1. Ngbanga ti nyen la batême ayeke tâ kota ye mingi? (Bâ foto so ayeke na tongo nda ti article so.)

NGU oko oko, azo saki mingi so amanda Bible ayeke wara batême. Ala mingi ayeke amaseka wala ala de maseka mingi. Peut-être ala kono na yâ ti tâ tënë. Mo kue? Tongana a yeke tongaso, a yeke nzoni mingi. A lingbi mbeni Chrétien awara batême na a yeke kota ye so ayeke sara si zo awara salut.—Mat. 28:19, 20; 1 Pi. 3:21.

2. Ngbanga ti nyen la a lingbi zo asara mbeto pëpe ti mû terê ti lo na Nzapa?

² Atâa so batême ayeke zi lege na zo ti wara anzoni ye mingi, a ga nga na zo akua. Na lege wa? Na lango ti batême ti mo, mo kiri lani tënë en na hundango tënë so: “Na lege ti sandaga ti Jésus Christ, [mo] ke siokpari ti [mo] awe na [mo] mû tere ti [mo] na Jéhovah ti sara ye so bê ti lo aye?” Batême ti mo afa so mo mû terê ti mo na Nzapa awe. Mo mû kpengba zendo na Jéhovah ti ye lo nga ti zia aye so bê ti lo aye kozo na aye kue. So ayeke tënë ti ngia ape. A lingbi mo regretté ni? Oko pëpe. Ti zia terê ti mo na maboko ti  Jéhovah ayeke sioni oko pëpe. Gbu li ti mo na ndö ti gigi ti mo tongana mo sara fade ni ape. Zo so ayeke na gbe ti Jéhovah ape, lo yeke na gbe ti komandema ti Satan. Zabolo aye ti tene mo wara salut ape. Tongana mo girisa beku ti mo ti fini ti lakue lakue ndali ti so mo mû mbage ti lo na mo ke komandema ti Jéhovah ayeke nzere na lo mingi.

3. So mo mû terê ti mo na Jéhovah, anzoni ye wa la mo wara?

³ Ahon ti mû mbage ti Satan, gbu li ti mo na ndö ti anzoni ye so mo wara ndali ti so mo mû terê ti mo na Nzapa nga mo wara batême na mo ga Chrétien. So fadeso mo mû fini ti mo na Jéhovah awe, mo lingbi ti tene na mbeto oko ape, mo tene: “Jéhovah ayeke na terê ti mbi; mbeto ayeke sara ande mbi pëpe. Nyen la zo apeut ti sara na mbi nyen?” (Ps. 118:6). Mbeni kota pasa ti hon mungo mbage ti Nzapa nga ti hinga lo ayeke dä ape.

4, 5. (a) Na lege wa la mungo terê na Nzapa ayeke kua ti zo oko oko? (b) Akpale wa la ayeke si gï na amaseka ape?

⁴ So mo yeke mbeni Chrétien so awara batême awe, mo lingbi pëpe ti duti na nzoni songo na Jéhovah gï ndali ti so babâ na mama ti mo ayeke na nzoni songo na lo. Me mo wani la mo yeke sara kua ti wara salut même tongana mo ngbâ ti lango na gbe ti babâ na mama ti mo. Ngbanga ti nyen la a yeke kota ye ti girisa ni ape? Ndali ti so mo lingbi lakue pëpe ti hinga akpale so mo yeke tingbi ande na ni. Na tapande, tongana mo wara batême lani na ngoi so mo de maseka mingi, na ngoi so mo yeke kono mo yeke wara afini pensé nga na afini kpale. Mbeni maseka-wali atene: “Mingi ni, bê ti mbeni molenge ayeke son ape ndali ti so lo yeke Témoin ti Jéhovah gï ngbanga ti so a mû na lo pëpe gâteau ti anniversaire na ekole. Me angu mingi ape na pekoni, tongana nzara ti bungbingo koli na wali asara lo mingi, a lingbi lo hinga na bê ti lo kue so ti bata andia ti Jéhovah ayeke tâ nzoni ye so a lingbi lo sara ni.”

⁵ Biani, gï amaseka la ayeke tingbi na afini kpale ape. Même azo so awara lani batême na ngoi so ala ga kota zo awe ayeke tingbi na akpale so ayeke tara mabe ti ala so ala ku terê ti ala na ni ape. A lingbi ti duti akpale na yâ ti mariage, kpale ti seni wala kpale ti kua. Tâ tënë, atâa ngu ti zo ayeke oke, lo yeke tingbi na aye so na yâ ni a hunda ti tene lo duti be-ta-zo na Jéhovah.—Jacq. 1:12-14.

6. (a) So nyen na nyen mo doit ti sara ye alingbi na mungo terê ti mo na Jéhovah aye ti tene nyen? (b) Nyen la mo manda na lege ti aPhilippien 4:11-13?

⁶ Ti mû maboko na mo ti ngbâ ti duti be-ta-zo na yâ ti aye kue, girisa lâ oko ape so nyen na nyen mo doit ti sara ye alingbi na zendo so mo mû na Jéhovah. So aye ti tene so mo tene lani na Kota Gbia ti dunia kue so mo yeke ngbâ ti sara na lo même tongana akamarade ti mo wala babâ na mama ti mo azia ti sara na lo (Ps. 27:10). Na yâ ti aye kue, grâce na mungo maboko ti Jéhovah, mo lingbi ti wara ngangu ti sara ye alingbi na mungo terê ti mo na lo.—Diko aPhilippien 4:11-13.

7. Ti sara kua ndali ti salut ti mo wani ‘tongana zo so ayeke na mbeto nga so terê ti lo adö’ aye ti tene nyen?

⁷ Jéhovah aye ti tene mo duti kamarade ti lo. Me ti ngbâ ti bata songo ti mo na lo nga ti sara kua ndali ti salut ti mo wani, a hunda ti tene mo sara effort. A-Philippien 2:12 atene: “Ala ngbâ ti sara kua ndali ti salut ti ala wani juska aga nzoni; ala sara ni tongana azo so ayeke na mbeto nga so terê ti ala adö.” Atënë so afa so mo bezoin ti gbu li ti mo na ndö ti aye so mo yeke sara ande ti bata songo ti mo na Jéhovah nga ti ngbâ be-ta-zo na lo atâa kpale wa la mo wara. A lingbi mo duti na confiance na mo wani ahon ndö ni ape. Même ambeni zo so asara na Nzapa teti angu mingi azia ti sara na lo. Tongaso, ambeni ye wa la mo lingbi ti sara ti sara kua ndali ti salut ti mo wani?

8. Mandango ye zo wani aye ti tene nyen? Ngbanga ti nyen la a yeke kota ye?

⁸ Ti duti kamarade ti Jéhovah, e bezoin ti mä lo nga ti sara lisoro na lo. Mandango Bible e wani ayeke kozo ye so e yeke sara ti mä Jéhovah. Ye so aye ti tene e gi ti hinga lo na lege so e diko Bible nga na ambeti so asara tënë na ndö ni nga e gbu li ti e na ndö ni. Na ngoi so mo yeke sara ni, girisa ape so mandango Bible mo wani ayeke gï senge mandango mbeti ape. A lingbi a duti pëpe tongana ti so e yeke bata aye na li ti e gï ti sara na mbeni examen. Nzoni mandango ye ayeke tongana mbeni pendere voyage so na ngoi ni e yeke manda afini ye na ndö ti asarango ye ti Jéhovah. Ye so ayeke sara si mo ga nduru mingi na Nzapa na lo yeke ga nduru na mo.—Jacq. 4:8.

9. Aye wa la amû maboko na mo ti manda ye mo wani?

⁹ Bungbi ti Jéhovah asigi na gbâ ti aye ti mû maboko na mo ti leke mbeni nzoni kapa ti mandango ye. Na tapande, tongana mo gue na ndö ti site jw.org na gbe ti tënë “Adolescents” mo yeke wara mbage so atene “Explore la Bible !” A yeke mû maboko na mo ti manda anzoni ye na lege ti ambaï ti Bible. Nga, na ndö ti site jw.org, mo yeke wara afiche ti étude ti buku “Bible alingbi ti fa nyen na e?” so ayeke mû maboko na mo ti duti na kpengba mabe nga ti fa na azo aye so mo mä na bê na ni. Mo lingbi ti wara ambeni ye ti manda ye na ndö ni na yâ ti article: “Les jeunes s’interrogent . . . Comment trouver du plaisir à lire la Bible ?” so ayeke na yâ ti Réveillez-vous ! ti avril 2009. Mandango ye nga na gbungo li ayeke kota ye mingi na yâ ti kua so mo yeke sara ndali ti salut ti mo wani.—Diko Psaume 119:105.

10. Ngbanga ti nyen la mbeni Chrétien so awara batême awe abezoin ti sambela?

¹⁰ Tongana mandango ye ayeke ye so na lege ni e yeke mä Jéhovah, sambela ayeke ye so na lege ni e yeke sara tënë na lo. A lingbi Chrétien abâ sambela pëpe tongana mbeni ye so lo yeke sara ni lakue me so ndani ayeke dä ape; wala a lingbi lo bâ ni pëpe tongana mbeni ye ti magie so ayeke sara si aye so lo ye ti sara aga nzoni. Me sambela ayeke tâ sarango lisoro na Zo so asara e. Jéhovah aye ti mä mo. (Diko aPhilippien 4:6.) Atâa agingo bê so mo wara, Bible awa mo ti mû “aye so ane mo, mo bi ni na ndö ti Jéhovah”. (Ps. 55:22). Mo mä na bê na tënë so? Aita kutu mingi alingbi ti dë bê ti mo so tënë so amû maboko na ala. A lingbi nga ti mû maboko na mo.

11. Ngbanga ti nyen la a lingbi mo kiri singila na Jéhovah lakue?

 ¹¹ Sambela ayeke zi lege na mo ti sara aye mingi ahon gï ti hunda Jéhovah ti mû maboko na mo. Bible atene: “Ala fa singila ti bê ti ala.” (aCol. 3:15). Na ambeni ngoi, akpale ahon ndö ti e na asara si e yeke bâ anzoni ye so e wara tongana senge ye. Lâ oko oko, pensé kamême na aye ota so mo lingbi ti kiri singila na Jéhovah ndali ni. Na pekoni, sambela Jéhovah ndali ni. Abigail, mbeni maseka-wali so awara batême na ngoi so lo yeke na ngu 12, atene: “Mbi bâ so Jéhovah alingbi ti tene e kiri singila na lo ahon tanga ti azo kue ti dunia. A lingbi e kiri singila na lo ndali ti amatabisi so lo mû na e na ngoi kue so lege azi na e ti sara ni.” Na ambeni ngoi Abigail ayeke hunda terê ti lo na mbeni hundango ndo so lo mä lani: “Tongana a zi aye kue so mbi yeke na ni so ade mbi kiri singila na Jéhovah ndali ni ape, aye oke la ayeke ngbâ na mbi?”

12, 13. Ngbanga ti nyen la a yeke kota ye ti tene mo pensé na ndö ti aye so asi na mo so afa na mo so Jéhovah ayeke nzoni?

¹² Jéhovah amû lani maboko na Gbia David ti gbu ngangu na yâ ti angangu kpale mingi. Tongaso, aye so asi na David apusu lo ti tene: “Ala tara na ala bâ tongana nyen Jéhovah ayeke nzoni; ngia ayeke na zo so akpe na mbage ti lo ti bata terê ti lo.” (Ps. 34:8). Versê so afa na e so a yeke nzoni e wani e bâ so Jéhovah ayeke nzoni. Na ngoi so mo diko Bible nga na ambeti ti e nga mo gue na abungbi, mo yeke hinga tongana nyen la Jéhovah amû maboko na ambeni zo ti ngbâ be-ta-zo. Me na ngoi so songo ti mo na Jéhovah ayeke kpengba, mo bezoin ti bâ tongana nyen la Jéhovah ayeke mû maboko na mo. Na lege wa la aye so asi na mo afa na mo so Jéhovah ayeke nzoni?

¹³ Mbeni ye asi na aChrétien oko oko kue awe so asara si ala bâ so Jéhovah ayeke nzoni. Lo tisa e oko oko kue ti ga nduru na lo nga na Molenge ti lo. Jésus atene: “Zo oko alingbi ti ga na mbi pëpe, gï tongana Babâ so atokua mbi si agboto lo aga na lo na mbage ti mbi.” (Jean 6:44). Mo pensé so atënë so abâ mo? Mbeni maseka atene na bê ti lo, lo tene: ‘Jéhovah agboto babâ na mama ti mbi na mbage ti lo, me mbi mû gï peko ti ala.’ Me na ngoi so mo mû terê ti mo na Jéhovah na mo wara batême, mo fa na lo so mo yeke na mbeni songo na lo so ayeke nde. Fadeso, lo hinga mo nzoni. Bible adë be ti e, atene: “Tongana mbeni zo andoye Nzapa, Nzapa ahinga zo ni so.” (1 aCor. 8:3). Gi lakue ti bâ na nene ni mingi place ti mo na yâ ti bungbi ti Jéhovah.

14, 15. Tongana nyen la kua ti fango tënë alingbi ti mû maboko na mo ti kpengba mabe ti mo?

¹⁴ Mo lingbi ti bâ nga so Jéhovah ayeke nzoni na ngoi so mo sara tënë ti mabe ti mo na azo na mbeto ape na ngoi so mo yeke na fango tënë wala na ekole. A lingbi ti duti ngangu na mo ti fa tënë na amba ti mo na ekole. Peut-être mo yeke gi bê ti mo ndali ti so mo hinga ape wala ala yeke mä mo wala pëpe. A lingbi ti duti ngangu na mo ape ti sara tënë na zo oko, me tongana mo yeke sara tënë na gbâ ti azo, a lingbi ti duti ngangu na mo mingi. Nyen la alingbi ti mû maboko na mo?

¹⁵ Kozoni, gbu li ti mo na ndö ti ndani so mo yeda so aye so mo mä na bê na ni ayeke tâ tënë. Tongana afiche ti étude so ayeke na ndö ti jw.org ayeke na yanga ti kodro ti mo, sara kua na ni. A leke ni ti mû maboko na mo ti gbu li ti mo na ndö ti aye so mo mä na bê na ni, ngbanga ti nyen la mo mä na bê na ni nga tongana nyen la mo lingbi ti fa ni na azo. Tongana mabe ti mo akpengba nga mo leke terê ti mo nzoni, mo yeke ye ande ti fa tënë na ndö ti Jéhovah na azo.—Jér. 20:8, 9.

16. Nyen la alingbi ti mû maboko na mo ti hon ndö ti mbeto ti sara tënë polele na ndö ti aye so mo mä na bê na ni?

 ¹⁶ Même tongana mo leke terê ti mo nzoni, peut-être mbeto asara mo ti sara tënë polele na ndö ti aye so mo mä na bê na ni. Mbeni ita-wali so ayeke na ngu 18, so awara batême na ngoi so lo yeke na ngu 13, atene: “Mbi hinga ye so mbi mä na bê na ni, me na ambeni ngoi a yeke ngangu na mbi ti fa ndani na zo polele.” Lo sara tongana nyen? Lo tene: “Mbi gi ti sara ni tongana ti so mbi yeke sara ka tënë na azo lâ oko oko. Amba ti mbi ti ekole ayeke sara tënë polele na ndö ti aye so ala sara. A lingbi mbi nga mbi sara tongaso. Tongaso, na ngoi so mbi yeke sara lisoro na ala, mbi yeke yôro na yâ ni mbeni nduru tënë na ndö ti mbeni ye nde, na tapande, mbi yeke tene: ‘Mbeni lâ na ngoi so mbi yeke manda Bible na mbeni zo, na . . . ’ Na pekoni, mbi kiri na ndö ti tënë so mbi yeke tene fade. Atâa so ye so mbi yeke sara tënë na ndö ni andu Bible tongaso ape, mingi ni, so mbi tene mbi yeke manda Bible na mbeni zo ala ye ti hinga tongana nyen la mbi yeke sara ni. A yeke si so ala hunda atënë na mbi na ndö ni. So mbi sara kua na kode so mingi, ti fa tënë na azo ayeke ngangu na mbi encore ape. Terê ti mbi anzere na pekoni mingi.”

17. Tongana nyen la bango ndo ti mo na ndö ti mabe ti mo alingbi ti mû maboko na mo ti sara tënë na azo?

¹⁷ Tongana azo abâ so e yeke pensé na ala biani nga e ne ala, a yeke ngangu mingi ape ti tene ala ne e nga na aye so e mä na bê na ni. Olivia, so ayeke na ngu 17 so awara batême na ngoi so lo de maseka mingi, atene: “Mbi sara lani mbeto lakue ti yôro tënë ti Bible na yâ ti mbeni lisoro, ndali ti so mbi tene tongana mbi sara ni, azo ayeke bâ mbi tongana zo so aye tënë ti Nzapa ti lo ahon ndö ni. Na pekoni, lo changé pensé ti lo. Ahon ti tene Olivia angbâ gï ti sara mbeto, lo tene: “Amaseka mingi ahinga ye oko pëpe na ndö ti aTémoin ti Jéhovah. A-Témoin so ala hinga ala ayeke gï e awe. Tongaso, sarango ye ti e alingbi ti sara si ala mä e wala ala mä e ape. Tongana e yeke azo ti kamene na a yeke ngangu na e ti sara tënë ti mabe ti e wala tongana mbeto ahon ndö ti e na ngoi so e yeke sara tënë ni, ala lingbi ti bâ e tongana azo so abâ dutingo Témoin ti Jéhovah tongana ye ti kamene. Ala lingbi même ti mä e ape ndali ti so e yeke na confiance na e wani ape. Ye oko, tongana e yapu ti sara tënë nga e hinga na bê ti e kue so aye so e mä na bê na ni ayeke tâ tënë nga e yôro tënë ni lakue na yâ ti alisoro ti e, a lingbi ti sara si ala ne e.”

18. Aye wa la a lingbi mo sara ti sara kua ndali ti salut ti mo wani?

¹⁸ Tongana ti so e bâ, ti sara kua ndali ti salut ti mo wani ayeke kete kua ape. Ambeni ye so a lingbi mo sara ayeke ti diko Bible nga ti gbu li ti mo na ndö ni, ti sambela Jéhovah nga ti pensé na ndö ti ambeni fason so Jéhovah airi tënë nzoni na ndö ti mo. Tongana mo sara aye so, a yeke mû maboko na mo ti duti na confiance mingi so Jéhovah ayeke Kamarade ti mo. Ye so ayeke pusu mo ti fa na azo aye so mo mä na bê na ni.—Diko Psaume 73:28.

19. Ngbanga ti nyen la a yeke na lege ni ti tene mo sara kue ti wara salut?

¹⁹ Jésus atene: “Tongana mbeni zo aye ti ga na peko ti mbi, zia lo ke terê ti lo wani, lo yô keke ti pasi ti lo na lo ngbâ ti mû peko ti mbi.” (Mat. 16:24). Ti mû peko ti Jésus, a lingbi Chrétien oko oko kue amû terê ti lo na Jéhovah na lo wara batême. Sarango tongaso ayeke mû lege na mo ti wara atufa mingi laso nga ti wara fini ti lakue lakue na yâ ti fini dunia ti Nzapa. Tongaso, sara aye kue so mo lingbi ti sara ti ngbâ ti sara kua ndali ti salut ti mo wani.