1. Anzoni ye wa la amaseka mingi asara awe?

 NGU oko oko, amaseka saki mingi ayeke wara batême. Ka mo? Tongana mo wara batême awe, aita ti congrégation ayeke na ngia ndali ti mo, Jéhovah nga kue (aProv. 27:11). Gbu li kete na ndö ti gbâ ti aye ti nzoni so mo sara. Na tapande, mo manda Bible nzoni, peut-être na yâ ti angu mingi. Aye so mo manda asara si mo hinga so Bible ayeke Mbeti ti Nzapa. Ye so ayeke kota mingi ayeke so mo hinga Wa ti Bible nga mo ye lo. So mo ye Jéhovah mingi asara si fadeso mo ga mbeni wakua ti lo so amû terê ti lo na lo nga awara batême. So pendere ye!

2. Nyen la e yeke bâ na yâ ti article so?

 ² Kozo ti tene mo wara batême, mo wara akpale so asara si a yeke ngangu na mo ti duti be-ta-zo na Jéhovah. Me na ngoi so mo yeke kpengba, mo yeke wara ande afini kpale. Satan ayeke gi ande ti sara si mo zia ti ye Jéhovah nga ti sara na Lo (aÉph. 4:14). Zia si ye tongaso asi ape. Nyen la apeut ti aidé mo ti ngbâ ti sara na Jéhovah nga ti sara ye alingbi na yanga so mo mû ti sara na lo? Mo doit ti ngbâ ti gue na li ni, ti “sara kue” ti ga Chrétien so akpengba (aHéb. 6:1). Me, mo peut ti sara ni tongana nyen?

3. Nyen la a yeke nzoni aChrétien kue asara na peko ti batême ti ala?

³ Na peko ti batême ti e, e kue e bezoin ti sara ye alingbi na wango so bazengele Paul amû na amba ti lo aChrétien so ayeke na Éphèse. Lo wa ala ti ga aChrétien so “akpengba kue  awe”. (aÉph. 4:13). So ti tene, ala doit ti ‘ngbâ ti gue na li ni.’ Paul ahaka maïngo ti e aChrétien na fason so mbeni molenge ayeke kono na ni. Tongana a dü mbeni bébé, babâ na mama ti lo aye lo nga ala yeke na ngia ndali ti lo. Me lo peut ti ngbâ lakue bébé ape. Tongana ngoi ayeke hon, lo doit ti zia lege ti “asarango ye ti kete molenge”. (1 aCor. 13:11). A-Chrétien nga adoit ti sara tongaso. Na peko ti batême ti e, e doit ti ngbâ ti gue na li ni. Zia e bâ ambeni ye so ayeke aidé e ti sara ni.

4. Nyen la apeut ti aidé mo ti gue na li ni? Fa ndani so mo tene tongaso. (aPhilippien 1:9).

⁴ Gi ti ye Jéhovah mingi. Mo ye Jéhovah mingi awe, me mo peut ti ye lo mingi ahon ti kozo. Mo peut ti sara ni tongana nyen? Bazengele Paul afa mbeni fason so mo peut ti sara ni na aPhilippien 1:9. (Diko ni.) Paul asambela ti tene ndoye ti aPhilippien “angbâ gï ti wu mingi ahon ti kozo”. Tongaso, e peut ti sara si ndoye ti e angbâ ti kono. E peut ti sara ni tongana e wara “tâ hingango ye nga na kode ti bango yâ ti aye nzoni”. Tongana e hinga Jéhovah nzoni mingi, e yeke ye lo mingi nga e yeke bâ na nene ni asarango ye ti lo nga na fason so lo yeke sara na aye. E yeke ye mingi ti zia ngia na bê ti lo nga e yeke ye lâ oko ape ti sara mbeni ye so azia vundu na bê ti lo. E yeke sara kue ti hinga ye so bê ti lo aye nga tongana nyen la e peut ti sara ye alingbi na ni.

5-6. Tongana nyen la e peut ti ye Jéhovah mingi? Fa ndani so mo tene tongaso.

⁵ Jésus asara ye tâ gï tongana Jéhovah. Tongaso, tongana e hinga Jésus nzoni, e yeke ye Jéhovah mingi (aHéb. 1:3). Tâ nzoni lege ti hinga Jésus ayeke ti manda a-Évangile osio. Tongana ade mo komanse ti diko Bible lâ na lâ ape, mo peut ti komanse fadeso na dikongo a-Évangile. Tongana mo yeke diko ambaï na ndö ti Jésus, luti mingi na ndö ti asarango ye ti lo. A nzere lani na azo ti duti na terê ti lo nga ti sara lisoro na lo; na ndoye, lo yô lani akete molenge na kate ti lo (Marc 10:13-16). Lo sara ye lani na nzoni bê mingi, na mbeto asara adisciple ti lo ape ti fa na lo atënë ti bê ti ala (Mat. 16:22). So Jésus asara tongaso, lo sara ye tongana Babâ ti lo ti yayu. A yeke ngangu oko ape ti ga nduru na Jéhovah. E peut ti sambela lo. Na ngoi so e yeke sambela, e peut ti zi bê ti e kue na lo. E hinga biani so lo yeke fâ ngbanga na ndö ti e ape. Lo ye e nga lo yeke pensé na e.—1 Pi. 5:7.

⁶ Jésus ayeke bâ lani mawa ti azo. Bazengele Matthieu atene: “Tongana lo bâ gbâ ti azo so, mawa ti ala asara lo ngbanga ti so a sara pasi na ala nga yâ ti ala akangbi kirikiri tongana ataba so ayeke na berger pëpe.” (Mat. 9:36). Ka ti Jéhovah ayeke tongana nyen? Jésus atene: “A nzere pëpe na Babâ ti mbi so ayeke na yayu tongana mbeni oko ti akete zo so agirisa.” (Mat. 18:14). Tënë so azia ngia na bê ti e mingi. Tongana e gi ti hinga Jésus nzoni, e yeke ye Jéhovah mingi.

7. Tongana mo mû ngoi ti duti na terê ti aChrétien so akpengba, a peut ti aidé mo tongana nyen?

⁷ Mo peut nga ti manda ti ye azo mingi nga ti maï ti ga mbeni Chrétien so akpengba tongana mo mû ngoi ti duti na terê ti aita ti congrégation ti mo so akpengba. Bâ tongana nyen la ala yeke na ngia mingi. Ala regretté oko ape desizion so ala mû ti sara na Jéhovah. Hunda ala ti fa na mo ambeni ye so asi na ala na yâ ti kua ti Jéhovah. Tongana mo yeke na mbeni kpengba desizion ti mû, hunda wango na ala. Girisa ape so “na lege ti gbâ ti awamungo wango, ye aga nzoni.”—aProv. 11:14.

8. Tongana a si so mo yeke na kite na ndö ti mbeni tënë so Bible atene, nyen la mo peut ti sara?

 ⁸ Hon ndö ti akite so mo yeke na ni. Tongana ti so a fa na  paragraphe 2, Satan ayeke gi ti kanga lege na mo ti gue na li ni. Mbeni lege so lo peut ti sara ni ayeke ti sara si mo duti na kite na ndö ti ambeni fango ye ti Bible. Na tapande, peut-être ambeni zo ayeke gi ti sara si mo yeda so Nzapa la acréé e ape me e bâ gigi na lege ti évolution. Na ngoi so mo de lani kete, peut-être mo gbu li na ndö ni ape, me peut-être fadeso a yeke fa ni na mo na ekole. Peut-être mo bâ so ye so azo so ayeke fa mbeti na mo ayeke fa na ndö ti évolution ayeke na lege ni. Ye oko, peut-être lâ oko ala gbu li nzoni ape na ndö ti aye so afa so Lo so acréé aye ayeke dä. Dabe ti mo na mama-ndia so ayeke na aProverbe 18:17, so atene: “Kozo zo so amû tënë na gbele ngbanga, azo so amä lo apensé so lo yeke na raison, juska mba ti lo ni aga ahunda yâ ti lo.” Ahon ti yeda gï tongaso na atënë so mo mä na ekole, gbu li nzoni na ndö ti atâ tënë so ayeke na yâ ti Mbeti ti Nzapa, Bible. Sara recherche na yâ ti ambeti ti e. Sara lisoro na aita so amä na bê ândö na évolution. Hunda ala ti fa na mo nyen la asara si ala hinga so Lo so acréé aye aye e. Mara ti alisoro tongaso apeut ti aidé mo ti hinga aye so afa so Lo so acréé aye ayeke dä.

9. Nyen la mo manda na lege ti ye so asi na Melissa?

⁹ Ita-wali Melissa abâ nzoni mingi na lege ti recherche so lo sara na ndö ti création. b Lo tene: “Na ekole, awafango mbeti ayeke fa ye na ndö ti évolution na mbeni lege so asara si azo abâ so a yeke tâ tënë. Na tongo nda ni, mbi ye ti sara recherche ape ndali ti so mbeto asara mbi ti wara mbeni ye so afa so tënë ti évolution ayeke tâ tënë. Me mbi pensé mbi tene Jéhovah aye ape ti tene e sara na lo sân anzoni raison. Tongaso, mbi komanse ti sara recherche. Mbi diko buku Y a-t-il un Créateur qui se soucie de vous ? nga na brochure La vie a-t-elle été créée ? nga Cinq questions à se poser sur l’origine de la vie. A yeke tâ gï ye so mbi bezoin ni lani la. Tongana mbi sara ni fade hio, a yeke duti nzoni mingi.”

10-11. Nyen la apeut ti aidé mo ti ngbâ ti duti na anzoni sarango ye? (1 aThessalonicien 4:3, 4).

 ¹⁰ Ke asioni sarango ye. Na ngoi so mo yeke maseka, nzara ti bungbingo koli na wali apeut ti sara mo mingi, nga na ambeni ngoi ambeni zo ayeke gi ti pusu mo ti sara lango-sioni. Ye so Satan aye ti tene mo sara la. Nyen la apeut ti aidé mo ti ngbâ ti duti na anzoni sarango ye? (Diko 1 aThessalonicien 4:3, 4.) Na yâ ti sambela, fa na Jéhovah atënë ti bê ti mo nga hunda lo ti mû na mo ngangu (Mat. 6:13). Girisa ape so Jéhovah aye ti aidé mo, me ti fâ ngbanga na ndö ti mo ape (Ps. 103:13, 14). Bible apeut nga ti aidé mo. Melissa, so e sara tënë ti lo fade, ayeke tiri lani ti dö sese na asioni pensé. Lo tene: “Dikongo Bible lâ na lâ a-aidé mbi ti ngbâ ti tiri na asioni nzara ti bê ti mbi. A aidé mbi ti girisa ape so mbi yeke ti Jéhovah nga mbi ye ti sara na lo.”—Ps. 119:9.

¹¹ Gi ti leke akpale ti mo gï mo oko ape. Sara lisoro na ndö ni na babâ na mama ti mo. A yeke kete ye ape ti sara lisoro na ndö ti aye so abâ mo wani, me a yeke kota ye ti sara ni. Melissa atene: “Mbi sambela ti wara courage, na pekoni mbi sara tënë ti kpale ti mbi na babâ ti mbi. Na pekoni, mbi wara kota dengo bê. Mbi hinga lani so Jéhovah ayeke na ngia ndali ti mbi.”

12. Tongana nyen la mo peut ti mû anzoni desizion?

¹² Zia si amama-ndia ti Bible afa lege na mo. Tongana mo yeke kono, babâ na mama ti mo ayeke zia lege na mo ti mû adesizion mo wani. Me aye mingi ayeke dä so ade mo hinga ni ape. Tongana nyen la mo peut ti kpe ti sara mbeni faute so ayeke buba songo ti mo na Jéhovah? (aProv. 22:3). Ita-wali Kari afa aye so a-aidé lo ti mû anzoni desizion. Lo hinga so aChrétien so akpengba abezoin mbeni ndia ti fa lege na ala na yâ ti aye kue ape. Lo tene: “Mbi bezoin lani ti hinga amama-ndia ti Bible ahon ti hinga gï andia.” Na ngoi so mo yeke diko Bible, hunda terê ti mo: ‘Nyen la versê so afa na mbi na ndö ti pensé ti Jéhovah? Eskê amama-ndia ayeke dä so apeut ti aidé mbi ti sara ye na lege ni? Tongana a yeke dä, tongana nyen la mbi peut ti wara ye ti nzoni tongana mbi sara ye alingbi na ni?’ (Ps. 19:7; És. 48:17, 18). Tongana mo diko Bible nga mo gbu li na ndö ti amama-ndia so ayeke na yâ ni, mo yeke bâ so a yeke ngangu ape ti mû adesizion so azia ngia na bê ti Jéhovah. Tongana mo ngbâ ti gue na li ni, mo yeke bâ so mo bezoin pëpe mbeni ndia ndali ti aye kue ndali ti so mo comprendre pensé ti Jéhovah na ndö ti aye.

13. Anzoni kamarade apeut ti aidé mo tongana nyen? (aProverbe 13:20).

¹³ Sara kamarade na azo so aye Jéhovah. Akamarade so mo soro apeut ti aidé mo ti ga mbeni Chrétien so akpengba. (Diko aProverbe 13:20.) Ita-wali Sara akomanse lani ti perdre ngia ti lo. Na pekoni, mbeni ye asi so a-aidé lo ti kiri ti duti na ngia. Sara atene: “Mbi wara anzoni kamarade tâ na nzoni ngoi. Yenga oko oko, mbi na mbeni ita-wali so ayeke maseka e yeke manda Tour ti Ba Ndo ndo oko. Mbeni kamarade ti mbi ni nde a-aidé mbi ti komanse ti sara commentaire na ngoi ti abungbi. So akamarade ti mbi a-aidé mbi, mbi komanse ti bâ mandango ye mbi wani nga na sambela na nene ni mingi. Mbi komanse ti duti na kpengba songo na Jéhovah, nga mbi komanse ti duti na ngia encore.”

14. Julien awara anzoni kamarade tongana nyen?

¹⁴ Tongana nyen la mo peut ti sara kamarade na azo so apeut ti aidé mo? Julien, so  ayeke fadeso ancien, atene: “Na ngoi so mbi de maseka, mbi wara anzoni kamarade na fango tënë. Akamarade so ayapu lani na fango tënë, na ala aidé mbi ti bâ tongana nyen la fango tënë apeut ti nzere na mbi. Mbi komanse ti leke na bê ti mbi ti sara kua ti ngoi kue. Mbi ga ti bâ nga so mbi yeke na gbâ ti anzoni kamarade ape ndali ti so mbi gi ti sara kamarade gï na azo so ngu ti mbi na ala ayeke oko. Ambeni ngoi na pekoni, mbi wara nga anzoni kamarade na Béthel. Tapande ti ala a-aidé mbi ti soro anzoni ngia, na a sara si mbi ga nduru mingi na Jéhovah.”

15. Wango wa la Paul amû na Timothée na ndö ti akamarade? (2 Timothée 2:20-22).

¹⁵ Ka tongana mo bâ so mbeni zo na yâ ti congrégation ayeke nzoni kamarade ndali ti mo ape? Paul ahinga lani so ambeni zo na yâ ti congrégation ayeke pensé wala ayeke sara ye tongana aChrétien ape, ni la lo tene na Timothée ti ngbâ ayo na ala. (Diko 2 Timothée 2:20-22.) Songo ti kamarade so e yeke na ni na Jéhovah ayeke ye ti ngangu ngere. A yeke nzoni e zia pëpe si mbeni zo awoko yâ ti songo so e sara ngangu ti duti na ni na Babâ ti e ti yayu.—Ps. 26:4.

16. Aye wa la a yeke nzoni mo gi ti sara?

¹⁶ Gi ti sara anzoni ye. Zia na gbele mo ti sara aye so ayeke sara si mabe ti mo akpengba nga ayeke aidé mo ti ga mbeni Chrétien so akpengba mingi (aÉph. 3:16). Na tapande, mo peut ti mû desizion ti manda Bible nga ti diko ni mingi ahon ti kozo (Ps. 1:2, 3). Wala mo peut ti gi ti sambela fani mingi nga na bê ti mo kue. Peut-être mo bezoin ti sara hange na angia so mo yeke soro nga na fason so mo yeke sara kua na ngoi ti mo (aÉph. 5:15, 16). Tongana Jéhovah abâ ngangu so mo yeke sara ti gue na li ni, a yeke nzere na lo.

17. Tongana mo aidé azo, mo yeke bâ nzoni dä tongana nyen?

¹⁷ Mo yeke ga mbeni Chrétien so akpengba tongana mo aidé ambeni zo. Jésus atene: “Mungo ye na zo aga na ngia mingi ahon warango ye na tïtî zo.” (Kus. 20:35). Mo yeke duti na ngia mingi tongana mo mû ngoi  ti mo nga na ngangu ti mo ti maseka ti aidé ambeni zo. Na tapande, mo peut ti zia na gbele mo ti aidé ambakoro nga na azo so ayeke na kpale ti seni na yâ ti congrégation ti mo. Mo peut ti aidé ala na lege so mo gue mo vo ye na ala wala mo aidé ala ti sara kua na téléphone, tablette wala ordinateur ti ala. Tongana mo yeke ita-koli, mo peut ti gi ti ga wakua ti mungo maboko, tongaso si mo peut ti aidé aita mingi (aPhil. 2:4). Mo yeke fa nga so mo ye azo so ayeke na gigi ti congrégation na lege so mo fa nzoni tënë ti Royaume na ala (Mat. 9:36, 37). Tongana lege ayeke dä, zia na gbele mo ti mû kua ti ngoi kue.

18. Tongana mo mû kua ti ngoi kue, tongana nyen la a peut ti aidé mo ti gue na li ni?

¹⁸ Kua ti ngoi kue apeut ti zi lege na mo mingi ti gue na li ni. Tongana mo yeke pionnier, lege apeut ti zi na mo ti gue na Ekole ti awafango nzoni tënë ti Royaume. Mo peut ti wara lege ti sara kua na Béthel wala na construction. Ita-wali Kaitlyn, so ade maseka so ayeke pionnier, atene: “Ti fa tënë na terê ti aita so akpengba ayeke mbeni kota ye so a-aidé mbi ti gue na li ni na peko ti batême ti mbi. Tapande ti ala apusu mbi ti manda Bible mingi nga ti maï akode ti fango ye ti mbi.”

19. Anzoni ye wa la mo yeke wara tongana mo ngbâ ti gue na li ni?

¹⁹ Tongana mo ngbâ ti gue na li ni, mo yeke wara anzoni ye mingi. Mo yeke buba ngoi ti mo ape ti tomba peko ti aye so ayeke asenge senge ye (1 Jean 2:17). Mo yeke wara pëpe vundu so apeut ti ga na peko ti mungo asioni desizion. Me, aye so mo yeke sara ayeke ga nzoni nga mo yeke duti biani na ngia (aProv. 16:3). Nzoni tapande ti mo ayeke kpengba amba ti mo aChrétien, amaseka nga na ambakoro (1 Tim. 4:12). Kota ye ni ayeke so mo yeke duti na siriri nga na ngia ndali ti so mo zia ngia na bê ti Jéhovah nga mo yeke na kpengba songo na lo.—aProv. 23:15, 16.