1. Nyen la ayeke sara si e duti na ngia mingi?

 JÉHOVAH aye ti tene e duti na ngia. E hinga ni ndali ti so ngia ayeke mbeni mbage ti lengo ti yingo vulu ti lo (aGal. 5:22). So mungo ye na zo aga na ngia mingi ahon warango ye na tïtî zo, e yeke duti na ngia mingi tongana e fa tënë mingi nga e aidé aita ti e na alege nde nde.—Kus. 20:35.

2-3. (a) Tongana ti so a fa na aGalate 6:4, aye use wa la ayeke aidé e ti ngbâ ti duti na ngia na yâ ti kua ti Jéhovah? (b) Nyen la e yeke bâ na yâ ti article so?

² Tongana ti so a fa na aGalate 6:4, bazengele Paul asara tënë ti aye use so ayeke aidé e ti ngbâ ti duti na ngia. (Diko ni.) Kozo ni, a yeke nzoni e sara ye kue so e peut ti sara ndali ti Jéhovah. Tongana e yeke sara ye kue so e peut ti sara ndali ti Jéhovah, a yeke nzoni e duti na ngia (Mat. 22:36-38). Use ni, a lingbi e haka terê ti e na amba ti e ape. Atâa nyen la e peut ti sara ndali ti so e yeke na nzoni seni, a fa ye na e nzoni wala e yeke na kode ti sara ni, a yeke nzoni e kiri singila na Jéhovah. Aye kue so e yeke na ni, lo la lo mû na e. Me, tongana amba ti e ayeke sara ambeni mbage ti fango tënë nzoni ahon e, a yeke nzoni e duti na ngia so ala yeke sara kua na akode ti ala ti gonda Jéhovah, me pëpe ti yâa iri ti ala wala ti gi gï nzoni ti ala. Tongaso, e yeke sara mandako na ala ape, me e yeke manda ye na mbage ti ala.

³ Na yâ ti article so, e yeke bâ aye so apeut ti aidé e tongana e découragé ndali ti so e lingbi pëpe ti sara aye kue so e ye ti sara na yâ ti kua ti Jéhovah. E yeke bâ nga tongana nyen la e peut ti sara kua nzoni mingi na akode so e yeke na ni nga aye so e lingbi ti manda na lege ti tapande ti amba ti e.

4. Nyen la apeut ti sara si e découragé? Mu mbeni tapande ti fa ni.

⁴ Ambeni ita alingbi pëpe ti sara aye kue so ala ye ti sara na yâ ti kua ti Jéhovah ndali ti so ala ga mbakoro wala terê ti ala ason, na a sara si ala découragé. A yeke ye so asi na Carol. Lo yeke fa lani tënë na ndo so a bezoin awafango tënë dä mingi. Na ngoi ni so, lo manda Bible na azo 35 nga mingi ti ala so lo aidé ala amû terê ti ala na Nzapa nga awara batême. Fango tënë ti Carol aga na anzoni ye mingi. Na pekoni, terê ti lo ason ngangu, na mingi ni lo doit ti ngbâ gï na yanga-da. Carol atene: “Mbi hinga so ndali ti so terê ti mbi ason, mbi lingbi pëpe ti sara ye so amba ti mbi apeut ti sara, me mbi bâ so mbi yeke be-ta-zo tongana ala ape. Mbi peut ape ti sara ye kue so mbi ye ti sara, na a découragé mbi.” Carol aye ti sara ye kue so lo peut ti sara na Jéhovah. So ayeke nzoni mingi. E hinga biani so Nzapa ti e so abâ mawa ti zo abâ nzoni bibe ti lo na nene ni.

5. (a) Nyen la a yeke nzoni e girisa ape tongana e lingbi pëpe ti sara aye kue so e ye ti sara? (b) Tongana ti so afoto so afa, tongana nyen la ita-koli so asara lakue aye so lo peut ti sara na yâ ti kua ti Jéhovah?

⁵ Tongana na ambeni ngoi mo découragé ndali ti so mo peut ti sara mbeni ye ape, hunda terê ti mo: ‘Nyen la Jéhovah ahunda na mbi?’ Jéhovah aye ti tene mo sara ye kue so mo peut ti sara na yâ ti dutingo ti mo ti fadeso. Gbu li na ndö ti ye so: Mbeni ita-wali so ayeke na ngu 80 adécouragé ndali ti so lo lingbi pëpe ti fa tënë mingi tongana ti so lo yeke sara lani na ngu 40. Lo pensé so atâa lo sara ye kue so lo peut ti sara, a nzere na Jéhovah ape. Me eskê a yeke tâ tënë? Gbu li na ndö ni. Tongana ita-wali so asara ye kue so lo peut ti sara na ngoi so lo yeke lani na ngu 40 nga lo ngbâ ti sara ni na ngu 80, a fa so lo zia lâ oko ape ti sara ye kue so lo peut ti sara. Tongana e komanse ti bâ so ye so e yeke sara na yâ ti kua ti Jéhovah alingbi ape ti nzere na lo, a lingbi e girisa ape so Jéhovah la ayeke fa ye so alingbi ti nzere na lo. Tongana e sara ye kue so e peut ti sara, Jéhovah ayeke tene na e: “So nzoni!”—Bâ Matthieu 25:20-23.

6. Nyen la e peut ti manda na lege ti tapande ti Maria?

⁶ A yeke ngangu ape ti tene e duti na ngia tongana e zia li ti e na ndö ti ye so e peut ti sara me pëpe na ndö ti ye so e lingbi pëpe ti sara. Gbu li na ndö ti tapande ti Ita Maria, so ayeke na mbeni kobela so asara si lo peut ti fa tënë mingi ape. Kozo, vundu ahon ndö ti lo na lo bâ so lo yeke ye oko ape. Me na peko ti so Maria agbu li na ndö ti mbeni ita-wali na yâ ti congrégation so ayeke gï na ndö ti gbogbo, lo mû desizion ti aidé lo. Maria atene: “Mbi leke ti tene mbi na lo e fa tënë na lege ti téléphone nga na lettre. Lakue tongana e fa tënë legeoko, mbi kiri na yanga-da mbi yeke na ngia nga a nzere na mbi so mbi wara lege ti aidé ita ti mbi.” E nga kue e peut ti duti na ngia mingi tongana e zia li ti e na ndö ti ye so e peut ti sara me pëpe na ndö ti ye so e lingbi pëpe ti sara. Me ka tongana e peut ti sara ambeni kua ti Jéhovah mingi wala nzoni?

7. Nzoni wango wa la bazengele Pierre amû na aChrétien?

⁷ Na yâ ti kozo lettre ti bazengele Pierre, lo wa aita ti lo ti sara kua na akode ti ala kue ti kpengba na aita ti ala. Pierre atene: “Ti lingbi na matabisi so zo oko oko awara, ala mû ni ala sara na kua na amba ti ala tongana anzoni wabatango ye ti kota nzobe ti Nzapa.” (1 Pi. 4:10). A yeke nzoni e sara ye kue so e peut ti sara ti sara kua na akode ti e na e gi bê ti e ape so amba ti e apeut ti sara bê na terê ti e wala  ala peut ti découragé. Tongana e sara pëpe ye kue so e peut ti sara ndali ti so e gi bê ti e ndali ti ye so amba ti e ayeke pensé, e yeke sara pëpe ye kue so e peut ti sara ndali ti Jéhovah.

8. Ti gue oko na 1 aCorinthien 4:6, 7, ngbanga ti nyen la a yeke nzoni e kpe ti pika kate na ndö ti akode ti e?

⁸ A lingbi e sara kua na akode ti e nzoni mingi, me e doit ti sara hange si e pika kate ndali ni ape. (Diko 1 aCorinthien 4:6, 7.) Na tapande, peut-être mo hinga nzoni mingi tongana nyen ti komanse ti manda Bible na azo. Sara kua na kode so. Me a yeke kota ye ti tene mo girisa ape so mo doit ti pika kate na ndö ni ape. Imaginé so ade ti ninga ape mo fa tënë pendere mingi na mbeni zo na asara si mo komanse ti manda Bible na lo. Mo ye mingi ti sara tënë ni na aita ti groupe ti mo ti fango tënë. Me na ngoi so mo wara terê na ala, mbeni ita-wali akomanse ti tene na ala so lo zia mbeni périodique na mbeni zo na fango tënë. Ita-wali ni azia périodique na mbeni zo, me mo komanse ti manda Bible na mbeni zo. Nyen la mo yeke sara? Mo hinga so ye so asi na mo so ayeke kpengba aita ti groupe ni, me peut-être mo yeke yeda ti ku ti fa ni na ala na mbeni ngoi nde, ndali ti so mo ye pëpe ti tene ita-wali so azia périodique so abâ so lo fa tënë nzoni ape tongana mo. Sarango ye na nzoni bê la. Me ngbâ ti hunda azo ti manda Bible na ala. Kode so mo yeke na ni so, sara na kua.

9. A yeke nzoni e sara kua na akode ti e tongana nyen?

⁹ Zia e girisa ape so akode kue so e yeke na ni, Nzapa la amû na e. A yeke nzoni e sara kua na akode so ti kpengba aita ti congrégation, me pëpe ti yâa iri ti e (aPhil. 2:3). Tongana e sara kua na ngangu ti e nga na akode ti e ti sara ye so bê ti Nzapa aye, a yeke sara si e duti na ngia, pëpe ndali ti so e sara ye nzoni ahon amba ti e wala e yeke kota ahon ala, me ndali ti so e sara kua na akode ti e ti mû gonda na Jéhovah.

10. Ngbanga ti nyen la a yeke na lege ni ape ti haka terê ti e na amba ti e?

¹⁰ Tongana mbeni zo asara hange ape, lo peut ti komanse ti haka aye so lo sara ni nzoni na aye so mbeni zo apeut ti sara ni nzoni ape. Na tapande, mbeni ita-koli apeut ti mû adiskur pendere mingi. So ayeke ye so lo yeke sara ni nzoni la. Me lo peut ti pensé so lo yeke nzoni mingi ahon mbeni ita-koli so ahinga pëpe ti sara diskur nzoni. Me peut-être ita-koli so ahinga nzoni mingi ti yamba agene, ti fa ye na amolenge ti lo wala lo yapu na fango tënë. A nzere na e mingi so aita mingi ayeke sara kua na akode ti ala ti sara na Jéhovah nga ti aidé amba ti ala.

11. Ngbanga ti nyen la a yeke nzoni e gi ti mû tapande ti Jésus?

¹¹ Atâa so a yeke nzoni e kpe ti haka terê na amba ti e, e peut ti wara aye ti nzoni tongana e manda ye na lege ti tapande ti aita so ayeke be-ta-zo. Nzoni tapande so e peut ti manda ye na lege ni ayeke ti Jésus. Atâa so lo yeke lani mbilimbili-kue, e peut ti manda ye na lege ti apendere sarango ye ti lo nga na aye so lo sara (1 Pi. 2:21). Tongana e sara ye kue so e peut ti sara ti mû tapande ti lo mbilimbili, e yeke ga nzoni wakua ti Jéhovah nga e yeke fa tënë nzoni mingi.

12-13. Nyen la e peut ti manda na lege ti tapande ti Gbia David?

¹² Na yâ ti Bible, e yeke wara gbâ ti atapande ti akoli nga na awali so ayeke be-ta-zo so e peut ti mû tapande ti ala, atâa so ala yeke lani mbilimbili-kue ape (aHéb. 6:12). Gbu li na ndö ti Gbia David, so Jéhovah atene lo yeke “mbeni koli so bê ti [ni] aye lo,” wala tongana ti so mbeni Bible nde atene, “zo so alingbi na bê ti [ni]”. (Kus. 13:22). Me, David ayeke lani mbilimbili-kue ape. Lo sara lani ambeni kota faute. Atâa so kue, lo zia na e nzoni tapande. Ngbanga ti nyen? Ngbanga ti so na ngoi so a kiri na lo na nzoni lege, lo gi araison ape. Me lo yeda na ngangu wango so a mû na lo nga lo hunda pardon na bê ti lo kue ndali ti aye so lo sara. A sara si Jéhovah apardonné lo.—Ps. 51:3, 4, 10-12.

¹³ E peut ti manda ye na lege ti tapande ti David na lege so e hunda terê ti e: ‘Tongana a mû na mbi wango, mbi yeke sara ka ye tongana nyen? Eskê mbi yeke yeda hio na afaute ti mbi, wala mbi yeke gi araison? Eskê mbi yeke ka nduru ti tene so faute ni ayeke ti ambeni zo? Eskê mbi yeke sara kue ti kiri ti sara afaute ni so ape?’ Mo peut ti hunda terê ti mo na a-oko hunda so na ngoi so mo yeke diko mbaï ti ambeni koli na awali so ayeke be-ta-zo so Bible asara tënë ti ala. Eskê akpale so ala wara lani ayeke oko na ati so mo wara? Apendere sarango ye wa la ala yeke lani na ni? Na yâ ti aye ni, hunda terê ti mo: ‘Tongana nyen la mbi peut ti sara ye nzoni tongana wakua be-ta-zo ti Jéhovah so ahon ti kozo?’

14. Tongana nyen la e peut ti bâ nzoni tongana e bâ asarango ye ti amba ti e aChrétien?

¹⁴ E peut nga ti bâ nzoni tongana e bâ asarango ye ti amba ti e aChrétien, atâa ala yeke amaseka wala ambakoro. Na tapande, eskê mo peut ti pensé na mbeni zo na yâ ti congrégation ti mo so ayeke gbu ngangu na yâ ti  mbeni tara, peut-être amba ti lo apusu lo ti sara sioni ye, afami ti lo akanga lege na lo wala lo yeke na kpale ti seni? Eskê mo bâ ambeni pendere sarango ye ti lo so mo ye ti mû tapande ni? Tongana mo bâ nzoni tapande ti lo, mo peut ti hinga anzoni ye so ayeke aidé mo ti gbu ngangu na yâ ti atara so mo wara. E kiri singila mingi so aita so azia na e nzoni tapande ti mabe.—aHéb. 13:7; Jacq. 1:2, 3.

15. Wango wa la bazengele Paul amû so apeut ti aidé e ti ngbâ ti duti na ngia na yâ ti kua so e yeke sara na Jéhovah?

¹⁵ Ti tene siriri nga na beoko amaï na yâ ti congrégation, a lingbi e oko oko kue e sara ye kue so e peut ti sara. Gbu li na ndö ti akozo Chrétien. Ala yeke lani na akode nga na akua nde nde (1 aCor. 12:4, 7-11). Me ye so apusu lani ala ape ti sara mandako na mba nga aga na kangbi ape. Paul awa ala kue ti sara ye so ala doit ti sara “ti leke terê ti Christ”. Paul atene na aÉphésien, atene: “Tongana membre ni oko oko asara kua na lege ni, a yeke mû maboko na terê ni ti kono na ngoi so lo yeke kpengba terê ti lo wani na yâ ti ndoye.” (aÉph. 4:1-3, 11, 12, 16). Azo so amä wango ti Paul so asara si siriri nga na beoko amaï, a yeke aye so e yeke bâ laso na yâ ti acongrégation ti e.

16. Nyen la a yeke nzoni e leke na bê ti e ti ngbâ ti sara? (aHébreu 6:10).

¹⁶ Leke na bê ti mo ti ngbâ ti kpe ti haka terê ti mo na amba ti mo. Manda ye na lege ti tapande ti Jésus, nga sara kue ti mû tapande ti apendere sarango ye ti lo. Bâ nzoni na lege ti tapande ti mabe ti azo so Bible asara tënë ti ala nga na ti aita ti ngoi ti e. Na ngoi so mo yeke ngbâ ti sara ye kue so mo peut ti sara, hinga biani so Jéhovah “ayeke kirikiri pëpe si lo girisa kusala ti [mo]”. (Diko aHébreu 6:10.) Ngbâ ti sara na Jéhovah na ngia, hinga so lo bâ na nene ni a-effort so mo sara na âme ti mo kue ti zia ngia na bê ti lo.