1. Ngbanga ti nyen la Jésus ahunda lani na Jéhovah ti bâ ndo na ndö ti adisciple ti lo?

 NA BÏ so na ndade ni Jésus akui, lo hunda na Babâ ti lo ti yayu mbeni mbilimbili ye. Lo hunda na Jéhovah ti bâ ndo na ndö ti adisciple ti lo (Jean 17:15, 20). Tâ tënë, Jéhovah ayeke bâ ndo lakue na ndö ti azo ti lo, so ti tene, lo yeke bâ lege ti ala nga lo yeke bata ala. Me Jésus ahinga lani so Satan ayeke kanga ande lege ngangu na adisciple ti lo. Jésus ahinga nga so adisciple ti lo abezoin mungo maboko ti Jéhovah ti dö sese na Zabolo so ayeke sara sioni bira na ala.

2. Ti gue oko na Psaume 33:18-20, ngbanga ti nyen la tongana e wara akpale e bezoin ti sara mbeto ape?

² Dunia ti Satan ayeke ga na gbâ ti akpale na atâ Chrétien laso. E yeke wara akpale so apeut ti découragé e nga so apeut même ti sara si e doit ti fa wala e yeke be-ta-zo na Jéhovah. Me tongana ti so e yeke bâ ande na yâ ti article so, e doit ti sara mbeto ti ye oko ape. Jéhovah ayeke bâ ndo na ndö ti e, so ti tene, lo bâ akpale so e yeke wara nga lo yeke nduru ti aidé e ti gbu ngangu dä. Zia e bâ atapande use so ayeke na yâ ti Bible so afa tongana nyen la “lê ti Jéhovah ayeke na ndö ti azo so ayeke kpe mbeto ti lo”.—Diko Psaume 33:18-20.

3. Na ngoi wa la e peut ti bâ so e yeke gï e oko?

³ Atâa so e yeke na yâ ti kota sewa ti awakua ti Jéhovah, na ambeni ngoi e peut ti bâ so e yeke gï e oko. Na tapande, amaseka apeut ti bâ so ala yeke gï ala oko na ngoi so ala yeke fa nda ti aye so ala mä na bê na ni na devant ti amba ti ala ti ekole wala na ngoi so ala gue na mbeni fini congrégation. Vundu apeut ti sara ambeni ita wala ala découragé ndali ti so ala pensé so ala  doit ti gbu ngangu gï ala oko. Mbeto apeut ti sara e ti fa atënë ti bê ti e na amba ti e ndali ti so e gi bê ti e so ala peut ti comprendre e ape. Nga na ambeni ngoi, e peut même ti hunda terê ti e eskê mbeni zo apensé biani na e? Atâa nyen la asara si e bâ so e yeke gï e oko, na ambeni ngoi e yeke bâ nga so zo ti mungo maboko na e ayeke dä ape nga e yeke gi bê ti e. Jéhovah aye lâ oko ape ti tene e pensé tongaso. Ngbanga ti nyen la e tene tongaso?

4. Ngbanga ti nyen la prophète Élie atene: “Gï mbi oko la mbi ngbâ”?

⁴ Bâ tapande ti Élie so ayeke be-ta-zo. Lo yeke kpe lani ti bata fini ti lo ahon lango 40 ndali ti so Jézabel adeba yanga ti fâ lo (1 aGbia 19:1-9). Na nda ni, na ngoi so lo yeke gï lo oko na yâ ti mbeni dû ti tênë, lo tene na Jéhovah: “Gï mbi oko la mbi” yeke prophète so angbâ (1 aGbia 19:10). Ambeni prophète ayeke lani na yâ ti kodro ni. Na tapande, Abdias ahonde aprophète 100 si Jézabel afâ ala ape (1 aGbia 18:7, 13). Ka ngbanga ti nyen la Élie abâ lani so lo yeke gï lo oko? Eskê lo pensé lani so aprophète so Abdias ahonde ala akui kue awe? Eskê lo bâ lani so lo yeke gï lo oko ndali ti so zo oko aga ti tene lo na lo asara na Jéhovah ape, même na peko ti so na Hoto ti Carmel Jéhovah afa so lo la lo yeke tâ Nzapa? Peut-être lo bâ so zo oko ahinga ape so fini ti lo ayeke na yâ ti kota kpale wala lo gi bê ti lo so zo oko apensé na lo ape? Bible afa na e atënë ti bê ti Élie kue ape. Me ye so e hinga ayeke so Jéhovah acomprendre ndani so Élie abâ so lo yeke gï lo oko nga lo hinga mbilimbili tongana nyen ti aidé lo.

5. Tongana nyen la Jéhovah adë bê ti Élie so lo yeke gï lo oko ape?

⁵ Jéhovah asara aye mingi ti aidé Élie. Lo sara kue ti tene Élie asara tënë. Fani use lo hunda Élie, lo tene: “Mo yeke sara nyen ge?” (1 aGbia 19:9, 13). Fani use kue Jéhovah adengi mê amä Élie na ngoi so lo yeke zi bê ti lo na lo. Jéhovah akiri tënë na Élie na lege so Lo fa na lo so lo yeke dä nga so Lo yeke na ngangu mingi. Lo dë nga bê ti Élie so amba ti lo awakua ti Jéhovah ayeke mingi (1 aGbia 19:11, 12, 18). Kite ayeke dä ape so bê ti Élie adë na peko ti so lo zi bê ti lo na Jéhovah nga lo mä kiringo tënë ti Jéhovah. Jéhovah amû na Élie ambeni kota  kua. Lo hunda na lo ti tuku mafuta na li ti Hazaël si lo ga gbia ti Syrie, ti tuku mafuta na li ti Jéhu si lo ga gbia ti Israël nga ti zia Élisée tongana prophète (1 aGbia 19:15, 16). So Jéhovah amû akua so na Élie, lo aidé lo ti zia li ti lo na ndö ti anzoni ye. Nzapa amû nga na lo mbeni kota kamarade, Élisée. Tongana nyen la mo peut ti wara mungo maboko ti Jéhovah na ngoi so mo bâ so mo yeke gï mo oko?

6. Nyen la mo peut ti sambela ndali ni tongana mo bâ so mo yeke gï mo oko? (Psaume 62:8).

⁶ Jéhovah atisa mo ti sambela lo. Lo bâ akpale so mo yeke na yâ ni nga lo dë bê ti mo so lo yeke mä asambela ti mo na ngoi kue (1 aThes. 5:17). A nzere na lo ti mä sambela ti awakua ti lo (aProv. 15:8). Nyen la mo peut ti sambela ndali ni tongana mo bâ so mo yeke gï mo oko? Zi bê ti mo kue na Jéhovah tongana ti so Élie asara lani. (Diko Psaume 62:8.) Fa na lo agingo bê ti mo nga ye so a sara na ndö ti mo. Hunda na Jéhovah ti aidé mo ti hinga ye ti sara tongana mo bâ so mo yeke gï mo oko wala vundu asara mo. Na tapande, tongana mo bâ so mo yeke gï mo oko nga mbeto asara mo na ngoi so mo yeke fa tënë na ekole, hunda na Jéhovah ti mû na mo courage so mo bezoin ni ti sara tënë. Mo peut même ti hunda lo ti mû na mo ndara ti fa nda ti aye so mo mä na bê na ni na kode (Luc 21:14, 15). Tongana mo yeke tiri na asioni pensé, hunda Jéhovah ti aidé mo ti sara tënë ni na mbeni Chrétien so akpengba. Mo peut ti hunda Jéhovah ti aidé zo so mo yeke fa atënë ti bê ti mo na lo ti comprendre mo. Zi bê ti mo kue na Jéhovah, bâ tongana nyen la lo yeke kiri tënë na asambela ti mo nga yeda na mungo maboko ti amba ti mo. Tongana mo sara ni, mo yeke bâ so mo yeke gï mo oko ape.

7. Tapande ti Mauricio afa na mo nyen?

⁷ Jéhovah amû na e kue nzoni kua ti sara. Mo peut ti duti sûr so lo bâ akua kue so mo sara na yâ ti congrégation nga na fango tënë nga a yeke kota ye na lê ti lo (Ps. 110:3). Tongana nyen la ti ngbâ ti sara kua ti Jéhovah mingi apeut ti aidé mo tongana mo bâ so mo yeke gï mo oko? Bâ tapande ti Ita-koli Mauricio so ayeke maseka. b Kete na peko ti so Mauricio awara batême, yeke yeke mbeni kota kamarade ti lo akomanse ti zia tâ tënë. Mauricio atene: “So mbi bâ lo zia Jéhovah, mbi yeke na nzoni bango ndo na ndö ti mbi encore ape. Mbi hunda terê ti mbi wala mbi peut ti sara ye alingbi na yanga so mbi mû ti sara na Jéhovah nga ti ngbâ na yâ ti sewa ti Jéhovah. Mbi bâ so mbi yeke gï mbi oko nga mbi pensé so zo oko ayeke comprendre mbi ape.” Nyen la a-aidé lani Mauricio? Lo tene: “Mbi kiri mbi fa tënë mingi. Ye so a-aidé mbi ti zia ti pensé gï na mbi wani nga ti tomba asioni pensé ti mbi. Mbi bâ so mbi yeke na ngia nga  mbi yeke gï mbi oko ape na ngoi so mbi na amba ti mbi e yeke fa tënë.” Même tongana e peut ti fa tënë na terê ti amba ti e aChrétien ape, e yeke wara ngangu tongana e na ala e fa tënë na lege ti alettre nga na téléphone. Mbeni ye nde wa la a-aidé Mauricio? Lo kiri lo tene: “Mbi sara nga akua mingi na yâ ti congrégation. Mbi sara kue ti leke adevoir ti mbi nga ti sara ni. Akua so asara si mbi bâ so Jéhovah nga na amba ti mbi abâ mbi na nene ni.”

8. Angangu kpale apeut ti sara e tongana nyen?

⁸ E yeke ku ti wara akpale na lâ ti nda ni so (2 Tim. 3:1). Me li ti e apeut ti kpe na ngoi so mbeni kpale so e ku terê ti e na ni ape asi. Peut-être gï hio tongaso e wara kpale ti nginza wala docteur atene na e so e yeke na mbeni ngangu kobela wala e perdre mbeni zo so e ye lo. Na angoi tongaso, e peut ti bâ so vundu ahon ndö ti e, mbilimbili tongana na bango ni e wara kpale na peko ti terê wala même tongana ambeni ngangu kpale asi na e na oko ngoi. Me, girisa ape so Jéhovah ayeke bâ ndo na ndö ti e nga grâce na mungo maboko ti lo, e hinga na bê ti e kue so e peut ti luti na lê ti akpale kue.

9. Fa ambeni kpale so Job awara lani.

⁹ Bâ tongana nyen la Jéhovah a-aidé Job so ayeke be-ta-zo. Gï na yâ ti mbeni kete ngoi, Job awara lani angangu kpale. Gï na lango oko, a tene na Job so a nzi wala a fâ anyama ti lo kue nga a fâ azo ti kua ti lo nga na amolenge ti lo kue (Job 1:13-19). Kete na pekoni, na ngoi so Job angbâ ti sara vundu, lo wara mbeni sioni kobela so ason lo mingi nga so abuba terê ti lo (Job 2:7). Aye so asi na Job ayeke lani sioni mingi, ni la lo tene: “Nzara ti gigi asigi na yâ ti mbi awe; mbi ye ti ngbâ na fini pëpe.”—Job 7:16.

10. Tongana nyen la Jéhovah amû na Job aye so lo bezoin ni ti gbu ngangu na yâ ti akpale ti lo? (Bâ foto ti couverture ni.)

¹⁰ Jéhovah ayeke bâ ndo lani na ndö ti Job. So Jéhovah aye Job, Lo mû na lo aye so lo bezoin ni ti gbu ngangu na yâ ti akpale ti lo nga ti ngbâ be-ta-zo. Jéhovah asara tënë na Job, lo dabe ti lo na kota ndara ti Lo nga so na ndoye lo yeke bâ lege ti acréature ti Lo. Lo sara tënë ti gbâ ti anyama so apika bê mingi (Job 38:1, 2; 39:9, 13, 19, 27; 40:15; 41:1, 2). Jéhovah asara nga lani kua na mbeni maseka so ayeke be-ta-zo, so iri ti lo Élihu, ti kpengba Job nga ti dë bê ti lo. Élihu adë bê ti lo so Jéhovah ayeke futa lakue awakua ti lo so agbu ngangu. Me Jéhovah apusu nga Élihu ti mû na Job ambeni wango na ndoye. Élihu a-aidé Job ti zia ti pensé mingi na ndö ti lo wani na lege so lo dabe ti lo so lo yeke kete mingi tongana a haka lo na Jéhovah so acréé dunia (Job 37:14). Jéhovah amû nga mbeni kua na Job. Lo tene na lo ti sambela ndali ti akamarade ti lo ota so asara siokpari (Job 42:8-10). Tongana nyen la Jéhovah ayeke mû maboko na e laso tongana e wara angangu kpale?

11. Tongana nyen la Bible ayeke aidé e na ngoi so e wara akpale?

¹¹ Jéhovah ayeke sara tënë na e droit tongana ti Job ape, me lo yeke sara tënë na e na lege ti Mbeti ti lo, Bible (aRom. 15:4). Lo dë bê ti e na lege so lo mû na e mbeni beku ndali ti kekereke. Bâ gï ambeni pensé ti Bible so apeut ti dë bê ti e na ngoi so e wara akpale. Na yâ ti Bible, Jéhovah adë bê ti e so mbeni ye, na tapande angangu kpale, “alingbi ande ti kangbi e na ndoye ti [lo] pëpe”. (aRom. 8:38, 39). Lo dë nga bê ti e so lo ‘yeke nduru na azo kue so ayeke iri lo’ na lege ti sambela (Ps. 145:18). Jéhovah atene na e so tongana e zia bê ti e na lo, e peut ti gbu ngangu na yâ ti akpale kue nga même ti duti na ngia tongana e yeke bâ pasi (1 aCor. 10:13;  Jacq. 1:2, 12). Bible adabe ti e nga so akpale ti e ayeke teti kete ngoi tongana a haka ni na futa ti lakue lakue so Jéhovah aye ti mû na e (2 aCor. 4:16-18). Jéhovah amû na e beku so e peut ti zia bê ti e dä: Lo yeke futi azo so asara si e yeke wara akpale, so ti tene, Satan Zabolo nga na azo so ayeke sioni tongana lo (Ps. 37:10). Eskê mo bata na li ambeni versê ti Bible so adë bê so ayeke aidé mo ti gbu ngangu na yâ ti akpale so ayeke ga?

12. Nyen la Jéhovah aye ti tene e sara tongana e ye ti wara aye ti nzoni mingi na lege ti Bible?

¹² Jéhovah aye ti tene e zia mbeni ngoi nde ti manda Bible lakue nga ti gbu li mingi na ndö ti aye so e diko. Tongana e sara ye alingbi na aye so e manda, mabe ti e ayeke kpengba mingi nga e yeke ga nduru mingi na Babâ ti e ti yayu. Ye so ayeke sara si e wara ngangu ti gbu ngangu na yâ ti akpale. Jéhovah ayeke mû nga yingo vulu ti lo na azo so azia bê ti ala na Bible. Yingo so apeut ti mû na e “ngangu so ahon ti so zo ayeke na ni” ti gbu ngangu na yâ ti akpale kue.—2 aCor. 4:7-10.

13. Tongana nyen la akobe ti yingo so “ngbâa be-ta-zo so ayeke sara ye na ndara” ayeke mû na e ayeke aidé e ti gbu ngangu na yâ ti akpale?

¹³ Na mungo maboko ti Jéhovah, “ngbâa be-ta-zo so ayeke sara ye na ndara” ayeke sigi na gbâ ti a-article, avidéo nga na abia so apeut ti aidé e ti kpengba mabe ti e nga ti ngbâ nduru na Jéhovah (Mat. 24:45). A lingbi e sara kua nzoni na aye kue so Jéhovah ayeke mû na e. Ade ti ninga ape mbeni ita-wali na États-Unis atene so lo kiri singila mingi ndali ti akobe ti yingo so kue. Lo tene: “Na yâ ti ngu 40 so mbi sara na Jéhovah, fani mingi mbi wara akpale so na yâ ni mbi doit ti fa so mbi yeke be-ta-zo.” Lo wara lani angangu kpale: Mbeni zo ti kpengo na oto so asoulé afâ âta ti lo ti koli, mbeni sioni kobela afâ babâ na mama ti lo nga a wara cancer na terê ti lo fani use. Nyen la a-aidé lani lo ti gbu ngangu? Lo tene: “Jéhovah abâ lege ti mbi lakue. Akobe ti yingo so lo yeke mû na e na lege ti ngbâa be-ta-zo so ayeke sara ye na ndara a-aidé lani mbi ti gbu ngangu. Grâce na ni, tongana Job, mbi peut ti tene: ‘Juska mbi kui, mbi yeke ngbâ gï na ndö ti sarango ye ti mbi ti mbilimbili!’”—Job 27:5.

14. Tongana nyen la Jéhovah ayeke sara kua na amba ti e aChrétien ti mû maboko na e na ngoi ti akpale? (1 aThessalonicien 4:9).

¹⁴ Jéhovah afa na azo ti lo ti ye terê nga ti dë bê ti mba na angoi ti ngangu kpale. (2 aCor. 1:3, 4; diko 1 aThessalonicien 4:9.) Na tapande ti Élihu, aita ti e aye mingi ti aidé e ti ngbâ be-ta-zo na ngoi so e wara akpale (Kus. 14:22).  Gbu li na ndö ti tapande ti Diane so aita ti congrégation ti lo akpengba lo nga a-aidé lo ti ngbâ nduru na Jéhovah na ngoi so koli ti lo awara mbeni ngangu kpale ti seni. Lo tene: “Ye ni ayeke lani ngangu. Me e bâ ngangu maboko ti Jéhovah nga lo bâ lege ti e na ndoye na yâ ti anze so aye ayeke ngangu na e so. Congrégation ti e asara aye mingi ti aidé e. Aita aga abâ e, ala iri e na téléphone nga ala gbu e na yâ ti maboko ti ala, aye so kue a-aidé e ti gbu ngangu. So mbi hinga ti kpe na oto ape, aita asara kue ti tene mbi gue na abungbi nga mbi fa tënë na ngoi so mbi peut ti sara ni.” A nzere na e mingi so e yeke na aita ti congrégation so aye e mingi.

15. Ngbanga ti nyen la e hinga biani so e peut ti gbu ngangu na yâ ti akpale?

¹⁵ E kue e yeke wara ande mbeni kpale. Me, tongana ti so e bâ fade, lâ oko e yeke gbu ngangu na yâ ti kpale gï e oko ape. So Jéhovah ayeke Babâ ti ndoye, lo yeke bâ ndo lakue na ndö ti e. Lo yeke na terê ti e, lo yeke nduru ti mä atënë so e tene ti voro yanga na lo ti aidé e nga lo ye mingi ti aidé e (És. 43:2). E hinga biani so e peut ti gbu ngangu na yâ ti kpale ndali ti so, na nzoni bê, lo mû na e aye kue so e bezoin ni ti gbu ngangu. Lo mû na e cadeau so ayeke ti sambela, lo mû na e Bible, gbâ ti akobe ti yingo nga na sewa ti aita so aye terê ti aidé e na angoi so e bezoin mungo maboko.

16. Tongana nyen la e peut ti zia si Jéhovah angbâ ti bâ lege ti e na ndoye?

¹⁶ E kiri singila mingi so e yeke na mbeni Babâ ti yayu so ayeke bâ ndo na ndö ti e. “Bê ti e asi na ngia ndali ti lo.” (Ps. 33:21). E peut ti kiri singila na Jéhovah so lo yeke bâ lege ti e na ndoye na lege so e gi ti bâ nzoni na lege ti aye kue so lo mû na e ti aidé e. E bezoin nga ti sara part ti e si Nzapa angbâ ti bâ lege ti e. So ti tene, tongana e ngbâ ti sara ye so e peut ti sara ti mä yanga ti Jéhovah nga ti sara ye so ayeke na lege ni na lê ti lo, lo yeke bâ ndo na ndö ti e lakue.—1 Pi. 3:12.