1. Nyen la Jéhovah ahunda na e?

 TONGANA mbeni wali ti koli adü, a yeke mbeni ngoi so ala yeke na ngia mingi. Me atâa so babâ na mama aye bébé ti ala mingi, ala ye ti tene lo ngbâ lakue bébé ape. Ti tâ tënë ni, ala yeke gi bê ti ala mingi tongana lo yeke kono ape. Legeoko nga, atâa so Jéhovah ayeke na ngia na ngoi so e komanse ti manda ye na ndö ti lo, lo ye ti tene e ngbâ gï ge ape (1 aCor. 3:1). Me lo hunda na e ti ga aChrétien so ‘aga akangba’.—1 aCor. 14:20.

2. Nyen la e yeke bâ na yâ ti article so?

² Ti ga Chrétien so ayeke kangba aye ti tene nyen? Ti ga Chrétien so ayeke biazo, nyen la e bezoin ti sara? Kpengbango kobe ti yingo ayeke aidé e tongana nyen ti ga Chrétien so akpengba? Ngbanga ti nyen la a yeke nzoni e sara confiance na e wani ahon ndö ni ape? Na yâ ti article so, e yeke kiri tënë na ahunda so.

TI GA CHRÉTIEN SO AKPENGBA AYE TI TENE NYEN?

3. Ti ga Chrétien so ayeke kangba aye ti tene nyen?

³ Na yâ ti Bible, tënë ti Grec so a kiri peko ni na tënë “kangba,” ndani aye nga ti tene “zo so akpengba koli wala wali awe.” a (1 aCor. 2:6). Tongaso, legeoko tongana mbeni bébé so ayeke ngbâ ti kono juska lo kpengba, e nga kue e doit ti ngbâ ti kpengba songo ti e na Jéhovah. Tongana e sara tongaso, e yeke ga aChrétien so ayeke abiazo. Même tongana e ga Chrétien so akpengba awe, a yeke nzoni e ngbâ ge ape  (1 Tim. 4:15). E kue, même amaseka, e peut ti ga aChrétien so akpengba. Me nyen la ayeke fa so mbeni Chrétien akpengba awe?

4. Nyen la afa so mbeni Chrétien akpengba awe?

⁴ Chrétien so akpengba ayeke zo so ayeke sara aye kue so Nzapa ahunda, lo yeke soro sorongo pëpe aye so Nzapa ahunda so lo ye ti sara ye alingbi na ni. Tâ tënë, so lo yeke mbilimbili-kue ape, lo yeke sara afaute. Me lâ oko oko, lo yeke pensé nga lo yeke sara ye ague oko na ye so bê ti Nzapa aye. Lo yü fini zo awe nga lo ngbâ lakue ti sara effort ti tene apensé ti lo ague tâ oko na ti Nzapa (aÉph. 4:​22-24). Lo manda ti mû anzoni desizion na lege so lo gbu li na ndö ti andia nga na amama-ndia ti Jéhovah. Tongaso, lo bezoin gbâ ti andia ape ti fa na lo ye so a yeke nzoni lo sara. Tongana lo mû mbeni desizion, lo yeke sara kue ti sara ye alingbi na ni.—1 aCor. 9:​26, 27.

5. Nyen la apeut ti si na mbeni Chrétien so ayeke biazo ape? (aÉphésien 4:​14, 15).

⁵ Me, ti mbeni Chrétien so akpengba ape, a yeke ngangu ape ti tene atënë ti “handa”, “amvene so a leke ni na mayele”, atënë ti mvene so a yeke kangbi ni na yâ ti asango nga na a-apostat ague na lo yongoro. b (Diko aÉphésien 4:​14, 15.) Lo peut ti sara bê na terê ti azo, lo na amba ti lo apeut ti mä terê ape wala bê ti lo apeut ti son hio. Nga peut-être fani mingi, lo yeke sara asioni ye na ngoi so lo wara tara.—1 aCor. 3:3.

6. Ngbanga ti nyen la e peut ti haka gango biazo na mbeni molenge so ayeke kono? (Bâ nga foto.)

⁶ Tongana ti so e tene fade, Bible ahaka gango biazo na mbeni molenge so ayeke kono ti ga kangba. Aye mingi ayeke dä so molenge ahinga ni ape, tongaso lo bezoin mbeni zo so akono awe ti bata lo nga ti fa lege na lo. Na tapande, mbeni mama apeut ti hunda na kete molenge ti lo ti wali ti gbu maboko ti lo na ngoi so ala yeke fâ lege. Tongana molenge ni ayeke kono, mama ni apeut ti mû lege na lo ti fâ lege lo wani, me lo yeke dabe ti lo ti bâ ndo mbage na mbage kozo si lo fâ lege. Tongana molenge ni aga kota zo awe, lo wani lo yeke kpe mara ti akpale tongaso. Legeoko tongana ti so amolenge abezoin ti tene akota zo a-aidé ala ti kpe akpale, fani mingi aChrétien  so ayeke abiazo ape abezoin ti tene aChrétien so ayeke abiazo a-aidé ala ti kpe aye kue so apeut ti buba songo ti ala na Jéhovah nga ti mû anzoni desizion. Me ti aChrétien so ayeke biazo, na ngoi so ala ye ti mû mbeni desizion, ala yeke gbu li na ndö ti amama-ndia ti Bible ti hinga bango ndo ti Jéhovah na ndö ti ye ni, na pekoni ala yeke mû desizion alingbi na ni.

7. Eskê aChrétien so ayeke abiazo abezoin ti tene amba ti ala a-aidé ala?

⁷ Eskê a ye ti tene so Chrétien so ayeke biazo abezoin ti tene mbeni zo a-aidé lo ape? Ên-ën. A-Chrétien so akpengba abezoin nga ti hunda ti tene a aidé ala na ambeni ngoi. Me peut-être mbeni zo so ayeke gi ti ga biazo aye ti tene azo afa na lo ye ti sara wala lo ye ti tene ala mû desizion na place ti lo. Ti Chrétien so akpengba, lo yeke hunda azo so ayeke na ndara nga ahinga ye ahon lo ti aidé lo, me lo hinga so lo la lo doit ti mû desizion lo wani nga lo hinga so lo yeke “yô ande kungba ti lo wani.”—aGal. 6:5.

8. Na alege wa la abiazo ayeke nde na mba?

⁸ Legeoko tongana ti so yongo ti akangba nga na konongo ti ala ayeke nde nde, aChrétien so ayeke abiazo ayeke na asarango ye so ayeke nde nde. Na tapande ambeni ayeke na ndara mingi, ambeni ayeke sara ye na mbeto oko ape, ambeni ayeke mû ye mingi na zo nga ambeni ayeke zia terê mingi na place ti mba. Na ndö ni, na ngoi so aChrétien use awara oko kpale, ala peut ti mû adesizion so ayeke nde na ti mba me so ague oko na Bible. Mingi ni a yeke si tongaso tongana a ndu ye so abâ conscience ti zo oko oko. So ala hinga tongaso, ala yeke fâ ngbanga na ndö ti mba ape tongana adesizion so ala mû ayeke nde nde. Me ala yeke zia li ti ala na ndö ti dutingo beoko ti aita.—aRom. 14:10; 1 aCor. 1:10.

AYE SO E DOIT TI SARA TI GA ACHRÉTIEN SO AYEKE ABIAZO

9. Eskê e yeke ga abiazo sân ti sara effort? Fa ndani so mo tene tongaso.

⁹ Tongana a dü mbeni molenge, nyen na nyen, lo yeke kono ande, me e doit ti sara effort si e ga biazo. Na tapande, aita na Corinthe ayeda lani na nzoni tënë, ala wara batême, ala wara yingo vulu nga ala bâ nzoni na lege ti aye so bazengele Paul afa na ala (Kus. 18:​8-11). Me ambeni ngoi na peko ti batême ti ala, ala mingi ade aga abiazo ape (1 aCor. 3:2). Nyen la e peut ti sara ti tene mara ti ye tongaso asi na e ape?

10. Nyen la e doit ti sara ti ga biazo? (Jude 20).

¹⁰ Ti ga biazo, e doit kozoni ti duti na nzara ni. Azo so ‘aye ti ngbâ gï azo so ahinga ndo pëpe’, so aye ti kpengba na lege ti yingo ape, ayeke ga abiazo ape (aProv. 1:22). E ye pëpe ti duti tongana azo so akono awe me so ababâ na amama ti ala la ayeke mû adesizion na place ti ala. Me e ye ti tene e wani la e sara kue ti tene songo ti e na Jéhovah akpengba nga angbâ ti kpengba. (Diko Jude 20.) Tongana mo yeke sara ngangu ti ga biazo, hunda Jéhovah ti mû na mo “nzara ti sara ye nga na ngangu ti sara” ni.—aPhil. 2:13.

11. Nyen la Jéhovah amû na e ti aidé e ti ga biazo? (aÉphésien 4:​11-13).

¹¹ Jéhovah ahunda na e ape ti sara effort gï e wani ti ga abiazo. Lo mû na e aberger nga na awafango ye na yâ ti congrégation ti aidé e ti ga azo “so akpengba kue awe, ti yo ti lingbi na yongo so Christ ayo na ni kue”. (Diko aÉphésien 4:​11-13.) Jéhovah amû nga na e yingo vulu ti aidé e ti duti na “bibe ti Christ.” (1 aCor. 2:​14-16). Na ndö ni, Nzapa amû na e a-Évangile osio ti fa na e tongana nyen la Jésus ayeke pensé lani, lo yeke  sara tënë nga lo yeke sara ye na ngoi so lo yeke na sese. Tongana mo mû tapande ti fason so Jésus ayeke pensé nga lo yeke sara na ye, mo peut ti ga Chrétien so akpengba.

LEGE SO KPENGBANGO KOBE TI YINGO AYEKE AIDÉ E

12. “Akozo fango ye na ndö ti Christ” andu aye wa?

¹² Ti ga aChrétien so akpengba, e doit nga ti “hon akozo fango ye na ndö ti Christ”, so ti tene akozo fango ye ti aChrétien. Ambeni kozo fango ye ni ayeke changengo bê, mabe, batême nga na zingongo ti akuâ (aHéb. 6:​1, 2). Afango ye so ayeke fondation ti bungbi ti vorongo Nzapa ti aChrétien. Ndani la bazengele Pierre asara tënë ni na ngoi so lo yeke fa tënë na gbâ ti azo na ngoi ti Pentecôte (Kus. 2:​32-35, 38). Ti ga disciple ti Christ, e doit ti yeda na akozo fango ye so. Na tapande, Paul afa lani so tongana e mä na bê na zingongo ti akuâ ape, e peut ti ga adisciple ti Christ ape (1 aCor. 15:​12-14). Ye oko, e doit ti ngbâ gï na ndö ti akozo hingango ye na ndö ti tâ tënë ape.

13. Nyen la e doit ti sara ti bâ nzoni na lege ti kpengbango kobe ti yingo so a sara tënë ni na aHébreu 5:14? (Bâ nga foto.)

¹³ Kpengbango kobe ti yingo ayeke nde na akozo fango ye; a ye ti sara tënë ti andia nga na amama-ndia ti Jéhovah so ayeke aidé e ti comprendre apensé ti lo. Ti bâ nzoni na lege ti kobe so, e doit ti manda Bible, ti gbu li nzoni na ndö ni nga ti sara kue ti sara ye alingbi na ye so e manda. Tongana e sara ni, e yeke mû adesizion so anzere na Jéhovah. c—Diko aHébreu 5:14.

14. Tongana nyen la Paul a-aidé lani aChrétien ti Corinthe ti ga abiazo?

¹⁴ Fani mingi, a yeke ngangu na aChrétien so ade aga abiazo ape ti mû nzoni desizion na ndö ti ye so mbeni mbilimbili ndia ti Bible na ndö ni ayeke dä ape. Tongana mbeni mbilimbili ndia ti Bible ayeke dä ape, ambeni zo apensé so ala peut ti sara ye kue so ala ye. Ambeni zo apeut ti hunda ti tene a lu mbeni ndia na ngoi so a bezoin ni ape. Na tapande, na bango ni aChrétien ti Corinthe ahunda  lani na Paul ti sigi na mbeni ndia so afa na ala ti te kobe so a yâa na mbeni yanda wala pëpe. Paul afa lani na ala oko oko kue so ala yeke na “droit ti” soro ye, so ague oko na ye so conscience ti ala amû lege na ala ti sara. Lo fa lani na ala ambeni mama-ndia ti Bible so apeut ti aidé ala ti mû desizion so ayeke sara si conscience ti ala afâ ngbanga na li ti ala ape nga so ayeke sara si amba ti ala apika gere ti ala ape (1 aCor. 8:​4, 7-9). Paul ayeke aidé lani aChrétien ti Corinthe ti ga abiazo tongaso si ala peut ti sara kua na ngangu ti gbungo li ti ala ti mû desizion ahon ti tene azo la amû desizion na place ti ala wala ahon ti gi ti bâ gï andia.

15. Tongana nyen la Paul a-aidé lani aChrétien so ayeke aHébreu ti gue na li ni na lege ti yingo?

¹⁵ E manda mbeni kpengba ye na lege ti mbeti so Paul atokua na aChrétien so ayeke aHébreu. Ambeni ayeke kpengba lani songo ti ala na Jéhovah encore ape; ti vrai ni, ala “ga azo so ayeke gï na bezoin ti lait, me ti kpengbango kobe [ti yingo] pëpe.” (aHéb. 5:12). Jéhovah ayeke fa lani na ala afini ye na lege ti congrégation, me ala manda ni ape nga ala yeda na ni ape (aProv. 4:18). Na tapande, gbâ ti aJuif so amä na bê angbâ lani ti sara ye alingbi na Ndia ti Moïse atâa so a sara ngu 30 tongaso awe sandaga ti Jésus amingo ngangu ti Ndia ni awe (aRom. 10:4; Tite 1:10). Na yâ ti ngu 30 so, aChrétien ayeke na gbâ ti ngoi ti comprendre so ala bezoin encore ape ti sara ye alingbi na Ndia ni. Zo kue so adiko mbeti so yingo ti Nzapa apusu Paul ti sû na aHébreu apeut ti yeda so kpengbango kobe ti yingo la ayeke na yâ ni. Mbeti ti lo ni asara si ala bâ so fini lege ti vorongo Jéhovah, so lo zia na sese na lege ti Jésus, ayeke nzoni mingi. A sara nga si ala yeke na mbeto ape ti ngbâ ti fa tënë atâa aJuif akanga lege na ala.—aHéb. 10:​19-23.

SARA CONFIANCE NA MO WANI AHON NDÖ NI APE

16. Na ndö ti so e yeke gi ti ga Chrétien so akpengba, nyen la e doit ti sara?

¹⁶ E doit ti gi ti ga biazo nga e doit ti ngbâ biazo. Ti sara ni, e doit ti sara confiance na e wani ahon ndö ni ape (1 aCor. 10:12). A yeke nzoni e “ngbâ ti bâ terê ti [e] ti bâ wala” e ngbâ ti gue na li ni na lege ti yingo.—2 aCor. 13:5.

17. Tongana nyen la mbeti so Paul atokua na aChrétien ti Colosses afa so e bezoin ti ngbâ biazo?

 ¹⁷ Na yâ ti mbeti so Paul atokua na aColossien, lo kiri lo fa so e bezoin ti ngbâ aChrétien so ayeke abiazo. Atâa so ala ga lani aChrétien so akpengba awe, Paul awa ala ti sara hange si apensé ti azo ti dunia so ahanda ala ape (aCol. 2:​6-10). Épaphras, so ahinga aita ti congrégation ni nzoni, asambela fani mingi ti tene “na nda ni ala ga azo so akpengba kue awe”, wala abiazo (aCol. 4:12). Ye ti manda ni ayeke so wa? Paul na Épaphras acomprendre lani so ti tene e ngbâ aChrétien so ayeke abiazo, e bezoin ti sara effort nga e bezoin ti tene Nzapa amû maboko na e. Ala ye lani ti tene aChrétien ti Colosses angbâ aChrétien so ayeke abiazo, so ti tene, aChrétien so akpengba awe atâa akpale so ala wara.

18. Nyen la apeut ti si na mbeni Chrétien so akpengba awe? (Bâ nga foto.)

¹⁸ Paul atene lani na aHébreu so mbeni Chrétien so akpengba awe apeut ti zia ngia na bê ti Nzapa encore ape teti lakue lakue. Bê ti mbeni Chrétien apeut ti kpengba, tongaso lo peut ti changé bê ti lo encore ape ti tene Nzapa apardonné lo. Merci so ye so asi lani pëpe na aChrétien so ayeke aHébreu (aHéb. 6:​4-9). Me ka ti azo so laso ayeke fa tënë encore ape wala so a bi ala na gigi na so na pekoni ala changé bê ti ala? So ala sara terê ti ala kete ala changé bê ti ala, a fa so ala yeke nde na azo so Paul asara tënë ti ala. Me tongana ala kiri na Jéhovah, ala yeke na bezoin ti tene lo aidé ala (Ézéch. 34:​15, 16). A-ancien apeut ti leke ti tene mbeni Témoin so akpengba a-aidé ala ti kiri ti duti na kpengba songo na Jéhovah.

19. Nyen la a yeke nzoni e leke na bê ti e ti sara?

¹⁹ Tongana mo yeke gi ti ga biazo, mo peut ti ga ni. Ngbâ ti te kpengbango kobe ti yingo nga ti sara si apensé ti mo ague tâ gï oko na ti Jéhovah. Tongana mo ga biazo awe, sara ye kue so mo peut ti sara ti ngbâ biazo.