Mo lingbi ti kiri tënë na ahundango ndo so na lege ti a-article ti Tour ti Ba Ndo ti ngu 2019?

Nzapa amû zendo atene: “Aye ti bira kue so a leke ti sara na bira na mo ayeke sara ye oko na mo pëpe.” (És. 54:17). Zendo so aye ti tene nyen?

E lingbi ti duti na confiance so Nzapa ayeke bata e si “pupu ti yanga ti azo so akomande na ngangu” asara sioni na e ape (És. 25:4, 5). Awato ti e ayeke wara ande lege ape ti sara na e mbeni sioni ye so ayeke ngbâ lakue lakue.​—w19.01, l. 6-7.

Tongana nyen la sarango ye ti Nzapa na mbage ti azo ti Canaan nga na mbage ti azo ti Israël so ake andia ti lo afa so fango ngbanga ti lo ayeke mbilimbili?

Nzapa afâ lani ngbanga na ndö ti azo so asara lango-sioni wala asara sioni na awali nga na amolenge. Lo iri tënë nzoni na ndö ti azo so amä yanga ti lo nga asara ye na amba ti ala na lege ni.—w19.02, l. 22-23.

A lingbi e sara nyen tongana e yeke dä si mbeni zo so ayeke Témoin ape asambela?

E lingbi ti duti kpô nga ti sara ye na nengo zo, me e yeke tene “amen” ape wala e yeke gbu maboko ti azo ape na ngoi ti sambela ni. E lingbi ti sambela na yâ ti bê ti e.—w19.03, l. 31.

Tongana nyen la langongo na amolenge ayeke mbeni kota siokpari?

Zo so alango na mbeni molenge adoro droit ti molenge ni, lo sara sioni na congrégation, lo ke yanga ti azo ti komande nga lo doro ndia ti Nzapa. Na ando so andia ti kodro ahunda ti tene tongana a bi tënë na li ti mbeni zo a tene lo lango na molenge, a lingbi a fa ni na azo ti komande, a-ancien ayeke sara ye alingbi na ni.—w19.05, l. 9-10.

Tongana nyen la mo lingbi ti changé bibe so ayeke fa lege na mo?

Akota ye so a lingbi mo sara: Sara tënë na Jéhovah na lege ti sambela. Gbu li nzoni na ndö ti apensé nga na abango ndo ti mo so a lingbi mo changé ni. Soro anzoni kamarade.—w19.06, l. 11.

Nyen la e lingbi ti sara laso ti leke terê ti e ti ku ngoi so a yeke sara aye ti ngangu na e?

E bezoin ti kpengba songo ti e na Jéhovah. Duti na kite oko ape so Jéhovah aye e na lo yeke zia e lâ oko ape. Diko Bible lâ oko oko nga sambela lakue. Duti na kite ape so anzoni ye so Royaume ti Nzapa ayeke ga na ni ayeke si ande biani. Bata na li aversê so mo ye ni mingi nga na abia so asepela Jéhovah.—w19.07, l. 2-4.

Aye wa la e lingbi ti sara ti mû maboko na afami ti e ti sö fini ti ala?

A yeke kota ye ti gi ti comprendre ala, ti zia si nzoni tapande ti e afa ye na ala, e kanga bê nga e sara ye na nzoni bê.—w19.08, l. 15-17.

Ngbanga ti nyen la kua so Jésus amû na e ti sara adë bê ti e? (Mat. 11:28).

E yeke na azo so ayeke bâ ndo na ndö ti e so ayeke nzoni mingi, e yeke na akamarade so ayeke nzoni mingi nga kua so a mû na e ayeke nzoni mingi.—w19.09, l. 23.

Tongana nyen la Jéhovah alingbi ti zia na yâ ti bê ti e nzara ti sara ye nga na ngangu ti sara ye? (aPhil. 2:13).

Tongana e diko Bible nga e gbu li ti e na ndö ti ye so e diko, Nzapa alingbi ti sara si e yapu na lege so lo yeke zia na yâ ti bê ti e nzara ti sara ye nga na ngangu ti sara ye. Yingo ti lo alingbi ti sara si e sara kua na akode ti e nzoni mingi.—w19.10, l. 21.

Anzoni ye wa la a lingbi e sara kozo ti mû mbeni kota desizion?

Aye oku so a lingbi e sara ayeke so: E sara recherche nzoni, e sambela ti wara ndara, e bâ nzoni aye so apusu e ti mû desizion, e hinga mbilimbili aye so e ye ti sara nga e sara ye ahon ndö ni ape.—w19.11, l. 27-29.

Eskê a yeke na ngoi so Satan asara tënë na Éve la tënë ti âme so akui ape abâ gigi?

Na bango ni, a yeke na ngoi ni so ape. Satan atene na Ève so lo yeke kui ape, me lo tene pëpe so mitele ti lo ayeke kui me yingo ti lo ayeke ngbâ na fini na mbeni ndo. A zi avorongo nzapa ti wataka kue na ngoi ti kota ngu so apika na ngoi ti Noé. Peut-être azo akomanse ti mä na bê na tënë ti âme so ayeke kui ape kozo ti tene Nzapa asara si azo so aleke lani tour ti Babel akangbi.—w19.12, l. 15.