1. Ngoi kete kozo si Jésus akui, lo tene nyen na sioni zo so ayeke na terê ti lo? (Luc 23:39-43).

 JÉSUS nga na asioni zo use so ayeke na terê ti lo ayeke bâ lani pasi na ngoi so ala yeke gue yeke yeke ti kui (Luc 23:32, 33). Asioni zo use so ayeke tene lani sioni tënë ti Jésus, tongaso kite ayeke dä ape so ala yeke lani adisciple ti lo ape (Mat. 27:44; Marc 15:32). Me mbeni oko achangé lani bê ti lo. Lo tene: “Jésus, dabe ti mo na mbi tongana mo lï na yâ ti Royaume ti mo.” Jésus atene na lo: “Ti tâ tënë ni, mbi tene na mo laso: Mo yeke duti ande na mbi na Paradis.” (Diko Luc 23:39-43.) Ye oko afa ape so sioni zo so ayeda na tënë ti “Royaume ti yayu” so Jesus afa na ngoi ti kua ti fango tënë ti lo. Nga Jésus atene lani na koli so ape so lo yeke lï na yâ ti Royaume (Mat. 4:17). Jésus ayeke sara lani tënë ti Paradis so ayeke duti ande na ndö ti sese. E tene tongaso ngbanga ti nyen?

2. Nyen la afa so sioni zo so achangé lani bê ti lo ayeke Juif?

² Peut-être sioni zo so achangé lani bê ti lo ayeke mbeni Juif. Sioni zo so atene na mba ti lo, lo tene: “Mo kpe mbeto ti Nzapa ape? so mo kue mo yeke na gbe ti oko ngbanga ni so.” (Luc 23:40). A-Juif ayeke voro lani Nzapa oko, me azo ti amara amä na bê na anzapa mingi (Ex. 20:2, 3; 1 aCor. 8:5, 6). Tongana asioni zo so ayeke lani aJuif ape, peut-être oko ni so ayeke hunda mba ti lo, atene: “Mo kpe mbeto ti anzapa ape?” Na ndö ni, a tokua lani Jésus na azo ti amara ape, me na “mbage ti ataba ti da ti Israël so agirisa.” (Mat. 15:24). Nzapa afa nga na azo ti Israël so lo yeke zingo akuâ. Peut-être sioni zo so ahinga tënë ni, na atënë ti lo afa so lo pensé so Jéhovah ayeke zingo Jésus ti komande na yâ ti Royaume ti Nzapa. Na bango ni, koli so ayeke na beku so Nzapa ayeke zingo nga lo na kuâ.

3. Peut-être nyen la aga na li ti sioni zo so achangé bê ti lo na ngoi so Jésus asara tënë ti Paradis? Fa ndani so mo tene tongaso. (Genèse 2:15).

 ³ So sioni zo so achangé bê ti lo ayeke lani Juif, kite ayeke dä ape so lo hinga ye na ndö ti Adam na Ève nga na Paradis so Jéhovah azia ala dä. Tongaso, peut-être sioni zo so ahinga so Paradis so Jésus asara tënë ni ayeke duti mbeni pendere yaka ge na ndö ti sese.—Diko Genèse 2:15.

4. A yeke nzoni tënë so Jésus atene na mbeni sioni zo apusu e ti gbu li na ndö ti nyen?

⁴ A yeke nzoni tënë so Jésus atene na sioni zo ni apusu e ti gbu li ti bâ fini ayeke duti ande tongana nyen na yâ ti Paradis. Ti tâ tënë ni, e peut ti manda mbeni ye na ndö ti Paradis na lege ti komandema ti Gbia Salomon so na ngoi ni siriri ayeke dä. Bible atene so Jésus ayeke kota ahon Salomon. E peut ti ku ti tene Jésus na amba ti lo agbia ayeke sara si sese aga pendere Paradis (Mat. 12:42). Kite ayeke dä ape so a nzere na “ambeni taba” ti hinga aye so ala doit ti sara ti duti na fini lakue lakue na yâ ti Paradis.—Jean 10:16.

5. Mo pensé so fini na yâ ti Paradis ayeke duti ande tongana nyen?

⁵ Tongana mo pensé na ndö ti fini na yâ ti Paradis, nyen la ayeke ga na li ti mo? Peut-être mo yeke imaginé mbeni pendere parc so ayeke tongana yaka ti Éden (Gen. 2:7-9). Peut-être mo dabe ti mo na prophétie ti Michée so lo tene wakua ti Nzapa oko oko “ayeke duti ande na gbe ti keke ti vigne ti lo nga na gbe ti keke ti figue ti lo”. (Mi. 4:3, 4). Peut-être mo yeke pensé nga na aversê ti Bible so atene kobe ayeke duti ande gbani gbani (Ps. 72:16; És. 65:21, 22). Tongaso, peut-être mo yeke imaginé mo wani na yâ ti mbeni pendere parc, na mo yeke duti na terê ti mbeni table so asi singo na nzerengo kobe. Mo peut ti imaginé pendere fion ti akeke nga na afleur. Nga mo peut ti imaginé so afami nga na akamarade ti mo, so na popo ni mo yeke wara ala so a zingo ala na kuâ, ayeke he ngia nga a nzere na ala ti duti ndo oko. Aye so ayeke senge bango li ape. Kite ayeke dä ape so aye so kue ayeke passé ande na ndö ti sese. Me, na yâ ti Paradis e yeke sara ande pendere kua.

6. Nyen la e yeke sara ande na yâ ti Paradis? (Bâ foto.)

⁶ Jéhovah acréé lani e ti wara ngia na lege ti kua ti e (Zo-ti. 2:24). E yeke duti ande na aye ti sarango ni mingi, mbilimbili na ngoi ti Komandema ti ngu saki oko ti Christ. Azo so ayeke sö kuâ na ngoi ti kota ye ti vundu, nga na azo kutu mingi so ayeke zingo ande na kuâ, ayeke ande na bezoin ti bongo, kobe nga na ndo ti lango. E doit ti sara ande gbâ ti akua ti mû na ala aye ni so, me a yeke nzere na e ti sara ni. Gï tongana ti so Adam na Ève adoit lani ti bâ lege ti yaka so a zia ala dä, e yeke duti  ande na pasa ti sara si sese aga Paradis. Imaginé nga tongana nyen la a yeke nzere na e ti fa ye na azo kutu mingi so a yeke zingo ala ande na kuâ so ahinga ye mingi ape na ndö ti Jéhovah nga na ye so lo leke ti sara. A yeke nzere nga na e ti aidé azo so ayeke be-ta-zo, so ayeke lani na fini ngoi mingi kozo si Jésus aga na sese, ti hinga aye so asi ngbene ye so ala kui.

7. Nyen la e peut ti duti sûr na ni? Ngbanga ti nyen?

⁷ E peut ti duti sûr so na yâ ti Paradis, e yeke duti ande na siriri, e yeke wara ye kue so e bezoin ni nga wusuwusu ayeke duti ande dä ape. Ngbanga ti nyen? Ngbanga ti so Jéhovah afa na e awe mbeni tapande so afa tongana nyen la gigi ayeke duti ande na gbe ti komandema ti Molenge ti lo. Tapande ni ayeke komandema ti Gbia Salomon.

8. Tongana nyen la atënë so ayeke na Psaume 37:10, 11, 29 aga tâ tënë na peko ti so Gbia David asû ni? (Bâ “Atënë so azo ahunda” na yâ ti Tour ti Ba Ndo so.)

⁸ Yingo vulu apusu lani Gbia David ti sû atënë so afa gigi ayeke duti ande tongana nyen na ngoi so mbeni gbia ti ndara so ayeke be-ta-zo ayeke komande. (Diko Psaume 37:10, 11, 29.) Fani mingi, e yeke diko Psaume 37:11 na azo na ngoi so e yeke sara lisoro na ala na ndö ti Paradis so ayeke ga. A yeke biani na lege ni ndali ti so Jésus asara tënë ti versê so na yâ ti Fango tënë ti lo na ndö ti Hoto, na a fa so a yeke ga tâ tënë na yâ ti angoi so ayeke ga (Mat. 5:5). Me atënë ti David afa nga gigi ayeke duti ande tongana nyen na ngoi ti Gbia Salomon. Na ngoi so Salomon ayeke komande lani na Israël, siriri ti awakua ti Nzapa ayeke lani mingi nga aye ti ala amaï na yâ ti mbeni kodro so “lait na mafuta ti otoro asi singo dä”. Nzapa atene: “Tongana ala ngbâ ti mû peko ti andia ti mbi . . . , mbi yeke zia ande siriri na yâ ti kodro ni. Tongana ala yeke lango, mbeni zo ti sara si ala dö na mbeto ayeke duti dä pëpe.” (Lév. 20:24; 26:3, 6). Azendo so aga tâ tënë na ngoi ti komandema ti Salomon (1 Chron. 22:9; 29:26-28). Jéhovah amû nga lani zendo so asioni zo so ayeke “duti dä encore ape.” (Ps. 37:10). Tongaso, atënë so ayeke na Psaume 37:10, 11, 29 aga lani tâ tënë na ayeke ga nga ande tâ tënë na yâ ti angoi so ayeke ga.

9. Gbia-wali ti Shéba atene nyen na ndö ti komandema ti Gbia Salomon?

 ⁹ Gbia-wali ti Shéba amä tënë ti siriri nga na maïngo ti aye ti azo ti Israël na ngoi so Salomon ayeke lani gbia. Lo londo ayo ti ga na Jérusalem ti bâ ye ni na lê ti lo (1 aGbia 10:1). Na peko ti so lo bâ dutingo ti azo na gbe ti royaume ti Salomon, lo tene: “Atënë so mbi mä so asi même ndambo ti ye so mbi bâ so pëpe. . . . Azo ti kodro ti mo nga na awakua ti mo so ayeke luti lakue na gbele mo ti mä ndara ti mo ayeke na ngia!” (1 aGbia 10:6-8). Me dutingo ti azo na gbe ti komandema ti Salomon ayeke gï mbeni tapande ti aye so Jéhovah ayeke sara ande ndali ti azo na gbe ti komandema ti Molenge ti lo, Jésus.

10. Na yâ ti aye wa la Jésus ayeke kota ahon Salomon?

¹⁰ Jésus ayeke kota ahon Salomon na yâ ti aye kue. Salomon ayeke lani mbeni koli so ayeke mbilimbili-kue ape na lo sara akota faute so na nda ni aga na angangu kpale na awakua ti Nzapa. Me Jésus ayeke mbeni Gbia so ayeke mbilimbili-kue so asara faute ape (Luc 1:32; aHéb. 4:14, 15). Jésus angbâ lani be-ta-zo na Nzapa atâa so Satan atara lo ngangu mingi. Asarango ye ti Christ afa so lo yeke sara siokpari lâ oko ape wala lo yeke sara pëpe mbeni ye so ayeke sioni na azo ti gbe ti lo so ayeke be-ta-zo. So kota pasa la e yeke na ni ti tene lo duti Gbia ti e!

11. Azo wa la ayeke mû ande maboko na Jésus ti komande?

¹¹ Jésus na azo 144000, so ayeke komande legeoko na lo, ayeke bâ lege ti azo nga ala yeke sara si ye so Jéhovah aleke na bê ti lo ti sara ndali ti sese aga tâ tënë (Apoc. 14:1-3). So ala gbu ngangu na yâ ti atara nga na angangu kpale mingi na ngoi so ala yeke lani na sese, ala yeke bâ ande mawa ti azo. Kua ti nyen la azo so ayeke komande legeoko na Jésus ayeke sara ande?

12. Kua ti nyen la Jéhovah ayeke mû ande na azo 144000?

¹² Jésus na amba ti lo agbia ayeke na kua mingi ahon ti so Salomon ayeke na ni lani. Gbia ti Israël so ayeke bâ lani lege ti azo kutu mingi na yâ ti kodro oko. Me, ala so ayeke komande ande na yâ ti Royaume ti Nzapa ayeke mû maboko ti bâ lege ti azo kutu mingi so ayeke na ndö ti sese kue. So tâ kota pasa la Jéhovah amû na azo 144000!

13. Kua wa la so ayeke nde amba ti Jésus agbia ayeke sara ande?

¹³ Tongana ti Jésus, azo 144000 ayeke duti ande agbia nga na aprêtre (Apoc. 5:10). Na gbe ti Ndia ti Moïse, aprêtre ayeke mû maboko na awakua ti Nzapa ti ngbâ ti duti na nzoni seni nga ti ngbâ nduru na Jéhovah. So Ndia ni ayeke lani “gbe ti dê ti anzoni ye so ayeke ga,” a yeke na lege ni ti tene so amba ti Jésus agbia ayeke aidé ande azo ti ngbâ ti duti na nzoni seni nga ti ngbâ nduru na Jéhovah (aHéb. 10:1). E yeke ku ti bâ tongana nyen la agbia nga aprêtre so ayeke fa ande apensé ti ala na azo ti gbe ti Royaume so ayeke na ndö ti sese. Atâa nyen la Jéhovah aleke, e peut ti duti sûr so na yâ ti Paradis so ayeke ga, azo so ayeke na ndö ti sese ayeke wara ande afango lege so ala bezoin ni.—Apoc. 21:3, 4.

14. Songo wa la ayeke na popo ti “ambeni taba” na aita ti Christ?

¹⁴ Jésus airi azo so ayeke komande legeoko na lo “kete kundu ti ataba”. (Luc 12:32). Lo sara nga tënë ti mbeni use groupe ni so lo iri ala “ambeni taba”. Agroupe use so abungbi aga kundu oko ti ataba (Jean 10:16). Laso, azo so ayeke na yâ ti agroupe use so ayeke sara kua legeoko, na ala yeke ngbâ ande ti sara kua  maboko na maboko na ngoi so sese ayeke ga Paradis. Me na ngoi ni so, ala so ayeke na yâ ti groupe ti “kete kundu ti ataba” ayeke duti ande na yayu nga ala so ayeke na yâ ti groupe ti “ambeni taba” ayeke duti ande na beku ti ngbâ na fini lakue lakue na ndö ti sese. Me ambeni ye ayeke dä so “ambeni taba” adoit ti sara ti tene ala vivre ande na yâ ti Paradis.

15. (a) Tongana nyen la “ambeni taba” ayeke sara kua maboko na maboko na aita ti Christ? (b) Tongana nyen la e peut ti mû tapande ti ita-koli so ague na pharmacie? (Bâ foto.)

¹⁵ Zo ti sioni so achangé bê ti lo akui kozo ti tene lo wara lege ti fa so lo kiri singila na Christ ndali ti ye so lo sara ndali ti lo. Me laso, lege azi mingi na “ambeni taba” ti fa atënë ti bê ti ala na ndö ti Jésus. Na tapande, e fa so e ye lo mingi na lege ti sarango ye ti e na mbage ti aita ti lo so a soro ala na lege ti yingo vulu. Jésus atene so lo yeke fâ ngbanga na ndö ti ataba alingbi na sarango ye ti ala na mbage ti aita ti lo (Mat. 25:31-40). E peut ti mû maboko na aita ti Christ na lege so e yapu ti aidé ala na kua ti fango tënë nga na sarango adisciple (Mat. 28:18-20). A yeke ndani la e yeke gi ti sara kua nzoni na ambeti ti mandango na Bible na azo, so bungbi ti Jéhovah asigi na ni, na tapande, buku Ngbâ na fini lakue lakue! Tongana ade mo manda Bible na mbeni zo ape, mo peut ti zia na gbele mo ti hunda azo mingi ti manda Bible na ala.

16. Nyen la e peut ti sara laso ti leke terê ti e ti duti azo ti gbe ti Royaume ti Nzapa?

¹⁶ E doit ti ku pëpe juska e vivre na yâ ti Paradis si e duti na asarango ye ti azo so Jéhovah aye ti tene ala vivre dä. Laso, e peut ti gi ti sara ye mbilimbili na lege ti atënë ti yanga ti e na asarango ye ti e nga e duti lakue na anzoni sarango ye. E peut nga ti duti be-ta-zo na Jéhovah, na koli wala wali ti e nga na amba ti e aChrétien. Tongana laso e mä yanga ti Jéhovah na yâ ti sioni dunia so, a yeke duti ande ngangu na e ape ti mä yanga ti lo na yâ ti Paradis. E peut nga ti maï akode nga na asarango ye so afa so e yeke leke terê ti e ti vivre na yâ ti Paradis. Bâ article “Mo yeke nduru ti tene ‘sese aga ti mo’?” na yâ ti Tour ti Ba Ndo so.

17. Eskê a yeke nzoni e découragé ndali ti asiokpari so e sara giriri? Fa ndani so mo tene tongaso.

¹⁷ A yeke nzoni e zia ti fâ ngbanga na ndö ti  e ndali ti akota siokpari so e sara ândö. Ye oko, a yeke nzoni e bâ lâ oko ape ye so a futa ti zi azo tongana mbeni raison ti “ngbâ na yâ ti siokpari na mbana”. (aHéb. 10:26-31). Me e peut ti duti sûr so tongana e changé bê ti e biani na peko ti so e sara mbeni kota siokpari, e hunda Jéhovah nga na a-ancien ti aidé e nga e changé asarango ye ti e, lo yeke pardonné e kue (És. 55:7; Kus. 3:19). Girisa ape atënë so Jésus atene na aFarizien: “Mbi ga ti iri azo ti mbilimbili pëpe, me awasiokpari.” (Mat. 9:13). Ye so a futa ti zi azo ayeke na ngangu ti kanga ndö ti asiokpari kue so e sara.

18. Nyen la mo ye ti tene mo na zo ti sioni so akui na terê ti Jésus asara ande lisoro na ndö ni?

¹⁸ Eskê mo peut ti imaginé so mo yeke na yâ ti Paradis, na mo yeke sara lisoro na zo ti sioni so asara lani lisoro na Jésus? Kite ayeke dä ape so ala use kue ayeke kiri singila na Jésus ndali ti sandaga ti lo. Mo peut nga ti hunda lo ti fa na mo aye so asi na yâ ti andangba l’heure ti fini ti Jésus na sese, nga a sara lo tongana nyen na ngoi so Jésus ayeda ti sara ye so lo hunda. Na mbage, lo peut ti hunda mo ti fa na lo gigi ayeke lani tongana nyen na andangba lango ti dunia ti Satan. A yeke duti ande mbeni pendere pasa ti manda Bible na azo so ayeke tongana koli so.—aÉph. 4:22-24.

19. Ngbanga ti nyen la gigi na yâ ti Paradis ayeke fun ande sen ape? (Bâ foto ti couverture ni.)

¹⁹ Gigi na yâ ti Paradis ayeke fun ande sen na hôn ti e lâ oko ape. E yeke tingbi ande lakue na azo so e ye ti gi ti hinga ala nga e yeke duti lakue na nzoni kua ti sarango ni. Ye so ayeke nzoni mingi ayeke so, lâ oko oko, e yeke hinga Babâ ti e ti yayu nzoni mingi ahon ti kozo, nga aye so lo mû na e ayeke nzere na e. Aye ti manda na ndö ti lo ayeke duti ande dä lakue, nga aye mingi ayeke duti ande dä ti manda na ndö ti aye so lo créé. So gigi ti e ayeke ngbâ ande ti yo, tongana ngoi ayeke hon, e yeke ye Nzapa mingi ahon ti kozo. E kiri singila mingi na Jéhovah nga na Jésus so ala tene na e so e peut ti ngbâ na fini lakue lakue na yâ ti Paradis.