1. Fani mingi, Jéhovah ayeke kiri tënë na sambela ti awakua ti lo tongana nyen?

 ESKÊ mo hinga so Jéhovah apeut ti sara kua na mo ti kiri tënë na sambela so mbeni zo atene na bê ti lo kue? Jéhovah apeut ti sara kua na mo atâa mo yeke ancien, wakua ti mungo maboko, pionnier wala wafango tënë. Lo peut nga ti sara kua na mo atâa mo yeke maseka wala mbakoro wala mo yeke ita-koli wala ita-wali. Tongana mbeni zo so aye Jéhovah atoto na lo ti wara mungo maboko, fani mingi Nzapa ti e ayeke sara kua na a-ancien nga na ambeni wakua ti lo so ayeke be-ta-zo ti ga “azo so adë bê ti [zo ni so] mingi.” (aCol. 4:11). E yeke na ngia mingi ti sara na Jéhovah nga na aita na lege so. E peut ti wara lege ti sara ni na ngoi so mbeni sioni kobela amû ndo, mbeni ye ti ngangu asi wala a sara aye ti ngangu na aita ti e.

2. Ngbanga ti nyen la a peut ti duti ngangu ti aidé amba ti e na ngoi so mbeni sioni kobela amû ndo?

² Tongana mbeni sioni kobela amû ndo, a peut ti duti ngangu na e ti aidé mba. Na tapande, peut-être e ye ti gue ti bâ akamarade ti e, me a peut ti ga na kpale na e wala na ala. Peut-être e ye ti tisa aita so ayeke na kpale ti nginza ti ga ti te ye na ndo ti e, me so kue e peut ti sara ni ape. Peut-être e ye ti aidé ambeni zo, me a peut ti duti ngangu tongana azo ti sewa ti e ayeke bâ pasi. Atâa so kue, e ye ti aidé aita ti e, nga a nzere na Jéhovah tongana e sara ye so e peut ti sara ti aidé ala (aProv. 3:27; 19:17). Nyen la e peut ti sara?

3. Nyen la e manda na lege ti tapande ti a-ancien ti congrégation ti Desi? (Jérémie 23:4).

³ Ye so a-ancien apeut ti sara. Tongana mo yeke mbeni ancien,  gi ti hinga aita nzoni. (Diko Jérémie 23:4.) Desi, so a sara tënë ti lo na yâ ti article so ahon, atene: “Mbi na a-ancien ti groupe ti mbi e yeke fa ka tënë lakue nga na ambeni ngoi e yeke duti ndo oko ti sara ambeni ye.” b Ye so asara si a yeke ngangu ape na a-ancien ni ti aidé Desi na peko ti so kobela ti COVID-19 amû ndo nga ambeni zo ti sewa ti lo akui na kobela ni.

4. Ngbanga ti nyen la a-ancien apeut lani ti aidé Desi? Nyen la a-ancien amanda dä?

⁴ Desi atene: “So mbi na a-ancien e yeke akamarade, a yeke lani ngangu na mbi ape ti fa na ala atënë ti bê ti mbi nga na agingo bê ti mbi.” Nyen la a-ancien amanda dä? A-ancien, ala sara lisoro na aita so a zia ala ti bâ ndo na ndö ti ala kozo si mbeni ngangu kpale asi. Ala duti kamarade ti aita. Tongana mbeni sioni kobela so amû ndo akanga lege na ala ti gue ti bâ aita, ala gi ambeni lege nde ti sara lisoro na ala. Desi atene: “Na ambeni ngoi, a-ancien nde nde airi mbi na téléphone wala atokua na mbi amessage na oko lango ni. Aversê so ala fa na mbi andu bê ti mbi, atâa so mbi hinga ni nzoni.”

5. Tongana nyen la a-ancien apeut ti hinga aye so aita abezoin ni tongaso si ala aidé ala?

⁵ Mbeni lege so a-ancien apeut ti hinga aye so aita ti ala abezoin ni ayeke ti hunda na ala atënë na kode (aProv. 20:5). Eskê kobe, yorö nga na ambeni ye so ala bezoin ni alingbi ala? Eskê ala peut ti perdre kua ti ala wala même da ti ala? Eskê ala bezoin ti tene a aidé ala ti hunda gouvernement ti mû maboko na ala? Aita amû lani na Desi aye so lo bezoin ni. Me ndoye so a-ancien afa na mbage ti lo nga na awango ti Bible so ala mû na lo ti kpengba lo a-aidé lo mingi. Lo tene: “A-ancien asambela na mbi. Atâa so mbi girisa ambilimbili tënë so ala tene, me mbi girisa ape so a sara mbi nzoni. A yeke mbeni fason so Jéhovah atene na mbi, atene: ‘Mo yeke mo oko ape.’”—És. 41:10, 13.

6. Nyen la aita mingi na yâ ti congrégation apeut ti sara ti aidé amba ti ala? (Bâ foto.)

⁶ Ye so aita apeut ti sara. A yeke na lege ni ti ku ti tene a-ancien amû li ni ti aidé aita. Me Jéhovah aye ti tene e kue e kpengba aita nga e aidé ala (aGal. 6:10). Même mbeni kete ye so e sara ti fa so e ye mbeni zo so terê ti lo ason apeut ti kpengba lo mingi. Mbeni molenge apeut ti aidé babâ wala mama ti lo na ngoi  so ala yeke aidé mbeni ita-koli. Mbeni maseka apeut ti vo ye wala ti sara mbeni ye nde ndali ti mbeni ita-wali. Aita apeut ti tö kobe ti gue na ni na mbeni zo so terê ti lo ason. Me tongana mbeni sioni kobela amû ndo, azo kue ti yâ ti congrégation abezoin ti tene a kpengba ala. Peut-être e peut ti ngbâ aninga kete na peko ti bungbi ti sara lisoro na aita, atâa a yeke na Da ti Royaume wala na lege ti appel vidéo. A-ancien nga kue abezoin ti tene a kpengba ala. Ambeni Témoin atokua mbeti ti kiri singila na a-ancien ndali ti so lakue ala yeke na aye mingi ti sara ndali ti aita na ngoi so mbeni sioni kobela amû ndo. Tongana e sara part ti e ti “ngbâ ti dë bê ti mba nga ti kpengba mba”, a yeke tâ nzoni mingi.—1 aThes. 5:11.

7. Akpale wa la mbeni zo apeut ti wara na peko ti mbeni ngangu kpale?

⁷ Mbeni ngangu kpale apeut ti changé fini ti zo gï hio tongaso. Ambeni zo apeut ti perdre aye ti ala, da ti ala wala même azo so ala ye ala mingi. Asioni ye so apeut nga ti si na aita ti e. Nyen la e peut ti sara ti aidé ala?

8. Nyen la a-ancien nga na amokonzi ti sewa apeut ti sara kozo si mbeni ngangu kpale asi?

⁸ Ye so a-ancien apeut ti sara. A-ancien, ala aidé aita ti ala ti leke terê ti ala kozo si mbeni ngangu kpale asi. Ala sara kue ti tene aita kue ahinga aye so ala bezoin ti sara ti bata terê ti ala nga ti tene ala na a-ancien asara lisoro. Margaret, so a sara tënë ti lo na yâ ti article so ahon, atene: “A-ancien ti congrégation ti e asara mbeni bezoin ti congrégation so na yâ ni ala fa na e so kpale ti wâ so ayeke gbi ndo ade ti hunzi ape na ndo so e yeke dä. Ala tene so tongana akota zo ti kodro ahunda ti tene azo ague na mbeni ndo nde wala tongana ye ni aga sioni, e doit ti quitté hio.” Wango ti ala asi tâ na ngoi ni ndali ti so mbeni sioni wâ akomanse ti gbi ndo gï yenga oku na pekoni. Na ngoi ti vorongo Nzapa na yâ ti sewa, amokonzi ti sewa apeut ti sara lisoro na ndö ti ye so zo oko oko ti sewa adoit ti sara. Tongana mo na amolenge ti mo aleke terê ti ala awe, peut-être li ti ala ayeke ga kirikiri ape tongana mbeni ngangu kpale asi.

9. Aye wa la a-ancien apeut ti sara kozo nga na peko ti mbeni ngangu kpale?

⁹ Tongana mo yeke surveillant ti mbeni groupe, kozo ti tene mbeni ngangu kpale asi, sara kue ti wara vrai numéro ti téléphone ti aita kue na yâ ti groupe ti mo nga hinga ndo so ala lango dä. Sara aye so kue na mbeti nga ngoi na ngoi gi ti bâ wala ye achangé dä. Tongaso, tongana mbeni ngangu kpale asi, mo yeke wara awafango tënë ni kue ti bâ aye so ala bezoin ni. Tokua asango so kue na coordinateur ti bungbi ti a-ancien, na lo yeke tokua ni na surveillant ti circonscription. Tongana aita-koli so asara kua maboko na maboko, ala yeke aidé aita nzoni. Na peko ti wâ so agbi ndo so, surveillant ti circonscription ti Margaret alango ape teti ngbonga 36. Lo yeke lani na gbâ ti aye ti sara ti leke yâ ti kua so a-ancien ayeke sara na ngoi so ala yeke gi ti wara aita 450 so adoit ti quitté da ti ala nga ti bâ lege ti ala (2 aCor. 11:27). Tongaso, azo kue so abezoin ndo ti lango awara ni.

10. Ngbanga ti nyen la a-ancien abâ so a yeke kota ye ti sara vizite na aita ti kpengba ala? (Jean 21:15).

¹⁰ Kua ti a-ancien ayeke ti sara kua na Bible ti kpengba aita nga ti aidé ala so ayeke na vundu (1 Pi. 5:2). Tongana mbeni ngangu kpale asi, a yeke nzoni ala bâ si aita kue ayeke nzoni, ala yeke na kobe, bongo nga na ndo ti lango. Me teti nze mingi na pekoni, peut-être aita ayeke na bezoin ti tene a sara kua na Bible ti kpengba ala nga ti dë bê ti ala. (Diko Jean  21:15.) Harold, so ayeke membre ti mbeni Komite ti filiale nga lo wara terê na aita mingi so ayeke na ndo so ye ti ngangu asi dä, atene: “Ti tene azo akiri awara ngangu na peko ti mbeni ngangu kpale ayeke mû ngoi. Ala peut ti komanse ti bâ so ala yeke nzoni, me ala yeke ngbâ ti pensé na azo so ala ye ala so akui, wala mbeni ye ti ngangu ngere so ala perdre ni wala ngangu kpale so ala yeke lani na yâ ni. Tongana ala pensé na aye so, a peut ti sara si vundu akiri asara ala. A ye ti tene ape so ala yeke na mabe ape, me vundu so asara ala ayeke na lege ni.”

11. Nyen la asewa apeut ti duti lakue na bezoin ni?

¹¹ A-ancien ayeke sara ye alingbi na wango so ahunda ti “toto legeoko na azo so atoto.” (aRom. 12:15). A-ancien ayeke peut-être na bezoin ti tene na aita so asö kuâ so Jéhovah nga na aita ti ala angbâ ti ye ala. A-ancien ayeke aidé asewa ti ngbâ ti sara aye so ala yeke sara ka, na tapande, sambela, mandango ye, guengo na abungbi nga na fango tënë. A-ancien apeut nga ti wa ababâ na amama ti aidé amolenge ti ala ti zia li ti ala na ndö ti aye so mbeni ngangu kpale apeut ti buba ni ape. Ababâ na amama, ala dabe ti amolenge ti ala so Jéhovah ayeke duti lakue Kamarade ti ala nga lo yeke duti lakue dä ndali ti ala. Nga, ala fa na ala so ala peut ti ngbâ lakue na yâ ti mbeni sewa ti aita so ayeke na yâ ti dunia kue so ayeke nduru ti aidé ala.—1 Pi. 2:17.

12. Nyen la aita apeut ti sara ti aidé amba ti ala na ngoi ti mbeni ngangu kpale? (Bâ foto.)

¹² Ye so aita apeut ti sara. Tongana mbeni ngangu kpale asi nduru na ndo so mo yeke dä, hunda a-ancien ti hinga ye so mo peut ti sara ti aidé. Peut-être mo peut ti yamba na ndo ti mo teti mbeni ngoi azo so adoit ti quitté da ti ala wala avolontaire ti construction. Peut-être mo peut ti gue na kobe nga na ambeni ye nde na awafango tënë so abezoin ni. Tongana mbeni ngangu kpale asi na mbeni ndo so ayo na mo, mo peut nga ti aidé. Na lege wa? Mo peut ti sambela ndali ti azo so ye ni asi na ala (2 aCor. 1:8-11). Mo peut ti mû maboko na kua so a yeke sara ti mû maboko na aita na peko ti mbeni ngangu kpale na mungo offrande ndali ti kua ti fango tënë na yâ ti dunia kue (2 aCor. 8:2-5). Tongana mo peut ti gue na ndo so ngangu kpale ni asi dä ti aidé, hunda a-ancien ti hinga ye so mo peut ti sara ti aidé. Tongana a yeda ti tene mo aidé, peut-être a yeke fa na mo mbeni kua tongaso si mo peut ti mû maboko nzoni.

13. Akpale wa la aita ti e ayeke wara na yâ ti akodro so a kanga lege na kua ti e dä?

¹³ Na yâ ti akodro so a kanga lege na kua ti e dä, aye ti ngangu so a sara na aita asara si gigi akiri akpengba na ala. Aita na yâ ti akodro so ayeke wara nga kpale ti nginza, terê ti ala ayeke son nga ala yeke perdre azo so ala ye ala mingi. Me so a kanga lege na kua ti e, a peut ti duti ngangu na a-ancien ti gue ti kpengba aita wala ti sara lisoro na ala. A yeke ye so asi lani na Andrei, so a sara tënë ti lo na yâ ti article so ahon. Mbeni ita-wali ti groupe ti fango tënë ti lo ayeke lani na kpale ti nginza. Na pekoni, lo sara accident na oto. Lo bezoin lani ti tene a sara na lo gbâ ti opération, nga lo peut ti sara kua ape. Atâa so a kanga lege na kua ti e nga sioni kobela so amû ndo, aita asara lani ye so ala peut ti sara ti aidé lo, na Jéhovah abâ ni.

14. Tongana nyen la a-ancien apeut ti zia nzoni tapande na lege so ala zia bê ti ala na Jéhovah?

¹⁴ Ye so a-ancien apeut ti sara. Andrei asambela lani nga lo sara ye so lo peut ti sara. Nyen la Jéhovah asara? Lo sara si aita nde nde ti congrégation so apeut ti sara aye mingi a-aidé lo. Ambeni ague na ita-wali ni ti bâ docteur. Ambeni amû na lo nginza ti aidé lo. Jéhovah apusu ala ti sara aye so ala peut ti sara, nga lo sara tufa na ndö ti a-effort kue so ala sara (aHéb. 13:16). A-ancien, tongana a kanga lege na kua ti e, ala hunda na aita ti aidé ala (Jér. 36:5, 6). Kota ye ni, ala zia bê ti ala na Jéhovah. Lo peut ti aidé ala ti mû na aita aye so ala bezoin ni.

15. Tongana nyen la e peut ti ngbâ ti duti beoko na aita na ngoi so a yeke sara aye ti ngangu na e?

¹⁵ Ye so aita apeut ti sara. Tongana a kanga lege na kua ti e, peut-être e doit ti sara bungbi na yâ ti akete kete groupe. Tongaso, a yeke kota ye mingi ti duti na siriri na popo ti e. Zia e tiri na Satan, me na amba ti e ape. Kanga lê na ndö ti afaute ti aita ti mo, wala gi ti tene ala leke akpale so ayeke na popo ti ala hio (aProv. 19:11; aÉph. 4:26). Ala mû li ni ti aidé mba na popo ti ala (Tite 3:14). Aye so aita asara ti aidé ita-wali so ayeke na yâ ti bezoin aga na aye ti nzoni na azo kue ti yâ ti groupe ni. Ala ga nduru mingi na mba tongana mbeni sewa.—Ps. 133:1.

16. Ti gue oko na aColossien 4:3, 18, tongana nyen la e peut ti aidé aita ti e so a yeke sara aye ti ngangu na ala?

¹⁶ Aita saki mingi ayeke sara na Jéhovah  atâa so gouvernement akanga lege na ambeni kua ti e. A kanga ambeni ndali ti mabe ti ala. E peut ti sambela ndali ti ala nga na azo ti sewa ti ala. E peut nga ti sambela ndali ti aita so asara ye na mbeto ape ti aidé aita so a kanga ala, atâa so a peut ti gbu ala. Ala yeke wa aita so ti zia bê ti ala na Jéhovah, ala yeke mû na ala aye so ala bezoin ni nga ala yeke gbu koko ti ala na gbele da-ngbanga. c (Diko aColossien 4:3, 18.) Hinga so sambela ti mo ayeke na ngangu mingi.—2 aThes. 3:1, 2; 1 Tim. 2:1, 2.

17. Tongana nyen la mo peut ti leke terê ti mo laso ti ku na ngoi so a yeke sara ande aye ti ngangu na mo?

¹⁷ Mo na azo ti sewa ti mo apeut ti leke terê ti ala laso ti ku na ngoi so a yeke sara ande aye ti ngangu na ala (Kus. 14:22). Gi pëpe ti imaginé asioni ye kue so apeut ti si. Me, kpengba songo ti mo na Jéhovah nga aidé amolenge ti mo ti sara tongaso. Tongana, na ambeni ngoi, mo gi bê ti mo, zi bê ti mo na Nzapa (Ps. 62:7, 8). Ala sara lisoro na sewa na ndö ti araison kue so ndali ni ala peut ti sara confiance na lo. d Gï tongana ti so tongana mo aidé amolenge ti mo ti leke terê ti ala ndali ti mbeni ngangu kpale ayeke aidé ala, tongana mo leke amolenge ti mo ti ku na sarango aye ti ngangu na zo ayeke aidé nga ala. Ala yeke sara ye na mbeto ape nga ala yeke duti kpô ndali ti so mo fa na ala ti sara confiance na Jéhovah.

18. Nyen la ayeke ku e kekereke?

¹⁸ Siriri ti Nzapa asara si e bâ so e yeke nzoni (aPhil. 4:6, 7). Na lege ni, Jéhovah ayeke dë bê ti e atâa so laso terê ti e apeut ti son, mbeni ngangu kpale apeut ti si na e nga a peut ti sara aye ti ngangu na e. Lo yeke sara kua na a-ancien so asara kua ngangu ti ga ti sara vizite na e ti kpengba e. Lo mû na e kue pasa ti aidé mba na popo ti e. Siriri so e yeke na ni laso ayeke leke e ti ku na akota kpale so ayeke ga, même “kota ye ti vundu”. (Mat. 24:21). Na ngoi ni so, e yeke duti ande na bezoin ti ngbâ ti duti na siriri nga ti aidé amba ti e ti sara nga tongaso. Me na pekoni, e yeke wara ande ape akota kpale so ayeke sara si e gi bê ti e. E yeke duti ande na tâ siriri so ayeke ngbâ lakue lakue.—És. 26:3, 4.