeni paragraphe sân mbeto. Na ngoi so lo hunzi dikongo ni, lo tene pardon na lo sigi. Kete na pekoni, lo kiri, lo na akete molenge use na lo tene yeke: “Pardon, mbi doit fade ti gue ti mû amolenge ti mbi.”

Ambeni ngoi ayeke nga dä so fini ti e ayeke lani na yâ ti kpale. Mbeni lâ, na ngoi so e yeke fa tënë da na da, wali ti mbi akpe loro aga na mbage ti mbi, mbeto ahon ndö ti lo. Lo tene so mbeni zo apika ngombe na ndö ti lo. Li ti mbi akpe nga mbeto asara mbi. Me na pekoni, e ga ti bâ so koli ni aye lani ti pika ngombe na ndö ti Sirkka ape, me lo yeke pika lani ngombe na ndö ti mbeni koli so ayeke hon tâ gï na terê ti lo.

Tongana angoi ayeke hon, sarango ye ti ngangu na zo ni asara e mbeto mingi tongana ti kozo ape. Sarango ye ti aTémoin ti ndo ni so awara mara ti akpale so wala ati so ahon ti so, a kpengba e. Lakue e yeke sara ye alingbi na wango ti a-ancien ti ndo ni, e sara ye na hange nga e zia tanga ti aye ni na maboko ti Jéhovah.

Ti tâ tënë ni, ambeni kpale ni ayeke nga ngangu mingi tongana ti so e pensé fade ape. Mbeni lâ, na ngoi so mbi yeke sara vizite na mbeni zo, mbi mä mbeni ye mo bâ mo tene awali use la ayeke dekongo ayeke zonga mba na gigi. A nzere lani na mbi ape ti bâ azo so ayeke papa, me zo so mbi yeke sara vizite na lo atene e sigi e duti na gbe ti veranda. Ti vrai ni a yeke lani vrai “papa” ape azo use la ayeke haka peko ti papa ti avoizin ti ala.

Na ngu 1997, a soro mbi ti fa ye na Ekole ti formation ministérielle. b A yeke nzere ka na mbi mingi ti gue na a-ekole ti bungbi ti Jéhovah. Me  mbi pensé lâ oko ape so mbi yeke wara pasa ti fa ye na mbeni ekole ni.

Ambeni ngoi na pekoni, mbi ga surveillant ti district. Na ngoi so a zi kua ni so, mbi kiri na terê ti kua ti circonscription. Tongaso, ahon ngu 30 awe la mbi yeke fa ye na mbeni ekole ti bungbi ti Jéhovah nga mbi yeke surveillant so ayeke gue na ando nde nde. Akua so aga na mbi gbâ ti atufa. Me akpale ayeke nga lani dä. Zia mbi fa ni na ala.

Mbi yeke mbeni zo so mbi kpengba nga mbi sara confiance na mbi wani. Ye so a-aidé lani mbi na yâ ti angangu kpale. Me na ambeni ngoi mbi yeke sara ye ahon ndö ni na ngoi so mbi yeke gi ti leke akpale na yâ ti acongrégation. Mbeni lâ, mbi mû wango ngangu na ambeni ita ti sara ye na ndoye nga ti sara ye ahon ndö ni ape na amba ti ala. Me mbi pensé lani so a yeke na angoi ni so la mbi manke a-oko sarango ye ni so.—aRom. 7:​21-23.

Awokongo ti mbi asara si na ambeni ngoi mbi découragé ngangu (aRom. 7:24). Na mbeni ngoi, mbi tene lani na Jéhovah na yâ ti sambela so a yeke nzoni mbi zia kua ti missionnaire mbi kiri na Finlande. Na lakui ni so, mbi gue na mbeni bungbi ti congrégation. Atënë so mbi mä na ngoi ti bungbi ni apusu mbi ti bâ so a yeke nzoni ti ngbâ ti sara kua ti mbi ti missionnaire ni nga ti ngbâ ti sara ngangu ti hon ndö ti awokongo ti mbi. Na lango ni so, so mbi bâ tongana nyen la Jéhovah akiri tënë polele na sambela so, a ndu bê ti mbi mingi. Na ndö ni, mbi kiri singila mingi na lo so na nzoni bê lo mû maboko na mbi ti hon ndö ti awokongo ti mbi.

Mbi na Sirkka e kiri singila mingi na Jéhovah so lo mû lege na e ti sara kua ti ngoi kue na yâ ti kota mbage ti fini ti e. Mbi kiri nga singila mingi na Jéhovah so amû na mbi wali so asara ye na ndoye mingi nga so ayeke be-ta-zo na yâ ti angu so kue.

Mbi ga nduru ti wara ngu 70 awe na mbi yeke zia ande kua ti fango ye na ekole ti bungbi ti Jéhovah nga na kua ti surveillant so ayeke gue na ando nde nde. Me ye so asara mbi vundu ape. Ngbanga ti nyen? Ngbanga ti so mbi hinga biani so ye so amû gonda mingi na Jéhovah ayeke ti tene e sara na lo alingbi na ngangu ti e nga e gonda lo na bê so asi singo na ndoye nga na singila (Mi. 6:8; Marc 12:​32-34). Ti gonda Jéhovah, e bezoin ape ti sara mbeni kota kua.

Tongana mbi pensé na akua so mbi sara ândö, mbi bâ so a mû na mbi ni pëpe ndali ti so mbi yeke nzoni ahon amba ti mbi wala ndali ti so mbi yeke na akode so apika bê mingi. Me Jéhovah amû lani na mbi akua so ndali ti kota nzobe ti lo. Lo mû na mbi akua so atâa so mbi yeke na awokongo. Mbi hinga so mbi wara lani lege ti sara akua so gï grâce na mungo maboko ti Jéhovah. Tongaso, awokongo ti mbi asara si a bâ polele ngangu ti Nzapa.—2 aCor. 12:9.