1. Fini ti e ayeke tongana nyen na lê ti Jéhovah?

 IMAGINÉ so mbeni kamarade ti mo amû na mbeni da. Peinture ti da ni abuba nga da ni ayeke yuru. Atâa akpale so ayeke na terê ti da ni, da ni ayeke ye ti ngangu ngere. Kite ayeke dä ape so mo yeke bâ ni na nene ni nga mo yeke bata ni. Legeoko nga, Jéhovah amû na e mbeni cadeau ti ngangu ngere, cadeau ti fini. Ti vrai ni, Jéhovah afa so lo bâ fini ti e na nene ni mingi na lege so lo mû Molenge tongana ye so afuta ti zi e.—Jean 3:16.

2. Tongana ti so a fa na 2 aCorinthien 7:1, nyen la Jéhovah aye ti tene e sara?

² Jéhovah la amû fini na aye kue (Ps. 36:9). Bazengele Paul ayeda na tënë so tongana lo tene: “Ndali ti lo la e yeke na fini, e yeke tambela na e yeke dä.” (Kus. 17:25, 28). Tongaso, e peut ti tene so fini ti e ayeke mbeni cadeau so Nzapa amû na e. Na ndoye, lo mû na e aye so e bezoin ni ti ngbâ na fini (Kus. 14:15-17). Me Jéhovah ayeke bata fini ti e na lege ti miracle ape. Ye oko, lo ye ti tene e sara ye kue so e peut ti sara ti duti na nzoni seni nga ti ngbâ ti sara na lo. (Diko 2 aCorinthien 7:1.) Ngbanga ti nyen la a yeke nzoni e sara kue ti duti na nzoni seni nga ti ngbâ na fini? E yeke sara ni tongana nyen?

3. Mbeni raison wa la ndali ni e doit ti gi ti duti na nzoni seni?

³ Mbeni raison so ndali ni e doit ti gi ti duti na nzoni seni ayeke so, tongana e yeke na nzoni seni, e peut ti sara na Jéhovah nzoni mingi (Marc 12:30). E ye ti mû ‘terê ti e na Nzapa tongana sandaga so ayeke na fini, so ayeke nzoni-kue, so anzere na lo,’ tongaso e yeke kpe ti sara aye so e hinga so ayeke sara sioni na seni ti e (aRom. 12:1). Ti vrai ni, atâa nyen la e sara, terê ti e apeut ti son. Me e yeke sara ye kue so e peut ti sara ti duti na seni ndali ti so e ye ti fa na Babâ ti e ti yayu so e bâ na nene ni fini so lo mû na e na cadeau.

4. Nyen la Gbia David aye lani ti sara?

⁴ Gbia David afa ndani so lo bâ na nene ni fini so Nzapa amû na lo na cadeau, lo tene: “Nzoni ti nyen la kuâ ti mbi ayeke ga na ni? Nzoni ti nyen la ayeke ga tongana mbi descend na yâ ti dû? Fuku ti sese ayeke sepela mo? Fuku ti sese ayeke fa so mo yeke be-ta-zo?” (Ps. 30:9). Peut-être David asû atënë so na ngoi so fini ti lo ayeke gue ti hunzi. Me lo leke lani na bê ti lo ti ngbâ na fini aninga tongaso si lo peut ti ngbâ ti sara na Jéhovah. Kite ayeke dä ape so a yeke ye so e kue e leke na bê ti e la.

5. Atâa e yeke mbakoro wala terê ti e ason tongana nyen, nyen la e peut ti sara?

⁵ Songo terê nga na gango mbakoro apeut ti kanga lege na e ti sara gbâ ti aye so e yeke sara lani. A sara si bê ti e apeut ti son nga vundu asara e. Me a yeke nzoni e ngbâ ti sara kue ti bâ lege ti seni ti e. Ngbanga ti nyen? Ngbanga ti so atâa e yeke mbakoro wala terê ti e ason tongana nyen, e peut ti ngbâ ti gonda Jéhovah, tongana ti so Gbia David asara lani. Bê ti e adë mingi ti hinga so Nzapa abâ e na nene ni même tongana terê ti e ason wala e yeke mbakoro (Mat. 10:29-31). Même tongana e kui, lo yeke ku kungo ti zingo e na kuâ (Job 14:14, 15). Na ngoi so e yeke na fini, e ye ti sara ye kue so e peut ti sara ti bata seni nga na fini ti e.

6. Na ndö ti tengo ye na nyongo ye, nyen la Jéhovah aye ti tene e sara?

⁶ Atâa so Bible ayeke pëpe mbeni mbeti ti seni wala mbeti so ayeke fa na zo anzoni kobe so lo doit ti te, a fa na e pensé ti Jéhovah na ndö ti seni nga na tengo anzoni kobe. Na tapande, lo wa e ti “pusu yamba na terê ti [e] ye kue so alingbi ti sara sioni na [e]” so apeut ti buba terê ti e (Zo-ti. 11:10). Bible atene na e so a yeke nzoni ape ti te ye nga ti nyon ye ahon ndö ni. Aye so apeut ti buba seni ti e nga même ti fâ e (aProv. 23:20). Jéhovah ahunda na e ti duti na komandema na ndö ti ye so e yeke te nga na ye so e yeke nyon.—1 aCor. 6:12; 9:25.

7. Tongana nyen la wango so ayeke na aProverbe 2:11 a-aidé e ti mû anzoni desizion na ndö ti seni ti e?

⁷ E peut ti mû adesizion so afa so e kiri singila mingi na Nzapa so amû na e fini na lege so e sara kua nzoni na ngangu ti gbungo li ti e (Ps. 119:99, 100; diko aProverbe 2:11). Na tapande, e yeke gbu li nzoni na ndö ti ye so e yeke te. Tongana e ye mbeni kobe me e hinga so ayeke sara si terê e ason, e yeke te ni ape. E yeke sara nga ye na ndara tongana e gi ti lango nzoni, e sara sport lakue nga e sara si terê ti e nga na ndo ti e aduti propre.

8. Tongana nyen la Bible afa na e so ti tene kpale asi na e ape ayeke kota ye na lê ti Jéhovah?

⁸ Jéhovah alu lani Ndia na azo ti Israël na  ndö ti aye so ala peut ti sara ti bata terê ti ala si ala sara akota accident ape na yanga-da wala na place ti kua (Ex. 21:28, 29; Deut. 22:8). Tongana mbeni zo afâ mba ti lo na mbana ape, akota kpale ayeke ga na pekoni (Deut. 19:4, 5). Ndia ni ahunda lani ti tene apunir même azo so asara sioni na mbeni bébé so a de ti dü lo ape (Ex. 21:22, 23). Bible afa polele so Jéhovah aye ti tene e sara kue ti kpe a-accident.

9. Ambeni ye wa la e peut ti sara si e sara accident ape? (Bâ nga afoto.)

⁹ E yeke fa so e bâ na nene ni fini so Nzapa amû na e na cadeau tongana e sara aye so apeut ti sara si kpale asi na e ape na yanga-da nga na place ti kua. Na tapande, e yeke zia aye so apeut ti fâ zo na kä, aye so apeut ti sara sioni na zo wala ayöro na place so apeut ti sara sioni na zo ape nga e yeke zia aye tongaso na ndo so amolenge apeut ti mû ni ape. E yeke sara hange tongana e tingo wâ, e yeke kporo ngu nga e yeke sara hange na aye so e sara na kua ti sara aye so, e yeke ngbâ na terê ni na ngoi so e yeke sara kua na ni. E yeke kpe na oto ape tongana li ti e ayeke kpô ape ndali ti so e nyon yöro, sämba wala e lango  nzoni ape, nga e yeke iri ndo na téléphone ape wala e yeke tokua message ape na ngoi so e yeke kpe na oto.

10. Nyen la e peut ti sara kozo ti tene mbeni kota kpale asi nga na ngoi ti kpale ni?

¹⁰ Na ambeni ngoi, e lingbi pëpe ti kanga lege na ambeni ngangu kpale ti si. E lingbi pëpe ti kanga lege na akota kpale tongana kota pupu, asioni kobela so amû ndo nga na bira. Ye oko, tongana akpale tongaso asi, e peut ti sara kue ti tene kpale asi na e ape na lege so e quitté ndo ni tongana a hunda na e ti sara ni nga e sara ye alingbi na aye so akota zo ti kodro afa (aRom. 13:1, 5-7). E peut ti leke terê ti ku na ambeni kpale so ayeke si, tongaso a yeke nzoni e sara ye alingbi na aye so akota zo ti kodro afa ti leke terê ti e. Na tapande, a yeke nzoni e sara kue ti duti na aye tongana ngu, akobe so apeut ti buba hio ape nga na ayöro.

11. Tongana mbeni kobela so zo apeut ti mû na mba ti lo ayeke mû ndo na ndo so e yeke dä, nyen la a yeke nzoni e duti nduru ti sara?

¹¹ Nyen la a yeke nzoni e sara tongana mbeni kobela so zo apeut ti mû na mba ti lo ayeke mû ndo na ndo so e yeke dä? A yeke nzoni e sara ye alingbi na aye so azo ti gouvernement afa, na tapande ti sukula maboko, ti duti ayo na mba, ti yü masque nga ti duti na quarantaine. Tongana e sara aye so e yeke fa so e bâ na nene ni mingi fini so Nzapa amû na e na cadeau.

12. Tongana nyen la mama-ndia so ayeke na aProverbe 14:15 a-aidé e ti hinga sango wa la e yeke mä na ngoi so mbeni kota kpale asi?

¹² Na ngoi so akpale asi, na ambeni ngoi e yeke mä atënë so akamarade ti e, avoizin ti e nga na azo ti sango ayeke tene so ayeke tâ tënë ape. Ahon ti ‘mä na bê na tënë kue’ so e mä, a yeke nzoni e mä asango so ayeke na lege ni so alondo na azo ti gouvernement nga na adocteur. (Diko aProverbe 14:15.) Bebungbi nga na abureau ti afiliale ayeke sara kue ti wara asango so ayeke na lege ni kozo si ala fa na e aye so e doit ti sara na ngoi ti abungbi nga na fango tënë (aHéb. 13:17). Tongana e sara ye alingbi na aye so ala fa, e yeke bata terê ti e nga na amba ti e si sioni asi na e ape. E peut nga ti sara si azo aduti na nzoni bango ndo na ndö ti aTémoin ti Jéhovah.—1 Pi. 2:12.

13. Tongana a ndu tënë ti mênë, tongana nyen la e yeke fa so e bâ na nene ni mingi fini so Nzapa amû na e na cadeau?

¹³ Azo mingi ahinga so e aTémoin ti Jéhovah e yeke mû mênë ape. A yeke ndali ti so e bâ so mênë ayeke nzoni-kue. E yeke sara ye alingbi na ndia ti Jéhovah na ndö ti mênë na lege so e ke ti mû ni même na ngoi so e yeke na ngangu kobela (Kus. 15:28, 29). Me a ye ti tene ape so e ye ti kui. E bâ na nene ni mingi fini so Nzapa amû na e na cadeau. E yeke gi adocteur so ayeke duti nduru ti soigné e nzoni sân ti mû mênë na e.

14. Nyen la e peut ti sara si e duti pëpe na bezoin ti tene asara ambeni kota ye ti soigné e?

¹⁴ Tongana e bâ lege ti seni ti e na lege so e sara aye so e bâ na yâ ti article so, peut-être e yeke duti pëpe na bezoin ti tene a sara opération na e wala asara ambeni kota ye ti soigné e. Tongana e sara kue ti ngbâ na nzoni seni, e yeke wara sava hio tongana a sara na e opération. E yeke duti pëpe na bezoin ti tene a sara opération na e tongana e zi na ndo ti e nga na place ti kua ti e aye so apeut ti ga na e kpale nga e sara ye alingbi na ndia ti kpengo na oto.

15. (a) Ngbanga ti nyen la a yeke kota ye ti duti na carte DPA so e sû ni ade ti ninga ape? (Bâ nga foto.) (b) Tongana ti so a fa na yâ ti vidéo ni, tongana nyen la e peut ti mû anzoni desizion na ndö ti kode ti kaïngo na kobela so a sara kua na mênë?

 ¹⁵ So e bâ na nene ni fini so Nzapa amû na e na cadeau, e yeke remplir carte DPA ti e na ayeke duti na terê ti e na ngoi kue. Na lege ti mbeti so, e yeke fa atënë ti bê ti e na ndö ti mungo mênë nga na ambeni kode ti kaïngo na kobela. Eskê carte DPA ti mo aninga mingi awe? Tongana mo bezoin ti sû atënë ti bê ti mo na lê ti mbeti so wala ti changé ambeni ye na yâ ni, sara ni hio. Tongana e sû aye so e ye polele na mbeti, a yeke sara si a soigné e hio ndali ti so e yeke buba ngoi ti e ape ti sara lisoro na adocteur. E yeke aidé nga azo so ayeke soigné e ti sara kua pëpe na kode wala yöro so apeut ti ga na e kpale. b

16. Tongana e hinga ape ti remplir carte DPA, nyen la e peut ti sara?

¹⁶ Atâa e yeke maseka wala e yeke na nzoni seni, e kue e peut ti sara accident nga terê ti e apeut ti son (Zo-ti. 9:11). Tongaso, a yeke na lege ti ndara ti tene e remplir carte DPA ti e. Tongana mo hinga ti remplir ni ape, mo peut ti hunda a-ancien ti congrégation ti mo  ti aidé mo. Ala sara ngangu ti hinga tongana nyen ti remplir mbeti so, me adesizion so andu akode ti kaïngo na kobela, ala yeke mû ni na place ti mo ape. A yeke desizion ti mo wani (aGal. 6:4, 5). Me ala peut ti aidé mo ti asû aye so mo ye na lê ti mbeti ni.

17. Na ndö ti tënë ti seni, tongana nyen la e peut ti fa so e sara ye ahon ndö ni ape?

¹⁷ Gbâ ti adesizion so e yeke mû na ndö ti seni ti e nga na kode ti kaïngo na kobela ague oko na aye so e manda na yâ ti Bible (Kus. 24:16; 1 Tim. 3:9). Na ngoi so e yeke mû adesizion nga e yeke sara lisoro na amba ti e na ndö ti adesizion ti e, a yeke nzoni e dabe ti e na mama-ndia so ayeke na aPhilippien 4:5, so atene: “Zia azo kue ahinga so ala yeke sara ye ahon ndö ni pëpe.” Tongana e sara ye ahon ndö ni ape, e yeke gi bê ti e ahon ndö ni ape na ndö ti seni ti e nga e yeke pusu amba ti e ape ti sara ye alingbi na bango ndo ti e. E ye aita ti e nga e ne ala même tongana adesizion so ala mû ayeke nde na ti e.—aRom. 14:10-12.

18. Tongana nyen la e peut ti kiri singila ndali ti fini so Nzapa amû na e na cadeau?

¹⁸ E yeke kiri singila na Jéhovah so amû fini na aye kue na lege so e bata fini ti e nga e mû na lo anzoni ye ti e (Apoc. 4:11). Laso, terê e ayeke son nga e yeke wara angangu kpale. Me Lo so acréé e aye lani ti tene e vivre tongaso ape. Fafadeso lo yeke mû na e fini ti lakue lakue, terê ti e ayeke son ape nga e yeke kui ape (Apoc. 21:4). Ti ku na ngoi ni so, a nzere na e mingi ti ngbâ na fini nga ti sara na Jéhovah, Babâ ti e ti yayu so aye e mingi!