1. Na ngoi ti akozo Chrétien, tongana nyen la a leke yâ ti bungbi ti awakua ti Jéhovah?

 LAKUE tongana Jéhovah amû na awakua ti lo mbeni kua, lo ye ti tene ala sara ni na yâ ti wusuwusu ape (1 aCor. 14:33). Na tapande, lo ye ti tene a fa nzoni tënë na ndö ti sese kue so azo ayeke dä (Mat. 24:14). Jéhovah azia Jésus ti mû li ni na ndö ti kua so. Jésus asara kue ti tene a sara ni na yâ ti wusuwusu ape. Na Jérusalem na ngoi ti akozo Chrétien, mbeni bebungbi ayeke lani dä so na yâ ni a yeke wara abazengele nga na a-ancien; aita ti bebungbi ayeke mû lani adesizion so acongrégation kue ayeke sara ye alingbi na ni (Kus. 14:23). Na ngoi so acongrégation abâ gigi na ando nde nde, a-ancien ti congrégation oko oko ayeke fa na aita adesizion so bebungbi ni amû (Kus. 15:2; 16:4). So aita asara ye alingbi na aye so a fa, “acongrégation angbâ ti kpengba na yâ ti mabe na wungo ti aita ni ayeke gue na li ni lâ na lâ.”—Kus. 16:5.

2. Ngbene ye na ngu 1919 ti ga na ni, Jéhovah ayeke fa lege na awakua ti lo nga lo yeke mû kobe ti yingo na ala tongana nyen?

² Jéhovah angbâ ti leke yâ ti bungbi ti azo ti lo même laso. Ngbene ye na ngu 1919 ti ga na ni, na gbe ti fango lege ti Jéhovah, Jésus ayeke sara kua na mbeni kete groupe ti aita-koli so a soro ala ti gue na yayu ti leke yâ ti kua ti fango tënë nga ti mû kobe ti yingo na adisciple ti lo (Luc 12:42). a A yeke polele so Jéhovah ayeke sara tufa na ndö ti kua ti ala.—És. 60:22; 65:​13, 14.

3-4. (a) Mû mbeni tapande so afa tongana nyen la e bâ nzoni na lege ti bungbi ti e so a leke yâ ni. (b) Nyen la e yeke bâ na yâ ti article so?

 ³ Tongana a leke yâ ti bungbi ti e ape, e yeke wara lege ape ti sara kua so Jésus amû na e ti sara (Mat. 28:​19, 20). Na tapande, tongana fade acongrégation ayeke na aterritoire ti ala wani ape, azo ayeke fa tënë na ndo so bê ti ala aye. Peut-être e yeke fa tënë fani mingi na ambeni ndo, me e yeke fa tënë na ambeni ndo lâ oko ape. Eskê mo pensé na ambeni lege nde so e bâ nzoni ndali ti so a leke yâ ti bungbi ti e?

⁴ Gï tongana ti so Jésus aleke lani yâ ti kua ti adisciple ti lo na ngoi so lo yeke na sese, lo ngbâ ti leke yâ ti bungbi ti awakua ti Nzapa laso. Na yâ ti article so, e yeke bâ tapande so Jésus azia lani nga e yeke bâ tongana nyen la bungbi ti e ayeke mû peko ni. E yeke bâ nga tongana nyen la e peut ti fa so e sara confiance na bungbi ti Jéhovah.

BUNGBI TI E AMÛ PEKO TI TAPANDE SO JÉSUS AZIA LANI

5. Mbeni lege so bungbi ti e amû peko ti tapande ti Jésus ayeke so wa? (Jean 8:28).

⁵ Jésus azia lani si Babâ ti lo ti yayu la afa na lo ye so lo doit ti sara nga na tënë so lo doit ti tene. Bungbi ti Jéhovah ayeke mû tapande ti Jésus na lege so lo yeke sara kua na Bible ti aidé e ti hinga ye so ayeke na lege ni nga ye so ayeke na lege ni ape nga ti fa lege na e. (Diko Jean 8:28; 2 Tim. 3:​16, 17.) Fani mingi, a dabe ti e ti diko Bible nga ti sara ye alingbi na ni. Wango so a-aidé e tongana nyen?

6. Mbeni kota ye ti nzoni so e yeke wara na lege ti mandango Bible ayeke so wa?

⁶ E yeke wara ye ti nzoni mingi tongana e sara kua na ambeti ti e ti manda Bible. Na tapande, e peut ti haka afango ye ti Bible na afango lege so e wara na mbage ti bungbi ti Jéhovah. Tongana e bâ so fango lege so e wara ague oko na Bible, e yeke sara confiance mingi na bungbi ti Jéhovah.—aRom. 12:2.

7. Tënë wa la Jésus afa lani? Bungbi ti Jéhovah ayeke mû tapande ti lo tongana nyen?

⁷ Jésus afa lani “nzoni tënë ti Royaume ti Nzapa”. (Luc 4:​43, 44). Jésus ahunda nga lani na adisciple ti lo ti fa tënë na ndö ti Royaume (Luc 9:​1, 2; 10:​8, 9). Laso, azo kue so ayeke na yâ ti bungbi ti Jéhovah ayeke fa tënë ti Royaume atâa ndo wa la ala yeke dä wala kua wa la ala yeke sara.

8. Pasa wa la e yeke na ni?

⁸ E yeke na pasa ti fa na azo tâ tënë na ndö ti Royaume ti Nzapa. Azo kue la ayeke na pasa so ape. Na tapande, na ngoi so Jésus ayeke lani na sese, lo mû lege pëpe na asioni yingo ti sara tënë ti témoin na ndö ti lo (Luc 4:41). Laso, kozo ti tene mbeni zo afa tënë legeoko na awakua ti Jéhovah, lo doit ti sara ye so Bible ahunda si. E yeke fa so e bâ na nene ni mingi pasa so e yeke na ni ti fa tënë tongana e fa tënë ti Royaume na azo na ndo kue nga na ngoi kue so e peut ti sara ni. Legeoko tongana Jésus, ye so e leke na bê ti e ti sara ayeke ti lu ngongoa ti tâ tënë ti Royaume na yâ ti bê ti azo nga ti tuku ngu dä.—Mat. 13:​3, 23; 1 aCor. 3:6.

9. Tongana nyen la bungbi ti Jéhovah asara si azo ahinga iri ti Nzapa?

⁹ Jésus asara lani si azo ahinga iri ti Nzapa. Jésus asambela lani Babâ ti lo ti yayu, lo tene: “Mbi sara si ala hinga iri ti mo.” (Jean 17:26). Ti gue oko na tapande ti Jésus, bungbi ti Jéhovah asara kue ti aidé azo ti hinga iri ti Nzapa. Mbeni lege so bungbi ti Jéhovah asara ni ayeke na lege ti Mbeti ti Nzapa ti fini dunia. Na yâ ti Bible so,  a kiri na iri ti Nzapa na aplace kue so ayeke lani dä na ayanga ti kodro so a sû ândö na Bible. Laso, a yeke wara Bible so kue wala mbage ni na ayanga ti kodro ahon 270. Na Ambeni tënë: mbage A4 nga na A5, mo yeke wara anzene nzene tënë na ndö ti kiringo na iri ti Nzapa na aplace ni na yâ ti Bible so. Na Ambeni tënë: mbage C na yâ ti Bible ti étude na Français, mo yeke wara gbâ ti aye so afa so iri ti Nzapa adoit ti sigi fani 237 na yâ ti Mbeti ti Nzapa so aChrétien asû ândö na Grec.

10. Nyen la mo manda na lege ti tënë so mbeni wali so ayeke na Myanmar atene?

¹⁰ Legeoko tongana Jésus, e ye ti aidé gbâ ti azo ti hinga iri ti Nzapa. Na ngoi so mbeni wali so ayeke na ngu 67 na Myanmar ahinga iri ti Nzapa, lo komanse ti toto, lo tene: “Kozo ti tene mbi mä so iri ti Nzapa ayeke Jéhovah la . . . Mo fa na mbi mbeni ye so ayeke kota mingi so mbi doit fade ti hinga ni.” Tongana ti so ye so asi so afa, tongana azo ahinga iri ti Nzapa, a peut ti changé gigi ti ala.

NGBÂ TI FA SO MO YEKE NA CONFIANCE NA BUNGBI TI E

11. Tongana nyen la a-ancien apeut ti fa so ala sara confiance na bungbi ti Jéhovah? (Bâ nga foto.)

¹¹ Mbeni lege so a-ancien apeut ti fa so ala sara confiance na bungbi ti Jéhovah ayeke so wa? Tongana bungbi ti Jéhovah ahunda na a-ancien ti sara mbeni ye, ala doit ti diko nzoni tënë so a tene na ala na ndö ti ye so ala doit ti sara nga ala sara kue ti sara ye alingbi na ni. Na tapande, a fa na ala tongana nyen ti sara ambage ti bungbi, tongana nyen ti sambela ndali ti congrégation nga tongana nyen ti bâ lege ti ataba ti Christ. Tongana a-ancien asara ye alingbi na aye kue so bungbi ti Jéhovah afa, aita ayeke bâ so Jéhovah aye ala nga lo yeke bâ lege ti ala.

12. (a) Ngbanga ti nyen la a yeke nzoni e sara kua maboko na maboko na aita so ayeke mû li ni? (aHébreu 13:​7, 17). (b) Ngbanga ti nyen la a yeke nzoni e bâ gï apendere sarango ye ti aita so ayeke mû li ni?

¹² Tongana a-ancien afa na e mbeni ye ti sara, a yeke nzoni e duti nduru ti sara ni. Tongana e sara tongaso, a yeke duti ngangu ape na aita so ayeke mû li ni ti sara kua ti ala. Bible awa e ti mä yanga ti aita so ayeke mû li ni nga ti woko terê na gbe ti ala. (Diko aHébreu 13:​7, 17.) Na ambeni ngoi, a peut ti duti ngangu ti sara ni. Ngbanga ti nyen? Ngbanga ti so akoli so ayeke mbilimbili-kue ape. Me tongana e yeke bâ gï asioni sarango ye ti ala ahon ti bâ anzoni ni, ti vrai ni, e yeke mû maboko na awato ti e. E tene tongaso ngbanga ti nyen? E yeke sara si azo aduti na confiance na bungbi ti Jéhovah ape, na a yeke tâ gï ye so awato ti e aye. Nyen la e peut ti sara ti hinga amvene ti awato ti e nga ti ke ni?

ZIA PËPE SI AZO ASARA SI MO YEKE NA CONFIANCE NA BUNGBI TI JÉHOVAH ENCORE APE

13. Tongana nyen la awato ti Nzapa ayeke gi ti buba iri ti bungbi ti Jéhovah?

¹³ Awato ti Nzapa agi ti sara si anzoni ye so bungbi ti lo ayeke sara akpa aye so ayeke sioni. Na tapande, Jéhovah aye ti tene e duti na saleté ape, e duti na anzoni sarango ye nga e voro lo na lege ni. Lo hunda ti tene tongana mbeni zo asara sioni ye si lo changé bê ti lo ape, a bi lo na gigi ti bungbi (1 aCor. 5:​11-13; 6:​9, 10). E yeke sara ye alingbi na commandement ti Bible so. Ndani la awato ti e atene e ye azo ape, e yeke fâ ngbanga na ndö ti azo nga e ke azo so bango ndo ti ala ayeke nde na ti e.

14. Zo wa la ayeke na gunda ti amvene so a bi na ndö ti bungbi ti Jéhovah?

 ¹⁴ Hinga biani zo so ayeke tiri na bungbi ti Jéhovah. Satan Zabolo la ayeke na gunda ti amvene so azo ayeke tene na ndö ti bungbi ti Jéhovah. Lo yeke “babâ ti mvene.” (Jean 8:44; Gen. 3:​1-5). Tongaso, a yeke na lege ni ti tene Satan asara kua na azo so ayeke mû maboko na lo ti kangbi atënë ti mvene na ndö ti bungbi ti Jéhovah. Ye so asi lani na ngoi ti akozo Chrétien.

15. Nyen la akota zo ti nzapa asara lani na Jésus nga na adisciple ti lo?

¹⁵ Atâa so Jésus, Molenge ti Nzapa, ayeke lani mbilimbili-kue nga lo sara apendere miracle, Satan asara kua na ambeni zo ti tene gbâ ti mvene na iri ti lo. Na tapande, akota zo ti nzapa atene lani na azo so “mokonzi ti asioni yingo” la amû ngangu na Jésus ti tomba asioni yingo (Marc 3:22). Na ngoi so a gue lani na Jésus na gbele ngbanga, ala tene mvene na iri ti lo atene lo zonga Nzapa nga ala pusu gbâ ti azo ti hunda ti tene a fâ lo (Mat. 27:20). Ambeni ngoi na pekoni, na ngoi so adisciple ti Christ ayeke fa nzoni tënë, azo so ayeke kanga lege na ala ‘apusu azo’ ti sara aye ti ngangu na aChrétien so (Kus. 14:​2, 19). Tour ti Ba Ndo ti lango 1 ti décembre, ngu 1998, atene na ndö ti Kusala 14:​2, atene: “Awato so ayeke aJuif ake lani tënë so aChrétien afa, me ala ngbâ gï ge ape. Ala tene asioni mvene na iri ti aChrétien ti pusu azo ti amara nde ti ke ala.”

16. Tongana e mä ambaï ti mvene, nyen la e doit ti girisa ape?

¹⁶ Satan angbâ ti tene mvene laso. Lo ngbâ ti “handa azo na ndö ti sese kue”. (Apoc. 12:9). Tongana mo mä ambaï ti mvene na ndö ti bungbi ti Jéhovah wala na ndö ti aita so ayeke mû li ni, girisa ape fason so awato  ti Nzapa asara lani ye na Jésus nga na akozo Chrétien. Laso, a yeke sara aye ti ngangu na awakua ti Jéhovah nga a yeke tene asioni mvene na iri ti ala, tongana ti so Bible atene (Mat. 5:​11, 12). Ambaï ti mvene ayeke handa e ape tongana e girisa ape zo so ayeke na gunda ni nga e sara ye hio ti bata terê ti e. Nyen la e peut ti sara ti bata terê ti e?

17. Nyen la e peut ti sara ti tene ambaï ti mvene asara sioni na e ape? (2 Timothée 1:13). (Bâ nga encadré “ Aye ti sara tongana mo mä atënë ti mvene.”)

¹⁷ Ke ambaï ti mvene. Bazengele Paul amû wango polele na ndö ti ye so e doit ti sara tongana e mä ambaï ti mvene. Lo tene na Timothée ti “mû yanga na ambeni zo ti . . . dengi mê pëpe na ambaï ti mvene” nga ti “ke ambaï ti mvene”. (1 Tim. 1:​3, 4; 4:7). Atâa so mbeni bébé apeut ti mû mbeni ye na sese ti zia na yanga ti lo, mbeni zo so ahinga ndo nzoni ayeke sara ni ape ndali ti so lo hinga so apeut ti sara sioni na lo. E ke ambaï ti mvene ndali ti so e hinga zo so tënë ni alondo na lo. Me e yeke mä gï “anzoni tënë” so ayeke tâ tënë.—Diko 2 Timothée 1:13.

18. Tongana nyen la e peut ti fa so e yeke na confiance na bungbi ti Jéhovah?

¹⁸ E bâ fade gï aye ota so na yâ ni bungbi ti Jéhovah amû tapande ti Jésus. Na ngoi so mo yeke manda Bible, gi ti hinga ambeni fason so bungbi ti Jéhovah ayeke mû tapande ti Jésus. Aidé aita ti congrégation ti mo ti sara confiance mingi na bungbi ti Jéhovah. Ngbâ ti fa so mo yeke na confiance na bungbi ti Jéhovah na lege so mo duti be-ta-zo na Jéhovah nga mo ngbâ nduru na bungbi so lo yeke sara kua na ni ti sara ye so bê ti lo aye (Ps. 37:28). Zia e kiri singila lakue ndali ti pasa so e yeke na ni ti duti na popo ti awakua ti Jéhovah so aye terê nga so ayeke be-ta-zo na lo.