1. Tënë wa la Jésus atene na adisciple ti lo na ndö ti lango so a yeke futi dunia so? Wango wa la lo mû na ala?

 ALANGO kete kozo si Jésus akui, ambeni disciple ti lo osio ahunda lo, atene: “Fä. . . ti ngoi so aye ti ngoi so ayeke gue ti hunzi ayeke nyen?” (Mat. 24:3). Peut-être adisciple so ayeke gi lani ti hinga lawa la a yeke futi Jérusalem nga na temple ni. Na yâ ti kiringo tënë ti Jésus, lo sara tënë ti futingo Jérusalem nga na temple ni nga lo sara tënë ti “ngoi so aye ti ngoi so ayeke gue ti hunzi” so e yeke dä laso. Na ndö ti tënë ti hunzingo ti aye ti ngoi so, Jésus atene: “Na ndö ti tënë ti lango ni so nga na l’heure ni so, zo oko ahinga ni pëpe, atâa a-ange na yayu, wala Molenge ni ahinga ni pëpe, me gï Babâ ni.” Na pekoni, lo wa adisciple ti lo kue ti “zia lê ti ala angbâ na zingo ni, nga ti “lango pëpe.”—Marc 13:32-37.

2. Ngbanga ti nyen la a yeke lani kota ye ti tene akozo Chrétien alango ape?

² A lingbi aJuif so ayeke aChrétien na ngoi ti akozo Chrétien alango lani ape tongaso si ala sö fini ti ala. Jésus afa na adisciple ti lo ye so ayeke mû lege na ala ti hinga ngoi so a yeke futi aye ti ngoi ti a-Juif. Lo tene: “Tongana ala bâ aturugu so asara camp angoro Jérusalem, zia ala hinga so ngoi ti futingo lo aga nduru awe.” Na ngoi ni so ala doit ti mä wango ti Jésus ti ‘kpe na li ti ahoto’. (Luc 21:20, 21). Ala so asara ye alingbi na wango so asö fini ti ala na ngoi so aturugu ti Rome afuti Jérusalem.

3. Nyen la e yeke bâ na yâ ti article so?

 ³ Laso e yeke na hunzingo ti asioni ye ti ngoi so. E nga kue e doit ti bata bibe ti e nga lê ti e adoit ti kpengba. Na yâ ti article so e yeke bâ tongana nyen la e peut ti duti na nzoni bango ndo na ngoi so e yeke bâ aye so ayeke passé na yâ ti dunia, tongana nyen la e peut ti sara hange na asarango ye ti e nga tongana nyen la e peut ti sara kua nzoni na tanga ti ngoi so angbâ.

4. Ngbanga ti nyen la ayeke nzoni e gi ti hinga tongana nyen la aye so ayeke passé na yâ ti dunia asara si aprophétie ti Bible aga tâ tënë?

⁴ E yeke na anzoni raison so ndali ni e bâ so aye so ayeke passé na yâ ti dunia asara si aprophétie ti Bible ayeke ga tâ tënë. Na tapande, Jésus afa ambeni mbilimbili ye so a-aidé e ti hinga so aye ti dunia ti Satan so aga nduru ti hunzi awe (Mat. 24:3-14). Bazengele Pierre awa e ti bâ nzoni tongana nyen la aprophétie ayeke ga tâ tënë tongaso si mabe ti e akpengba (2 Pi. 1:19-21). Ndangba mbeti ti Bible akomanse na tënë so: “Tënë ti aye so Jésus Christ afa, so Nzapa amû na lo ti fa na angbâa ti lo aye so aga nduru ti si awe.” (Apoc. 1:1). Tongaso, aye so ayeke passé na yâ ti dunia laso agbu bê ti e mingi nga ti hinga tongana nyen la aye ni so ayeke sara si aprophétie ti Bible aga tâ tënë agbu bê ti e mingi. Na peut-être a nzere na e ti sara lisoro na amba ti e na ndö ti aye so ayeke passé so.

5. Nyen la a lingbi e kpe ni? Nyen la a lingbi e sara? (Bâ afoto.)

⁵ Ye oko, na ngoi so e yeke sara lisoro na ndö ti aprophétie ti Bible, a yeke nzoni ape ti tene e imaginé ye so ayeke si ande. Ngbanga ti nyen? Ngbanga ti so e ye pëpe ti tene mbeni tënë so ayeke ga na kangbi na yâ ti congrégation. Na tapande, e peut ti mä akota zo ti poroso ti dunia so afa tongana nyen la ala peut ti leke mbeni kpale ti bira nga ti ga na siriri na nzoni duti. Ahon ti imaginé so tënë ti ala ni asara si prophétie so ayeke na 1 aThessalonicien 5:3 aga tâ tënë, e doit ti gi ti hinga tënë so a fa ndani ade ti ninga ape. Tongana alisoro ti e ague oko na atënë so ayeke na yâ ti ambeti so bungbi ti Jéhovah asigi na ni, e yeke aidé congrégation ti ngbâ ti duti beoko nga ti duti “na bango ndo oko.”—1 aCor. 1:10; 4:6.

6. Use mbeti ti Pierre 3:11-13 afa na e nyen?

⁶ Diko 2 Pierre 3:11-13. Bazengele Pierre awa e ti gbu li na ndö ti ndani so a yeke nzoni e gbu li na ndö ti aprophétie ti Bible. Lo wa e ti bata lakue na li ti [e] ngoi so lâ ti Jéhovah ayeke duti dä.” Ngbanga ti nyen? A yeke pëpe ngbanga ti so e ye ti hinga ‘lango nga na l’heure’ so Jéhovah ayeke ga na Harmaguédon me a yeke ngbanga ti so e ye ti mû tanga ti ngoi so angbâ ti sara na “ye so ayeke nzoni-kue nga na akusala so afa so [e] voro Nzapa na bê ti [e] kue.” (Mat. 24:36; Luc 12:40). So ti tene, e ye ti ngbâ ti sara ye na lege ni nga ti sara kue ti tene aye kue so e sara ndali ti Jéhovah, e sara ni ndali ti so e ye lo mingi. Ti ngbâ ti sara ni, e doit ti sara hange na asarango ye ti e.

7. Tongana nyen la e yeke fa so e sara hange na asarango ye ti e? (Luc 21:34).

⁷ Jésus atene na disciple ti lo ti sara hange na aye so ayeke passé na yâ ti dunia so nga na asarango ye ti ala. Lo fa ni polele na yâ ti wango so ayeke na Luc 21:34. (Diko ni.) Jésus atene: “Ala sara hange [na asarango  ye ti ala].” Zo so ayeke sara hange na asarango ye ti lo ayeke sara hange na aye so apeut ti buba songo ti lo na Jéhovah nga lo yeke kpe ni. Tongana lo sara tongaso lo yeke ngbâ na yâ ti ndoye ti Nzapa.—aProv. 22:3; Jude 20, 21.

8. Wango wa la bazengele Paul amû na aChrétien?

⁸ Bazengele Paul awa aChrétien ti sara hange na asarango ye ti ala. Na tapande, lo tene na aChrétien ti Ephèse, lo tene: “Ala sara hange mingi na tambela ti ala si aduti tongana ti azo ti buba pëpe, me tongana ti azo ti ndara.” (aÉph. 5:15, 16). Satan ayeke gi lakue ti buba songo ti e na Jéhovah, ndani la Bible awa e ti “ngbâ ti gi ti hinga wala ye so bê ti Jéhovah aye ayeke nyen” tongaso si e peut ti bata terê ti e si Satan asara sioni na e ape.—aÉph. 5:17.

9. Tongana nyen la e yeke hinga ye so Jéhovah aye ti tene e sara?

⁹ Bible afa na e ape aye kue so apeut ti buba songo ti e na Jéhovah. Fani mingi e doit ti mû desizion na ndö ti aye so Bible asara tënë droit na ndö ni ape. Ti mû nzoni desizion e doit ti hinga “ye so bê ti Jéhovah aye”. E peut ti sara ni na lege so e diko Bible lakue nga e gbu li na ndö ni. Tongana e comprendre nzoni ye so Jéhovah aye nga e gi duti na “bibe ti Christ”, e yeke tambela “tongana ti azo ti ndara” même tongana ambilimbili ndia ti fa lege na e ayeke dä ape (1 aCor. 2:14-16). Na ambeni ngoi, a yeke ngangu ape ti hinga aye so e doit ti kpe ni. Me na ambeni ngoi a yeke ngangu ti hinga ni.

10. Ambeni sioni ye so e doit kpe ni ayeke so wa?

¹⁰ Ambeni sioni ye so e doit ti kpe ni ayeke ti zia pëpe nzara ti e na yâ ti mbeni zo, ti nyon sämba ahon ndö ni ape, ti tene pëpe asioni tënë, ti bâ pëpe asioni ngia, porno nga na ambeni ye tongaso (Ps. 101:3). Wato ti e Zabolo ayeke gi lakue lege ti buba yâ ti songo ti e na Jéhovah (1 Pi. 5:8). Tongana lê ti e akpengba ape, Satan apeut ti lu na yâ ti bê ti e angongoa ti sarango bê ti ye, sarango ye na lege ni ape, kota bê, kengo zo, fandara nga na batango zo na bê (aGal. 5:19-21). Na tongo nda ni, e peut ti bâ so apensé ni so ayeke sioni ape. Me tongana e zi ni hio ape, a yeke maï aga tongana mbeni sioni pere wala kugbe nga ayeke ga na kpale.—Jacq. 1:14, 15.

11. Mbeni kpale so zo ayeke bâ ni hio ape so e doit ti kpe ni ayeke so wa? Ngbanga ti nyen?

¹¹ Mbeni kpale so zo ayeke bâ ni hio ape ayeke asioni kamarade. Tara ti imaginé ye so. Mo na mbeni zo so ayeke Témoin ti Jéhovah ape ayeke sara kua lakue. Mo ye ti tene mba ti mo ti place ti kua ni aduti na nzoni bango ndo na ndö ti aTémoin ti Jéhovah, tongaso mo yeke sara ye na lo na nzoni bê nga mo yeke aidé lo. Na ambeni ngoi, mo na lo ague même fani mingi ti te ye. A ninga ape, lakue ala yeke gue ti te ye. Na ambeni ngoi, lo yeke sara tënë na ndö ti asioni ye me mo yeke sara sanka ni. So mo yeke mä asioni tënë ni so lakue, a gue ngbii a yeke son bê ti mo encore ape. Na mbeni lango, mba ti mo ni atisa mo ti tene ala gue anyon ye na peko ti kua na mo yeda. Na nda ni, mo komanse ti pensé tongana lo. A yeke ninga ape mo yeke komanse ti sara ye tongana mba ti mo ni. Ti vrai ni, e yeke sara ye na nzoni bê na azo kue nga e yeke ne ala, me e doit ti girisa ape so sarango ye ti e ayeke ga tongana ti azo so e mû ngoi ti duti na terê ti ala (1 aCor. 15:33). Tongana e sara hange na asarango ye ti e tongana ti so Jésus ahunda na e ti sara, e yeke sara kamarade senge senge ape na azo so ayeke sara pëpe ye alingbi na andia ti Jéhovah (2 aCor. 6:15). E yeke bâ kpale na e yeke kpe ni.

12. Nyen la adisciple ti Jésus asara lani na ngoi so ala yeke ku hunzingo ti aye ti ngoi so?

¹² Jésus aye lani ti tene adisciple ti lo aduti na aye mingi ti sara na ngoi so ala yeke ku hunzingo ti aye ti dunia so. Lo mû lani na ala kua ti sara. Lo mû yanga na ala ti fa nzoni tënë “na Jérusalem, na yâ ti Judée kue nga na Samarie, nga juska na ambage ti sese so ayeke tâ yongoro.” (Kus. 1:6-8). So tâ kota kua la adisciple ti Jésus awara lani so! Tongana ala sara ye kue so ala peut ti sara ti fa tënë na azo, ala yeke sara kua nzoni na ngoi ti ala.

13. Ngbanga ti nyen la e doit ti sara kua nzoni na ngoi ti e? (aColossien 4:5).

¹³ Diko aColossien 4:5. Ti sara hange na asarango ye ti e, e bezoin ti gbu li na ndö ti fason so e yeke sara kua na ngoi ti e. ‘Ye so zo aku terê ti lo na ni pëpe’ apeut ti si na e kue (Zo-ti. 9:11). Fini ti e apeut ti hunzi gï hio tongaso.

14-15. Tongana nyen la e peut ti sara kua nzoni na ngoi ti e? (aHébreu 6:11, 12). (Bâ nga foto.)

¹⁴ E peut ti sara kua nzoni na ngoi ti e na lege so e sara ye so bê ti Jéhovah aye nga e kpengba songo ti e ti kamarade na lo (Jean 14:21). E doit ti ‘luti ngangu, ti yengi pëpe, ti duti lakue na ye mingi ti sara na yâ ti kusala  ti Seigneur.’ (1 aCor. 15:58). Tongaso, tongana nda ni aga, atâa ayeke nda ti fini ti e wala ti aye ti ngoi so, e yeke regretté oko ape.—Mat. 24:13; aRom. 14:8.

¹⁵ Laso Jésus angbâ ti fa lege na adisciple ti lo na ngoi so ala yeke fa tënë ti Royaume ti Nzapa na ndö ti sese kue. Lo sara ye alingbi na zendo ti lo. Na lege ti bungbi ti Jéhovah, Jésus ayeke fa na e tongana nyen ti fa tënë nga lo mû na e aye so e bezoin ni ti fa nzoni tënë (Mat. 28:18-20). E yeke sara part ti e na lege so e yeke sara ngangu ti fa tënë na azo nga ti fa ye na ala nga na lege so lê ti e ayeke kpengba na ngoi so e yeke ku lango so Jéhovah ayeke futi aye ti dunia so. Tongana e sara ye alingbi na wango so ayeke na aHébreu 6:11, 12, e yeke hule na terê ti beku ti e “juska na nda ni.”—Diko ni.

16. Nyen la e leke na bê ti e ti ngbâ ti sara?

¹⁶ Jéhovah afa lango nga na l’heure so lo yeke futi dunia ti Satan awe. Tongana lango ni asi, Jéhovah ayeke sara ye alingbi na aprophétie so lo sara si a sû na yâ ti Bible. Me, na ambeni ngoi e peut ti pensé so lango ti futingo sioni dunia so ayeke si hio ape. Ye oko, lâ ti Jéhovah ‘ayeke si na retard ape!’ (Hab. 2:3). Tongaso, zia e leke na bê ti e ti “ngbâ ti bâ ndo ti bâ gango ti Jéhovah”, na sarango tongaso e fa so e “ngbâ ti ku Nzapa ti salut ti [e].”—Mi. 7:7.