1-2. (a) Eunice ayeke lani zo wa? So lo yeke mama, akpale wa la lo wara? (b) Mo tene nyen na ndö ti foto ti couverture ni?

 ATÂA so Bible afa ape aye so apassé na lango ti batême ti Timothée, e peut ti imaginé ngia so mama ti lo Eunice ayeke na ni na lango ni so (aProv. 23:25). Imaginé tongana nyen la terê ti lo anzere mingi na ngoi so lo bâ Timothée so ayeke luti na yâ ti ngu. Lo yeke he ngia na ngoi so Loïs, âta ti Timothée, aluti na terê ti lo. Eunice aluti kpô na ngoi so a yeke yôro Timothée na yâ ti ngu ni. Eunice amä bruit ti ngu ni na ngoi so Timothée ayeke sigi na gbe ni na ngia na yanga, na ngu ti lê ti Eunice akomanse ti sigi ndali ti so terê ti lo anzere mingi. Eunice afa na molenge ti lo ti ye Jéhovah na Molenge ti lo, Jésus Christ, atâa so a yeke lani kete ye ape. Akpale wa la lo hon ndö ni lani na ngoi so lo gi ti fa ye na molenge ti lo?

² Babâ na mama ti Timothée ayeke lani na yâ ti oko bungbi ti vorongo Nzapa ape. Babâ ti lo ayeke lani Grec, mama ti lo nga na âta ti lo ayeke aJuif (Kus. 16:1). Peut-être Timothée ade lani maseka na ngoi so Eunice na Loïs aga aChrétien. Me babâ ti lo aga Chrétien ape. Timothée ayeke soro bungbi ti vorongo Nzapa wa? Peut-être ngu ti lo alingbi lani awe ti tene lo mû desizion lo wani. Eskê lo yeke soro bungbi ti vorongo Nzapa ti babâ ti lo? Eskê lo yeke mû peko ti angobo ti aJuif so a fa na lo na ngoi so lo de kete? Wala lo yeke yeda ti ga disciple ti Jésus Christ?

3. Ti gue oko na aProverbe 1:8, 9, Jéhovah abâ kua so amama ayeke sara ti aidé amolenge ti ala ti ga akamarade ti lo tongana nyen?

³ Legeoko nga, amama so ayeke aChrétien aye azo ti sewa ti  ala mingi. Ye so ala ye mingi ayeke ti aidé amolenge ti ala ti gi ti duti na kpengba songo na Jéhovah. Nzapa ti e abâ a-effort ti ala na nene ni mingi. (Diko aProverbe 1:8, 9.) Jéhovah a-aidé amama mingi so afa na amolenge ti ala ti ye lo nga ti sara na lo.

4. Akpale wa la amama ayeke wara ni laso?

⁴ A yeke na lege ni so, na ambeni ngoi, mbeni mama ayeke gi bê ti lo wala amolenge ti lo ayeke soro ande ti sara na Jéhovah, tongana ti so Timothée asara lani. Ababâ na amama ahinga tongana nyen la dunia ti Satan ayeke pusu amolenge ti ala ti sara asioni ye (1 Pi. 5:8). Na ndö ni, amama mingi ayeke bata amolenge ti ala gï ala oko, wala koli ti ala ayeke voro Jéhovah ape. Na tapande, Ita-wali Christine * atene: “Koli ti mbi ayeke nzoni babâ nga lo ye e mingi, me lo ye lani oko ape ti tene mbi fa ye na amolenge ti e ti tene ala ga aTémoin ti Jéhovah. Teti angu mingi, fani mingi mbi yeke toto, mbi yeke gi bê ti mbi wala mbeni lâ amolenge ti mbi ayeke voro Jéhovah.”

5. Nyen la e yeke bâ na yâ ti article so?

⁵ Tongana mo yeke mama so ayeke Chrétien, mo peut ti aidé amolenge ti mo ti sara na Jéhovah, tongana ti so Eunice asara lani. Na yâ ti article so, e yeke bâ tongana nyen la mo peut ti mû tapande ti lo ti fa ye na amolenge ti mo na lege ti tënë ti yanga ti mo nga na sarango ye ti mo. E yeke bâ nga tongana nyen la Jéhovah ayeke aidé mo.

6. Tongana ti so a fa na 2 Timothée 3:14, 15, Timothée aga Chrétien tongana nyen?

⁶ Na ngoi so Timothée ade lani kete, mama ti lo asara kue ti fa na lo “atënë ti Nzapa so a sû na mbeti,” tongana ti so aJuif ahinga. Tâ tënë, lo hinga lani ye kue ape, ndali ti so lo hinga ye oko ape na ndö ti Jésus Christ. Me, aye so Timothée amanda na yâ ti Mbeti ti Nzapa amû lege na lo ti wara aye so lo bezoin ni ti ga Chrétien. Me eskê lo yeke ga Chrétien? So Timothée ayeke maseka, lo yeke na droit ti soro ti ga Chrétien wala pëpe. Kite ayeke dä ape so a-effort ti mama ti Timothée ayeke mbeni ye so asara si “a ga na lo” ti yeda na tâ tënë na ndö ti Jésus. (Diko 2 Timothée 3:14, 15.) A nzere lani na Eunice mingi so lo fa ye na ndö ti Jéhovah na molenge ti lo, atâa so a yeke lani ngangu. Biani, Eunice asara ye lani alingbi na iri ti lo, so alondo na mbeni tënë so ndani aye ti tene “sö benda.”

7. Tongana nyen la Eunice apeut lani ti aidé molenge ti lo ti ngbâ ti gue na li ni na peko ti batême ti lo?

⁷ Na ngoi so Timothée awara lani batême, lo si na mbeni kota ye so lo zia na gbele lo. Me Eunice angbâ lani ti gi bê ti lo na ndö ti lo na peko ti batême ni. Nyen la molenge ti lo ayeke sara na yâ ti gigi ti lo na pekoni? Eskê lo yeke sara kamarade na asioni zo? Eskê lo yeke gue ti sara ekole na Athènes nga lo yeke yeda na afango ye ti awandara ti kâ so ayeke apaïen? Eskê lo yeke buba ngoi ti lo, ngangu ti lo nga na lâ ti maseka ti lo na lege so lo sara kua ngangu ti ga zo ti mosoro? Eunice apeut lani ti mû desizion na place ti Timothée ape, me lo peut ti aide lo. Lo peut lani ti aidé lo tongana nyen? Lo peut lani ti ngbâ ti sara ngangu ti fa na molenge ti lo ti ye Jéhovah mingi nga ti kiri singila ndali ti Molenge ti lo. A yeke gï pëpe ababâ wala amama so wali wala koli ti ala asara na Jéhovah ape la ayeke na kpale ti aidé amolenge ti ala ti ye Jéhovah. Même tongana babâ na mama ni ayeke sara na Jéhovah, a peut ti duti ngangu na ala ti aidé amolenge ti ala ti sara na Jéhovah. Nyen la ababâ  na amama apeut ti manda na lege ti tapande ti Eunice?

8. Tongana nyen la mbeni mama apeut ti aidé koli ti lo so ayeke Témoin ti fa ye na amolenge ti ala na ndö ti Jéhovah?

⁸ Manda Bible na amolenge ti mo. Aita-wali, tongana koli ti ala ayeke Témoin, Jéhovah aye ti tene ala aidé lo ti fa ye na amolenge ti ala na ndö ti Lo. Mbeni ye so ala peut ti sara ni ayeke ti tene lakue ala mû maboko na vorongo Nzapa na yâ ti sewa. Ala sara nzoni tënë ni, nga ala gbu li na ndö ti aye so ala peut ti sara ti tene vorongo Nzapa na yâ ti sewa anzere. Peut-être ala peut ti aidé koli ti ala ti leke mbeni mbilimbili ye ti sara na ngoi ni. Na ndö ni, tongana ambeni molenge ti ala alingbi awe ti manda Bible na yâ ti buku Ngbâ na fini lakue lakue!, peut-être ala na koli ti ala apeut ti manda ni na ala.

9. Mbeni mama so koli ti lo ayeke Témoin ape apeut ti wara mungo maboko na ndo wa?

⁹ Ambeni mama adoit ti manda Bible na amolenge ti ala ndali ti so ala yeke kumbamba wala koli ti ala ayeke Témoin ape. Tongana a yeke dutingo ti mo la, gi bê ti mo ahon ndö ni ape. Jéhovah ayeke aidé mo. Sara kua na anzoni gbakuru ti fango na ye so bungbi ti Jéhovah amû na e ti fa na ye na amolenge ti mo. Mo peut ti hunda ambeni babâ wala mama so ahinga ti fa ye nzoni ti hinga tongana nyen la ala yeke sara kua na agbakuru so na ngoi ti vorongo Nzapa na yâ ti sewa (aProv. 11:14). * Jéhovah apeut nga ti aidé mo ti sara lisoro na amolenge ti mo. Hunda lo ti aidé mo ti hinga aye so ayeke na yâ ti li ti amolenge ti mo nga na aye so ayeke na yâ ti bê ti ala (aProv. 20:5). Mbeni senge hunda tongana: ‘Kota kpale ti mo na ekole ayeke so wa?’ apeut ti sara si ala sara mbeni pendere lisoro.

10. Na mbeni lege wa la mo peut ti aidé amolenge ti mo ti hinga Jéhovah?

¹⁰ Gi alege nde nde ti fa ye na amolenge ti mo na ndö ti Jéhovah. Sara lisoro na ndö ti Jéhovah nga na gbâ ti anzoni ye so lo sara na mo (Deut. 6:6, 7; És. 63:7). Ye so ayeke tâ kota ye mingi tongana mo lingbi pëpe ti manda ye na ala lakue na yanga-da. Christine, so e sara tënë ti lo fade, atene: “Lege azi na mbi mingi ape ti sara tënë na ndö ti Jéhovah, tongaso mbi yeke gbu angoi kue so lege azi na mbi ti sara ni. Mbi na amolenge ti mbi e yeke gue ka ti tambela wala e yeke kpe na ngo, na e yeke sara lisoro na ndö ti apendere ye so Jéhovah acréé nga na gbâ ti ambeni ye so ayeke aidé ala ti ga akamarade ti lo. Na ngoi so mbi bâ so amolenge ti mbi apeut ti manda Bible ala wani, mbi wa ala ti sara ni.” Na ndö ni, sara nzoni tënë ti bungbi ti Jéhovah nga na aita ti mo. Kasa a-ancien ape. Tënë so mo tene na ndö ti ala apeut ti aidé amolenge ti mo ti sara lisoro na ala na ngoi so ala bezoin mungo maboko.

11. Ti gue oko na Jacques 3:18, ngbanga ti nyen la a yeke kota ye ti sara si siriri amaï na yanga-da?

¹¹ Sara si siriri amaï na yanga-da. Fa lakue na koli ti mo nga na amolenge ti mo so mo ye ala. Tene nzoni tënë ti koli ti mo nga tene atënë so ane lo, fa na amolenge ti mo ti sara nga tongaso. Tongana mo sara tongaso, a yeke duti ngangu na amolenge ti mo ape ti manda ye na ndö ti Jéhovah. (Diko Jacques 3:18.) Bâ tapande ti Jozsef, so lo yeke pionnier spécial na Roumanie. Na ngoi so lo yeke kono, babâ ti lo asara si a yeke ngangu mingi na lo na mama ti lo nga na aita ti lo ti sara na Jéhovah. Jozsef atene: “Mama ti mbi asara kue ti tene siriri aduti na yanga-da ti e. Lakue tongana  Babâ asara ye na ngangu mingi, Mama ayeke sara ye na nzoni bê mingi. Tongana lo bâ so a yeke ngangu na e ti ne babâ ti e nga ti mä yanga ti lo, lo yeke sara lisoro na e na ndö ti aÉphésien 6:1-3. Na pekoni, lo yeke fa na e anzoni sarango ye ti babâ ti e nga lo yeke aidé e ti hinga ndani so e doit ti ye lo. A aidé sewa ti e duti na siriri.”

12. Ti gue oko na 2 Timothée 1:5, tapande ti Eunice asara nyen na ndö ti Timothée?

¹² Diko 2 Timothée 1:5. Eunice azia lani nzoni tapande na Timothée. Lo doit lani ti fa na lo so e yeke fa so e yeke na tâ mabe na lege ti aye so e sara (Jacq. 2:26). Kite ayeke dä ape so Timothée abâ lani so ye so apusu mama ti lo ti sara ye ayeke so lo ye Jéhovah mingi. Timothée abâ lani biani so sarango na Jéhovah asara si mama ti lo ayeke na ngia. Tapande ti Eunice asara lani nyen na ndö ti Timothée? Bazengele Paul atene so Timothée ayeke lani na kpengba mabe tongana ti mama ti lo. Lo wara lani kpengba mabe gï tongaso ape. Timothée abâ lani tapande ti mama ti lo na lo mû peko ni. Legeoko nga laso, amama mingi amû maboko na azo ti sewa ti ala ti sara na Jéhovah “na lege ti tënë pëpe”. (1 Pi. 3:1, 2). Mo peut ti sara nga tongaso. Na lege wa?

13. Ngbanga ti nyen la a yeke nzoni mbeni mama azia songo ti lo na Jéhovah na kozo ndo?

¹³ Zia songo ti mo na Jéhovah na kozo ndo (Deut. 6:5, 6). Tongana ti amama mingi, mo sara asacrifice mingi. Mo yeke mû ngoi ti mo, nginza ti mo, mo yeke fâ lango na lê ti mo nga mo yeke sara ambeni ye ti mû na amolenge ti mo aye so ala bezoin ni. Me a yeke nzoni aye so amû ngoi ti mo kue ape si mo wara ngoi pëpe ti kpengba songo ti mo na Jéhovah. Zia lakue mbeni ngoi nde ti sambela, ti manda Bible mo wani nga ti gue na abungbi. Tongana mo sara ni, mo yeke ga nduru mingi na Jéhovah nga mo yeke zia nzoni tapande na azo ti sewa ti mo nga na aita.

14-15. Tapande ti Leanne, Maria nga na João afa na mo nyen?

¹⁴ Gbu li na ndö ti tapande ti ambeni maseka so tapande ti mama ti ala apusu ala ti ye Jéhovah nga ti sara confiance na lo. Leanne, molenge ti Christine, atene: “Tongana Babâ ayeke na yanga-da, e peut lani ti manda Bible ape. Me Mama ayeke gue lakue na abungbi. Atâa so e hinga ye lani mingi na ndö ti Bible ape, aye so lo sara a-aidé e ti duti na kpengba mabe. Ngoi mingi kozo si e gue na abungbi, e hinga so aTémoin ti Jéhovah ayeke fa tâ tënë.”

¹⁵ Maria, so na ambeni ngoi babâ ti lo apunir ala ndali ti so ala gue na bungbi, atene: “Mama ti mbi ayeke mbeni oko ti aita-wali so asara ye na mbeto oko ape. Na ngoi so mbi de molenge, na ambeni ngoi mbi ke ti sara ambeni ye ndali ti so mbi sara mbeto ti tënë so amba ti mbi ayeke tene. Me so mbi bâ so lo sara ye na mbeto oko ape nga so lakue lo zia Jéhovah kozo na yâ ti gigi ti lo, a aidé mbi ti sara mbeto ti zo ape.” João, so babâ ti lo ake na ala ti sara lisoro na ndö ti Jéhovah wala Bible na yanga-da, atene: “Peut-être ye so a-aidé mbi mingi ayeke so Mama ayeke lani nduru ti dö aye kue ti zia ti nzere na babâ ti mbi, me lo zia ti ye Jéhovah ape.”

16. Tapande ti mbeni mama apeut ti aidé ambeni zo tongana nyen?

¹⁶ Amama, ala girisa ape so tapande ti ala apeut ti aidé ambeni zo. Na lege wa? Bâ tongana nyen la tapande ti Eunice a-aidé bazengele Paul. Lo tene mabe ti Timothée, so ayeke ti handango lê ti zo oko pëpe so, ayeke “kozo  na . . . Eunice”. (2 Tim. 1:5). Lawa la Paul abâ mabe ti Eunice ti kozoni? A yeke peut-être na ngoi ti kozo voyage ti lo ti missionnaire la lo wara terê na Loïs nga na Eunice na Lystre, na peut-être lo aidé ala ti ga aChrétien (Kus. 14:4-18). Gbu li kete: Na ngoi so Paul atokua mbeti na Timothée ngu 15 na pekoni, lo ngbâ ti dabe ti lo na aye so mabe apusu Eunice ti sara nga lo fa lo tongana mbeni tapande ti mû peko ni. A yeke polele so tapande ti lo akpengba lani bazengele Paul mingi nga peut-être aChrétien mingi so ayeke na ngoi ni kâ. Tongana mo yeke bata amolenge ti mo gï mo oko wala koli ti mo ayeke Témoin ape, hinga biani so nzoni tapande ti mo ayeke kpengba amba ti mo nga ayeke pusu ala ti sara ye.

17. Nyen la a yeke nzoni mo sara tongana, na bango ni, molenge ti mo aye ti sara na Jéhovah ape, atâa so mo sara ngangu ti fa ye na lo?

¹⁷ Ka tongana, na bango ni, molenge ti mo aye ti sara na Jéhovah ape, atâa a-effort so mo sara? Girisa ape so ti fa ye na molenge ayeke mû ngoi. Tongana ti so foto so afa, tongana mo lu mbeni ngongoa ti kobe, peut-être na ambeni ngoi mo yeke hunda terê ti mo wala a yeke sigi na a yeke lë lê ti kobe. Atâa so mo lingbi pëpe ti hinga biani wala a yeke lë lengo, mo yeke ngbâ ti tuku ngu dä ti tene a kono (Marc 4:26-29). Legeoko nga, so mo yeke mbeni mama, peut-être na ambeni ngoi mo yeke hunda terê ti mo wala a-effort so mo yeke sara ayeke aidé biani amolenge ti mo ti  ye Jéhovah. Mo peut ti mû desizion na place ti amolenge ti mo ape. Me tongana mo ngbâ ti sara ye kue so mo peut ti sara ti fa ye na ala, ala peut ti ga akamarade ti Nzapa.—aProv. 22:6.

18. Tongana nyen la Jéhovah apeut ti aidé amolenge ti mo ti ga akamarade ti lo?

¹⁸ Depuis giriri ti ga na ni, Jéhovah a-aidé amaseka mingi ti ga akamarade ti lo (Ps. 22:9, 10). Lo lingbi nga ti aidé amolenge ti mo ti ga akamarade ti lo, tongana ala ye (1 aCor. 3:6, 7). Même tongana amolenge ti mo asara na Jéhovah na bê ti ala kue ape, lo yeke ngbâ ti ye ala (Ps. 11:4). Tongana ala sara mbeni ye ti fa so ala ye ti zia ngia na bê ti Jéhovah, lo yeke aidé ala ti ga akamarade ti lo (Kus. 13:48; 2 Chron. 16:9). Lo peut ti aidé mo ti tene mbeni nzoni tënë na ngoi so amolenge ti mo ayeke tâ na bezoin ni (aProv. 15:23). Wala lo peut ti pusu mbeni ita-koli wala ita-wali so ayeke sara ye na nzoni bê na yâ ti congrégation ti aidé ala. Même tongana amolenge ti mo akono awe, Jéhovah apeut ti dabe ti ala na mbeni ye so mo fa na ala ândö (Jean 14:26). Tongana mo ngbâ ti fa ye na amolenge ti mo na lege ti tënë ti yanga ti mo nga na tapande ti mo, Jéhovah ayeke futa mo.

19. Ngbanga ti nyen la mo peut ti hinga biani so mo nzere na Jéhovah?

¹⁹ A yeke pëpe aye so amolenge ti mo asoro ti sara la ayeke sara si Jéhovah aye mo. Lo ye mo ndali ti so mo ye lo. Tongana mo yeke bata amolenge ti mo gï mo oko, Jéhovah amû zendo ti duti Babâ ti amolenge ti mo nga Zo so ayeke bata mo (Ps. 68:5). Amolenge ti mo wani la ayeke soro ti sara na Jéhovah wala pëpe. Me tongana mo ngbâ ti zia bê ti mo na Jéhovah ti aidé mo nga mo sara ye kue so mo peut ti sara, mo yeke nzere na lê ti lo.