Mo diko a-article ti Tour ti Ba Ndo so asigigi ade ti ninga ape so nzoni? Bâ wala mo lingbi ti kiri tënë na ahundango ndo so ge:

Mara ti siokpari wa la Jésus asara tënë ni na yâ ti wango so lo mû so ayeke na Matthieu 18:15-17?

Lo yeke sara lani tënë ti siokpari so azo ni wani alingbi ti leke ni na popo ti ala. Me tongana a leke ni gbä, a lingbi ti ga mbeni kota siokpari so a lingbi ti bi mbeni zo na gigi ti bungbi ndali ni. Na tapande, a lingbi ti duti pango ndo wala sarango ye ti likisi.—w16.05, l. 7.

Nyen la mo lingbi ti sara ti wara ye ti nzoni mingi na dikongo Bible?

Mo lingbi ti sara aye so: Diko Bible na nzoni bibe, gi aye so mo lingbi ti sara ye alingbi na ni; hunda tere ti mo na atënë tongana: ‘Tongana nyen la mbi lingbi ti sara kua na ni ti mû maboko na ambeni zo?’; sara kua na aye so e yeke na ni ti sara recherche na ndo ti ye so mo diko ni.—w16.05, l. 24-26.

Eskê a yeke sioni ti tene mbeni Chrétien so amä na bê na zingongo ti akuâ asara vundu?

Ti mä na bê na zingongo ti akuâ azi pëpe kota vundu so asara mbeni Chrétien so mbeni zo ti lo akui. Abraham atoto lani kuâ ti Sara (Gen. 23:2). Tongana ngoi ayeke hon, vundu ni alingbi ti hon.—wp16.3, l. 4.

Koli so akanga na yâ ti lo nza, wala didi, so encre ti écrivain ayeke na yâ ni, nga na akoli omene so ayeke na aye ti bira so a sara tënë ti ala na Ézéchiel chapitre 9 aye ti sara tënë ti azo wa?

E bâ so a ye ti sara tënë ti angangu turugu ti yayu so amû mbage lani na futingo Jérusalem nga so ayeke mû mbage ande na futingo aye na ngoi ti Harmaguédon. Ti ngoi ti e laso, koli so akanga na yâ ti lo nza so encre ti écrivain ayeke na yâ ni so aye ti sara tënë ti Jésus Christ, so ayeke zia marque na ndo ti lê ti azo so ayeke sö kuâ ande.—w16.06, l. 16-17.

Bible ahon na yâ ti akpale wa?

Bible angbâ atâa so (1) aye so a sû Bible na ndo ni alingbi ti buba, aye tongana papyrus nga na poro ti tere ti nyama; (2) azo so ayeke na komandema nga na akota zo ti nzapa so akanga lege na Bible agi ti futi ni; nga (3) ambeni zo agi ti changé atënë ti yâ ni.—wp16.4, l. 4-7.

Aye wa la mbeni Chrétien alingbi ti sara ti duti na aye mingi ape?

Gi ti hinga biani aye so mo yeke tâ na bezoin ni. Buba nginza pëpe na tere ti aye so mo bezoin ni ape. Soro aye so mo yeke na bezoin ti vo ni yenga na yenga wala nze na nze nga oke la mo lingbi ti vo na aye ni. Kä aye so mo yeke na bezoin ni ape, mû ni na zo wala bi ni, nga futa abon kue so ayeke na li ti mo. Gi ti kiri na l’heure ti kua ti mo na gbe ni, nga leke ti fa tënë ahon ti kozo.—w16.07, l. 10.

Nyen la Bible afa so ngere ni ayeke kota ahon ngere ti lor na argent?

Job 28:12, 15 afa so ndara ti Nzapa ayeke nzoni mingi ahon lor na argent. Na ngoi so mo yeke gi ni, sara ngangu ti ngbâ ti sara tere ti mo kete nga ti kpengba na yâ ti mabe.—w16.08, l. 18-19.

A yeke na lege ni laso ti tene mbeni ita-koli abata kuä ti yanga ti lo?

Na ambeni ndo, tongana zo abata kuä ti yanga ti lo si lo leke ni nzoni peut-être ayeke sioni ape nga peut-être ayeke kanga lege na azo ape ti mä tënë ti Royaume. Me ambeni ita alingbi ti mû desizion ti bata pëpe kuä ti yanga ti ala (1 aCor. 8:9). Na yâ ti ambeni ngobo wala na ambeni ndo, aChrétien abâ so a yeke na lege ni ape ti bata kuä ti yanga ti ala.—w16.09, l. 21.

Ngbanga ti nyen la e lingbi ti zia bê ti e na mbaï ti David na Goliath?

Goliath ayo gi centimètre 20 ahon koli so a sara tënë ti lo na yâ ti ambeni mbeti na ngoi ti e a tene lo yo lo hon tanga ti azo kue. Aye so afa so David ayeke tâ zo so ayeke lani dä ayeke tênë so a sû mbeni tënë na ndo ni giriri so asara tënë ti da ti David nga na tënë so Jésus atene na ndo ti David. Anzene nzene tënë so Bible atene afa so aye so a tene na yâ ti mbaï ni so asi na mbeni tâ ndo biani.—wp16.5, l. 13.

Ndara ayeke nde na hingango ye nga na hingango ndo tongana nyen?

Zo so ayeke na hingango ye awara asango wala lo hinga ambeni ye. Zo so ahinga ndo alingbi ti bâ tongana nyen la ambeni ye ague oko. Me zo so ayeke na ndara alingbi ti sara kua na hingango ye nga na hingango ndo nzoni.—w16.10, l. 18.