A yeke na koli na wali so asara mariage awe ti mû desizion ala wani, na zia si desizion ti ala asara si ala duti na nzoni conscience. Ti sara ni, a lingbi ala gbu li ti ala nzoni na ndö ti fason so stérilet ni ayeke sara kua nga na amama-ndia ti Bible so andu tënë so.

Na ngoi so azo ayeke lani gï use na ndö ti sese (nga na peko ti kota ngu so apika na ngoi ti Noé so azo ayeke lani gï miombe), Jéhovah amû commandement so: “Ala dü, ala ga gbani.” (Gen. 1:28; 9:1). Bible atene ape so Jéhovah amû commandement so na aChrétien. Tongaso, a yeke na koli na wali ti bâ wala kode wa la ala ye ti sara kua na ni ti dü mingi ape wala ti bâ na ngoi wa la ala ye ti dü. Aye wa la a lingbi ala gbu li ti ala na ndö ni?

A lingbi amama-ndia ti Bible la amû maboko na aChrétien ti soro kode ti kangango lege na mungo ngo so ala ye ti sara kua na ni. A-Chrétien ayeke bâ pëpe tukungo ngo tongana mbeni kode so ala lingbi ti sara kua na ni. Tongana zo atuku ngo andâ lo sara ye ague nde na tënë so Bible atene na ndö ti nengo fini. A-Chrétien ayeke soro pëpe ti tuku ngo so na lege ni zo ayeke bâ gigi (Ex. 20:13; 21:22, 23; Ps. 139:16; Jér. 1:5). Ka ti sarango kua na stérilet ayeke tongana nyen?

A sara lani tënë na ndö ti tënë so na yâ ti Tour ti Ba Ndo ti lango 1 ti septembre 1979, na Français (lembeti 30-31). A sara lani astérilet ti ngoi ni so na plastique na a yeke yôro ni na yâ ti da ti molenge ti kanga lege na ngo. Article ni afa lani so a hinga mbilimbili pëpe tongana nyen la astérilet ni ayeke sara kua. Awandara mingi atene so astérilet ni ayeke kanga lege na ngu ti terê ti koli ti tingbi na para ti  wali ti ga foroto. Tongana ngu ti terê ti koli na para ti wali atingbi terê ape, fini ayeke komanse ape.

Ye oko, ambeni ye afa so na ambeni ngoi, ngu ti terê ti koli ni ayeke tingbi na para ti wali ni na ayeke ga foroto. Fini foroto so angbâ mênë so ayeke kono na gigi ti da ti molenge wala alingbi ti kono na yâ ti da ti molenge. Tongana a si na yâ ti da ti molenge ni, stérilet ni alingbi ti kanga lege na ni ti duti na place so alingbi ti kono dä, na ngo ni ayeke buba. So ayeke duti tongana tukungo ngo. Article ni atene: “Chrétien so aye Nzapa na bê ti lo kue, so ayeke gi ti hinga tongana nyen la astérilet ayeke sara kua, ayeke gbu li ti lo nzoni na ndö ti ye so Bible afa na ndö ti bango fini so ayeke nzoni-kue na nene ni.”—Ps. 36:9.

Na peko ti so a sigi lani na article so na ngu 1979, awandara asigi na akode mingi.

A sigi na mara ti astérilet use. A sara mbeni na cuivre, na a komanse ti sara kua na ni mingi na États-Unis na ngu 1988. Na ngu 2001, a sigi na mbeni stérilet so yorö ayeke na yâ ni. Astérilet use so ayeke sara kua tongana nyen?

Ti so a sara na cuivre: Tongana ti so e tene fade, na bango ni, astérilet asara si a yeke ngangu na ngu ti terê ti koli ti wara lege ti hon ti tingbi na para ti wali. Nga, so a sara ni na cuivre ayeke sara sioni na acellule so ayeke na yâ ti ngu ti terê ti koli, a yeke fâ acellule ni. * Na ndö ni, astérilet so a sara na cuivre ayeke sara ambeni changement na yâ ti da ti molenge.

Ti so yorö ayeke na yâ ni: Astérilet so mara ti yorö so ayeke na yâ ti apilule ayeke na yâ ni ayeke nde nde. Astérilet ni so ayeke tokua yorö na yâ ti da ti molenge. Na bango ni, mara ti astérilet ni so ayeke sara si para ti ambeni wali abâ gigi ape. Biani, tongana para ti wali abâ gigi ape, foroto so angbâ mênë ayeke bâ nga gigi ape. Na ndö ni, a tene so astérilet so ayeke sara si da ti molenge akpengba tongana ti kozo ape. * A yeke sara nga si ngu so ayeke na yanga ti da ti molenge akpengba, ye so ayeke kanga lege na ngu ti terê ti koli ti hon ti si na yâ ti da ti molenge.

Tongana ti so a fa so, mara ti astérilet so use kue ayeke sara ambeni changement na yâ ti da ti molenge. Me ka tongana ngu ti terê ti koli na para ti wali atingbi si foroto so angbâ mênë abâ gigi? Peut-être foroto so angbâ mênë so ayeke gue na yâ ti da ti molenge me lo yeke duti na nzoni ndo ti lo ape. Ye so ayeke sara si ngo ni abuba hio. Ye oko, awandara apensé so a yeke si ka mingi ape nga peut-être a lingbi ti si nga na angoi so wali ayeke mû pilule ti kanga lege na mungo ngo.

Tongaso, zo oko alingbi ti tene ape so stérilet so a sara na cuivre wala ti so yorö ayeke na yâ ni ayeke kanga lege biani biani na para ti wali ti ga foroto so angbâ mênë. Ye oko, awandara afa so ndali ti aye so a sara tënë ni na nduzu ge so, tongana wali asara kua na mara ti astérilet so, mingi ni lo yeke mû ngo ape.

Koli na wali so ayeke aChrétien, so aye ti sara kua na mbeni stérilet, alingbi ti sara lisoro na docteur ti ala na ndö ni. Lo lingbi ti fa na ala astérilet so a yeke sara na kua na ndo so ala yeke dä nga na aye ti nzoni nga na akpale so wali ni alingbi ti wara na pekoni. A lingbi ala ku pëpe wala ala zia pëpe si mbeni zo nde wala docteur ni la afa na ala ye so a lingbi ala sara (aRom. 14:12; aGal. 6:4, 5). A yeke desizion ti koli na wali ni. A lingbi desizion so ala mû azia ngia na bê ti Nzapa na asara si ala duti na nzoni conscience na gbele lo.—Bâ 1 Timothée 1:18, 19; 2 Timothée 1:3.