1. Ngbanga ti nyen la e yeke mû commentaire na ngoi ti abungbi?

 NGBANGA TI NYEN la e yeke ga na abungbi? Kozo raison ni ayeke ti gonda Jéhovah (Ps. 26:12; 111:1). E yeke ga nga na abungbi tongaso si e peut ti kpengba mba na angoi ti ngangu so (1 aThes. 5:11). Tongana e yôro maboko e mû commentaire, e yeke gonda Jéhovah nga e yeke kpengba mba.

2. Alege wa la azi na e ti mû commentaire na ngoi ti abungbi ti e?

² Yenga oko oko, lege azi na e ti mû commentaire na ngoi ti abungbi ti e. Na tapande, na anda-yenga e peut ti mû mbage na Mandango Tour ti Ba Ndo. Na abungbi ti milieu ti yenga, e peut ti mû commentaire na ngoi so e yeke sara Gi anzoni ye so ayeke na yâ ti Bible, Mandango Bible ti Congrégation nga na ambeni mbage ti bungbi ni so a sara lisoro dä.

3. Nyen la apeut ti sara si a yeke ngangu na e ti mû commentaire? A-Hébreu 10:24, 25 apeut ti aidé e tongana nyen?

³ E kue e ye ti gonda Jéhovah nga ti kpengba amba ti e aChrétien. Me ambeni ye apeut ti sara si a yeke ngangu na e ti mû commentaire. Mbeto apeut ti sara e ti mû commentaire wala e peut ti ye mingi ti mû commentaire, me a mû e mingi tongana ti so e ye ape. Nyen la apeut ti aidé e? Atënë so Paul atene na yâ ti lettre ti lo na aHébreu apeut ti aidé e ti wara kiringo tënë ni. Na ngoi so lo yeke fa ndani so a yeke kota ye ti  tene e sara bungbi ndo oko na amba ti e, lo tene so a yeke nzoni “e wa terê na popo ti e”. (Diko aHébreu 10:24, 25.) Tongana e bâ so même mbeni simple commentaire so e sara apeut ti kpengba azo so aga na bungbi, mbeto ayeke sara e ape ti mû commentaire. Tongana a mû e fani mingi ape, e peut ti duti na ngia so ambeni zo awara lege ti mû commentaire.—1 Pi. 3:8.

4. Aye ota wa la e yeke sara tënë na ndö ni na yâ ti article so?

⁴ Na yâ ti article so, e yeke bâ kozoni tongana nyen la e peut ti kpengba amba ti e tongana e yeke na yâ ti mbeni kete congrégation so azo ayeke mingi ape ti mû commentaire. Na pekoni, e yeke bâ tongana nyen la e yeke kpengba amba ti e tongana e yeke na yâ ti mbeni kota congrégation so azo mingi ayeke yôro maboko ti mû commentaire. Na nda ni, e yeke bâ tongana nyen la e peut ti kpengba amba ti e na lege ti atënë so e tene na yâ ti acommentaire ti e.

5. Tongana nyen la e peut ti wa terê na popo ti e tongana azo so aga na bungbi ayeke mingi ape?

⁵ Na yâ ti mbeni kete congrégation wala groupe, azo so ayeke mû commentaire ayeke mingi ape so ita so ayeke mû li ni apeut ti mû ala. Na ambeni ngoi, peut-être lo yeke ku aninga kete kozo si mbeni zo ayôro maboko ti mû commentaire. Bungbi ni apeut ti fatigué zo na akpengba zo ape. Nyen la mo peut ti sara? Duti nduru ti yôro maboko ti mo fani mingi. Tongana mo sara tongaso, mo peut ti pusu amba ti mo ti mû mbage dä fani mingi.

6-7. Nyen la e peut ti sara ti tene mbeto asara e mingi ape ti mû commentaire?

⁶ Nyen la mo peut ti sara tongana mbeto asara mo mingi ti mû commentaire? Azo mingi asara mbeto ti mû commentaire. Me ti kpengba aita ti mo, mo peut ti sara kue ti sara mbeto mingi ape ti mû commentaire. Mo peut ti sara ni tongana nyen?

⁷ Tongana mo kiri mo bâ ambeni wango so a mû na yâ ti ambeni Tour ti Ba Ndo so ahon apeut ti aidé mo. b Na tapande, leke terê ti mo nzoni (aProv. 21:5). Tongana mo mä yâ ti article ni nzoni, a yeke duti ngangu na mo ape ti mû commentaire. Nga, mû nduru commentaire (aProv. 15:23; 17:27). Ti mû nduru commentaire ayeke sara mo mbeto ape. A peut ti duti même ngangu ape na aita ti mo ti mä yâ ti mbeni nduru commentaire so mo sara so peut-être gï tënë oko wala use la ayeke na yâ ni ahon mbeni yongoro commentaire so gbâ ti atënë ayeke na yâ ni. Tongana mo mû mbeni nduru commentaire so mo tene ni na atënë ti mo wani, mo yeke fa so mo leke terê ti mo nzoni nga mo mä yâ ti article ni.

8. Jéhovah abâ a-effort ti e tongana nyen?

⁸ Ka tongana mo tara awango so kue gbä me mbeto angbâ ti sara mo mingi ti mû acommentaire? Duti sûr so Jéhovah abâ na nene ni a-effort so mo sara na bê ti mo kue ti sara ye so mo peut ti sara (Luc 21:1-4). Jéhovah ahunda na e ape ti sara ye so ahon ngangu ti e (aPhil. 4:5). Gi ti hinga ye so mo ye ti sara, leke ti sara ni nga sambela ti sara mbeto ape. Na tongo nda ni, ye so mo peut ti leke ti sara ayeke ti mû mbeni nduru commentaire.

9. Ngbanga ti nyen la a peut ti duti ngangu ti mû acommentaire na yâ ti akota congrégation?

⁹ Tongana awafango tënë ayeke mingi na yâ ti congrégation ti mo, mo peut ti wara mbeni  kpale nde. Peut-être aita mingi aye ti mû commentaire asara si fani mingi a mû mo ape. Na tapande, Danielle aye ka mingi ti mû acommentaire na ngoi ti abungbi. c Lo bâ ni tongana mbeni mbage ti vorongo Nzapa, mbeni lege ti kpengba amba ti lo nga mbeni lege ti duti na kpengba mabe na aye so Bible afa. Me na ngoi so lo gue na yâ ti kota congrégation, a mû lo fani mingi ape, na ambeni ngoi a mû même lo fani oko ape. Lo tene: “Bê ti mbi ason, mbi bâ so mbeni pasa la ahon mbi so. Tongana a si fani mingi, mo yeke komanse ti hunda terê ti mo wala aita ni asara mbana.”

10. Nyen la e peut ti sara ti wara pasa mingi ti mû commentaire?

¹⁰ Mo wara mara pensé ti Danielle so awe? Tongana mo wara ni awe, bê ti mo apeut ti pusu mo ti zia ti mû commentaire na ti mä gï azo mango. Me, zia pëpe lege ti mû commentaire. Nyen la mo peut ti sara? Tongana mo leke gbâ ti acommentaire ndali ti abungbi oko oko kue apeut ti aidé mo. Tongaso, tongana a mû mo pëpe na tongo nda ti mandango ye ni, mo peut ti wara lege ti mû commentaire na ngoi so bungbi ni ayeke gue na li ni. Na ngoi so mo yeke leke mbeni article ti Tour ti Ba Ndo, bâ tongana nyen la aparagraphe oko oko kue ague oko na mama-tene ti article ni. Tongana mo sara tongaso, peut-être mo yeke wara mbeni tënë ti tene na ngoi ti mandango article ni. Na ndö ni, mo peut ti leke ti sara commentaire na ndö ti aparagraphe so asara tënë na ndö ti afango ye ti Bible so a yeke ngangu ti fa ndani (1 aCor. 2:10). Ngbanga ti nyen? Ngbanga ti so peut-être azo ayeke kiri tënë mingi ape na mbage so. Ka tongana mo sara aye so kue me mo bâ so na ngoi ti abungbi mo wara lege ti kiri tënë ape? Mo peut ti sara lisoro na ita so ayeke mû li ni kozo na bungbi ni ti fa na lo mbeni hunda so mo ye ti kiri tënë na ni.

11. Nyen la aPhilippien 2:4 awa e ti sara?

¹¹ Diko aPhilippien 2:4. Yingo apusu bazengele Paul ti wa aChrétien ti zia lê ti ala na ndö ti aye so agbu bê ti amba ti ala. Tongana nyen la e peut ti sara ye alingbi na wango so  na ngoi ti abungbi? Tongana e girisa ape so, legeoko tongana e, amba ti e aye ti kiri tënë.

12. Nzoni lege ti kpengba amba ti e na ngoi ti abungbi ayeke so wa? (Bâ nga foto.)

¹² Gbu li na ndö ti ye so. Tongana mo na akamarade ti mo ayeke sara lisoro, eskê mo yeke sara tënë mingi na mo zia lege na ala ti sara tënë gï kete? Ên-ën! Mo ye ti tene ala kue amû mbage na lisoro ni. Legeoko nga, na ngoi ti abungbi e ye ti zia lege na azo mingi ti mû commentaire. Tongaso, mbeni nzoni lege ti kpengba aita ti e ayeke ti zia lege na ala ti fa tënë ti mabe ti ala (1 aCor. 10:24). Zia e bâ tongana nyen la e peut ti sara ni.

13. Tongana nyen la e peut ti zia lege na azo mingi ti mû commentaire?

¹³ Mbeni lege ni ayeke ti tene e mû nduru commentaire tongaso si e zia lege na azo mingi ti kiri tënë. A-ancien nga na awafango tënë so ayeke na kode mingi apeut ti zia tapande ni. Même tongana mo yeke mû nduru commentaire, sara tënë na ndö ti gbâ ti aye ape. Tongana mo sara tënë na ndö ti aye kue so ayeke na yâ ti mbeni paragraphe, aye ayeke ngbâ mingi ape ti tene ambeni zo asara tënë na ndö ni. Na tapande, na yâ ti paragraphe so awango ayeke use: mû nduru commentaire nga sara tënë na ndö ti gbâ ti aye ape. Tongana a mû mo kozo ti kiri tënë na paragraphe so, sara tënë gï na ndö ti ye oko.

14. Nyen la apeut ti aidé e ti bâ fani oke la e yeke yôro maboko? (Bâ nga foto.)

¹⁴ Sara ye na ndara ti bâ fani oke la mo yeke yôro maboko. Tongana mo yôro maboko fani mingi, peut-être mo yeke pusu ita so ayeke mû li ni ti mû mo fani mingi même tongana ade ambeni zo awara lege ti mû commentaire ape. A peut ti découragé ambeni zo ti yôro maboko ti ala.—Zo-ti. 3:7.

15. (a) A yeke nzoni e sara ye tongana nyen tongana a mû e ti kiri tënë ape? (b) Tongana nyen la aita so ayeke mû li ni apeut ti fa so ala pensé na azo kue? (Bâ encadré “ Tongana mo la mo yeke mû li ni.”)

¹⁵ Tongana awafango tënë mingi ayôro maboko ti ala na ngoi ti mbeni mandango ye, e  yeke wara lege ti mû commentaire fani mingi tongana ti so e ye ape. Na ambeni ngoi, ita so ayeke mû li ni apeut ti mû e kue ape. Vundu apeut ti sara e, me a yeke nzoni bê ti e ason ape tongana a mû e ape.—Zo-ti. 7:9.

16. Tongana nyen la e peut ti kpengba amba ti e so amû commentaire?

¹⁶ Tongana mo wara lege ti mû commentaire fani mingi tongana ti so mo ye ape, mo peut ti mä nzoni amba ti mo so amû ni tongaso si na peko ti bungbi mo gonda ala ndali ni. Tongana mo gonda aita ti mo apeut ti kpengba ala tongana ti so mo yeke kpengba ala tongana fade mo mû commentaire (aProv. 10:21). Ti gonda azo ayeke mbeni lege ti kpengba amba ti e.

17. (a) Tongana nyen la ababâ na amama apeut ti aidé amolenge ti ala ti leke acommentaire so ayeke na lege ni? (b) Ti gue oko na vidéo ni, aye osio wa la zo adoit ti sara ti leke mbeni commentaire? (Bâ kete tënë na gbe ni.)

¹⁷ Mbeni ye nde wa la e peut ti sara ti kpengba amba ti e na ngoi ti abungbi? Tongana mo yeke babâ wala mama, aidé amolenge ti mo ti leke acommentaire so alingbi na ngu ti ala (Mat. 21:16). Na ambeni ngoi, mbeni article ayeke sara tënë na ndö ti atënë so ayeke ngangu, na tapande akpale ti yâ ti mariage wala tënë na ndö ti nzoni sarango ye, me peut-être paragraphe oko wala use ayeke dä so mbeni molenge apeut ti sara commentaire na ndö ni. Aidé nga amolenge ti mo ti comprendre  ndani so peut-être a yeke mû ala ape na angoi kue so ala yôro maboko ti ala. Tongana mo fa ni na ala apeut ti sara si bê ti ala ason ape tongana a mû ambeni zo me a mû ala ape.—1 Tim. 6:18. d

18. Tongana nyen la e peut ti kpe ti gboto lê na ndö ti e na ngoi so e yeke sara acommentaire? (aProverbe 27:2).

¹⁸ E kue e peut ti leke anzoni commentaire so agonda Jéhovah nga akpengba aita ti e (aProv. 25:11). Atâa so na ambeni ngoi e peut ti fa na nduru tënë mbeni ye so asi na e, a yeke nzoni e kpe ti sara tënë mingi ndö ti e wani. (Diko aProverbe 27:2; 2 aCor. 10:18.) Ye oko, e yeke sara ngangu ti sara tënë mingi na ndö ti Jéhovah, Bible nga na awakua ti lo (Apoc. 4:11). Me tongana hundango tënë ti mbeni paragraphe ahunda na e ti fa mbeni ye so asi na e, a yeke na lege ni ti sara ni. E yeke bâ mbeni tapande ni na yâ ti paragraphe ti peko.

19. (a) Tongana e pensé na azo kue so aga na bungbi, ye ti peko ni ayeke nyen? (aRomain 1:11, 12). (b) Nyen la anzere na mo na ndö ti mungo acommentaire na ngoi ti abungbi?

¹⁹ Atâa so mbilimbili ndia na ndö ti mungo acommentaire ayeke dä ape, e kue e peut ti sara ngangu ti kpengba amba ti e. Ye so aye peut-être ti tene e mû commentaire ahon ndö ni ape. Wala a ye nga ti tene e yeke na ngia so e na amba ti e e yeke na pasa ti mû acommentaire. Tongana e zia lê ti e na ndö ti aye so agbu bê ti amba ti e na ngoi ti abungbi, e peut ti “wa terê na popo ti e”.—Diko aRomain 1:11, 12.