1. Nyen la mbeni ita-koli adoit ti sara ti tene gigi ti lo aduti nzoni?

 GBIA DAVID atene lani na Salomon, atene: “Kpengba terê ti mo na sara ye tongana koli.” (1 aGbia 2:​1-3). Laso, a yeke nzoni aita-koli kue asara ye alingbi na wango so. Ti sara ni, ala doit ti manda ti sara ye alingbi na andia ti Nzapa nga na amama-ndia ti Bible na yâ ti aye kue so ala yeke sara na yâ ti gigi ti ala (Luc 2:52). Ngbanga ti nyen la a yeke kota ye mingi ti tene aita-koli so ade maseka aga aChrétien so akpengba?

2-3. Ngbanga ti nyen la a yeke kota ye ti tene mbeni ita-koli so ade maseka aga Chrétien so akpengba?

² Aita-koli ayeke na akota kua na yâ ti sewa nga na yâ ti congrégation. Aita-koli so ade maseka, kite ayeke dä ape so ala pensé na akua so ala peut ti sara na yâ ti angoi so ayeke ga. Peut-être mo ye ti ga pionnier, wakua ti mungo maboko nga ti ga ancien mbeni lâ. Peut-être mo ye nga ti sara mariage nga ti dü amolenge (aÉph. 6:4; 1 Tim. 3:1). Ti sara aye so kue nga ti tene gigi ti mo aga nzoni, mo bezoin ti ga Chrétien so akpengba. b

³ Nyen la apeut ti aidé mo ti ga Chrétien so akpengba? Ambeni kode ayeke dä so a yeke kota ye ti tene mo manda ni. Tongaso, nyen la mo peut ti sara laso ti leke terê ti mo ndali ti akua so mo yeke sara ande tongaso si mo peut ti sara ni nzoni?

4. Na ndo wa la mo peut ti wara anzoni tapande ti mû peko ni? (Bâ nga foto.)

⁴ Mû peko ti anzoni tapande. Bible asara tënë ti gbâ ti akoli so ayeke na anzoni sarango ye so aita-koli so ade maseka apeut ti mû tapande ti ala. Akoli ti ândö so aye Nzapa  nga ala sara akua nde nde ti bâ lege ti azo ti lo. Mo peut nga ti wara nzoni tapande ti aita-koli so akpengba na yâ ti sewa ti mo nga na yâ ti congrégation (aHéb. 13:7). Mo yeke nga na tapande ti Jésus so ayeke mbilimbili-kue (1 Pi. 2:21). Na ngoi so mo yeke manda ye nzoni na ndö ti tapande ti akoli so, gbu li na ndö ti apendere sarango ye ti ala so mo ye ni mingi (aHéb. 12:​1, 2). Na pekoni, bâ tongana nyen la mo peut ti mû tapande ti ala.

5. Tongana nyen la mo peut ti manda ti gbu li nzoni? Ngbanga ti nyen la a yeke kota ye? (Psaume 119:9).

⁵ Gi ti duti na ‘kode ti gbu li nzoni’ nga “bata” ni (aProv. 3:21). Zo so ayeke na kode ti gbungo li ayeke sara ye na loro ape, me lo yeke gbu li nzoni kozo si lo sara ye so lo ye ti sara. Tongaso, manda ti dö terê ti sara ye ape na ngbâ ti sara tongaso. Ngbanga ti nyen? Dunia asi singo na amaseka-koli so azia si apensé ti ala wala atënë ti bê ti ala afa lege na ala (aProv. 7:7; 29:11). Télé, afilm, Internet nga na aréseaux sociaux apeut ti changé fason so mo yeke pensé na ni nga na fason ti sarango ye ti mo. Me mo peut ti wara kode ti gbungo li nzoni tongana nyen? Kozo ni, manda amama-ndia ti Bible nga gbu li na ndö ti ndani so a yeke aidé mo. Use ni, sara kua na amama-ndia ni so ti aidé mo ti mû adesizion so ayeke nzere na Jéhovah. (Diko Psaume 119:9.) Tongana mo gi ti duti na kpengba kode so, andâ mo yeke sara mbeni kpengba ye so ayeke gue na mo ti ga Chrétien so akpengba (aProv. 2:​11, 12; aHéb. 5:14). Bâ tongana nyen la kode ti gbungo li nzoni ayeke aidé mo na yâ ti aye use so: 1) fason ti sarango ye ti mo na mbage ti aita-wali nga (2) fason ti yungo bongo nga na lekengo terê ti mo pendere.

6. Tongana nyen la kode ti gbungo li nzoni ayeke aidé mbeni ita-koli so ade maseka ti ne aita-wali?

⁶ Kode ti gbungo li nzoni ayeke aidé mo ti fa so mo ne awali. Na tapande, peut-être mbeni ita-koli so ade maseka aye ti hinga mbeni ita-wali nzoni, na a yeke sioni ape. Ye oko, tongana lo ye ti sara mariage na ita-wali ni ape, ita-koli so ade maseka so ayeke na kode ti gbungo li nzoni ayeke tene pëpe mbeni tënë, lo yeke tokua message ape wala lo yeke sara pëpe mbeni ye so asara si ita-wali ni apensé so lo ye ti mû lo (1 Tim. 5:​1, 2). Tongana  lo na ita-wali ni ayeke bâ terê ndali ti mariage, lo yeke sara si iri ti ita-wali ni abuba ape na lege so lo yeke zia lâ oko ape si ala duti ala use sân mbeni zo na terê ti ala.—1 aCor. 6:18.

7. Tongana nyen la kode ti gbungo li nzoni ayeke aidé mbeni ita-koli so ade maseka na ngoi so lo yeke soro bongo so lo yeke yü nga na coiffe so lo yeke sara?

⁷ Mbeni lege so mbeni maseka-koli ayeke fa so lo yeke na kode ti gbungo li nzoni ayeke na lege ti yungo bongo ti lo nga na sarango coiffe ti lo. Mingi ni, azo so ayeke sigi na afini bongo nga na afini fason ti yungo bongo ayeke azo so ane Jéhovah ape wala ayeke azo so ayeke na asioni sarango ye. Tongaso, a yeke hinga asioni pensé ti ala ni na lege ti abongo so ala yeke sigi na ni so a gbu zo gbungo wala so asara si koli akpa wali. Na ngoi so ita-koli so ade maseka so ayeke gi ti ga Chrétien so akpengba ayeke soro bongo so lo yeke yü, lo yeke zia si amama-ndia ti Bible nga na nzoni tapande ti aita ti congrégation afa lege na lo. Lo peut ti hunda terê ti lo: ‘Eskê aye so mbi soro ti sara afa so mbi yeke gbu li ti mbi nzoni nga mbi ne azo? Eskê fason ti yungo bongo ti mbi asara si a yeke ngangu ape na azo ti hinga so mbi yeke sara na Nzapa na bê ti mbi kue?’ (1 aCor. 10:​31-33; Tite 2:6). Tongana mbeni ita-koli so ade maseka ayeke na kode ti gbungo li nzoni, aita ti lo nga na Babâ ti lo ti yayu ayeke ne lo.

8. Tongana nyen la mbeni ita-koli so ade maseka apeut ti gi ti duti zo ti confiance?

⁸ Duti zo ti confiance. Mbeni maseka-koli so ayeke zo ti confiance ayeke sara akua kue so a mû na lo nzoni (Luc 16:10). Gbu li na ndö ti tapande ti Jésus so ayeke mbilimbili-kue. Lakue lo sara akua ti lo kue na bê ti lo kue. Lo sara akua kue so Jéhovah amû na lo, même na ngoi so a yeke ngangu na lo ti sara ni. Lo ye azo, mbilimbili adisciple ti lo, na lo yeda na bê ti lo wani ti mû fini ti lo ndali ti ala (Jean 13:1). Na tapande ti Jésus, sara akua kue so a mû na mo. Tongana mo hinga ape tongana nyen ti sara ni, sara terê ti mo kete na hunda na aita-koli so akpengba ti aidé mo. Sara gï mbage ti kua ni ape (aRom. 12:11). Hunzi kua so a mû na mo, mo bâ mo tene mo sara ni “na Jéhovah, me na azo pëpe”. (aCol. 3:23). Mo yeke mbilimbili-kue ape, tongaso bâ terê ti mo kete nga yeda na afaute kue so mo sara.—aProv. 11:2.

9. Ngbanga ti nyen la mbeni ita-koli so ade maseka adoit ti gi ti duti na anzoni kode?

⁹ Ti tene mo ga mbeni Chrétien so akpengba, mo bezoin ti gi ti duti na anzoni kode. A yeke aidé mo ti sara akua ti mo na yâ ti congrégation, ti wara mbeni kua so ayeke aidé mo wala azo ti sewa ti mo ti wara aye so ala bezoin ni nga ti duti na nzoni songo na azo. Bâ ambeni nzoni kode ni.

10-11. Tongana mbeni ita-koli so ade maseka ahinga ti diko mbeti nga ti sû ni nzoni, a yeke aidé lo nga na congrégation tongana nyen? (Psaume 1:​1-3). (Bâ nga foto.)

¹⁰ Manda ti diko nga ti sû mbeti nzoni.  Bible atene so zo so amû ngoi lâ oko oko ti diko Bible nga ti gbu li na ndö ni ayeke duti na ngia nga ye kue so lo sara ayeke ga nzoni. (Diko Psaume 1:​1-3.) Tongana lo diko Bible lâ oko oko, lo yeke hinga fason so Jéhovah ayeke pensé na ni, na a yeke aidé lo ti gbu li nzoni nga ti hinga tongana nyen ti sara ye alingbi na ye so lo hinga (aProv. 1:​3, 4). A bezoin mara ti akoli so na yâ ti congrégation. Ngbanga ti nyen?

¹¹ Aita abezoin mungo maboko ti akoli so alingbi ti fa ye nga ti mû wango so alondo na Bible (Tite 1:9). Tongana mo peut ti diko mbeti nga ti sû ni nzoni, mo peut ti leke adiskur nga na acommentaire so ayeke aidé aita nga akpengba mabe ti ala. Mo peut nga ti mû anzoni note na ngoi so mo yeke manda ye nga na ngoi so mo yeke mä adiskur na abungbi nga na akota bungbi. Anote so ayeke aidé mo ti kpengba mabe ti mo nga ti wa amba ti mo.

12. Nyen la ayeke aidé mo ti sara lisoro nzoni na azo?

¹² Manda ti sara lisoro nzoni na azo. Mbeni ita-koli adoit ti manda ti sara lisoro nzoni na azo. Ye so aye ti fa so lo bezoin ti mä azo nga ti comprendre apensé nga na atënë ti bê ti ala (aProv. 20:5). Lo peut ti manda ye na lege ti totongo ti go ti zo, lê ti lo nga na ageste ti lo. Mo peut ti hinga ye so ape tongana mo mû ngoi ti duti na azo ape. Tongana lakue mo yeke sara lisoro na azo gï na lege ti message, a yeke duti ngangu na mo ti sara lisoro na azo lê na lê. Tongaso, gi alege ti sara lisoro na azo lê na lê.—2 Jean 12.

13. Mbeni ye nde wa la mbeni maseka-koli adoit ti manda? (1 Timothée 5:8). (Bâ nga foto.)

¹³ Manda ti bâ lege ti mo mo wani. Mbeni ita-koli so akpengba adoit ti sara kua tongaso si lo wara aye so lo na azo ti da ti lo abezoin ni. (Diko 1 Timothée 5:8.) Na ambeni kodro, aita-koli so ade maseka apeut ti manda kua na mbage ti babâ ti ala wala mbeni fami nde. Na ambeni kodro nde, mbeni maseka-koli apeut ti manda mbeni kua ti maboko wala mbeni kua nde na ngoi so lo yeke na lycée. A yeke lakue nzoni ti manda mbeni kode so ayeke aidé mo ti wara mbeni kua (Kus. 18:​2, 3; 20:34; aÉph. 4:28). Sara kue ti tene azo ahinga mo tongana zo so ayeke sara kua ngangu nga so ayeke sara mbeni kua juska lo hunzi ni. Tongana mo sara tongaso, peut-être mo yeke wara mbeni kua. Asarango ye nga na akode so e sara tënë ni fade ayeke nga kota ye so apeut ti aidé mbeni ita-koli ti sara akua so lo yeke wara ande. Zia e bâ ambeni kua ni.

14. Tongana nyen la mbeni ita-koli so ade maseka apeut ti leke terê ti lo ti sara kua ti ngoi kue?

¹⁴ Kua ti ngoi kue. Aita-koli mingi akomanse ti sara kua ti ngoi kue na maseka ti ala. Kua ti pionnier ayeke aidé mbeni maseka-koli ti sara kua nzoni na terê ti azo nde nde. A yeke aidé nga lo ti hinga ti depensé nginza so lo wara nzoni nga ti vo aye ahon nginza ti lo ape (aPhil. 4:​11-13). Mbeni nzoni ye so ayeke aidé mo ti komanse kua ti ngoi kue ayeke kua ti pionnier auxiliaire. Aita mingi asara kua ti pionnier auxiliaire teti mbeni ngoi na a-aidé ala ti komanse kua ti pionnier permanent. Kua ti pionnier apeut ti zi lege na ambeni kua ti ngoi kue nde, na tapande kua ti construction wala kua ti Béthel.

15-16. Nyen la ayeke aidé mbeni ita-koli so ade maseka ti ga wakua ti mungo maboko wala ancien?

¹⁵ Gi ti ga wakua ti mungo maboko wala ancien. A yeke nzoni aita-koli kue agi ti sara aye so a hunda ti ga ancien. Bible atene so tongana aita-koli agi ti sara kua ti ancien, andâ ala “sara nzara ti mbeni kusala so ayeke nzoni mingi.” (1 Tim. 3:1). Kozo ti tene mbeni ita aga ancien, lo doit ti ga wakua ti mungo maboko. Awakua ti mungo maboko ayeke aidé a-ancien ti bâ lege ti aita ti congrégation. A-ancien nga na awakua ti mungo maboko ayeke sara terê ti ala kete ti sara kua ndali ti aita ti ala nga ala yapu na kua ti fango tënë. Aita-koli so ade maseka apeut ti ga awakua ti mungo maboko même tongana ade ala wara ngu bale-use ape. Mbeni wakua ti mungo maboko so ayeke sara kua ti lo nzoni apeut ti ga ancien même tongana ade lo wara ngu 25 ape.

¹⁶ Tongana nyen la mo peut ti gi ti ga wakua ti mungo maboko wala ancien? Bible afa ambeni sarango ye so mo bezoin ti gi ti duti na ni. Ye oko, girisa ape so asarango ye so kue alondo na Bible, nga ndoye so zo ayeke na ni ndali ti Jéhovah, ndali ti azo ti sewa ti lo nga ndali ti congrégation la adoit ti pusu lo ti gi ti duti na ni (1 Tim. 3:​1-13; Tite 1:​6-9; 1 Pi. 5:​2, 3). Gi ti hinga nzoni asarango ye so oko na oko kue. Sambela Jéhovah ti aidé mo ti duti na asarango ye so. c

17. Tongana nyen la mbeni ita-koli so ade maseka apeut ti leke terê ti lo ti ga koli ti wali nga mokonzi ti sewa? (Bâ nga foto.)

¹⁷ Kua ti koli ti wali nga ti mokonzi ti sewa. Tongana ti so Jésus afa, ambeni ita-koli so akpengba angbâ kumbamba (Mat. 19:12). Ye oko, tongana mo soro ti sara mariage, mo yeke ga koli ti wali nga mokonzi ti sewa  (1 aCor. 11:3). Jéhovah aku na mbage ti koli ti ye wali ti lo, ti mû na lo aye so lo bezoin ni, ti duti nzoni kamarade ti lo nga ti aidé lo ti ngbâ nduru na Jéhovah (aÉph. 5:​28, 29). Asarango ye nga na akode so e sara tënë ni fade na yâ ti article so, na tapande, kode ti gbungo li nzoni, nengo awali nga dutingo zo ti confiance, ayeke aidé mo ti duti nzoni koli ti wali. Mo yeke sara kua ti mo ti koli ti wali nga na ti mokonzi ti sewa nzoni tongana mo yeke na asarango ye nga na akode so.

18. Tongana nyen la mbeni maseka-koli apeut ti leke terê ti lo ti ga mbeni babâ?

¹⁸ Kua ti babâ. Na peko ti so mo sara mariage, mo peut ti ga babâ. Nyen la mo peut ti manda na mbage ti Jéhovah na ndö ti dutingo nzoni babâ? Aye ti manda ayeke mingi (aÉph. 6:4). Jéhovah atene polele na Molenge ti lo Jésus so lo ndoye lo mingi nga so bê ti lo anzere na lo mingi (Mat. 3:17). Tongana mo ga babâ, sara kue ti tene lakue amolenge ti mo ahinga so mo ye ala. Gonda ala fani mingi ndali ti anzoni ye so ala sara. Ababâ so amû tapande ti Jéhovah ayeke aidé amolenge ti ala ti ga aChrétien so akpengba. Mo peut ti leke terê ti mo laso ti sara kua so tongana na ndoye mo bâ lege ti azo ti sewa ti mo nga na aita ti congrégation nga tongana mo fa na ala so mo ye ala nga mo bâ ala na nene ni (Jean 15:9). Ti sara aye so ayeke aidé mo ti duti mbeni nzoni koli ti wali nga mbeni nzoni babâ na yâ ti angoi so ayeke ga. Ti ku na ngoi ni so, mo yeke sara nzoni kua ndali ti Jéhovah, azo ti sewa ti mo nga ndali ti aita ti congrégation.

19-20. Nyen la ayeke aidé aita-koli so ade maseka ti ga aChrétien so akpengba? (Bâ foto ti couverture ni.)

¹⁹ Ala aita-koli so ade maseka, ala yeke ga aChrétien so akpengba gï tongaso ape. Ala bezoin ti soro anzoni tapande ti mû peko ni, ti gi ti duti na kode ti gbungo li nzoni, ti duti zo ti confiance, ti duti na anzoni kode nga ti leke terê ti ala ndali ti akua so ala peut ti sara ande.

²⁰ Na ambeni ngoi tongana ala gbu li ti ala na ndö ti akua so angbâ na devant ti ala, ala peut ti bâ so a yeke mingi. Me ala peut ti sara ni. Ala girisa ape so Jéhovah aye mingi ti aidé ala (És. 41:​10, 13). Aita na yâ ti congrégation nga kue ayeke aidé ala. Tongana ala ga zo so Jéhovah aye si ala ga ni, gigi ti ala ayeke nzere na ala mingi. Ala aita-koli so ade maseka, e ye ala mingi. Zia Jéhovah asara tufa mingi na ndö ti ala na ngoi so ala yeke gi ti ga aChrétien so akpengba.—aProv. 22:4.