Mbaï so Matthieu asû na ndö ti dungo Jésus nga na fini ti lo na ngoi so lo de kete ague nde kete na ti so Luc asû ndali ti so Matthieu asû ye na ndö ti apensé nga na aye so asi na mbeni zo, na Luc asû ye na ndö ti apensé nga na aye so asi na mbeni zo nde.

Évangile ti Matthieu asara tënë mingi na ndö ti aye so asi na Joseph. A fa kozo ye so lo sara na ngoi so lo hinga so Marie ayeke na ngo, a fa bango li ti lo so na yâ ni mbeni ange afa na lo ye na ndö ti ngo ti Marie nga tongana nyen la lo sara ye alingbi na ye so ange ni afa na lo (Mat. 1:19-25). Matthieu asara nga tënë ti bango li ti Joseph so na yâ ni mbeni ange awa lo ti tene lo na sewa ti lo akpe ague na Égypte. Na pekoni, Matthieu asara tënë ti bango li ti Joseph so na yâ ni mbeni ange atene na lo ti kiri na kodro ti Israël. Lo sara nga tënë ti kiringo ti Joseph na Israël nga na desizion so lo mû ti tene lo na sewa ti lo asara kodro na Nazareth.​—Mat. 2:13, 14, 19-23.

Me Évangile ti Luc asara tënë mingi na ndö ti Marie. A sara tënë ti ngoi so ange Gabriel aga abâ Marie, ti ngoi so Marie ague abâ Élisabeth nga na atënë so Marie atene ti sepela Jéhovah (Luc 1:26-56). Luc afa nga atënë so Siméon atene na Marie na ndö ti pasi so Jésus ayeke bâ ande. Même na yâ ti mbaï so asara tënë ti ngoi so Marie na sewa ti lo ague na temple na ngoi so Jésus ayeke na ngu 12, Luc asû atënë so Marie atene lani, me atënë ti Joseph pëpe. Luc akiri atene so aye so andu bê ti Marie mingi (Luc 2:19, 34, 35, 48, 51). Tongaso, Matthieu asara tënë mingi na ndö ti apensé ti Joseph nga na aye so lo sara, me Luc afa anzene nzene tënë na ndö ti apensé ti Marie nga na aye so asi na lo.

Legeoko nga, molongo ti akotara ti Jésus ayeke nde nde na yâ ti aÉvangile use so. Matthieu asû molongo ti akotara ti Joseph nga lo fa so, ndali ti so Joseph ayeke babâ so abata Jésus, ndia amû lege na Jésus ti duti héritier ti Royaume ti David. Ngbanga ti nyen? Ngbanga ti so Joseph ayeke lani mbeni hale ti Gbia David na lege ti Salomon, molenge ti David (Mat. 1:6, 16). Ye oko, na bango ni, Luc afa molongo ti akotara ti Marie nga lo fa so Jésus ayeke na droit ti duti héritier ti Royaume ti David “na lege ti mitele”. (aRom. 1:3). Ngbanga ti nyen? Ngbanga ti so Marie ayeke lani mbeni hale ti Gbia David na lege ti Nathan, molenge ti David (Luc 3:31). Me ngbanga ti nyen la Luc afa pëpe so Marie ayeke molenge ti Héli, so ayeke babâ ti lo? Ngbanga ti so ambeti so a sû ândö ti fa molongo ti akotara ti zo, a yeke zia gï iri ti akoli dä. Ni la tongana Luc azia iri ti Joseph dä na lo tene so lo yeke molenge ti Héli, azo ahinga lani so Joseph ayeke kogara ti Héli.​—Luc 3:23.

Molongo ti akotara ti Jésus so ayeke na yâ ti Évangile ti Matthieu na ti Luc afa polele so Jésus ayeke Messie so a mû lani zendo ti lo. So azo ahinga nzoni mingi so Jésus ayeke lani mbeni hale ti Gbia David, même aFarizien na aSadducéen alingbi lani ti ke ni ape. Laso, atënë ti Matthieu na ti Luc na ndö ti molongo ti akotara ti Jésus asara si mabe ti e akpengba na asara si e yeke na confiance so azendo ti Nzapa ayeke ga ande tâ tënë.