Aita ayeke bâ so kozo mariage ni ahunzi na ngoi so koli ni akiri asara mariage nga so ndia ayeda na fini mariage ni. Ti hinga ndani so e tene tongaso, zia e bâ tënë so Jésus atene na ndö ti divorce nga na kiringo ti sara mariage.

Na Matthieu 19:9, Jésus afa oko raison so ndali ni mbeni zo apeut ti sara divorce. Lo tene: “Tongana a yeke ndali ti lango-sioni pëpe, si mbeni zo asara divorce na wali ti lo na lo sara mariage na mbeni wali nde, andâ lo gi mbeni wali nde la.” Atënë ti Jésus so afa na e so: (1) lango-sioni ayeke gï oko ye so ndali ni Bible amû lege na zo ti sara divorce nga so (2) mbeni koli so asara divorce na wali ti lo sân raison so na lo sara mariage na mbeni wali nde, lo gi mbeni wali nde la. *

Eskê atënë ti Jésus so aye ti fa so Bible amû lege na mbeni koli so asara lango-sioni na asara divorce ti kiri ti sara mariage? A yeke tongaso lakue ape. Tongana mbeni koli agi mbeni wali nde, wali ti lo so tënë ayeke na li ti lo ape apeut ti mû desizion ti pardonné lo wala pëpe. Tongana lo ke ti pardonné lo nga lo sara divorce so ague oko na ndia, ala use kue ayeke na droit ti kiri ti sara mariage.

Me peut-être wali ni, so tënë ayeke na li ti lo ape, aye ti sara divorce ape, na lo tene na koli ti lo so lo yeke pardonné lo. Me tongana koli ni, so agi mbeni wali nde, ake ti tene wali ni apardonné lo nga lo sara divorce, ye ni ayeke duti tongana nyen? So wali ni ayeda ti pardonné lo na ti bata mariage ti ala, Bible amû lege na koli ni pëpe ti kiri ti sara mariage. Tongana a bi koli ni na gigi ape na lo mû desizion ti sara mariage na mbeni zo nde, atâa so lo yeke na liberté ti sara ni ape, lo kiri lo gi mbeni wali nde la. A-ancien ayeke kiri ti sara komite ti lo ti bâ lege ti tënë ni.—1 aCor. 5:1, 2; 6:9, 10.

Tongana mbeni koli akiri asara mariage atâa so Bible amû lege na lo ti sara ni ape, aita ti congrégation ayeke bâ kozo mariage ni nga na fini ni so tongana nyen? Ti gue oko na ye so Bible atene, eskê kozo mariage ni angbâ? Eskê wali ni, so tënë ayeke na li ti lo ape, apeut ti mû desizion ti pardonné ngbene koli ti lo wala pëpe? Eskê aita ayeke bâ fini mariage ni tongana gingo mbeni zo nde?

Ândö, aita ayeke bâ fini mariage ni tongana gingo mbeni zo nde na ngoi kue so zo so tënë ayeke na li ti lo ape angbâ na fini, akiri asara mariage ape wala asara lango-sioni ape. Ye oko, na ngoi so Jésus ayeke sara lani tënë na ndö ti divorce nga na kiringo ti sara mariage, lo sara pëpe tënë ti zo so tënë ayeke na li ti lo ape. Me, lo fa so mbeni koli so asara divorce atâa so Bible amû lege na lo ti sara ni ape nga lo kiri lo sara mariage, lo gi mbeni wali nde. Na yâ ti ye so, zo so asara divorce, na lo kiri lo sara mariage, Jésus atene lo gi mbeni zo nde, na lo fâ yâ ti kozo mariage ti lo.

Tongana mbeni koli asara divorce na wali ti lo na lo kiri lo sara mariage, lege ayeke dä encore ape na ngbene wali ti lo, so tënë ayeke na li ti lo  ape, ti pardonné lo wala pëpe. Tongaso, lo doit pëpe ti mû kota desizion so ayeke ti pardonné ngbene koli ti lo wala pëpe. Nga, même tongana wali ni so tënë ayeke na li ti lo ape akui, akiri asara mariage wala lo sara lango-sioni, bango ndo ti aita na ndö ti fini mariage ni achangé ape. *

Na yâ ti tapande so e bâ fade, koli ni agi mbeni wali nde na ague na lo ti sara divorce. Ka tongana koli ni agi fade pëpe mbeni wali nde me lo sara divorce, na pekoni lo kiri lo sara mariage? Wala ka tongana koli ni asara lango-sioni gï na peko ti divorce ni, na pekoni lo kiri lo sara mariage atâa so wali ni aye lani ti pardonné lo? Na yâ ti atapande so kue, divorce ni nga na kiringo ti sara mariage ni ayeke gingo mbeni zo nde, na a fâ yâ ti ngbene mariage ni. Ndia ayeda na fini mariage ni. Na yâ ti Tour ti Ba Ndo ti lango 15 ti février, ngu 1980, lembeti 32 na Français, atene: “Lo sara mbeni fini mariage awe na lo lingbi pëpe ti fâ yâ ni nga ti kiri na ngbene wali ti lo; so lo sara divorce, lo gi mbeni wali nde nga so lo kiri lo sara mariage, lo fâ yâ ti ngbene mariage ni awe.”

So e changé yâ ti fason so e mä na yâ ti tënë so, a ye ti tene ape so aChrétien apensé so mariage ayeke nzoni-kue encore ape wala gingo koli wala wali nde ayeke kota siokpari ape. Tongana Bible amû lege na mbeni koli pëpe ti sara divorce na wali ti lo na ti sara mariage na mbeni wali nde si lo sara ni, a-ancien ayeke sara komite ti lo ndali ti so lo gi mbeni wali nde. (Tongana fini wali ni ayeke mbeni Chrétien, a-ancien adoit ti sara komite ti lo ndali ti so lo sara lango-sioni.) Atâa so a yeke bâ pëpe fini mariage ni tongana gingo koli wala wali nde, teti angu mingi, koli ni alingbi pëpe ti sara akota kua na yâ ti congrégation. Lo yeke komanse ti sara ni gï tongana bê ti azo ason encore ape na sioni ye so lo sara ândö nga azo akiri akomanse ti ne lo. Kozo ti tene a-ancien amû na lo mbeni kua, a yeke nzoni ala gbu li na ndö ti dutingo ti ngbene wali ti lo so peut-être lo sara lani ye na lo na handa nga na akete molenge so lo dö ala lo zia.—Mal. 2:14-16.

So akota kpale ayeke ga na peko ti sarango divorce nga kiringo ti sara mariage so Bible ake, aChrétien ayeke sara ye na ndara ti bâ mariage tongana ye so ayeke nzoni-kue, tongana ti so Jéhovah abâ na ni.—Zo-ti. 5:4, 5; aHéb. 13:4.