Mo diko a-article ti Tour ti Ba Ndo so asigi ade ti ninga ape so nzoni? Bâ wala mo lingbi ti kiri tënë na ahundango ndo so ge:

Anzoni ye wa la e yeke wara tongana e mû ngoi ti sara tënë na Jéhovah, ti mä lo nga ti gbu li na ndö ti lo?

E yeke mû anzoni desizion, e yeke ga mbeni nzoni wafango ye, mabe ti e ayeke kpengba mingi nga e yeke ye Jéhovah mingi.—w22.01, l. 30-31.

Tongana e sara confiance na Jéhovah nga na azo so ayeke sara kua na iri ti lo, a yeke aidé e tongana nyen?

Laso ayeke ngoi ti tene e manda ti sara confiance na fason so Nzapa ayeke sara na aye na lege so e duti na kite ape na ndö ti aye so a-ancien afa nga na adesizion so ala mû. Na ngoi ti kota ye ti vundu, e yeke duti nduru ti sara ye alingbi na aye so a fa na e ti sara même tongana, na bango ni, e mä yâ ni ape wala a yeke na lege ni ape.—w22.02, l. 4-6.

So ange ni atene na Zacharie tënë ti “fil à plomb” so ayeke “na maboko ti [Gouverneur] Zorobabel”, a ye ti fa nyen? (Zach. 4:8-10).

Atënë ti ange ni afa na azo ti Nzapa so atâa so na bango ni fini temple ni alingbi na ti kozo ape, a yeke hunzi ni nga a yeke duti ye so Nzapa ayeda na ni.—w22.03, l. 16-17.

Tongana nyen la fason so e yeke sara na tënë apeut ti duti mbeni nzoni tapande ndali ti amba ti e? (1 Tim. 4:12).

E yeke sara tënë na nzoni bê nga na nengo zo na azo so e yeke fa tënë na ala, e yeke he bia na bê ti e kue, e yeke mû commentaire lakue na abungbi, e yeke tene tâ tënë nga na atënë so akpengba amba ti e nga e yeke zonga zo ape.—w22.04, l. 6-9.

Ngbanga ti nyen la Apocalypse 13:1, 2 atene so gï nyama oko la ayeke na aye so anyama ti ngonda osio, so ti tene, aroyaume so a sara tënë ti ala na Daniel chapitre 7, ayeke na ni?

Nyama ti ngonda so a sara tënë ti lo na Apocalypse 13 aye pëpe ti sara tënë ti mbeni mbilimbili royaume, na tapande, Rome. Me, a ye ti sara tënë ti agouvernement kue so akomande na ndö ti azo juska laso.—w22.05, l. 9.

Kota ye wa la e peut ti sara ti fa so e yeke na confiance so Nzapa ayeke fâ ngbanga mbilimbili?

Tongana mbeni zo ason bê ti e wala a sara siokpari na terê ti e, e yeke ngbâ ti sara ngonzo na terê ti lo ape nga e yeke bata lo na bê ape, me e yeke zia tënë ni na maboko ti Jéhovah. Lo yeke zi asioni ye kue so siokpari aga na ni.—w22.06, l. 10-11.

Nyen la a yeke nzoni ita-koli so ayeke sambela na ngoi ti bungbi agirisa ape?

Nda ti sambela ayeke pëpe ti mû wango na azo wala ti tene mbeni tokua. Mbilimbili na tongo nda ti bungbi, lo bezoin ti ‘sara tënë mingi’ ape (Mat. 6:7).—w22.07, l. 24-25.

Na lege wa la “[azo] so angbâ ti sara aye ti sioni, zingongo ti ala na kuâ ague na ala ti wara ngbanga”? (Jean 5:29).

A yeke fâ ande ngbanga ti ala pëpe alingbi na aye so ala sara ândö. A yeke bâ yâ ti asarango ye ti ala na peko ti so a zingo ala na kuâ.—w22.09, l. 18.

Pendere wango wa la Ita Rutherford amû na aita na ngoi ti kota bungbi ti septembre 1922?

Na ngoi ti kota bungbi so a sara ni na Cedar Point, na Ohio, na États-Unis, lo tene: “Gbia ni akomande! Ala yeke awatokua ti lo. Tongaso ala fa, ala fa, ala fa tënë ti Gbia ni na Royaume ti lo.”—w22.10, l. 3-5.

Ésaïe chapitre 30 afa aye ota so Nzapa ayeke sara ti aidé e ti gbu ngangu. A yeke aye wa?

Chapitre so afa so (1) lo yeke mä asambela ti e nga lo yeke kiri tënë na ni, (2) lo yeke fa lege na e nga (3) lo yeke sara tufa na ndö ti e laso nga na yâ ti angoi so ayeke ga.—w22.11, l. 9.

Ngbanga ti nyen la e peut ti tene so atënë so ayeke na Psaume 37:10, 11, 29 aga tâ tënë ândö nga ayeke ga tâ tënë na yâ ti angoi so ayeke ga?

Atënë ti David afa nzoni mingi pendere dutingo ti azo ti Israël ti ândö, na tapande, na ngoi ti komandema ti Salomon. Jésus asara tënë ti mbeni paradis so ayeke ga ande, nga lo tene peko ti atënë ti yâ ti versê 11 (Mat. 5:5; Luc 23:43).—w22.12, l. 8-10, 14.