1. Tongana e sara lisoro na ndö ti fason so e ga na yâ ti “tâ tënë,” e yeke bâ nzoni dä tongana nyen?

 “MO WARA tâ tënë tongana nyen?” Kite ayeke dä ape so mo kiri tënë na hunda so fani mingi awe. Na ngoi so e yeke gi ti hinga mbeni ita nzoni, mbeni kozo hunda so e yeke hunda ka na lo la. E ye mingi ti mä tongana nyen la aita ti e ahinga Jéhovah nga ala ye lo, nga a nzere na e ti fa na ala ndani so e ye tâ tënë (aRom. 1:11). Alisoro so adabe ti e so tâ tënë ayeke ye ti ngangu ngere mingi na lê ti e. E leke nga na bê ti e ti ‘ngbâ ti tambela na yâ ti tâ tënë,’ so ti tene, ti ngbâ ti vivre na mbeni fason so ayeke sara si e wara atufa ti Jéhovah nga e zia ngia na bê ti lo.—3 Jean 4.

2. Nyen la e yeke bâ na yâ ti article so?

² Na yâ ti article so, e yeke bâ ambeni raison so ndali ni e ye tâ tënë. Na pekoni, e yeke bâ tongana nyen la e peut ti ngbâ ti fa so e ye pendere cadeau so. Kite ayeke dä ape so aye so e yeke bâ ayeke sara si e kiri singila mingi na Jéhovah so agboto e na yâ ti tâ tënë (Jean 6:44). A yeke sara nga si e duti na nzara mingi ti fa tâ tënë na azo.

3. Kota raison so ndali ni e ye tâ tënë ayeke so wa?

³ E ye tâ tënë ndali ti araison mingi. Kota raison ni ayeke so e ye Jéhovah Nzapa, so tâ tënë alondo na lo. Na lege ti Bible, e hinga so lo yeke ngangu mingi, lo la lo leke yayu nga na sese. E hinga nga so lo yeke Babâ ti e ti yayu so aye e, lo yeke  bâ lege ti e na ndoye (1 Pi. 5:7). E hinga so Nzapa ti e ayeke Nzapa so “asara nzoni bê na zo nga so abâ mawa ti zo, lo sara ngonzo hio hio pëpe, lo si singo na tâ ndoye nga na tâ tënë”. (Ex. 34:6). Jéhovah aye fango ngbanga ti mbilimbili (És. 61:8). Bê ti lo ason ti bâ so e yeke bâ pasi, nga lo yeke nduru, so ti tene, lo yeke na nzara mingi ti hunzi apasi ti e kue na ngoi so lo soro awe (Jér. 29:11). Ngoi ni so ayeke duti ande pendere mingi. So ayeke mbeni raison so ndali ni e ye Jéhovah mingi.

4-5. Ngbanga ti nyen la bazengele Paul ahaka beku ti e na kale ti bateau?

⁴ Mbeni raison nde so ndali ni e ye tâ tënë ayeke so wa? Tâ tënë aga na e gbâ ti anzoni ye. Bâ mbeni tapande ni. Mbeni tâ tënë ti Bible ayeke tënë ti beku ti e ti kekereke. Ti fa so beku ayeke ye ti ngangu ngere, bazengele Paul atene: “Beku so e yeke na ni so, a yeke tongana kale ti bateau ndali ti âme ti e. Beku ni so aluti nzoni nga aluti ngangu.” (aHéb. 6:19). Tongana ti so kale ayeke sara si mbeni bateau ague kirikiri ape, beku ti e apeut ti sara si e luti tongana e wara akpale na yâ ti gigi ti e.

⁵ Ge, Paul ayeke sara tënë ti beku ti guengo na yayu so aChrétien so a soro ala ti gue na yayu aye ni mingi. Me, atënë ti lo ni abâ nga aChrétien so ayeke ku kungo ti ngbâ na fini lakue lakue na yâ ti Paradis na ndö ti sese (Jean 3:16). Biani, ti hinga ye na ndö ti beku ti fini ti lakue lakue asara si e hinga ndani so e yeke na fini.

6-7. So Yvonne amanda ye na ndö ti gigi ti kekereke, lo bâ nzoni dä tongana nyen?

⁶ Bâ ye so asi na Ita-wali Yvonne. Lo kono na yâ ti tâ tënë ape nga na kete ti lo, lo yeke lani na mbeto ti kuâ. Lo dabe ti lo na mbeni tënë so lo diko ni so lo peut ti girisa ni ape. A tene: “Mbeni lâ, zo kue ayeke kui.” Lo tene: “Tënë ni so asara si mbi lango na bï ape, mbi yeke pensé gï na ndö ti gigi ti mbi ti kekereke. Mbi tene: ‘Ti tâ tënë ni, aye ti nzoni adoit ti duti na yâ ti gigi so mingi. Ka mbi yeke na fini ngbanga ti nyen?’ Mbi ye lani ti kui ape!”

⁷ Na pekoni, na ngoi so Yvonne ayeke maseka, lo wara terê na aTémoin ti Jéhovah. Lo tene: “Mbi to nda ti hinga biani so mbi lingbi ti wara fini ti lakue lakue na yâ ti Paradis na ndö ti sese ge.” So ita ti e ti wali so amanda tâ tënë, lo bâ nzoni dä tongana nyen? Lo kiri lo tene: “Lango ayeke kpe encore na lê ti mbi na bï ape ndali ti gingo bê na ndö ti kekereke wala na ndö ti kuâ.” A yeke polele so Yvonne aye tâ tënë ti Bible nga lo ye mingi ti fa na azo beku ti lo ti kekereke.—1 Tim. 4:16.

8-9. (a) Na yâ ti mbeni toli ti Jésus, tongana nyen la mbeni koli afa so lo bâ na nene ni mingi mbeni mosoro so lo wara? (b) Tongana nyen la mo yeke fa so mo bâ tâ tënë na nene ni mingi?

⁸ Mbeni tâ tënë ti Bible ayeke nga nzoni tënë na ndö ti Royaume ti Nzapa. Jésus ahaka tâ tënë ti Royaume so na mbeni mosoro so ahonde. Na Matthieu 13:44, Jésus atene: “Royaume ti yayu ayeke tongana mbeni mosoro so a honde ni na yâ ti yaka. Mbeni koli awara ni, na lo honde ni. So terê ti lo anzere mingi, lo gue lo kä aye ti lo kue na lo vo yaka so.” Bâ so koli ni ayeke gi lani mosoro ni gingo ape. Me na ngoi so lo wara ni, lo sara akota sacrifice ti wara ni. Ti tâ tënë ni, lo kä aye kue so lo yeke na ni. Ngbanga ti nyen? Ngbanga ti so lo hinga so mosoro ni ayeke ye ti ngangu ngere mingi. Ngere ni ahon ngere ti aye kue so lo kä ni.

⁹ Eskê mo bâ tâ tënë tongaso? Kite ayeke  dä ape so mo bâ ni tongaso. E hinga so mbeni ye na yâ ti dunia so, so a peut ti haka ni na ngia so e yeke na ni ti sara na Jéhovah laso ayeke dä ape; e yeke na beku ti duti ande na fini lakue lakue na gbe ti Royaume ti Nzapa. Pasa so e yeke na ni ti duti na kpengba songo na Jéhovah, ngere ni ahon asacrifice kue so e sara. Ye so asara si e yeke na ngia mingi ayeke “ti mû ngia mingi na lo.”—aCol. 1:10.

10-11. Nyen la apusu lani Michael ti sara akota changement na yâ ti gigi ti lo?

¹⁰ Mingi ti e asara akota asacrifice ti zia ngia na bê ti Jéhovah. Ambeni azia akota kua so ala yeke sara na yâ ti dunia so. Ambeni azia ti tomba peko ti mosoro. Ambeni achangé biani biani fason so ala yeke vivre na ni na ngoi so ala hinga Jéhovah. A yeke ye so Michael asara lani. Lo kono na yâ ti tâ tënë ape. Na maseka ti lo, a fa na lo karaté. Lo tene: “Na mbi, a yeke lani kota ye mingi ti ngbâ ti duti na nzoni forme. Na ambeni ngoi, mbi bâ so mbeni zo apeut ti pika mbi ape.” Me na ngoi so Michael akomanse ti manda Bible, lo hinga bango ndo ti Jéhovah na ndö ti sarango ye ti ngangu na zo (Ps. 11:5). Michael atene na ndö ti couple so ayeke aTémoin so amanda Bible na lo, atene: “Ala tene na mbi lâ oko ape ti zia karaté, me ala ngbâ gï ti fa tâ tënë ti Bible na mbi.”

¹¹ So Michael amanda ye mingi na ndö ti Jéhovah asara si lo ye Jéhovah mingi. Ye so andu bê ti lo mingi ayeke so Jéhovah ayeke bâ mawa ti awakua ti Lo. Tongana ngoi ayeke hon, Michael abâ so lo doit ti mû mbeni desizion so ayeke changé fini ti lo. Lo tene: “Mbi hinga lani so ti zia karaté ayeke duti mbeni ye so ayeke ngangu mingi so ade mbi sara ni lâ oko ape. Me mbi hinga nga so a yeke zia ngia na bê ti Jéhovah nga mbi hinga biani so ti sara na lo ayeke nzoni ahon asacrifice kue so mbi sara.” Michael ahinga so tâ tënë so lo wara ayeke ye ti ngangu ngere mingi, ndani la lo yeke nduru ti sara akota changement na yâ ti gigi ti lo.—Jacq. 1:25.

12-13. Tâ tënë ti Bible a-aidé Mayli tongana nyen?

¹² Ti fa so tâ tënë ayeke ye ti ngangu ngere, Bible ahaka ni na mbeni lampe so ayeke za na yâ ti vukongo ndo (Ps. 119:105; aÉph. 5:8). Mayli, so ayeke na Azerbaïdjan, abâ na nene ni mingi mungo maboko so lo wara na lege ti Bible. Bungbi ti vorongo Nzapa ti babâ ti lo ayeke nde na ti mama ti lo. Babâ ti lo ayeke lani Musulman, na mama ti lo ayeke Juif. Lo tene: “Atâa so mbi hinga lani mbi tene Nzapa ayeke dä, ambeni ye asara si li ti mbi aga kirikiri. Mbi yeke hunda lani terê ti mbi, mbi tene: ‘Nzapa asara azo ngbanga ti nyen? Nga ndali ti nyen la a yeke sara pasi na azo, na yâ ti gigi ti ala, lakue lakue na yâ ti enfer?’ Teti so azo atene so aye kue so asi ayeke ye so Nzapa aye la, mbi hunda terê ti mbi, mbi tene: ‘Nzapa la ayeke tâ biani na gunda ti kpale ti azo? Nga a nzere na lo ti bâ ala na bango pasi?’”

¹³ Mayli angbâ lani ti gi kiringo tënë na ahunda ti lo. Na pekoni, lo yeda ti tene a manda Bible na lo, na lo ga na yâ ti tâ tënë. Lo tene: “Atâ tënë ti yâ ti Bible achangé bango ndo ti mbi na ndö ti fini tâ nzoni mingi. Afango ye so mbi wara na yâ ti Mbeti ti Nzapa aga na mbi siriri ti bê.” Tongana Mayli, e kue e yeke gonda Jéhovah, “lo so lo iri [e] ti sigi na yâ ti bingo ti ga na yâ ti pendere lumière ti lo.”—1 Pi. 2:9.

14. Tongana nyen la e peut ti ye tâ tënë mingi? (Bâ nga encadré “ Ambeni hakango ye nde.”)

¹⁴ So ayeke gï ambeni tapande so afa so tâ tënë ayeke ye ti ngangu ngere. Kite ayeke dä  ape so mo peut ti pensé na gbâ ti ambeni nde. Mo peut ti leke ti tene na ngoi ti mbeni mandango ye mo wani, mo gi ti wara ambeni raison so ndali ni e doit ti ye tâ tënë. Tongana e ye tâ tënë mingi, e yeke wara alege mingi ti fa so e ye ni.

15. Mbeni lege so e peut ti fa so e ye tâ tënë ayeke so wa?

¹⁵ E peut ti fa so e ye tâ tënë na lege so e manda lakue Bible nga na ambeti ti e. Atâa e sara ngu oke na yâ ti tâ tënë, gbâ ti aye ayeke lakue dä ti tene e manda ni. Kozo numéro ti Tour ti Ba Ndo atene lani, atene: “Mvene asi singo na yâ ti dunia so, a sara si a peut ti duti ngangu ti tene zo ahinga tâ tënë. Ti wara ni, mo doit ti gi ni gingo. . . . Tongana mo ye ti wara ni, mo doit ti sara effort. A lingbi mo ngbâ gï na ndö ti tâ tënë oko so mo wara ape. . . . A lingbi mo ngbâ ti gi ti wara ni gbani.” Mandango ye ayeke kete ye ape, me a yeke nzoni zo asara effort ti manda ye.

16. Kode ti mandango ye wa la mo bâ so ayeke nzoni? (aProverbe 2:4-6).

¹⁶ Azo kue la aye ti diko ye nga ti manda ye ape. Me Jéhovah atisa e ti “ngbâ ti gi” ti mä yâ ti tâ tënë nzoni mingi. (Diko aProverbe  2:4-6.) Tongana e sara effort ti sara ni, e yeke bâ lakue nzoni dä. Corey atene so, na ngoi so lo yeke diko Bible, lo yeke zia li ti lo na ndö ti mbeni versê oko. Lo tene: “Mbi yeke diko akete tënë na gbe ni kue, mbi yeke diko aversê kue so a fa na lege ti agere-mbeti so a zia na terê ti atënë ti yâ ti versê ni nga mbi yeke sara ambeni recherche na ndö ni. . . . Kode so a-aidé mbi ti manda ye mingi.” Atâa e sara kua na kode so wala na mbeni nde, e yeke fa so e bâ na nene ni tâ tënë tongana e mû ngoi nga e sara effort ti manda ni.—Ps. 1:1-3.

17. Ti vivre alingbi na tâ tënë aye ti tene nyen? (Jacques 1:25).

¹⁷ E hinga so gï ti manda tâ tënë alingbi ape. Ti wara ye ti nzoni mingi, e doit ti vivre alingbi na tâ tënë, so ti tene, e doit ti sara ye alingbi na aye so e manda na yâ ti fini ti e. Tongana e sara tongaso la tâ tënë apeut ti ga na e tâ ngia. (Diko Jacques 1:25.) Tongana nyen la e peut ti hinga so e yeke vivre alingbi na tâ tënë? Mbeni ita-koli atene so ti hinga ni, e doit ti bâ yâ ti asarango ye ti e ti bâ aye so e sara ni nzoni nga na aye so e doit ti changé ni. Bazengele Paul atene: “Ndo so e maï ngbii si e si dä awe so, zia e ngbâ ti tambela mbilimbili na ndö ti oko lege ni so.”—aPhil. 3:16.

18. Ngbanga ti nyen la e yeke sara kue ti ‘ngbâ ti tambela na yâ ti tâ tënë’?

¹⁸ Gbu gï li na ndö ti anzoni ye so e wara so e sara kue ti ‘ngbâ ti tambela na yâ ti tâ tënë’. Gigi ti e aga nzoni nga e zia ngia na bê ti Jéhovah nga na amba ti e aChrétien (aProv. 27:11; 3 Jean 4). So ayeke anzoni raison so ndali ni e ye tâ tënë nga e yeke vivre alingbi na ni.