1. Kota pasa wa la e yeke na ni?

SO E yeke na yâ ti congrégation ti Jéhovah ayeke mbeni kota pasa. E yeke na yâ ti mbeni paradis ti yingo so asi singo na azo so aye siriri nga ayeke na ngia. Place ti mo na yâ ti congrégation ayeke so wa?

2. Tapande wa la bazengele Paul asara kua na ni na yâ ti ambeni lettre so lo sû na gbe ti yingo?

² E lingbi ti manda ye mingi na ndö ti place ti e na yâ ti congrégation na lege ti mbeni tapande so bazengele Paul asara kua na ni na yâ ti ambeni lettre so lo sû na gbe ti yingo ti Nzapa. Na yâ ti alettre so oko na oko, Paul ahaka congrégation na terê ti zo. Lo haka nga azo ti yâ ti congrégation ni na amembre nde nde ti terê ni.—aRom. 12:4-8; 1 aCor. 12:12-27; aÉph. 4:16.

3. Aye ti manda ota wa la e yeke bâ ni na yâ ti article so?

³ Na yâ ti article so, e yeke bâ akpengba ye ota so e lingbi ti manda na lege ti tapande so Paul asara kua na ni. Kozoni, e yeke bâ so e oko oko kue e yeke na place * ti e na yâ ti congrégation ti Jéhovah. Use ni, e yeke bâ ye so e lingbi ti sara tongana a yeke ngangu na e ti hinga place ti e na yâ ti congrégation. Ota ni, e yeke bâ ndani so a lingbi e ngbâ ti sara akua so a mû na e na yâ ti congrégation.

4. Nyen la aRomain 12:4, 5 afa na e?

⁴ Kozo ye so e lingbi ti manda na lege ti tapande so Paul asara kua na ni ayeke so e oko oko kue e yeke na mbeni kpengba place na yâ ti sewa ti Jéhovah. Ti komanse na tapande ni, Paul atene: “Tongana ti so e yeke na amembre mingi na yâ ti terê oko, me amembre ni so, ala kue asara gï oko kua pëpe, e nga, atâa so e yeke mingi, e yeke gï terê oko so ayeke beoko na Christ, me e oko oko kue e yeke amembre ti terê ti amba ti e.” (aRom. 12:4, 5). Paul aye ti tene nyen la? Lo ye ti tene so e oko oko kue e yeke na akua nde nde ti sara na yâ ti congrégation, me e oko oko kue e yeke ye ti ngangu ngere.

5. “Amatabisi” wa la Jéhovah amû na congrégation?

⁵ Tongana mo pensé na azo so ayeke na mbeni place na yâ ti congrégation, peut-être li ti mo ayeke tï hio na ndö ti azo so amû li ni (1 aThes. 5:12; aHéb. 13:17). A yeke tâ tënë so, na lege ti Christ, Jéhovah amû na congrégation ti lo “akoli tongana amatabisi.” (aÉph. 4:8). Na popo ti ‘akoli so ayeke tongana amatabisi’ so, mo yeke wara amembre ti Bebungbi, aita-koli so ayeke mû maboko na Bebungbi, amembre ti Komite ti filiale, asurveillant ti circonscription, aita-koli so ayeke fa ye na yâ ti a-ekole ti bungbi ti Jéhovah, a-ancien ti congrégation nga na awakua ti mungo maboko. Yingo vulu la amû maboko ti tene a zia aita so kue na kua ti bâ lege ti ataba ti Jéhovah so ayeke ye ti ngangu ngere na lê ti lo nga ti kpengba congrégation.—1 Pi. 5:2, 3.

6. Ti gue oko na 1 aThessalonicien 2:6-8, nyen la aita-koli so yingo vulu amû maboko ti soro ala ayeke sara kue ti sara?

⁶ Yingo vulu la amû maboko ti soro aita-koli so ti sara akua nde nde. Legeoko tongana ti so ambage nde nde ti terê ti zo, na tapande amaboko nga na gere, ayeke sara kua ndali ti nzoni ti terê ni kue, aita so yingo vulu amû maboko ti soro ala ayeke sara kua ndali ti nzoni ti congrégation kue. Ala yeke gi gloire ti ala wani ape. Me ala yeke sara kue ti kpengba aita ti ala. (Diko 1 aThessalonicien 2:6-8.) E kiri singila mingi na Jéhovah ndali ti aita-koli so, so alingbi, so azia aye so agbu bê ti amba ti ala kozo na ti ala!

7. Anzoni ye wa la aita mingi so ayeke na yâ ti kua ti ngoi kue awara?

⁷ Na yâ ti congrégation, peut-être ambeni ita ayeke sara kua ti missionnaire, ti pionnier spécial wala ti pionnier permanent. Ti tâ tënë ni, aita na yâ ti dunia kue asara si kua ti fango tënë nga na ti sarango adisciple aga kua so ala yeke sara na ngoi kue. So ala sara tongaso, ala mû maboko na azo mingi ti ga adisciple ti Christ Jésus. Atâa so mingi ti aita so ayeke na aye ti sese mingi ape, Jéhovah amû na ala gbâ ti anzoni ye (Marc 10:29, 30). E ye aita so mingi, nga e kiri singila mingi so ala yeke na yâ ti congrégation.

8. Ngbanga ti nyen la awafango nzoni tënë oko oko kue ayeke kota mingi na lê ti Jéhovah?

⁸ Eskê gï aita so ayeke na kua na yâ ti congrégation nga na ala so ayeke na yâ ti kua ti ngoi kue la ayeke na place na yâ ti congrégation? Oko ape! Awafango nzoni tënë ti Royaume oko oko kue ayeke kota mingi na lê ti Nzapa nga na congrégation (aRom. 10:15; 1 aCor. 3:6-9). Ala yeke kota mingi na lê ti lo ndali ti so mbeni kota ye so azo ti congrégation azia na gbele ala ayeke ti sara si azo aga adisciple ti Seigneur ti e Jésus Christ (Mat. 28:19, 20; 1 Tim. 2:4). Azo kue so ayeke fa tënë, so ti tene awafango tënë so awara batême awe nga na ala so ade ti wara batême ape, ayeke sara kue ti zia kua ti fango tënë kozo na yâ ti fini ti ala.—Mat. 24:14.

9. Ngbanga ti nyen la e bâ aita ti e ti wali na nene ni mingi?

 ⁹ Jéhovah afa so lo ne aita-wali na lege so lo mû na ala kota kua na yâ ti congrégation. Lo bâ na nene ni awali ti akoli, amama, awali-mua nga aita-wali kumbamba so ayeke sara na lo be-ta-zo. Bible asara tënë ti gbâ ti awali so azia ngia na bê ti Nzapa. A gonda ala ndali ti tapande ti ndara ti ala, ti mabe ti ala, ti yapungo ti ala na yâ ti kua ti Nzapa, ti sarango ye ti ala na mbeto ape, ti mungo ye mingi na azo nga ndali ti anzoni kua ti ala (Luc 8:2, 3; Kus. 16:14, 15; aRom. 16:3, 6; aPhil. 4:3; aHéb. 11:11, 31, 35). E kiri singila mingi na Jéhovah so, na yâ ti acongrégation ti e, e yeke na aita-wali so ayeke na a-oko pendere sarango ye so!

10. Ngbanga ti nyen la e bâ ambakoro ti e na nene ni mingi?

¹⁰ E yeke nga na ngia so ambakoro ayeke mingi na yâ ti congrégation. Na yâ ti ambeni congrégation, mo yeke wara ambakoro-koli na ambakoro-wali so asara na Jéhovah be-ta-zo na yâ ti fini ti ala kue. Peut-être ambeni mbakoro amanda tâ tënë ade ti ninga mingi ape. Ambakoro mingi ayeke tiri na akpale ti seni nde nde so gango mbakoro aga na ni. Akpale so asara si ala yeke na ngangu ti sara aye mingi ape na yâ ti congrégation nga na fango tënë. Ye oko, ala sara aye so ala lingbi ti sara ti fa tënë, nga ala mû ngangu ti ala kue ti kpengba aita nga ti fa ye na ala. Nga e bâ nzoni na lege ti akode ti ala. Jéhovah abâ ala biani na nene ni, e nga kue e bâ ala na nene ni.—aProv. 16:31.

11-12. Amaseka so ayeke na yâ ti congrégation akpengba mo tongana nyen?

¹¹ Gbu nga li na ndö ti amaseka. Na ngoi so ala yeke kono, ala yeke wara akpale mingi na yâ ti dunia so Satan Zabolo la akomande ni nga so asioni pensé ti lo la ayeke sara ngangu na ndö ti azo (1 Jean 5:19). Me so e bâ amaseka ti e ayeke mû acommentaire na bungbi, ala yeke fa tënë nga na mbeto ape ala yeke gbu koko ti mabe ti ala, akpengba e kue mingi. Biani, ala amaseka ala yeke na kpengba place na yâ ti bungbi ti Jéhovah!—Ps. 8:2.

¹² Ye oko, a yeke ngangu na ambeni ita ti  yeda so ala yeke na kpengba place na yâ ti congrégation. Nyen la alingbi ti mû maboko na e ti bâ so e oko oko kue e yeke na place na yâ ti congrégation? Zia e bâ ni.

13-14. Ngbanga ti nyen la peut-être ambeni ita abâ so ala yeke ye oko ape na yâ ti congrégation?

¹³ Bâ use ye so e lingbi ti manda na lege ti tapande so Paul amû. Lo gboto lê na ndö ti mbeni kpale so azo mingi ayeke na ni laso; ala bâ so a yeke ngangu na ala ti yeda so ala yeke na place na yâ ti congrégation. Paul atene: “Tongana gere atene: ‘So mbi yeke maboko pëpe, mbi yeke ti mbi mbeni membre ti terê pëpe,’ so la asara si lo yeke mbeni membre ti terê ni ape? Nga, tongana mê atene: ‘So mbi yeke lê pëpe, mbi yeke ti mbi mbeni membre ti terê pëpe,’ so la asara si lo yeke mbeni membre ti terê ni ape?” (1 aCor. 12:15, 16). Nyen la Paul aye lani ti fa ni?

¹⁴ Tongana mo haka terê ti mo na aita na yâ ti congrégation, peut-être mo yeke bâ so mo yeke ye oko ape. Ambeni ita na yâ ti congrégation ayeke na kode ti fango ye, ala yeke anzoni zo ti lekengo aye wala ala hinga ti dë bê ti zo nga ti kpengba zo nzoni mingi. Peut-être mo bâ so mo yeke sara aye so tongana ti so ala yeke sara ape. Ye so afa so mo sara terê ti mo kete nga mo bâ terê ti mo kete (aPhil. 2:3). Me sara hange. Tongana mo yeke haka terê ti mo lakue na azo so ayeke na apendere kode, mo yeke découragé. Tongana ti so Paul atene, peut-être mo bâ so mo yeke na place oko ape na yâ ti congrégation. Nyen la alingbi ti mû maboko na mo ti hon ndö ti bango ndo so?

15. Ti gue oko na 1 aCorinthien 12:4-11, nyen la a lingbi e girisa ape tongana e yeke na mbeni mbilimbili kode?

¹⁵ Gbu li na ndö ti ye so: Jéhovah amû lani na ambeni kozo Chrétien amatabisi ti yingo vulu ti sara amiracle, me ala kue la awara lani a-oko matabisi ape. (Diko 1 aCorinthien 12:4-11.) Jéhovah amû lani na ala amatabisi nga na akode nde nde, me a bâ ala oko oko kue na nene ni. Laso, e yeke na amatabisi ti yingo  vulu so ape. Me tënë so achangé ape: E kue e yeke na a-oko kode ape, me Jéhovah abâ e kue na nene ni.

16. Wango wa la Paul amû so a lingbi e sara ye alingbi na ni?

¹⁶ Ahon ti haka terê ti e na amba ti e aChrétien, a lingbi e sara ye alingbi na wango ti bazengele Paul so: “Zia zo oko oko atara kua ti lo ti bâ wala a yeke tongana nyen, tongaso si lo duti na ngia ndali ti kua ti lo wani, me na hakango terê ti lo na mbeni zo nde pëpe.”—aGal. 6:4.

17. Tongana nyen la e lingbi ti bâ nzoni na lege ti wango ti Paul?

¹⁷ Tongana e sara ye alingbi na wango ti Paul so nga e bâ yâ ti asarango ye ti e nzoni, peut-être e yeke bâ so e yeke na ambeni kode so amba ti e ayeke na ni ape. Na tapande, peut-être mbeni ancien ayeke na nzoni kode ti fango ye na pupitre ape, me peut-être lo sara si azo mingi aga adisciple. Wala peut-être lo hinga ape ti leke yâ ti aye nzoni tongana ti ambeni ancien ti congrégation ti lo, me peut-être a hinga lo tongana mbeni berger so aye aita na a yeke ngangu ape na awafango tënë ti hunda awango ti Bible na lo. Wala peut-être a hinga lo mingi ndali ti so lo yeke zo ti yambango azo (aHéb. 13:2, 16). Tongana e hinga polele akode ti e, a yeke sara si e yeke duti na ngia ti sara aye so e lingbi ti sara ndali ti congrégation. Nga peut-être e yeke sara kota bê na terê ti amba ti e ape ndali ti akode ti ala so ayeke nde na ti e.

18. Tongana nyen la e lingbi ti maï akode ti e?

¹⁸ Atâa place ti e na yâ ti congrégation ayeke so wa, a lingbi e kue e gi ti maï na yâ ti kua ti Jéhovah nga e maï akode ti e. Ti mû maboko na e ti maï, Jéhovah ayeke fa ye na e pendere mingi na lege ti bungbi ti lo. Na tapande, na bungbi ti e ti milieu ti yenga, a yeke fa ka na e tongana nyen ti fa tënë nzoni ahon ti kozo. Eskê mo yeke gi ti sara ye alingbi na aye so a fa na ngoi ti bungbi so?

19. Tongana nyen la mo lingbi ti wara lege ti gue na Ekole ti awafango nzoni tënë ti Royaume?

¹⁹ Mbeni pendere kapa ti fango ye ayeke na ngoi ti Ekole ti awafango nzoni tënë ti Royaume. Aita so alingbi ti gue na ekole so ayeke aita so ayeke na yâ ti kua ti ngoi kue nga so ngu ti ala alondo na ngu 23 ti si na ngu 65. Peut-être mo bâ so mo lingbi lâ oko ape ti gue na ekole so. Me ahon ti fa araison so ndali ni mo lingbi pëpe ti gue na ekole so, gi araison so ndali ni mo ye ti gue. Leke ti sara aye so alingbi ti mû maboko na mo ti gue. Na lege ti mungo maboko ti Jéhovah nga tongana mo sara effort, peut-être mo yeke wara lege ti gue atâa so mo bâ so mo lingbi lâ oko ape ti gue na ekole so.

20. A-Romain 12:6-8 afa na e nyen?

²⁰ Ota ye so e lingbi ti manda na lege ti tapande so Paul amû ayeke na aRomain 12:6-8. (Diko ni.) Ge, Paul akiri afa so azo so ayeke na yâ ti congrégation ayeke na akode nde nde. Me fadeso ye so lo gboto lê na ndö ni ayeke so: a lingbi e sara kua na akode so e yeke na ni ti kpengba congrégation.

21-22. Nyen la e lingbi ti manda na lege ti tapande ti Robert nga na Felice?

²¹ Bâ tapande ti mbeni ita-koli so e iri lo Robert. Na peko ti so lo sara kua ti Jéhovah na kodro-wande, a tokua lo na Béthel ti kodro ti lo. Atâa so a fa na lo so lo sara pëpe mbeni sioni ye, lo tene: “Teti anze mingi mbi yeke na ngia ape ndali ti so mbi pensé so mbi sara lani kozo kua ti mbi ni nzoni ape. Na ambeni ngoi mbi ye ti zia kua ti mbi na Béthel.” Lo sara lani tongana nyen ti kiri ti duti na ngia? Mbeni mba ti lo ancien adabe ti lo so Jéhovah afa  ye na e na yâ ti akua nde nde so e sara kozo tongaso si e lingbi ti sara fini kua ti e nzoni. Robert ayeda so lo bezoin lani ti zia ti bâ ndo na peko nga ti komanse ti zia lê ti lo na ndö ti ye so lo lingbi ti sara fadeso.

²² Ita Felice Episcopo awara lani mara ti kpale so. Lo na wali ti lo awara lani diplôme ti Ekole ti Galaad na ngu 1956 nga ala sara kua ti circonscription na Bolivie. Na ngu 1964 ala dü molenge. Felice atene: “A yeke lani kete ye na e ape ti zia kua so e ye ni mingi. A lingbi mbi yeda so teti ngu oko mbi découragé. Me na mungo maboko ti Jéhovah, mbi changé bango ndo ti mbi nga mbi zia li ti mbi na ndö ti fini kua ti mbi ti babâ.” Mo yeke na bango ndo ti Robert wala ti Felice so? Eskê mo découragé ndali ti so fadeso mo yeke sara pëpe a-oko kua so mo yeke sara lani? Tongana a yeke tongaso, mo yeke duti na ngia mingi tongana mo changé ye so mo yeke pensé mingi na ndö ni nga mo zia li ti mo na ndö ti ye so mo lingbi ti sara fadeso ti sara na Jéhovah nga na aita ti mo. Duti na aye mingi ti sara, sara kua na akode ti mo ti mû maboko na azo nga mo yeke wara ngia tongana mo kpengba congrégation ti mo.

23. Nyen la a lingbi e mû ngoi ti sara? Nyen la e yeke bâ na yâ ti article ti peko?

²³ Jéhovah abâ e oko oko kue na nene ni mingi. A nzere na lo so e yeke na yâ ti sewa ti lo. Tongana e mû ngoi ti gbu li na ndö ti ye so e lingbi ti sara ti kpengba aita ti e nga na pekoni e sara ngangu ti sara ni, peut-être e yeke pensé ape so e yeke na place ape na yâ ti congrégation. Ka ti bango ndo ti e na ndö ti amba ti e na yâ ti congrégation? Tongana nyen la e lingbi ti fa so e ye ala nga e ne ala? E yeke bâ kota tënë so na yâ ti article ti peko.