KITE ayeke dä ape so gbâ ti acadeau so Jéhovah amû na mo anzere na mo, nga mo kiri singila na lo ndali ni. Bible afa so vin ayeke mbeni cadeau so alondo na Nzapa. A tene même atene: “A sara mapa ti tene zo ahe ngia, nga vin asara si gigi ti zo anzere na lo.” (Zo-ti. 10:19; Ps. 104:15). Me peut-être mo bâ so ambeni zo ayeke na kpale ti nyongo sämba. Na ndö ni, na yâ ti dunia azo ayeke na abango ndo nde nde na ndö ti nyongo sämba. Tongaso, nyen la apeut ti aidé aChrétien ti mû anzoni desizion na ndö ti nyongo sämba?

Atâa ndo wa la e yeke vivre dä wala ngobo ti e ayeke so wa, tongana e zia si bango ndo ti Nzapa afa lege na apensé ti e nga na adesizion ti e ayeke aidé e mingi.

Peut-être mo bâ so gbâ ti azo ayeke nyon sämba fani mingi nga ala nyon ahon ndö ni. Peut-être ambeni zo anyon sämba ndali ti so asara si ala duti nzoni. Ambeni anyon ni ti girisa na akpale ti ala. Na ambeni ndo, azo apensé so azo so anyon sämba mingi ayeke azo so akpengba koli wala wali awe wala ala yeke na ngangu mingi.

Me aChrétien awara afango lege ti ndara so alondo na Lo so acréé ala so aye ala. Na tapande, lo fa na e angangu kpale so ayeke ga na peko ti nyongo sämba ahon ndö ni. Peut-être e diko awe na aProverbe 23:​29-35 anzene nzene tënë so a fa na ndö ti sarango ye ti zo so asoulé nga na akpale so aga na pekoni. a Daniel, so ayeke ancien na Europe, apensé na gigi ti lo kozo ti tene lo ga Chrétien, lo tene: “So mbi yeke nyon lani sämba ahon ndö ni asara si mbi mû asioni desizion nga mbi wara angangu kpale. Tongana mbi pensé na ni, bê ti mbi ayeke son mingi.”

Tongana nyen la e peut ti mû anzoni desizion na ndö ti nyongo sämba si e wara pëpe akpale so aga na peko ti nyongo sämba ahon ndö ni? E doit ti zia si apensé ti Nzapa afa lege na adesizion ti e nga na aye so e sara.

Zia e bâ ye so Bible afa na ndö ti nyongo sämba nga na araison so ndali ni ambeni zo ayeke nyon ni.

Bible ake ape ti tene zo anyon sämba. Ti tâ tënë ni, Bible atene so nyongo vin apeut ti sara si terê ti zo anzere. A tene: “Te kobe ti mo na nzerengo terê nga mo nyon vin ti mo na ngia na bê.” (Zo-ti. 9:7). Na ambeni ngoi, Jésus na awakua ti Jéhovah so ayeke be-ta-zo anyon vin.—Mat. 26:​27-29; Luc 7:34; 1 Tim. 5:23.

Atâa so Bible ake ape ti tene zo anyon sämba, a ke ti tene zo asoulé. Bible atene polele, atene: “Ala zia vin asoulé ala pëpe.” (aÉph. 5:18). A fa même so “angbâa ti sämba . . . Royaume ti Nzapa ayeke ga ti ala pëpe.” (1 aCor. 6:10). Jéhovah ake na kuru go nyongo sämba ahon ndö ni nga ti soulé. Ahon ti mû desizion na ndö ti nyongo sämba alingbi na ngobo ti ndo so e yeke dä, e yeke mû desizion alingbi na bango ndo ti Nzapa.

Ambeni zo abâ so ala peut ti nyon sämba gbani sân ti soulé. Me a peut ti ga na kota kpale. Bible afa polele so ti ‘duti ngbâa ti vin’ apeut ti sara si zo asara akota faute nga lo buba songo ti lo na Jéhovah (Tite 2:3; aProv. 20:1). Jésus atene même lani so “nyongo sämba ahon ndö ni” apeut ti kanga lege na zo ti lï na yâ ti fini dunia ti Nzapa (Luc 21:​34-36). Tongaso, nyen la apeut ti aidé mbeni Chrétien ti kpe akpale so a yeke ngangu ape ti wara ni tongana zo anyon sämba?

Tongana mbeni zo azia si ngobo ti ndo so lo kono dä la afa na lo ye so lo doit ti sara na ndö ti nyongo sämba, a yeke ga na kpale. A-Chrétien ayeke sara ye so azia ngia na bê ti Jéhovah na ndö ti tënë ti tengo ye nga na nyongo ye. Bible adabe ti e atene: “Wala ala yeke te ye, wala ala yeke nyon ye wala ala yeke sara mbeni ye nde, ala sara ye kue ndali ti gloire ti Nzapa.” (1 aCor. 10:31). Bâ ambeni hunda nga na amama-ndia ti Bible ti gbu li dä la:

Eskê mbi yeke nyon sämba ti tene a nzere na amba ti mbi? Exode 23:2 atene: “Mo mû pëpe peko ti azo mingi mingi.” Ge, Jéhovah ayeke wa lani azo ti Israël ti mû pëpe peko ti azo so ayeke zia ngia na bê ti lo ape. A yeke nga nzoni wango ndali ti aChrétien laso. Tongana e zia si amba ti e la afa na e ye so e doit ti sara na ndö ti sämba, yeke yeke e yeke zia ti sara aye so Jéhovah ahunda na e nga e yeke buba songo ti e na lo.—aRom. 12:2.

Eskê mbi yeke nyon sämba ti fa so mbi yeke ngangu? Na ambeni ndo, azo mingi ayeke nyon sämba fani mingi nga ahon ndö ni, na a bâ ni tongana sioni ye ape (1 Pi. 4:3). Me mä tënë ti ndara so ayeke na 1 aCorinthien 16:​13, so atene: “Zia lê ti ala angbâ na zingo ni, ala luti ngangu na yâ ti mabe, ala sara ye tongana akoli, ala kpengba.” Eskê sämba apeut biani ti aidé mbeni zo ti kpengba? Ên-ën. A yeke ngangu ape ti tene sämba akanga lege na zo ti gbu li nzoni nga ti mû anzoni desizion. Tongaso, ti nyon sämba gbani ayeke pëpe ye so afa so mbeni zo ayeke na ngangu, me a fa so lo yeke buba zo. Ésaïe 28:7 afa zo so ague yongoro ndali ti so lo nyon sämba tongana zo so atambela kirikiri na lo pika gere ti lo.

Tâ ngangu alondo na Jéhovah, na ti wara ni, lê ti e adoit ti ngbâ na zingo ni nga e doit ti luti ngangu na yâ ti mabe (Ps. 18:32). E yeke sara ni tongana e sara kue ti kpe akpale nga na adesizion so ayeke buba songo ti e na Jéhovah. Jésus afa lani so lo yeke na mara ti ngangu ni so na ngoi so lo yeke na sese, na azo mingi ane lo ndali ti so lo sara ye na mbeto ape nga lo leke na bê ti lo ti ngbâ ti sara ye na lege ni.

Eskê mbi yeke nyon sämba ti girisa akpale ti mbi? Yingo apusu mbeni zo so asû mbeni psaume ti tene tënë so: “Na ngoi so agingo bê ahon  ndö ti mbi, mo [Jéhovah mo] dë bê ti mbi nga mo sara si mbi duti na siriri.” (Ps. 94:19). Tongana akpale ahon ndö ti mo, sara confiance na Jéhovah ti aidé mo, me na sämba ape. Mbeni nzoni lege ti sara ni ayeke ti sambela Jéhovah fani mingi. Azo mingi abâ so ti gi wango na mbage ti mbeni ita ti congrégation so ayeke na kpengba songo na Jéhovah a-aidé mingi. Ti vrai ni, tongana zo anyon sämba ti hon ndö ti akpale, a peut ti sara si ti ngbâ ti sara ye na lege ni ayeke duti encore kota ye na lê ti lo tongana ti kozo ape (Os. 4:11). Daniel, so e sara tënë ti lo fade, atene: “Mbi yeke gi lani bê ti mbi nga mbi bâ so tënë ayeke na li ti mbi. Mbi nyon sämba tongaso si mbi gi bê ti mbi mingi ape, me mbi bâ so a kiri a ga na mbi akpale, mbi perdre akamarade ti mbi nga mbi bâ so mbi yeke ye oko ape.” Nyen la a-aidé lani Daniel? Lo tene: “Mbi bâ lani so mbi bezoin Jéhovah ti aidé mbi, me sämba ape. Grâce na mungo maboko ti Jéhovah, mbi wara lege ti hon ndö ti akpale ti mbi.” Ti tâ tënë ni, Jéhovah ayeke lakue dä ti aidé e, même tongana e bâ so mbeni ye ti sarango ni ayeke dä ape.—aPhil. 4:​6, 7; 1 Pi. 5:7.

Tongana na ambeni ngoi mo yeke nyon sämba, mo peut ti gbu li ti bâ wala mo bezoin ti sara ambeni changement. Hunda terê ti mo: ‘Eskê mbeni zo ti sewa ti mbi wala mbeni kota kamarade ti mbi agi bê ti lo na ndö ti nyongo sämba ti mbi?’ Tongana a yeke tongaso, a peut ti fa so mo yeke na mbeni sarango ye wala mbeni kpale so mo hinga ni ape. ‘Eskê mbi yeke nyon sämba ahon ti so mbi yeke nyon ka?’ Ye so apeut ti fa so mo komanse ti ga ngbâa ti sämba awe. ‘Eskê a yeke ngangu na mbi ti nyon sämba ape teti ambeni lango wala aninga?’ Tongana a yeke tongaso, andâ nyongo sämba aga sarango ye ti terê ti mo awe wala mo ga ngbâa ni awe. Peut-être mo bezoin mbeni docteur ti aidé mo ti hon ndö ti kpale so.

So nyongo sämba apeut ti ga na akpale mingi, ambeni Chrétien amû desizion ti nyon sämba ape. Ambeni zo apeut ti soro ti nyon sämba ape ndali ti so a nzere na yanga ti ala ape. Tongana mbeni kamarade ti mo amû mara ti desizion so, mo peut ti sara ye na nzoni bê na lege so mo ne desizion ti lo ni sân ti diko tënë na terê ti lo.

 Peut-être mo bâ so a yeke nzoni mo fa wungo ti verre wala bouteille ti sämba so mo yeke nyon. Wala peut-être mo peut ti sigi na ndia ti mo wani na ndö ti ngoi oke la mo yeke nyon sämba, peut-être fani oko yenga oko oko wala mo nyon gï kete na ngoi ti tengo ye. Ambeni zo asoro asämba so ala yeke nyon ni, na tapande ala yeke nyon vin wala ala yeke nyon bière alingbi na ni, me ala yeke nyon angangu sämba ape, ala yeke nyon même ape angangu sämba so a tuku jus na yâ ni. Tongana zo afa polele wungo ti verre wala bouteille ti sämba so lo yeke nyon, a yeke duti ngangu na lo ape ti ngbâ dä. Mbeni Chrétien so ayeke na kpengba songo na Jéhovah abezoin ti gi bê ti lo ape na ndö ti ye so azo ayeke pensé na ndö ti desizion so lo mû na ndö ti nyongo sämba.

Na ngoi so e yeke mû adesizion na ndö ti nyongo sämba, e bezoin nga ti gbu li na ndö ti ye so amba ti e apensé. A-Romain 14:21 atene: “A yeke nzoni mo te nyama pëpe wala mo nyon vin pëpe wala mo sara pëpe mbeni ye so asara si ita ti mo apika gere.” Mo peut ti sara ye alingbi na wango so tongana nyen? Fa so mo ye aita. Tongana mo bâ so nyongo sämba apeut ti son bê ti mbeni ita, ndoye ayeke pusu mo ti nyon ni ape na ngoi so lo yeke dä. Tongana mo sara tongaso, mo yeke fa so mo ne aita nga mo ye ala nga mo pensé mingi na ala ahon mo wani.—1 aCor. 10:24.

Na ndö ni, peut-être gouvernement asigi na andia na ndö ti nyongo sämba so a yeke nzoni aChrétien asara ye alingbi na ni. Andia so apeut ti fa ngu so zo adoit ti wara awe si lo peut ti nyon sämba, wala a peut ti ke ti tene zo so anyon sämba akpe na oto wala asara kua na ambeni machine.—aRom. 13:​1-5.

Jéhovah amû na e gbâ ti apendere cadeau, mbeni ayeke liberté ti soro fason so e ye ti sara kua na acadeau so lo mû na e. Lo mû nga na e liberté ti soro ye so e ye ti te nga na ye so e ye ti nyon. Zia e fa so e bâ liberté so na nene ni mingi na lege so e sara kua na ni ti zia ngia na bê ti Babâ ti e ti yayu.