ESKÊ mo yeke na nzara ti sara mbeni kua na yâ ti congrégation me mo lingbi pëpe ti sara ni fadeso? Peut-être a yeke mbeni kua so mbeni ita ayeke sara ni fadeso. Wala peut-être a yeke mbeni kua so mo yeke lani na pasa ti sara ni. Ye oko, ngu ti mo, kpale ti seni, kpale ti nginza wala akua ti sewa akanga lege na mo ti sara ambeni ye. Wala peut-être mo doit ti zia kua so mo sara ngu mingi awe ndali ti achangement so a sara na yâ ti bungbi ti Jéhovah. Atâa raison ni ayeke so wa, peut-être mo bâ so mo sara pëpe aye kue so mo ye ti sara na yâ ti kua ti Nzapa. Na yâ ti aye tongaso, a yeke na lege ni so na ambeni ngoi vundu asara mo. Même tongana a yeke tongaso, nyen la mo lingbi ti sara si mo ngbâ ti découragé ape, bê ti mo angbâ ti son ape wala mo bata zo na bê ape? Tongana nyen la mo lingbi ti ngbâ ti duti na ngia?

E lingbi ti manda ti ngbâ ti duti na ngia na lege ti tapande ti Jean Baptiste. Jean ayeke lani na akota kua ti sara, me âmanke lo ku terê ti lo lani ape na aye so asi na lo na yâ ti kua ti Jéhovah. Peut-être lo imaginé nga lani ape so ngoi so lo sara na kanga ayeke ninga ahon ngoi so lo sara na yâ ti kua ti fango tënë. Me Jean angbâ lani ti duti na ngia na yâ ti tanga ti fini ti lo. Nyen la amû lani maboko na lo? Tongana nyen la e lingbi ti ngbâ ti duti na ngia même tongana ambeni ye azia vundu na bê ti e?

Na avril ngu 29, Jean akomanse kua ti lo so ayeke ti leke lege ti Messie na lege so lo yeke fa tënë, lo tene: “Ala changé bê ti ala, ngbanga ti so Royaume ti yayu aga nduru awe.” (Mat. 3:2; Luc 1:12-17). Azo mingi ayeda na tënë ti lo. Gbâ ti azo alondo na ayongoro ndo ala ga ti mä tënë ti lo nga ala mingi achangé bê ti ala na ala wara batême. Na mbeto ape Jean agboto nga lani mê ti akota zo ti nzapa so abâ terê ti ala tongana azo ti mbilimbili na ndö ti tënë ti ngbanga so ayeke ku ala tongana ala changé bê ti ala ape (Mat. 3:5-12). Jean asara kua so ayeke kota ahon atanga ni kue na ngoi so lo batize Jésus na octobre ngu 29. Ti londo na ngoi ni so ti ga na ni, lo fa na azo ti mû peko ti Jésus, Messie so a mû zendo ti lo.—Jean 1:32-37.

Ndali ti so kua ti Jean ayeke nde mingi, Jésus atene: “Na popo ti azo so awali adü ala, mbeni so abâ gigi na so ayeke kota ahon Jean  Baptiste ayeke dä pëpe.” (Mat. 11:11). Kite ayeke dä ape so Jean ayeke lani na ngia mingi ndali ti aye ti nzoni so lo wara. Legeoko tongana Jean, laso Nzapa airi tënë nzoni mingi na ndö ti gbâ ti azo. Zia e bâ tapande ti mbeni ita-koli so iri ti lo ayeke Terry. Lo na wali ti lo, Sandra, asara kua ti ngoi kue ahon ngu 50. Terry atene: “Mbi sara lani apendere kua mingi. Mbi yeke lani pionnier, Béthelite, pionnier spécial, surveillant ti circonscription, surveillant ti district, na fadeso mbi kiri pionnier spécial encore.” Ti sara akua na yâ ti bungbi ti Jéhovah aga na e ngia, me tongana ti so e yeke manda na lege ti tapande ti Jean, a lingbi e sara ngangu si e ngbâ ti duti na ngia na ngoi so dutingo ti e achangé.

Ye so asara si Jean angbâ lani ti duti na ngia ayeke so lo kiri lani singila mingi ndali ti akua so a mû na lo. Bâ mbeni tapande ni. Na peko ti batême ti Jésus, kua ti fango tënë ti Jean akomanse ti kiri na gbe ni me kua ti Jésus akomanse ti gue na li ni. Adisciple ti Jean agi bê ti ala lani ni la ala tene na lo, atene: “Bâ, lo yeke batize azo na azo kue ayeke gue na mbage ti lo.” (Jean 3:26). Jean atene na ala, atene: “Zo so amû wali fini fini ayeke koli ti wali ni. Me na ngoi so kamarade ti koli so amû wali fini fini ayeke luti na terê ti lo na amä lo, lo yeke na kota ngia ndali ti go ti koli ti wali ni so lo mä so. Ni la, ngia so mbi yeke na ni so alingbi kue awe.” (Jean 3:29). Jean asara lani mandako na Jésus ape, lo pensé nga lani ape so kua so a mû na lo akiri na gbe ni ndali ti so kua ti Jésus ayeke kota mingi. Me Jean angbâ lani ti duti na ngia ndali ti so lo bâ na nene ni mingi kua so lo sara tongana “kamarade ti koli so amû wali fini fini”.

Bango ndo ti Jean amû lani maboko na lo ti ngbâ ti duti na ngia atâa so kua ti lo ayeke lani kete kua ape. Na tapande, Jean ayeke lani Naziréen ngbene ye na ngoi so a dü lo, tongaso a ke na lo ti nyon vin (Luc 1:15). Jésus asara tënë ti gigi ti Jean so lo yeke na ye mingi ape, lo tene: “Jean aga, lo te kobe pëpe nga lo nyon ye pëpe.” Me Jésus na adisciple ti lo ayeke lani na gbe ti mara ti andia so ape ni la ala vivre tongana tanga ti azo kue (Mat. 11:18, 19). Na ndö ni, atâa so Jean asara lani mbeni miracle ape, lo hinga lani so adisciple ti Jésus, so na popo ti ala ambeni ayeke lani adisciple ti Jean kozo, alingbi ti sara amiracle (Mat. 10:1; Jean 10:41). Ahon ti tene Jean azia si aye ni so agboto lê ti lo, lo sara kua so Jéhovah amû na lo na bê ti lo kue.

Tongana e nga kue e bâ na nene ni kua so e yeke sara fadeso na Jéhovah, e yeke bata ngia ti e. Terry, so e sara tënë ti lo fade, atene: “Mbi zia li ti mbi gï na ndö ti akua oko oko kue so a mû na mbi.” Tongana lo pensé na fini ti lo na yâ ti kua ti ngoi kue, lo tene: “Mbi regretté ye oko ape me mbi yeke na apendere ye so mbi yeke dabe ti mbi na ni.”

E lingbi ti duti na ngia mingi na yâ ti kua ti Nzapa tongana e gbu li na ndö ti ye so asara si mbeni kua so bungbi ti Jéhovah amû na e ayeke biani kota ye mingi: “E na Nzapa e sara kua oko.” (1 aCor. 3:9). Mbeni ye ti ngangu ngere so e yeke na ni ayeke ngbâ pendere tongana e bâ lege ni lakue. Legeoko nga, e yeke ngbâ ti duti na ngia tongana e ngbâ ti gbu li na ndö ti kota pasa so e yeke na ni ti sara kua oko na Jéhovah. E yeke haka pëpe angangu so e yeke sara na ti ambeni zo. E yeke bâ pëpe so kua so Jéhovah amû na e ayeke kete na ti so lo mû na ambeni zo.—aGal. 6:4.

Peut-être Jean ahinga lani so lo yeke sara kua ti lo aninga mingi ape, me peut-être lo hinga ape so a yeke hunzi tâ gï hio tongaso (Jean 3:30). Na ngu 30, nze omene na peko ti so Jean abatize Jésus, Gbia Hérode akanga Jean. Me Jean asara lani ye so lo lingbi ti sara ti ngbâ ti fa tënë (Marc 6:17-20). Nyen la amû lani maboko na lo ti ngbâ ti duti na ngia na yâ ti achangement so? Lo ngbâ lani ti zia li ti lo na ndö ti aye so ayeke akota ye na lê ti Jéhovah.

Atâa so Jean ayeke lani na da ti kanga, lo mä tënë ti kua ti fango tënë ti Jésus so ayeke gue na li ni (Mat. 11:2; Luc 7:18). Jean ahinga lani na bê ti lo kue so Jésus ayeke Messie, me peut-être lo yeke hunda lani terê ti lo tongana nyen la Jésus ayeke sara aye kue so Mbeti ti Nzapa atene Messie ayeke sara ni. Ndali ti so Jean ahinga lani so Messie ayeke duti ande gbia, peut-être lo hunda terê ti lo wala Jésus ayeke ga gbia fafadeso.  Peut-être lo hunda nga terê ti lo wala Jésus ayeke zi lo na kanga. So Jean aye ti hinga kua ti Jésus nzoni, lo tokua adisciple ti lo use ti hunda atënë so na Jésus: “Mo yeke Lo so ayeke ga? Wala a lingbi e ku mbeni zo nde?” (Luc 7:19). Na ngoi so ala kiri, Jean adoit lani ti mä ala nzoni na ngoi so ala yeke fa tongana nyen la Jésus asava azo na lege ti miracle na pekoni lo tokua ala ti gue ti tene na Jean: “Awaziba ayeke bâ ndo, azo so gere ti ala abuba ayeke tambela, terê ti azo ti buruma aga nzoni, azo so mê ti ala akanga ayeke mä ndo, a yeke zingo akuâ, na a yeke fa nzoni tënë na awayere.”—Luc 7:20-22.

Kite ayeke dä ape so atënë so ala tene akpengba Jean. A fa so aprophétie na ndö ti Messie la ayeke ga tâ tënë na ndö ti Jésus so. Atâa so Jésus azi Jean na kanga ape, Jean ahinga lani so peko ti kua ti lo angbâ senge ape. Atâa so lo yeke na kanga, lo yeke lani na raison ti duti na ngia.

Legeoko tongana Jean, tongana e zia li ti e na ndö ti kua ti Jéhovah, e yeke kanga bê ti ku nga e yeke duti na ngia na ngoi so e yeke gbu ngangu (aCol. 1:9-11). E lingbi ti gbu ngangu tongana e diko Bible nga e gbu li na ndö ni, na ye so ayeke mû maboko na e ti hinga so ye kue so e sara ndali ti Nzapa ayeke ngbâ senge senge ape (1 aCor. 15:58). Sandra atene: “Dikongo mbeni chapitre ti Bible lango oko oko amû maboko na mbi ti ga nduru mingi na Jéhovah. A mû maboko na mbi ti zia li ti mbi na ndö ti Jéhovah me na ndö ti mbi ape.” E lingbi nga ti zia li ti e na ndö ti atondo ti kua ti Royaume, na a lingbi ti mû maboko na e ti zia ti pensé gï na ndö ti dutingo ti e wani nga ti zia li ti e na ndö ti aye so Jéhovah ayeke sara. Sandra atene: “Kapa ti JW Télédiffusion ti nze oko oko amû maboko na e ti bâ so e yeke nduru mingi na bungbi ti Jéhovah nga amû maboko na e ti ngbâ ti duti na ngia na yâ ti kua ti e.”

Na yâ ti kete ngoi so Jean Baptiste afa tënë, lo fa lani tënë na même “yingo nga na ngangu” so Élie ayeke na ni, nga tongana Élie, lo ‘yeke ândö mbeni zo so ayeke na abibe tongana ti e’. (Luc 1:17; Jacq. 5:17). Tongana e mû tapande ti Jean so akiri singila nga lo zia li ti lo na ndö ti kua ti Jéhovah, e nga kue e lingbi ti ngbâ ti duti na ngia na yâ ti kua ti Royaume so e yeke sara atâa nyen la asi.