Mo hinga?
Ngbanga ti nyen la awande ayeke lani na popo ti aturugu ti Gbia David?
NA POPO ti aturugu ti Gbia David a yeke wara lani akoli so ayeke azo ti Israël ape; na tapande, Zélec zo ti mara ti Ammon; Urie zo ti mara ti Heth; Ithmah zo ti Moab (1 Chron. 11:39, 41, 46). a Na popo ti aturugu ti David a yeke wara nga “azo ti mara ti Kérét na ti Pélét nga na azo ti gbata ti Gath”. (2 Sam. 15:18). Na bango ni azo ti mara ti Kérét na azo ti mara ti Pélét ayeke na songo na aPhilistin. (Ézéch. 25:16). Azo ti gbata ti Gath alango lani peut-être na gbata ti aPhilistin so ayeke na Gath.—Jos. 13:2, 3; 1 Sam. 6:17, 18.
Ngbanga ti nyen la David amû awande na popo ti aturugu ti lo? Lo hinga lani biani so ala yeke be-ta-zo na lo nga kota ye ni ala yeke be-ta-zo na Jéhovah. Na tapande, mbeni mbeti (The New Interpreter’s Dictionary of the Bible) atene na ndö ti azo ti mara ti Kérét na ti Pélét, atene: “Ala ngbâ lani be-ta-zo na David na yâ ti akpale so ayeke ngangu mingi so lo wara na ngoi ti komandema ti lo.” Ala fa ni tongana nyen? Na ngoi so “azo ti Israël” kue adö Gbia David azia ti mû peko ti ‘mbeni zo ti bingo kpale so iri ti lo ayeke Shéba’, azo ti mara ti Kérét na ti Pélét angbâ lani be-ta-zo na David nga ala aidé lo ti kanga lege na Shéba so asara kpengba-li (2 Sam. 20:1, 2, 7). Mbeni lâ, Adonijah, molenge ti Gbia David agi ti ga gbia na place ti Salomon. Ge encore, azo ti mara ti Kérét na ti Pélét angbâ be-ta-zo na David nga ala mû maboko ti zia Salomon gbia na peko ti lo ndali ti so lo la Jéhovah asoro lo.—1 aGbia 1:24-27, 38, 39.
Mbeni wande ni so ayeke lani be-ta-zo mingi na David ayeke Ittaï, zo ti gbata ti Gath. Ittaï na aturugu ti lo 600 amû lani maboko na Gbia David na ngoi so molenge ti lo Absalom asara kpengba-li nga lo gi ti sara si azo ti Israël amû peko ti lo. Na tongo nda ni, David atene na Ittaï so, ndali ti so lo yeke wande, lo bezoin ti tiri ndali ti ni ape. Me Ittaï atene na lo, atene: “Ti tâ tënë ni, so Jéhovah ayeke na fini nga seigneur na gbia ti mbi ayeke na fini, ndo kue so seigneur na gbia ti mbi ayeke gue dä, mbi wakua ti lo nga kue mbi yeke gue dä, atâa a yeke ti kui wala ti ngbâ na fini.”—2 Sam. 15:6, 18-21.
Ittaï ayeke lani be-ta-zo na David, zo so Jéhovah asoro lo
Atâa so azo ti mara ti Kérét, azo ti mara ti Pélét nga na azo ti gbata ti Gath ayeke awande, ala hinga so Jéhovah ayeke tâ Nzapa nga David ayeke zo so Jéhovah asoro lo. David adoit lani ti kiri singila mingi na Jéhovah ndali ti so lo yeke na akoli so ayeke be-ta-zo tongaso na terê ti lo.
a Ndia ti Nzapa so ayeke na Deutéronome 23:3-6 ake lani ti tene azo ti mara ti Ammon nga na azo ti mara ti Moab alï na yâ ti congrégation ti azo ti Israël. Ye oko, na bango ni ndia ni so aye ti sara tënë ti gango zo ti mara ti Israël me ake pëpe ti tene awande abungbi na awakua ti Nzapa wala asara kodro na popo ti ala. Bâ Étude perspicace des Écritures, volume 1, l. 95.
