1-2. Ngbanga ti nyen la Jésus ayeke lani kpô ape?

NA NDANGBA lango ti Jésus na sese tongana zo, lo yeke lani kpô ape. Na yâ ti ngoi kete asioni zo ayeke sara pasi na lo nga ala yeke fâ lo. Me Jésus ayeke gi bê ti lo lani gï pëpe ndali ti kuâ so ayeke ku lo. Lo ye lani Babâ ti lo mingi nga lo ye ti zia ngia na bê ti lo. Jésus ahinga lani so tongana lo ngbâ be-ta-zo na yâ ti ngangu tara so ayeke ga, lo yeke mû mbage na zingo zonga so a bi na ndö ti iri ti Jéhovah. Jésus aye nga lani azo na lo hinga so e yeke duti na beku ti duti na fini ti lakue lakue gï tongana lo ngbâ be-ta-zo na Jéhovah juska na kuâ.

² Atâa so Jésus ayeke lani na yâ ti ngangu tara, lo yeke lani na siriri. Lo tene na abazengele ti lo, lo tene: “Mbi mû na ala siriri ti mbi.” (Jean 14:27). Lo yeke lani na “siriri ti Nzapa”, so ti tene lo yeke lani na dengo bê so zo ayeke wara ndali ti so lo yeke na nzoni songo na Jéhovah. Siriri so asara si Jésus agi bê ti lo ape.​—aPhil. 4:6, 7.

3. Nyen la e yeke bâ na yâ ti article so?

³ Zo oko na popo ti e ayeke wara pëpe mara ti tara so Jésus adoit lani ti gbu ngangu na yâ ni, me azo kue so amû peko ti Jésus ayeke wara atara (Mat. 16:24, 25; Jean 15:20). Na ndö ni, legeoko tongana Jésus, na ambeni ngoi e yeke kpô ape. Tongana nyen la e lingbi ti zia pëpe si gingo bê ahon ndö ti e nga asara si e yeke na siriri ti bê ape? Zia e bâ aye ota so Jésus asara lani na ngoi ti fango tënë ti lo na ndö ti sese nga e bâ tongana nyen la e lingbi ti mû tapande ti lo na ngoi so e wara atara.

4. Na gbungo li na ndö ti 1 aThessalonicien 5:17, mû ambeni tapande so afa so Jésus asambela fani mingi na ndangba lango ti fini ti lo na ndö ti sese.

⁴ Diko 1 aThessalonicien 5:17. Jésus asambela lani fani mingi na yâ ti ndangba lango ti fini ti lo na ndö ti sese. Na ngoi so lo zia lani na sese bungbi ti dango bê na kuâ ti lo, lo sambela na ndö ti mapa na vin ti dango bê na kuâ ti lo ni (1 aCor. 11:23-25). Kozo ti zia place so ala sara lani Pâque dä, lo sambela na adisciple ti lo (Jean 17:1-26). Na ngoi so lo na adisciple ti lo asi na Gethsémané na bï ni so, lo sambela fani mingi (Mat. 26:36-39, 42, 44). Na ndö ni, Jésus atene lani atanga ti tënë ti lo na yâ ti sambela kozo ti tene lo kui (Luc 23:46). Jésus asambela Jéhovah na lo fa na lo aye kue so asi na ndangba lango ti fini ti lo.

5. Ngbanga ti nyen la abazengele asara lani mbeto?

⁵ Mbeni raison so ndali ni Jésus agbu ngangu lani ayeke so lo zia bê ti lo na Babâ ti lo na lo fa ni na lege so lo sambela lo fani mingi. Me abazengele ti lo angbâ lani ti sambela na bï ni so ape. Ye so asara si mbeto asara ala na ngoi so ala wara tara (Mat. 26:40, 41, 43, 45, 56). Tongana e wara atara, e yeke ngbâ be-ta-zo gï tongana e mû tapande ti Jésus nga e “ngbâ ti sambela lakue”. Aye wa la e lingbi ti sambela ndali ni?

6. Tongana nyen la mabe ayeke mû maboko na e ti ngbâ ti duti na siriri?

⁶ E lingbi ti sambela Jéhovah ti tene lo “sara si mabe ti e akiri akono.” (Luc 17:5; Jean 14:1). E bezoin mabe ndali ti so Satan ayeke tara azo kue so amû peko ti Jésus (Luc 22:31). Tongana nyen la mabe ayeke mû maboko na e ti ngbâ ti duti na siriri même tongana e wara  kpale na peko ti terê? Tongana e sara ye kue so ayeke na lege ni ti tene e sara ti hon ndö ti mbeni kpale, mabe ayeke pusu e ti zia kpale ni na maboko ti Jéhovah. Ndali ti so e yeke na confiance so lo hinga tongana nyen ti leke kpale ni nzoni mingi ahon e, e yeke na siriri ti bê.​—1 Pi. 5:6, 7.

7. Atënë ti Robert afa na mo nyen?

⁷ Sambela ayeke mû maboko na e ti ngbâ ti duti na siriri ti bê atâa atara wa la e wara. Bâ tapande ti Robert, mbeni ancien so ayeke be-ta-zo so ayeke fadeso na ngu 80 tongaso. Lo tene: “Wango so ayeke na aPhilippien 4:6, 7 amû maboko na mbi ti hon ndö ti atara mingi na yâ ti fini ti mbi. Mbi doit lani ti hon ndö ti akpale ti nginza. Na ndö ni, teti mbeni ngoi, mbi perdre kua ti mbi ti ancien.” Nyen la amû lani maboko na Robert ti ngbâ ti duti na siriri ti bê? Lo tene: “Tongana mbi komanse ti gi bê ti mbi, hio mbi yeke sambela. Mbi hinga so tongana mbi sambela fani mingi nga na bê kue, mbi yeke na siriri mingi.”

8. Tongana ti so a tene na Jean 8:29, mbeni raison nde wa la ndali ni Jésus ayeke lani na siriri ti bê?

⁸ Diko Jean 8:29. Même na ngoi so azo asara ye ti ngangu na Jésus, lo yeke lani na siriri ti bê ndali ti so lo hinga so lo yeke zia ngia na bê ti Babâ ti lo. Lo ngbâ lani ti mä yanga na angoi so a yeke lani ngangu na lo ti sara ni. Lo ye lani Babâ ti lo nga sarango na Jéhovah ayeke kota ye mingi na yâ ti fini ti lo. Kozo ti tene lo ga na sese, lo yeke lani “wakode-kua” ti Nzapa (aProv. 8:30). Nga, na ngoi so lo yeke lani na sese, lo yapu ti fa ye na ndö ti Babâ ti lo na azo (Mat. 6:9; Jean 5:17). Kua so asara  lani si Jésus ayeke na kota ngia.​—Jean 4:34-36.

9. Tongana nyen la ti mû ngoi mingi ndali ti kua ti fango tënë ayeke mû maboko na e ti ngbâ ti duti na siriri ti bê?

⁹ E lingbi ti sara ye tongana Jésus na lege so e mä yanga ti Jéhovah nga e “duti lakue na ye mingi ti sara na yâ ti kusala ti Seigneur”. (1 aCor. 15:58). Na ngoi so e “mû ngoi ti [e] kue” na kua ti fango tënë, e lingbi ti duti na nzoni bango ndo mingi na ndö ti akpale ti e (Kus. 18:5). Na tapande, azo so e yeke wara ala na fango tënë, fani mingi ala wara angangu kpale ahon e. Me, tongana ala komanse ti ye Jéhovah nga ala sara ye alingbi na awango ti lo, fini ti ala achangé na ala yeke na ngia mingi. Lakue tongana e bâ ye tongaso asi, e yeke na confiance so Jéhovah ayeke bâ lege ti e. Confiance so amû maboko na e ti ngbâ ti duti na siriri ti bê. Mbeni ita-wali so na yâ ti fini ti lo kue atiri na kota vundu nga na bibe so lo yeke ye oko ape abâ so tënë so ayeke tâ tënë. Lo tene: “Tongana mbi fa tënë mingi, mbi yeke hon ndö ti vundu ti mbi nga mbi yeke na ngia mingi. Mbi pensé so raison ni ayeke so tongana mbi yeke na fango tënë, mbi bâ so mbi yeke nduru mingi na Jéhovah.”

10. Atënë ti Brenda afa na mo nyen?

¹⁰ Bâ nga tapande ti mbeni ita-wali so iri ti lo ayeke Brenda. Lo na molenge ti lo ti wali awara mbeni ngangu kobela. Brenda ayeke gï na yâ ti puse ti azo ti bubango gere nga lo yeke na ngangu mingi ape. Na ambeni ngoi lo yeke fa tënë da na da, me mingi ni lo yeke fa tënë na lege ti alettre. Lo tene: “Na ngoi so mbi ga ti bâ so na yâ ti dunia so yorö ti kaï na kobela ti mbi ayeke dä ape, mbi wara lege ti zia li ti mbi kue na ndö ti kua ti mbi ti fango tënë. Ti tâ tënë ni, fango tënë asara si mbi pensé pëpe na ndö ti agingo bê ti mbi. Me mbi zia li ti mbi na ndö ti mungo maboko na azo so mbi fa tënë na ala na yâ ti territoire ti congrégation ti e. Na ndö ni, na ngoi so mbi yeke fa tënë, mbi yeke pensé lakue na ndö ti beku ti kekereke so mbi yeke na ni.”

11-13. (a) Aye wa la abazengele nga na ambeni zo asara na Jésus so afa so ala yeke atâ kamarade ti lo? (b) Mungo maboko ti akamarade ti Jésus asara lo tongana nyen?

¹¹ Na ngoi kue so Jésus ayeke fa lani tënë, abazengele ti lo so ayeke be-ta-zo afa so ala yeke atâ kamarade ti lo. Ala yeke lani mara ti kamarade so Bible asara tënë ti lo, atene: “Mbeni kamarade ayeke dä so aye zo ahon ita ti zo ni.” (aProv. 18:24). Jésus abâ lani akamarade tongaso na nene ni mingi. Na ngoi ti kua ti fango tënë ti lo, aita ti lo ti koli na lege ti mitele ayeke lani na mabe na lo ape (Jean 7:3-5). Na mbeni ngoi, afami ti lo atene même so ye asara li ti lo (Marc 3:21). Me na bï so na ndade ni Jésus akui, lo tene na abazengele ti lo so ayeke be-ta-zo, lo tene: “Ala yeke azo so angbâ na terê ti mbi na yâ ti atara so asi na mbi.”​—Luc 22:28.

¹² Na ambeni ngoi abazengele azia vundu na bê ti Jésus, me lo bâ lani gï afaute ti ala ape, lo bâ gï mabe so ala yeke na ni na lo (Mat. 26:40; Marc 10:13, 14; Jean 6:66-69). Na ndangba bï ti Jésus na akoli so ayeke be-ta-zo so, kozo ti tene a fâ lo, lo tene na ala, lo tene: “Mbi yeke iri ala akamarade ti mbi, ngbanga ti so mbi fa na ala aye kue so mbi mä na yanga ti Babâ ti mbi.” (Jean 15:15). Kite ayeke dä ape so akamarade ti Jésus akpengba lo lani mingi. Maboko so ala mû na Jésus na yâ ti kua ti fango tënë ti lo asara si lo yeke lani na ngia mingi.​—Luc 10:17, 21.

¹³ Na ndö ti abazengele so ayeke lani akamarade ti Jésus, lo yeke lani na ambeni koli na awali so ayeke nga akamarade ti lo so amû maboko na lo na yâ ti kua ti fango tënë na  ambeni nzoni lege. Ambeni atisa lo lani na ndo ti ala si lo wara kobe ti te (Luc 10:38-42; Jean 12:1, 2). Ambeni avoyagé legeoko na lo nga ala mû na lo ambeni ye ti ala (Luc 8:3). Jésus ayeke lani na anzoni kamarade ndali ti so lo kue lo yeke nzoni kamarade ndali ti ala. Lo sara anzoni ye na ala nga lo hunda na ala pëpe ti sara aye so ahon ngangu ti ala. Atâa so Jésus ayeke lani mbilimbili-kue, lo kiri lani singila na akamarade ti lo so ayeke mbilimbili-kue ape ndali ti maboko so ala mû na lo. Na ndö ni, kite ayeke dä ape so ala mû maboko na lo ti ngbâ ti duti na siriri ti bê.

14-15. Tongana nyen la e lingbi ti wara anzoni kamarade? Tongana nyen la ala lingbi ti mû maboko na e?

¹⁴ Anzoni kamarade ayeke mû maboko na e ti ngbâ be-ta-zo na Jéhovah. Nzoni lege ti wara anzoni kamarade ayeke ti duti mbeni nzoni kamarade (Mat. 7:12). Na tapande, Bible awa e ti mû ngoi ti e nga na ngangu ti e ti mû maboko na amba ti e, mbilimbili ala so ayeke “na bezoin” ni (aÉph. 4:28). Mo lingbi ti pensé na mbeni zo ti congrégation ti mo so mo lingbi ti mû maboko na lo? Mo lingbi ti gue ti vo ye na mbeni wafango tënë so alingbi pëpe ti sigi na da ndali ti so lo yeke mbakoro wala lo yeke na kpale ti seni? Mo lingbi ti mû kobe na mbeni sewa so ayeke na kpale ti nginza? Tongana mo hinga ti sara kua na site jw.org^® nga na application JW Library^®, mo lingbi ti mû maboko na aita ti congrégation ti mo ti sara kua na ni? Tongana e yeke sara kua mingi ti mû maboko na amba ti e, kite ayeke dä ape so e yeke duti na ngia.​—Kus. 20:35.

¹⁵ Akamarade so e yeke na ni ayeke mû maboko na e na ngoi so e yeke na yâ ti atara nga  ala yeke mû maboko na e ti ngbâ ti duti na siriri ti bê. Legeoko tongana ti so Élihu amä Job na ngoi so lo yeke sara tënë ti atara so asi na lo, akamarade ti e ayeke mû maboko na e na lege so ala yeke kanga bê ti mä e na ngoi so e yeke fa agingo bê ti e na ala (Job 32:4). A lingbi e hunda pëpe na akamarade ti e ti mû desizion na place ti e, me e yeke sara ye na ndara tongana e mä awango so ala mû na e na lege ti Bible (aProv. 15:22). Nga, legeoko tongana ti so Gbia David asara terê ti lo kete lo yeda na mungo maboko ti akamarade ti lo, a lingbi e zia pëpe si baba akanga lege na e ti yeda na mungo maboko so akamarade ti e aye ti mû na e na ngoi so e bezoin ni (2 Sam. 17:27-29). Biani, anzoni kamarade tongaso ayeke mbeni cadeau so alondo na Jéhovah.​—Jacq. 1:17.

16. Ti gue oko na aPhilippien 4:6, 7, oko lege so e lingbi ti wara siriri ayeke so wa? Fa ndani so mo tene tongaso.

¹⁶ Diko aPhilippien 4:6, 7. Ngbanga ti nyen la Jéhovah atene so e lingbi ti wara siriri so lo mû “na lege ti Christ Jésus”? Ngbanga ti so e lingbi ti wara siriri ti bê nga ti ngbâ ti duti na ni gï tongana e hinga kua so Jésus ayeke na ni ti sara na yâ ti ye so Nzapa aleke na bê ti lo ti sara nga e yeke na confiance na ni. Na tapande, Nzapa ayeke pardonné asiokpari ti e kue na lege ti ye so Jésus afuta ti zi azo (1 Jean 2:12). Ye so adë bê ti e mingi. So Jésus ayeke Gbia ti Royaume ti Nzapa, lo yeke zi ande asioni ye kue so Satan nga na dunia ti lo aga na ni na ndö ti e (És. 65:17; 1 Jean 3:8; Apoc. 21:3, 4). Ye so amû na e mbeni pendere beku. Atâa so Jésus amû na e mbeni kua so ayeke ngangu, lo yeke na e nga lo yeke mû maboko na e na lâ ti nda ni ti aye ti ngoi so (Mat. 28:19, 20). Ye so asara si e yeke na mbeto oko ape. Dengo bê, beku nga na dutingo na mbeto ape ayeke kota ye so e bezoin ni ti duti na siriri ti bê.

17. (a) Tongana nyen la mbeni Chrétien alingbi ti ngbâ ti duti na siriri ti bê? (b) Tongana ti so a tene na Jean 16:33, nyen la e yeke wara lege ti sara?

¹⁷ Tongaso, tongana nyen la mo lingbi ti ngbâ ti duti na siriri ti bê tongana angangu tara ayengi mo? Mo lingbi ti duti na ni tongana mo sara aye so Jésus asara lani. Kozoni, sambela nga ngbâ ti sambela atâa nyen la asi. Use ni, mä yanga ti Jéhovah nga yapu na fango tënë même tongana a yeke ngangu ti sara ni. Nga ota ni, bâ ndo na mbage ti akamarade ti mo ti mû maboko na mo na yâ ti atara. Na pekoni, siriri ti Nzapa ayeke bata bibe ti mo nga na bê ti mo. Nga, legeoko tongana Jésus, mo yeke hon ndö ti atara kue.​—Diko Jean 16:33.