1. Sarango lisoro na azo na fango tënë asara ambeni ita tongana nyen? (Bâ nga foto.)

 E AWAKUA ti Jéhovah e yeke fa tënë na azo ndali ti so e ye Babâ ti e ti yayu nga e ye ti aidé azo ti hinga lo. Awafango tënë mingi aye mingi ti fa tënë. Me a yeke ngangu na ambeni ti ye fango tënë. Ngbanga ti nyen? Ambeni ita ayeke kamene mingi nga ala yeke na confiance na ala wani ape. A sara ambeni ita nzoni ape ti gue na yanga-da ti azo sân ti tene azo ni atisa ala. Ambeni ita apeut ti sara mbeto ti tene azo asara ngonzo na terê ti ala. A fa na ambeni ita ti son bê ti azo ape. Atâa so aita so aye Jéhovah mingi, ala bâ so a yeke ngangu na ala ti fa nzoni tënë na azo so ala hinga ala ape. Me ala hinga so kua ti fango tënë ayeke kota kua mingi, na ala yeke sara ni lakue. Ala zia ngia mingi na bê ti Jéhovah.

2. Tongana a yeke ngangu na mo ti fa tënë na ngia, ngbanga ti nyen la a yeke nzoni mo découragé ape?

² Eskê na ambeni ngoi mara ti apensé so asara si mo yeke fa tënë na ngia ape? Tongana a yeke tongaso, découragé ape. Tongana mo yeke na confiance na mo wani ape, a fa so mo sara terê ti mo kete na mo ye ti gboto lê mingi na ndö ti mo ape. A ye nga ti fa so mo ye ti wara tënë na azo ape. Zo oko aye ti son bê ti azo ape, mbilimbili na ngoi so lo yeke gi ti sara nzoni na azo. Babâ ti mo ti yayu acomprendre mo nzoni nga lo ye ti tene mo wara mungo maboko so mo bezoin ni (És. 41:13). Na yâ ti article so, e yeke bâ aye oku so e peut ti sara ti hon ndö ti apensé so nga e yeke bâ tongana nyen la e peut ti gi ti duti na ngia na fango tënë.

 ZIA SI BIBLE AKPENGBA MO

3. Nyen la a-aidé lani prophète Jérémie ti fa tënë na azo?

³ Même ândö, tënë ti Nzapa akpengba awakua ti lo na ngoi so ala yeke na mbeni ngangu kua ti sara. Bâ tapande ti prophète Jérémie. Mbeto asara lani lo na ngoi so Jéhovah amû na lo kua ti fango tënë. Jérémie atene: “Mbi hinga ti sara tënë pëpe ndali ti so mbi de maseka mingi.” (Jér. 1:6). Nyen la a-aidé lani lo ti fa tënë na mbeto ape? Lo wara lani ngangu na lege ti tënë so Jéhovah atene na lo. Lo tene: “Tënë ni aga tongana wâ na yâ ti bê ti mbi, na a yeke gbi na yâ ti abio ti mbi. Mbi fatigué awe ti pete ndö ni.” (Jér. 20:​8, 9). Atâa so a yeke lani ngangu na Jérémie ti fa tënë na ndo so Jéhovah atene lo fa tënë dä, tënë so a hunda na lo ti fa amû na lo ngangu so lo bezoin ni ti sara kua ni.

4. Tongana e diko Bible nga e gbu li na ndö ni, a yeke aidé e tongana nyen? (aColossien 1:​9, 10).

⁴ A-Chrétien ayeke wara ngangu so ala bezoin ni na lege ti atënë ti Jéhovah so ayeke na yâ ti Bible. Na ngoi so bazengele Paul ayeke sû mbeti na congrégation ti Colosses, lo tene so ti wara tâ hingango ye ayeke pusu aita ti lo ti “tambela na lege so alingbi na lê ti Jéhovah” nga ti ngbâ ti “lë lengo na yâ ti nzoni kusala kue”. (Diko aColossien 1:​9, 10.) Na yâ ti nzoni kusala so, mo yeke wara fango nzoni tënë. Tongaso, tongana e diko Bible nga e gbu li na ndö ni, mabe so e yeke na ni na Jéhovah ayeke kpengba nga e yeke bâ polele so a yeke kota ye ti fa tënë ti Royaume.

5. Tongana nyen la e peut ti wara ye ti nzoni mingi na ngoi so e yeke diko Bible nga e yeke manda ni?

⁵ Ti wara ye ti nzoni mingi na lege ti Bible, a yeke nzoni e mû ngoi ti diko ni, ti manda ni nga ti gbu li na ndö ni. Tongana mo diko mbeni versê si mo mä yâ ni gbä, huru ni ape. Me sara kua na Index des publications des Témoins de Jéhovah wala Mbeti ti sarango na recherche ndali ti aTémoin ti Jéhovah ti gi ti mä yâ ni. Tongana mo mû ngoi ti manda ye nzoni, mo yeke hinga nzoni mingi so ye so Bible afa ayeke tâ tënë (1 aThes. 5:21). Tongana mo hinga biani so atënë so ayeke na yâ ti Bible ayeke tâ tënë, a yeke nzere na mo mingi ti fa ni na azo.

LEKE TERÊ TI MO NZONI NDALI TI FANGO TËNË

6. Ngbanga ti nyen la a yeke nzoni mo leke terê ti mo nzoni ndali ti fango tënë?

⁶ Tongana mo leke terê ti mo nzoni ndali ti fango tënë, mbeto ayeke sara mo mingi  ape ti fa tënë na azo. Jésus a-aidé lani adisciple ti lo ti leke terê ti ala kozo si lo tokua ala ti fa tënë (Luc 10:​1-11). So adisciple ni asara ye alingbi na aye so Jésus afa na ala, ala sara gbâ ti aye, na a sara si ala yeke na ngia mingi.—Luc 10:17.

7. Tongana nyen la e peut ti leke terê ti e ndali ti fango tënë? (Bâ nga foto.)

⁷ Tongana nyen la e peut ti leke terê ti e ndali ti fango tënë? A yeke nzoni e gbu li na ndö ti fason so e peut ti fa atâ tënë nzoni na lege ti atënë ti e wani. Tongana e gbu li kozo na ndö ti ye so azo ti territoire ti e apeut ti sara wala tënë so ala peut ti tene na ngoi so e yeke fa tënë na ala, a peut nga ti aidé e. Tongaso, na ngoi so e yeke sara lisoro na azo, mbeto ayeke sara e ape, e yeke he ngia na ala nga e yeke sara ye na ala na nzoni bê.

8. Na lege wa la aChrétien ayeke tongana ata ti sese so bazengele Paul asara tënë ni na yâ ti tapande ti lo?

⁸ Bazengele Paul atene na aita ti lo aChrétien, lo tene: “E yeke na mosoro so na yâ ti ata ti sese.” (2 aCor. 4:7). Mosoro ni so ayeke nyen? A yeke kua ti fango tënë ti Royaume so ayeke sö fini ti azo (2 aCor. 4:1). Ata ti sese ni aye ti sara tënë ti azo wa? A ye ti sara tënë ti awakua ti Nzapa so ayeke fa nzoni tënë na azo. Na ngoi ti Paul, azo ti kango ye ayeke zia lani aye ti ngangu ngere tongana kobe, vin nga na nginza na yâ ti ata ti sese ti gue na ni na ambeni ndo. Legeoko nga, Jéhovah amû na e mbeni ye ti ngangu ngere, so ayeke nzoni tënë, ti fa ni na azo. Grâce na mungo maboko ti Jéhovah, e peut ti wara ngangu so e bezoin ni ti ngbâ ti fa tënë.

SAMBELA TI SARA YE NA MBETO APE

9. Tongana mbeto ti zo asara e, e peut ti hon ndö ni tongana nyen? (Bâ nga foto.)

⁹ Na ambeni ngoi, mbeto ti zo apeut ti sara e. E peut ti hon ndö ni tongana nyen? Gbu li na ndö ti sambela so abazengele asara na ngoi so a hunda na ala ti fa tënë encore ape. Ahon ti tene mbeto asara ala, ala hunda lani na Jéhovah ti aidé ala “ti ngbâ ti fa tënë ti [lo] na mbeto oko pëpe”. Jéhovah akiri lani tënë na sambela ti ala na lê ni lê ni (Kus. 4:​18, 29, 31). Tongana mbeto ti zo asara e na ambeni ngoi, a yeke nzoni e nga kue e sambela Jéhovah ti aidé e.  Hunda Jéhovah ti aidé mo ti ye azo mingi tongaso si mo sara mbeto ape ti fa nzoni tënë na ala.

10. Tongana nyen la Jéhovah ayeke aidé e ti duti aTémoin ti lo? (Ésaïe 43:​10-12)

¹⁰ Jéhovah asoro e ti duti aTémoin ti lo na lo tene lo yeke aidé e ti sara mbeto ape. (Diko Ésaïe 43:​10-12.) Bâ gï aye osio so Jéhovah ayeke sara ti aidé e. Kozo ni, Jésus ayeke na e na ngoi kue so e yeke fa nzoni tënë (Mat. 28:​18-20). Use ni, Jéhovah ayeke aidé e na lege ti a-ange (Apoc. 14:6). Ota ni, Jéhovah ayeke mû na e yingo vulu ti lo ti aidé e ti dabe ti e na aye so e manda (Jean 14:​25, 26). Osio ni, Jéhovah amû na e aita so e na ala e yeke gue na fango tënë. Grâce na mungo maboko ti Jéhovah nga na ti aita so aye e, e yeke na aye kue so e bezoin ni ti fa tënë nzoni.

CHANGÉ ATËNË TI MO ALINGBI NA BEZOIN TI AZO NGA DUTI NA NZONI BANGO NDO

11. Na ngoi so mo yeke fa tënë, tongana nyen la mo peut ti wara azo mingi? (Bâ nga foto.)

¹¹ Tongana mo wara azo mingi ape na yanga-da, eskê asara si mo découragé? Hunda terê ti mo: ‘Na l’heure tongaso, azo ti territoire ti mbi ayeke na ndo wa?’ (Kus. 16:13). ‘Eskê ala yeke na place ti kua, wala ala gue ti vo ye?’ Tongana ayeke tongaso, eskê mo peut ti wara azo mingi na fango tënë na terê ti lege? Mbeni ita-koli so iri ti lo Joshua atene: “Mbi wara lege ti fa tënë na ando so a yeke kä ye dä nga na ando so azo ayeke dä mingi.” Lo na wali ti lo Bridget awara nga azo mingi na yanga-da na ngoi so ala fa tënë na ngoi so ndo ague ti vuko nga na adimanche na peko ti midi.—aÉph. 5:​15, 16.

12. Tongana nyen la e peut ti hinga aye so azo amä na bê na ni wala aye so azo ayeke gi bê ti ala na ndö ni?

¹² Tongana na tongo nda ni, tënë so mo yeke fa agbu bê ti azo ape gi ti hinga aye so ala mä na bê na ni wala aye so ala yeke gi bê ti ala na ndö ni. Joshua na Bridget ayeke sara ka kua na hunda so ayeke na tongo nda ti atract ti e na ngoi so ala yeke sara lisoro na azo. Na tapande, tongana ala yeke sara kua na tract Mo bâ ti mo Bible tongana nyen? ala yeke tene: “Ambeni zo abâ Bible tongana mbeti so alondo na Nzapa, ti ambeni ayeke tongaso ape. Mo tene ti mo  nyen?” Mingi ni, hunda so asara si ala na azo asara lisoro.

13. Ngbanga ti nyen la e yeke ngbâ ti fa tënë même tongana azo amä e ape? (aProverbe 27:11).

¹³ Même tongana azo amä e ape na ngoi so e yeke fa tënë, e sara ye so e leke na bê ti e ti sara. Ngbanga ti nyen? Ngbanga ti so e sara ye so Jéhovah na Molenge ti lo aye ti tene e sara so ayeke ti fa tënë ti témoin (Kus. 10:42). Même tongana e wara mbeni zo ti sara lisoro na lo ape wala azo ake tënë so e fa, e peut ti duti na ngia ndali ti so e hinga so e zia ngia na bê ti Babâ ti e ti yayu.—Diko aProverbe 27:11.

14. Ngbanga ti nyen la e peut ti duti na ngia na ngoi so mbeni wafango tënë awara na yâ ti territoire mbeni zo so aye ti hinga tâ tënë?

¹⁴ E peut nga ti duti na ngia tongana mbeni wafango tënë awara na yâ ti territoire mbeni zo so aye ti hinga tâ tënë. Mbeni Tour ti Ba Ndo ahaka lani kua ti e na kua ti gingo mbeni molenge so agirisa. Gbâ ti azo la ayeke mû mbage na gingo molenge ni, ala yeke gi lo na ando na peko ti terê. Tongana a wara molenge ni, azo kue ayeke na raison ti duti na ngia, me gï pëpe zo so awara molenge ni. Legeoko nga, azo kue na yâ ti congrégation la ayeke mû maboko ti sara si mbeni zo aga fini disciple ti Jésus. E bezoin ti tene aita kue ti congrégation amû maboko ti fa tënë na azo kue ti yâ ti territoire ti congrégation ni, na aita kue ayeke na ngia na ngoi so mbeni fini zo akomanse ti ga na abungbi.

GI TI YE MINGI JÉHOVAH NGA NA AZO

15. Tongana nyen la ti sara ye alingbi na Matthieu 22:​37-39 apeut ti aidé e ti duti na ngia mingi ti fa tënë? (Bâ nga ti couverture ni.)

¹⁵ E peut ti duti na ngia mingi ti fa tënë tongana e gi ti ye mingi Jéhovah nga na azo. (Diko Matthieu 22:​37-39.) Imaginé tongana nyen la a nzere na Jéhovah mingi ti bâ e na kua ti fango tënë nga tongana nyen la azo ayeke duti na ngia mingi na ngoi so ala komanse ti manda Bible. Girisa nga ape so azo so amä tënë so e fa nga amû desizion ti sara na Jéhovah apeut ti ngbâ na fini lakue.—Jean 6:40; 1 Tim. 4:16.

16. Tongana nyen la e peut ti duti na ngia ti fa tënë na ngoi so e yeke gï na yanga-da? Fa ambeni tapande ni.

¹⁶ Eskê ambeni ye asara si mo yeke gï na yanga-da? Tongana a yeke tongaso, mo peut  ti zia li ti mo na ndö ti aye so mo peut ti sara ti fa so mo ye Jéhovah nga na azo. Na ngoi ti COVID-19, Samuel na Dania ayeke lani gï na yanga-da. Na ngoi ti kpale so, ala fa tënë lakue na téléphone, na lege ti alettre nga ala manda Bible na azo na lege ti Zoom. Samuel afa tënë na azo so lo wara lani terê na ala na clinique na ngoi so a yeke soigné kobela ti lo ti cancer. Lo tene: “Tongana e yeke na yâ ti akpale, e yeke gi bê ti e, e fatigué nga aye apeut ti tara mabe ti e. E bezoin ti duti na ngia na yâ ti kua so e yeke sara na Jéhovah.” Na ngoi ni so, Dania atï na lo yeke gï na gbogbo teti nze ota. Tongaso, lo bezoin puse ti azo so ayeke na kpale ti seni teti nze omene. Lo tene: “Mbi gi lani ti sara aye kue so dutingo ti mbi amû lege na mbi ti sara. Mbi wara lege ti fa tënë na mbeni infirmier so aga ti bâ mbi. Nga mbi sara lisoro na azo so ayeke ga na aye na da so mbi yeke dä. Mbi sara nga lani mbeni nzoni lisoro na téléphone na mbeni wali so ayeke sara kua na mbeni ndokua ti kango yorö.” Dutingo ti Samuel na Dania amû lani lege na ala ti sara aye mingi ape me ala sara ye so ala peut ti sara na ala wara ngia dä.

17. Tongana nyen la mo peut ti bâ nzoni mingi na lege ti aye so e bâ na yâ ti article so?

¹⁷ Gi ti sara ye alingbi na aye oku so a fa na yâ ti article so. Aye so oko na oko kue ayeke tongana aye ti terê ti mbeni kobe. Tongana a mû aye ti terê ti kobe ni kue la a tö na ni, kobe ni ayeke nzere. Tongana e sara ye alingbi na aye kue so a fa na yâ ti article so, e yeke hinga nzoni mingi tongana nyen ti hon ndö ti asioni bango ndo nga tongana nyen ti wara ngia mingi na fango tënë.