1. Nyen la awakua ti Nzapa kue aye ti sara? Ngbanga ti nyen? (Bâ foto ti couverture ni.)

JÉSUS CHRIST amû yanga na adisciple ti lo ti ‘gue, ti sara si azo na popo ti amara kue aga adisciple.’ (Mat. 28:19). Awakua ti Nzapa kue so ayeke be-ta-zo aye ti hinga tongana nyen la ala lingbi ti sara kua so amû na ala ti sara so “kue.” (2 Tim. 4:5). A yeke na lege ni ndali ti so kua so ayeke kota mingi, ayeke nzoni ye ti tene zo asara na ngoi ti lo nga a doit ti sara ni hio ahon tanga ti akua kue. Ye oko, a lingbi ti duti ngangu na e ti mû ngoi mingi ti fa tënë tongana ti so e ye.

2. Akpale wa la alingbi ti sara si a yeke ngangu na e ti sara kusala ti e ti Chrétien?

² Ambeni kota kua nde ayeke dä so amû ngoi nga na ngangu ti e. Peut-être a lingbi e sara kua l’heure mingi lango oko oko ti wara aye so e na sewa ti e e yeke na bezoin ni. Peut-être a yeke ngangu na e ti bâ lege ti akua kue so e doit ti sara ndali ti sewa ti e, wala e yeke na kobela, wala e yeke na yâ ti kota vundu wala e yeke na akpale so gango mbakoro aga na ni. Tongana nyen la e lingbi ti sara kusala ti e ti Chrétien kue na ngoi so e yeke gbu ngangu na yâ ti akpale so?

3. Atënë ti Jésus so ayeke na Matthieu 13:23 amû lege na e ti hinga nyen?

³ Tongana dutingo ti e amû lege na e pëpe ti mû ngoi mingi ndali ti kua ti Jéhovah, a lingbi e découragé ape. Jésus ahinga lani so e kue e lingbi pëpe ti lë lengo ti Royaume so alingbi terê. (Diko Matthieu 13:23.) Jéhovah abâ na nene ni mingi aye kue so e yeke sara na yâ ti kua ti lo tongana e yeke sara ye kue so e lingbi ti sara (aHéb. 6:10-12). Me na mbage, peut-être e bâ so dutingo ti e amû lege na e ti sara kua mingi ahon ti so e yeke sara. Na yâ ti article so, e yeke bâ tongana nyen la  e lingbi ti zia kua ti e ti Chrétien kozo na yâ ti fini ti e, ti ngbâ ti duti na aye mingi ape na yâ ti fini ti e nga ti maï akode ti e ti fango tënë nga na ti fango ye. Me, kozoni, ti sara kusala ti e ti Chrétien kue aye ti tene nyen?

4. Ti sara kusala ti e ti Chrétien kue aye ti tene nyen?

⁴ Na nduru tënë, ti sara kusala ti e ti Chrétien kue aye ti tene a lingbi e sara kue ti fa tënë mingi nga ti fa ye mingi alingbi na ngangu ti e. Me ti sara kusala ti e ti Chrétien kue aye gï pëpe ti sara tënë ti wungo ti ngoi so e mû ti fa na tënë. Raison so apusu e ti fa tënë ayeke kota mingi na Jéhovah. Ndali ti so e ye Jéhovah nga na azo, e yeke sara kusala ti e ti Chrétien * na âme ti e kue (Marc 12:30, 31; aCol. 3:23). Ti sara na Nzapa na âme ti e kue aye ti tene ti mû ngangu kue so e yeke na ni ti sara na kua ti lo. Tongana e bâ na nene ni pasa so e yeke na ni ti fa tënë, e yeke gi ti fa nzoni tënë na azo mingi.

5-6. Mû mbeni tapande ti fa tongana nyen la mbeni zo so ayeke na ngoi mingi ape ti fa tënë alingbi ti zia fango tënë kozo na yâ ti fini ti lo.

⁵ Imaginé mbeni maseka-koli so aye kua ti fango mbeti mingi. Lo yeke na ngia ti fa mbeti na ngoi kue so lo lingbi ti sara ni. Na nda ni, lo wara kua ti fango mbeti na yâ ti mbeni ekole privé na anda-yenga. Ye oko, nginza so a futa na lo alingbi na abezoin ti lo kue ape. Tongaso, lo sara kua ti batango nginza na yâ ti mbeni magazin na lundi ti si na vendredi. Atâa so lo mû mingi ti ngoi ti lo ti sara kua na yâ ti magazin ni, lo ye fango mbeti mingi. Lo ye ti maï kode ti fango mbeti ti lo nga ti sara kua ti fango mbeti mingi. Lakue tongana lege azi na lo ti fa mbeti lo yeke sara ni même si ayeke gï teti kete ngoi.

⁶ Legeoko nga, peut-être mo lingbi pëpe ti fa tënë mingi tongana ti so mo ye. Me a yeke ye so mo ye ti sara la. Mo sara ngangu ti maï kode ti mo ti ndu bê ti azo na nzoni tënë. So mo doit ti bâ lege ti aye mingi, peut-être mo yeke hunda terê ti mo tongana nyen la mo lingbi ti zia kua ti fango tënë kozo na yâ ti fini ti mo.

7-8. Tongana nyen la e lingbi ti mû tapande ti bango ndo ti Jésus na ndö ti kua ti fango tënë?

⁷ Na yâ ti bango ndo ti Jésus na ndö ti fango tënë, lo zia na e mbeni tapande so apika bê mingi. Ye so ayeke lani kota ye mingi na lê ti lo ayeke fango tënë ti Royaume ti Nzapa na azo (Jean 4:34, 35). Lo tambela akilomètre ngbangbo mingi ti fa tënë na gbâ ti azo. Lo mû angoi kue so lege azi na lo ti fa tënë na azo na ando so azo ayeke gue dä mingi nga na yâ ti da ti azo. Jésus azia lani kua ti fango tënë kozo na yâ ti fini ti lo.

⁸ E lingbi ti sara ye tongana Christ na lege so e gi alege so azi ti fa nzoni tënë na azo na ngoi kue nga na ndo kue so e lingbi ti sara ni. E yeke nduru ti zia lege ti aye so asara si e duti nzoni tongaso si e wara lege ti fa tënë (Marc 6:31-34; 1 Pi. 2:21). Ambeni ita na yâ ti congrégation ayeke sara kua ti pionnier spécial, ti pionnier permanent wala ti pionnier auxiliaire. Ambeni ita amanda mbeni yanga ti kodro wala ala gue na mbeni ndo so a bezoin awafango tënë dä mingi. Ye oko, awafango tënë ti Royaume so alingbi pëpe ti sara aye so la ayeke sara mingi ti kua ti fango tënë. Atâa mo lingbi ti fa tënë mingi wala mo lingbi ti fa tënë gï kete, Jéhovah ahunda na e pëpe ti sara ye so ahon ngangu ti e. Lo ye ti tene e kue e wara ngia na yâ ti kua ti lo na ngoi so e yeke fa “pendere nzoni tënë ti Nzapa so ayeke na ngia”.​—1 Tim. 1:11; Deut. 30:11.

9. (a) Tongana nyen la Paul azia kua ti fango tënë kozo na yâ ti fini ti lo atâa so lo doit lani ti sara kua ti wara na nginza? (b) Nyen la Kusala 28:16, 30, 31 afa na e na ndö ti bango ndo ti Paul na ndö ti fango tënë ti lo?

⁹ Bazengele Paul azia na e nzoni tapande na lege so lo zia kua ti fango tënë kozo na yâ ti fini ti lo. Na ngoi so lo yeke lani na Corinthe na ngoi ti use voyage ti lo ti missionnaire, lo yeke lani na nginza mingi ape tongaso lo leke atente ti wara na nginza. Ye oko, kua ti lekengo atente ayeke lani ye so ayeke kota mingi na lê ti Paul ape. Lo sara lani kua so ti wara na aye so lo bezoin ni tongaso si lo lingbi ti fa nzoni tënë na azo ti Corinthe “senge senge”. (2 aCor. 11:7). Atâa so Paul adoit lani ti sara mbeni kua ti nginza, lo ngbâ ti zia kua ti fango tënë kozo na yâ ti fini ti lo nga lo fa tënë na lâ ti Sabbat oko oko kue. Na peko ti so dutingo ti Paul aga nzoni ahon ti kozo, lo wara lege ti fa tënë mingi. Paul “akomanse ti mû ngoi ti lo kue na tënë ni, lo yeke sara tënë na aJuif ti fa so Jésus ayeke Christ.” (Kus. 18:3-5; 2 aCor. 11:9). Ambeni ngoi na pekoni, na ngoi so Paul ayeke sara kanga na da ti lo wani na Rome ngu use, lo fa tënë na azo so aga ti bâ lo nga lo sû alettre. (Diko Kusala 28:16, 30, 31.) Paul aleke na bê ti lo ti zia lege pëpe si mbeni ye agboto lê ti lo na terê ti kua ti fango tënë. Lo tene: “So e wara kusala so . . . , e yeke kiri na peko pëpe.” (2 aCor. 4:1). Legeoko tongana Paul, même tongana e doit ti mû ngoi mingi ti sara kua ti nginza, e lingbi ti ngbâ ti zia kua ti fango tënë kozo na yâ ti fini ti e.

10-11. Tongana nyen la e lingbi ti sara kusala ti e ti Chrétien kue tongana e yeke na akpale ti seni?

¹⁰ Tongana e lingbi pëpe ti fa tënë da na da mingi ndali ti so e yeke mbakoro wala ndali ti so e yeke na mbeni kpale ti seni, e lingbi ti fa tënë na ambeni lege nde. Akozo Chrétien afa tënë lani na azo na ndo kue so ala yeke dä. Ala wara lege ti fa tâ tënë na azo da na da, na ando so azo ayeke gue dä mingi nga na alege kue so azi, so ti tene ala fa tënë na ando kue so ‘azo ayeke duti’ dä (Kus. 17:17; 20:20). Tongana e lingbi ti tambela mingi ape, peut-être e lingbi ti duti na ndo so azo ayeke gue dä mingi ti fa tënë na azo so ayeke hon. Wala peut-être e lingbi ti fa tënë na alege kue so azi, na lege ti  alettre wala na lege ti téléphone. Awafango tënë mingi so ambeni ye akanga lege na ala ngangu ti fa tënë da na da awara ngia mingi na fango tënë na alege so.

¹¹ Atâa kpale ti seni asara si mo lingbi ti fa tënë mingi ape, mo lingbi ti sara kusala ti mo ti Chrétien kue. Kiri mo gbu li na ndö ti tapande ti bazengele Paul. Lo tene: “Mbi wara ngangu ti sara aye kue ndali ti lo so lo mû ngangu ni na mbi.” (aPhil. 4:13). Paul abezoin lani ngangu so na ngoi so terê ti lo ason na ngoi ti mbeni voyage ti lo ti missionnaire. Lo tene na azo ti Galate, lo tene: “A yeke lani ndali ti mbeni kobela so ayeke na terê ti mbi la mbi wara lege ti fa na ala nzoni tënë ti kozoni.” (aGal. 4:13). Legeoko nga, akpale ti seni alingbi ti zi lege na mo ti fa nzoni tënë na azo, na tapande na adocteur, na a-infirmier nga na azo so ayeke bâ lege ti mo. Mingi ti azo so ayeke na place ti kua na ngoi so awafango tënë asi na da ti ala.

12. Ti ngbâ ti sara si “lê ti mo ayeke gï na ndö ti ye oko” aye ti tene nyen?

¹² Jésus atene: “Lampe ti terê ti zo ayeke lê. Tongaso, tongana lê ti mo ayeke gï na ndö ti ye oko [wala “ayeke simple”], terê ti mo kue ayeke za lumière.” (Mat. 6:22; kete tënë na gbe ni.) Lo ye ti tene nyen la? Lo ye ti tene a lingbi e ngbâ ti duti na aye mingi na yâ ti fini ti e ape wala e zia lê ti e na ndö ti mbeni ye oko so e ye ti sara, na e zia pëpe si mbeni ye agboto lê ti e wala ague na e yorongo na ni. Jésus azia na e tapande ni na lege so lo zia li ti lo gï na ndö ti kua ti fango tënë nga lo fa na adisciple ti lo ti ngbâ ti zia li ti ala gï na ndö ti kua ti Jéhovah  nga na Royaume ti Lo. E yeke mû tapande ti Jésus na lege so e zia kua ti fango tënë kozo na yâ ti fini ti e, so ti tene e “gi kozoni Royaume ti Nzapa nga na mbilimbili ti lo”.​—Mat. 6:33.

13. Nyen la alingbi ti mû maboko na e ti zia li ti e gï na ndö ti kua ti e ti Chrétien?

¹³ Mbeni lege ti zia lê ti e na ndö ti kua ti e ti fango tënë ayeke ti duti na aye mingi ape na yâ ti fini ti e, tongaso si e lingbi ti mû ngoi mingi ti mû maboko na azo ti hinga Jéhovah nga ti ye lo. * Na tapande, eskê e lingbi ti changé l’heure ti kua ti nginza ti e tongaso si e lingbi ti mû ngoi mingi ti fa tënë na yâ ti yenga? E lingbi ti kiri na gbe ni ngoi so e yeke mû ti sara na angia so ayeke te ngoi ti zo mingi?

14. Achangement wa la mbeni koli na wali ti lo asara ti fa tënë mingi?

¹⁴ A yeke ye so mbeni ancien, so iri ti lo ayeke Elias, na wali ti lo asara la. Lo tene: “E lingbi lani pëpe ti sara kua ti pionnier na lê ni lê ni, me ambeni ye ayeke lani dä so e lingbi ti sara ti mû lege na e ti fa tënë mingi. Tongaso e sara ambeni kete ye so amû lege na e ti fa tënë mingi. Na tapande, e vo aye mingi ape, e zia lege ti ambeni ngia so e bâ so amû ngoi ti e mingi nga e hunda na patron ti e ti changé l’heure ti kua ti e tongaso si e lingbi ti wara ngoi mingi ti sara ambeni ye nde. Ye ti peko ni ayeke so e wara lege ti fa tënë na lakui, e manda Bible na azo mingi nga e fa tënë même na milieu ti yenga fani use nze oko oko. So ngia si e wara!”

15-16. Ti gue oko na 1 Timothée 4:13, 15, tongana nyen la e lingbi ti ngbâ ti maï akode ti fango tënë ti e? (Bâ encadré “ Aye so mbi ye ti sara so ayeke mû maboko na mbi ti sara kusala ti mbi ti Chrétien kue.”)

¹⁵ Mbeni lege so e lingbi ti sara kusala ti e ti Chrétien kue ayeke ti maï akode ti fango tënë  ti e. Azo so ayeke sara ambeni kua abezoin ti tene a fa ye na ala lakue tongaso si ala lingbi ti maï hingango ye ti ala nga na akode ti kua ti ala. Ti awafango tënë ti Royaume ayeke nga tongaso. E bezoin ti ngbâ ti manda tongana nyen la e lingbi ti fa tënë nzoni mingi.​—aProv. 1:5; diko 1 Timothée 4:13, 15.

¹⁶ Me tongana nyen la e lingbi ti ngbâ ti maï na yâ ti kua ti e ti fango tënë? E yeke sara ni tongana e dengi mê nzoni ti mä awango so e wara na ngoi ti Bungbi ti kusala ti e nga na gigi ti e ti Chrétien, so e yeke sara yenga oko oko. Bungbi so afa na e anzoni ye so alingbi ti mû maboko na e ti maï akode ti fango tënë ti e. Na tapande, na ngoi so ita so amû li ni na bungbi ni ayeke mû wango na a-élève so asara adevoir, e lingbi ti bâ ambeni wango so alingbi ti mû maboko na e ti maï kode ti fango tënë ti e. Ti peko tongana e yeke fa nzoni tënë na mbeni zo, e lingbi ti sara ye alingbi na ni. E lingbi ti hunda ita so ayeke mû li ni na groupe ti fango tënë ti e ti mû maboko na e wala ti fa tënë legeoko na lo wala e hunda ti fa tënë legeoko na mbeni wafango tënë so ayeke na kode mingi, mbeni pionnier wala surveillant ti circonscription. Tongana e yeke sara kua mingi na agbakuru so e yeke fa na ye na azo, fango tënë nga fango ye ayeke nzere na e mingi.

17. Tongana mo sara kua ti mo ti Chrétien kue, nyen la mo yeke wara?

¹⁷ A yeke mbeni kota pasa so Jéhovah amû lege na e ti “sara kua oko” na lo (1 aCor. 3:9). Tongana mo “hinga biani aye so ayeke akota ye mingi ahon atanga ni” nga mo zia lï ti mo gï na ndö ti kusala ti e ti Chrétien, mo yeke “sara na Jéhovah na ngia na bê.” (aPhil. 1:10; Ps. 100:2). So mo yeke mbeni wakua ti Nzapa, mo lingbi ti duti na kite ape so lo yeke mû na mo ngangu so mo bezoin ni ti sara kua ti mo ti Chrétien atâa akpale wala aye so alingbi ti kanga lege na mo (2 aCor. 4:1, 7; 6:4). Atâa dutingo ti mo amû lege na mo ti fa tënë kete wala mingi, mo lingbi ti “duti na ngia ndali ti kua ti [mo] wani” tongana mo fa tënë na âme ti mo kue (aGal. 6:4). Tongana mo sara kua ti mo ti Chrétien kue, mo yeke fa so mo ye Jéhovah nga na azo. “Na sarango tongaso mo yeke sö ande mo wani nga na ala so ayeke mä mo.”​—1 Tim. 4:16.