1. Ngbanga ti nyen la Abraham apeut lani ti ngbâ ti duti na beku so lo yeke wara molenge?

 JÉHOVAH atene lani na kamarade ti lo Abraham so amara kue ti sese ayeke wara ande tënë nzoni na lege ti hale ti lo (Gen. 15:5; 22:18). So Abraham ayeke lani na kpengba mabe na Nzapa, lo hinga biani so zendo ti Nzapa so ayeke ga tâ tënë. Atâa so kue, na ngoi so Abraham ayeke na ngu 100 nga wali ti lo ayeke na ngu 90, couple so ayeke be-ta-zo so ade awara molenge ape (Gen. 21:​1-7). Me Bible atene: “[Abraham azia] beku ti lo na ndö ti mabe so lo yeke na ni lani, so lo yeke ga ande babâ ti amara mingi, alingbi na tënë so a tene.” (aRom. 4:18). Mo hinga so beku ti Abraham aga lani tâ tënë. Lo ga babâ ti Isaac, molenge so lo ku lo aninga. Ngbanga ti nyen la Abraham ahinga lani biani so Jéhovah ayeke sara ye alingbi na zendo ti lo?

2. Ngbanga ti nyen la Abraham ahinga lani biani so Jéhovah ayeke sara ye alingbi na zendo ti lo?

² So Abraham ahinga Jéhovah nzoni, lo ‘hinga biani lo tene ye so Nzapa amû zendo ni lani na lo so’ ayeke ga tâ tënë (aRom. 4:21). Abraham azia lani ngia na bê ti Jéhovah na Jéhovah adiko lo tongana zo ti mbilimbili ndali ti mabe ti lo (Jacq. 2:23). Tongana ti so aRomain 4:18 afa, Abraham ayeke lani na mabe nga na beku. Fadeso, zia e mä tënë so bazengele Paul atene na ndö ti beku na aRomain chapitre 5.

3. Nyen la Paul afa na ndö ti beku?

³ Paul afa ndani so e peut ti duti sûr so “beku [ti e] azia kamene na lê ti zo pëpe”. (aRom. 5:5). Lo aidé nga e ti comprendre tongana nyen la beku ti e aChrétien apeut ti kpengba ahon ti kozo. Na ngoi so e yeke bâ tënë so Paul atene na aRomain 5:​1-5 na ndö ti fason so beku ayeke kpengba na ni, gbu li na ndö ti beku ti mo wani. Tongana mo  sara tongaso, tongana ngoi ayeke hon peut-être mo yeke hinga so beku ti mo akiri akpengba ahon ti kozo. Article so ayeke fa nga tongana nyen la mo peut ti sara si beku ti mo akiri akpengba ahon ti so mo yeke na ni laso. Zia e bâ kozoni pendere beku so Paul atene ayeke zia kamene na lê ti zo pëpe.

4. A-Romain 5:​1, 2 asara tënë ti nyen?

⁴ Diko aRomain 5:​1, 2. Paul asû lani atënë so na aita ti congrégation ti Rome. Aita ni kâ amanda lani ye na ndö ti Jéhovah na Jésus, ala mä na bê nga ala ga aChrétien. Tongaso, Nzapa ‘adiko ala tongana azo ti mbilimbili ndali ti mabe’ ti ala nga lo soro ala na lege ti yingo vulu ti gue na yayu. Biani, ala peut ti ku mbeni pendere futa na ala peut ti duti sûr so ala yeke wara ni.

5. Beku wa la azo so a soro ala ti gue na yayu ayeke na ni?

⁵ Ambeni ngoi na pekoni, Paul asû mbeti na aita ti Éphèse so a soro ala ti gue na yayu na ndö ti beku so a iri ala ndali ni. Ala yeke wara “héritage [so a bata] na azo ti be-vulu”. (aÉph. 1:18). Paul afa nga lani na aita ti Colosses ndo so ala yeke wara futa ti ala dä. Lo iri ni “beku so ala yeke na ni na ndö ti aye so a bata ni na ala na yayu.” (aCol. 1:​4, 5). Tongaso, beku ti aChrétien so a soro ala ti gue na yayu ayeke so a yeke zingo ande ala ti wara fini ti lakue lakue na yayu, ndo so ala yeke komande legeoko na Christ dä.—1 aThes. 4:​13-17; Apoc. 20:6.

6. Mbeni ita-koli so a soro lo ti gue na yayu atene nyen na ndö ti beku ti lo?

⁶ A-Chrétien so a soro ala ti gue na yayu aye beku ti ala mingi. Na ngu 1991, Frederick Franz, mbeni ita so a soro lo ti gue na yayu na so asara na Nzapa be-ta-zo teti angu mingi, afa ye so lo pensé na ndö ti beku ti lo, lo tene: “Beku ti e ayeke ga tâ tënë, nga e azo 144 000 kue e yeke wara ande ye so Nzapa amû zendo ni na e. Futa ti e ayeke duti ande pendere mingi ahon ye kue so e imaginé. . . . E ngbâ ti bâ beku ti e tongana  ye so ayeke ti ngangu ngere mingi. . . . Na ngoi kue so e ngbâ ti ku ni, e kiri singila mingi na Nzapa ndali ni. A yeke mbeni ye so a yeke nzoni ti ku ni, même tongana e doit ti ku ni ngu kutu oko. Mbi ye beku ti e mingi ahon ti kozo.”

7-8. Beku wa la mingi ti e ayeke na ni? (aRomain 8:​20, 21).

⁷ Mingi ti e so e yeke voro Jéhovah laso, beku ti e ayeke nde. E yeke na beku so Abraham ayeke lani na ni: fini ti lakue lakue na ndö ti sese na gbe ti Royaume ti Nzapa (aHéb. 11:​8-10, 13). Paul asû mbeti na ndö ti pendere ye so ayeke ku azo so ayeke na beku so. (Diko aRomain 8:​20, 21.) Na ngoi so lani ti kozoni mo manda ye na ndö ti zendo ti Bible na ndö ti kekereke, nyen la anzere na mo na yâ ni mingi? Eskê a yeke lani zendo so atene mbeni lâ mo yeke sara siokpari encore ape? Wala terê ti mo anzere lani mingi ti hinga so azo so mo ye ala mingi so akui ayeke kiri ande na fini na yâ ti Paradis na ndö ti sese? Ndali ti beku so Nzapa amû na e, mo yeke na apendere ye mingi so mo yeke ku ni kungo.

⁸ Atâa e yeke na beku ti wara fini ti lakue lakue na yayu wala na ndö ti sese, e yeke na pendere beku so ndali ni e yeke na ngia. Na pendere beku ti e so apeut ti kpengba même mingi ahon ti kozo. Paul afa tongana nyen la beku ti e apeut ti kpengba ahon ti kozo. Zia e mä tënë so lo tene na ndö ti beku ti e. Atënë so lo tene a-aidé e biani ti duti sûr so beku ti e ayeke ga tâ tënë.

9-10. Tongana ti so tapande ti Paul afa, nyen la aChrétien apeut ti ku terê ti ala na ni? (aRomain 5:3). (Bâ nga afoto.)

⁹ Diko aRomain 5:3. Bâ so ye ti vundu apeut ti sara si beku ti e akpengba ahon ti kozo. Tënë so apeut ti sara si li ti e akpe. Ye oko, adisciple ti Christ kue apeut ti ku ti wara ye ti vundu. Gbu li na ndö ti tapande ti Paul. Lo tene na azo ti Thessalonique, lo tene: “Na ngoi so e yeke ândö na terê ti ala, lakue e yeke tene na ala kozoni so a  lingbi ye ti vundu asi na e, gï tongana ti so a si awe.” (1 aThes. 3:4). Lo tene nga na aita ti Corinthe, lo tene: “Aita, e ye si ala hinga tënë ti pasi so e bâ lani . . . E hinga pëpe wala e yeke ngbâ na fini.”—2 aCor. 1:8; 11:​23-27.

¹⁰ Laso, aChrétien nga kue apeut ti ku ti wara ambeni ye ti vundu (2 Tim. 3:12). Ka mo? So mo mä na bê na Jésus nga mo yeke mû peko ti lo, ye ti vundu asi na mo awe? Akamarade nga na afami ti mo apeut ti he mo. Ala peut même ti sara sioni ye na mo. So mo leke na bê ti mo ti sara ye na lege ni na yâ ti aye kue aga na mo kpale na place ti kua ti mo? (aHéb. 13:18). Eskê akota zo ti kodro akanga lege na mo ndali ti so mo yeke fa tënë ti beku ti mo na azo? Ye oko, atâa mara ti ye ti vundu wa la e wara, Paul atene a yeke nzoni e duti na ngia. Ngbanga ti nyen?

11. Ngbanga ti nyen la e bezoin ti leke na bê ti e ti gbu ngangu na yâ ti akpale kue?

¹¹ E peut ti duti na ngia même na ngoi so e yeke bâ pasi ndali ti so e hinga so apeut ti aidé e ti duti na mbeni sarango ye so ayeke kota mingi. Tongana ti so aRomain 5:3 atene, “ye ti vundu adü gbungo ngangu.” A-Chrétien kue ayeke wara aye ti vundu, tongaso aChrétien kue adoit ti gbu ngangu. E bezoin ti leke na bê ti e ti ngbâ ti gbu ngangu atâa akpale wa la e wara. Beku ti e ayeke ga tâ ye gï tongana e gbu ngangu. E ye pëpe ti duti tongana azo so Jésus ahaka ala na angongoa so atï na ando so ayeke tênë. Na tongo nda ni ala yeda na tënë ti Nzapa na ngia, me na ngoi so “aye ti vundu asi wala a sara ye ti ngangu” na ala, ala pika gere ti ala (Mat. 13:​5, 6, 20, 21). A yeke tâ tënë so kangango lege wala akpale ayeke ye ti ngia ape, me e yeke bâ nzoni tongana e gbu ngangu na yâ ni nga e ngbâ ti sara na Jéhovah. Na lege wa?

12. Tongana e gbu ngangu na yâ ti akpale e yeke bâ nzoni dä tongana nyen?

¹² Disciple Jacques afa anzoni ye so e yeke wara tongana e gbu ngangu na yâ ti akpale. Lo tene: “Zia si gbungo ngangu asara kua ti lo kue, si ala lingbi kue na ala duti na sioni oko pëpe na yâ ti ye kue nga mbeni ye amanke ala pëpe.” (Jacq. 1:​2-4). Jacques asara tënë ti gbungo ngangu mo bâ mo tene gbungo ngangu ayeke na mbeni kua ti sara. Kua wa la gbungo ngangu ayeke sara? A peut ti aidé mo ti kanga bê mingi, ti duti na kpengba mabe nga ti sara confiance mingi na Nzapa. Me, e yeke wara nga mbeni ye ti nzoni so ayeke kota mingi tongana e gbu ngangu.

13-14. Gbungo ngangu adü nyen? A yeke sara nyen na beku ti e? (aRomain 5:4).

¹³ Diko aRomain 5:4. Paul atene so gbungo ngangu adü “dutingo zo so anzere na lê ti Nzapa”. Gbungo ngangu ti mo ayeke zia ngia na bê ti Jéhovah. A ye ti tene ape so tongana mo wara akpale a nzere na Jéhovah. Ye so azia ngia na bê ti Nzapa ayeke mo. So mo gbu ngangu, mo ga zo so anzere na lê ti Nzapa. So pendere tufa!—Ps. 5:12.

¹⁴ Dabe ti mo so Abraham agbu lani ngangu na yâ ti atara na lo zia ngia na bê ti Nzapa. Jéhovah abâ lani lo tongana kamarade ti lo nga lo diko lo tongana zo ti mbilimbili (Gen. 15:6; aRom. 4:​13, 22). E nga kue e peut ti ga kamarade ti Nzapa nga lo bâ e tongana zo ti mbilimbili. A yeke pëpe wungo ti akua so e yeke sara na Jéhovah wala ndo so e sara na lo dä la asara si e zia ngia na bê ti lo. Me tongana e ngbâ be-ta-zo atâa e wara akpale, e yeke zia ngia na bê ti lo.  Atâa ngu ti e, dutingo ti e wala kode ti e ayeke so wa, e kue e peut ti gbu ngangu. Eskê mo yeke gbu ngangu na yâ ti mbeni kpale na ngoi so? Tongana a yeke tongaso, hinga so mo yeke zia ngia na bê ti Nzapa. Tongana e hinga so e zia ngia na bê ti Nzapa apeut ti aidé e mingi. A peut ti kpengba beku ti e.

15. Paul atene nyen na aRomain 5:​4, 5? Hundango tënë wa la apeut ti londo?

¹⁵ Tongana ti so Paul afa, tongana e ngbâ bê-ta-zo nga e gbu ngangu na yâ ti akpale, e yeke zia ngia na bê ti Jéhovah. Mä tënë so Paul akiri atene: “Dutingo zo so anzere na lê ti Nzapa adü beku, na beku azia kamene na lê ti zo pëpe.” (aRom. 5:​4, 5). Tënë so apeut ti hon gbungo li ti zo. Ngbanga ti nyen? Ngbanga ti so na aRomain 5:​2, Paul atene so aChrétien so ayeke na Rome ayeke na beku awe, “beku so [ala] yeke na ni ti wara ande gloire ti Nzapa.” Tongaso, tongana aChrétien so ayeke na beku awe, ngbanga ti nyen la Paul akiri asara tënë ti beku na ala?

16. Mbeni zo ayeke komanse ti duti na beku tongana nyen? (Bâ nga afoto.)

¹⁶ E peut ti comprendre tënë so Paul aye ti tene tongana e girisa ape so beku ayeke mbeni ye so ayeke maï maïngo. Na tapande: Eskê mo dabe ti mo na ngoi so ti kozoni mo mä tënë ti pendere beku so ayeke na yâ ti Bible? Peut-être na ngoi ni so, mo pensé so tënë ti dutingo na fini lakue lakue na yâ ti Paradis na ndö ti sese ayeke pendere mingi, me mo hinga ape so a yeke si biani. Ye oko, na ngoi so mo komanse ti manda ye mingi na ndö ti Jéhovah nga na azendo so ayeke na yâ ti Bible, mo hinga na bê ti mo biani so beku so ayeke ga tâ ye.

17. Tongana nyen la beku ti mo ayeke ngbâ ti maï na peko ti so mo mû terê ti mo na Jéhovah nga mo wara batême?

¹⁷ Même na peko ti so mo mû lani terê ti mo na Jéhovah nga mo wara batême, beku ti mo angbâ lani ti maï na ngoi so mo manda  ye mingi nga mo kpengba songo ti mo na Jéhovah (aHéb. 5:13–6:1). Peut-être ye so asara tënë ni na aRomain 5:​2-4 asi na mo awe. Mo wara aye ti vundu nde nde, me mo gbu ngangu na yâ ni nga mo bâ so mo zia ngia na bê ti Nzapa. So mo hinga so mo zia ngia na bê ti Nzapa, fadeso mo yeke même na kota raison ti ku ti wara aye so lo mû zendo ni. Beku ti mo akpengba ahon ti so mo yeke na ni lani na tongo nda ni. Beku ti mo akiri aga tâ ye na lê ti mo. A sara si mo sara akota changement, nga a changé fason so mo yeke sara na ye na azo ti sewa ti mo, adesizion ti mo nga même fason so mo yeke sara kua na ngoi ti mo.

18. Nyen la Jéhovah atene so lo yeke sara ni biani?

¹⁸ Bazengele Paul akiri afa mbeni ye so ayeke kota mingi na ndö ti beku so mo yeke na ni na peko ti so mo zia ngia na bê ti Nzapa. Lo tene so beku ti mo ayeke ga ande tâ ye. Ngbanga ti nyen la mo peut ti duti sûr na ni? Paul atene tënë so Nzapa atene so abâ aChrétien, lo tene: “Beku azia kamene na lê ti zo pëpe, ngbanga ti so a tuku ndoye ti Nzapa na yâ ti bê ti e na lege ti yingo vulu so a mû na e.” (aRom. 5:5). Mo yeke na araison kue ti duti sûr na beku so Nzapa amû na mo.

19. Na ndö ti beku ti mo, nyen la mo peut ti duti sûr na ni?

¹⁹ Gbu li na ndö ti zendo so Jéhovah amû lani na Abraham nga tongana nyen la lo zia ngia na bê ti Nzapa nga Lo bâ lo tongana kamarade ti Lo. Beku ti Abraham angbâ lani senge ape. Bible atene: “Ndali ti so Abraham afa so lo hinga ti kanga bê ti ku ye, lo wara zendo ni so.” (aHéb. 6:15; 11:​9, 18; aRom. 4:​20-22). Kamene asara lo lani ape. Mo peut ti duti sûr so tongana mo ngbâ be-ta-zo, mo yeke wara futa so mo yeke na beku na ni. Beku ti mo ayeke tâ ye, a sara si mo yeke na ngia na azia kamene na lê ti mo ape (aRom. 12:12). Paul atene: “Zia Nzapa so ayeke mû beku na zo asara si ala si na ngia nga na siriri kue na lege so ala zia bê ti ala kue na lo, si ala wu mingi na beku na ngangu ti yingo vulu.”—aRom. 15:13.