1. Ngbanga ti nyen la a yeke ngangu ti hinga vrai tënë so mbeni zo aye ti tene tongana lo tene lo pardonné mo?

 TONGANA mbeni zo atene na mo, atene “mbi pardonné mo awe”, bê ti mo ayeke dë mbilimbili tongana mo hinga so mo tene mbeni tënë wala mo sara mbeni ye so ason lo. Me tënë “mbi pardonné mo awe” aye mbilimbili ti tene nyen? Eskê zo so mo son bê ti lo aye ti tene so songo ti ala akiri tongana ti kozo awe? Wala zo ni aye gï ti tene so lo ye ti sara tënë na ndö ti ye ni encore ape? A yeke ngangu ti hinga vrai tënë so mbeni zo aye ti tene tongana lo tene ni pardonné mo.

 2. Bible atene nyen na ndö ti pardon ti Jéhovah? (Bâ nga kete tënë na gbe ni.)

² Fason so Jéhovah ayeke pardonné na e azo so e yeke mbilimbili-kue ape ayeke tâ nde mingi na fason so e yeke pardonné na amba ti e. Zo oko apeut ti pardonné mba ti lo tongana ti Jéhovah ape. Mbeni zo ti sungo psaume atene na ndö ti Jéhovah, atene: “Na mbage ti mo la azo ayeke wara tâ pardon, tongaso si ala kpe mbeto ti mo mingi.” a (Ps. 130:4). Ti vrai ni, pardon ti Jéhovah ayeke “tâ pardon”. Lo la lo fa na e ye so aye biani ti tene pardon. Na yâ ti ambeni versê, azo so asû Bible asara kua na mbeni tënë ti Hébreu so aye ti tene pardon, so a sara kua na ni lâ oko ape ti sara tënë ti pardon so azo ayeke pardonné na amba ti ala.

 3. Tongana nyen la pardon ti Jéhovah ayeke nde na ti e? (Ésaïe 55:​6, 7).

³ Tongana Jéhovah apardonné mbeni zo, lo yeke zi siokpari  ti lo biani biani. Songo so abuba na popo ti lo na zo ni ayeke kiri na place ni. E kiri singila mingi na Jéhovah so ayeke pardonné asiokpari ti e biani biani fani mingi.—Diko Ésaïe 55:​6, 7.

 4. Tongana nyen la Jéhovah a-aidé e ti comprendre ye so aye ti tene tâ pardon?

⁴ Tongana pardon ti Jéhovah ayeke nde na ti e, tongana nyen la e azo so e yeke mbilimbili-kue ape e peut ti comprendre ye so aye ti tene tâ pardon? Jéhovah asara kua na apendere tapande ti aidé e ti comprendre fason so lo yeke pardonné na e. Na yâ ti article so, e yeke bâ ambeni tapande ni. A yeke fa na e tongana nyen la tongana Jéhovah azi siokpari ti e, na oko ngoi ni, lo yeke kiri na place ni songo so ayeke na popo ti e na lo so abuba. Na ngoi so e yeke bâ atapande so, e yeke kiri singila mingi na Babâ ti e so ayeke sara ye na nzoni bê, so apardonné e na alege mingi.

JÉHOVAH AYEKE ZI SIOKPARI TI E

 5. Tongana Jéhovah apardonné asiokpari ti e, nyen la ayeke passé?

⁵ Na yâ ti Bible, fani mingi, a haka asiokpari na anengo kungba. Gbia David atene tënë so na ndö ti asiokpari ti lo wani: “Afaute ti mbi ayeke lakue na ndö ti li ti mbi; a yeke tongana mbeni nengo kungba so mbi lingbi ti yô ni pëpe.” (Ps. 38:4). Me Jéhovah ayeke pardonné awasiokpari so achangé bê ti ala (Ps. 25:18; 32:5). Tënë ti Hébreu so a kiri peko ni na “pardon” aye mbilimbili ti tene ti “yô mbeni ye na nduzu” wala ti “yô mbeni ye.” E peut ti pensé so Jéhovah ayeke tongana mbeni ngangu koli so na lege ti fä azi nengo kungba ti siokpari so ayeke na ndö ti go ti e na lo hon na ni.

 6. Jéhovah ayeke yô asiokpari ti e lo gue na ni ayo na e tongana nyen?

⁶ Bible asara kua na mbeni tapande so afa so Jéhovah ayeke yô asiokpari ti e lo gue na ni yongoro na e. Psaume 103:12 atene: “Tongana ti so ndo so lâ asigi dä ayo mingi na ndo so lâ alinda dä, lo zi akengo ndia ti e, lo zia ni yongoro na e.” Est ayo mingi na ouest. Ala peut ti tingbi terê lâ oko ape. Ye so aye ti fa so Jéhovah amû asiokpari ti e lo gue na ni ayo na e ahon ti so e peut ti imaginé. A fa na e so Jéhovah ayeke pardonné asiokpari ti e kue kue kue.

 7. Tongana nyen la Bible afa ye so Jéhovah ayeke sara na asiokpari ti e? (Michée 7:​18, 19).

⁷ Atâa so na lege ti fä Jéhovah ayeke yô asiokpari ti e lo hon na ni yongoro na e, eskê lo yeke ngbâ ti bata ni? Ên-ën! Gbia Ézéchias atene tënë so na ndö ti Jéhovah, lo tene: “Mo bi asiokpari ti mbi kue yongoro na peko ti mo.” Wala tongana ti so kete tënë na gbe ni atene “mo zi asiokpari ti mbi kue na lê ti mo.” (És. 38:​9, 17; kete tënë na gbe ni). Ye so aye ti fa so Jéhovah ayeke zi asiokpari ti azo so achangé bê ti ala, lo bi ni yongoro na lo yeke bâ ni encore ape. A peut nga ti kiri na peko ti tënë so tongaso: “Mo sara si asiokpari ti mbi agirisa mo bâ mo tene mbi sara ni lâ oko ape.” Bible akiri afa ni na lege ti mbeni tapande nde so ayeke na Michée 7:​18, 19. (Diko ni.) Aversê so afa so Jéhovah ayeke bi asiokpari ti e na gbe ti ngu-ingo. Ândö, a yeke ngangu ti tene mbeni zo awara mbeni ye so a bi ni na gbe ti ngu-ingo.

 8. Nyen la e manda juska ge?

⁸ Na lege ti atapande so, e manda so tongana Jéhovah apardonné e, lo zi nengo kungba ti siokpari na ndö ti e. Ti vrai ni, tongana ti so David atene: “Ngia ayeke na ala so a pardonné asarango ye ti ala so ague nde na ndia, nga ala so a kanga ndö ti asiokpari ti ala. Ngia ayeke na zo so Jéhovah ayeke diko ande  siokpari ti lo na li ti lo kete tongaso pëpe.” (aRom. 4:​6-8). So tâ pardon la!

JÉHOVAH AYEKE MBÔ SIOKPARI TI E

 9. Tongana nyen la Bible a-aidé e ti bâ so Jéhovah ayeke pardonné e kue kue kue?

⁹ Jéhovah asara kua na ambeni tapande nde ti aidé e ti bâ tongana nyen la na lege ti ye so a futa ti zi azo lo yeke mbô asiokpari ti azo so achangé bê ti ala. A yeke mo bâ mo tene Jéhovah ayeke sukula asiokpari ni so. A yeke sara si zo so asara siokpari ni ayeke saleté encore ape (Ps. 51:7; És. 4:4; Jér. 33:8). Jéhovah wani afa ye ti peko ni, lo tene: “Même tongana siokpari ti ala ni abe tongana mênë, a yeke vuru tongana neige. Même tongana a be ngbii aye ti vuko vukongo, a yeke vuru tongana kuä ti terê ti taba.” (És. 1:18). Tongana mbeni ye so abe tongana mênë agbu mbeni bongo, a yeke ngangu ti zi ni wala ti sukula ni. Na lege ti tapande so, Jéhovah adë bê ti e so lo peut ti sukula siokpari ti e tâ nzoni, na a yeke bâ ni encore ape.

10. Mbeni tapande nde wa la Jéhovah asara kua na ni ti fa so lo yeke pardonné e mingi?

¹⁰ Tongana ti so e bâ na yâ ti article so ahon, a haka nga asiokpari na “abon”. (Mat. 6:12; Luc 11:4). Tongaso, na ngoi kue so e sara siokpari na terê ti Jéhovah, a yeke mo bâ mo tene bon ti lo ayeke kono na li ti e. Kota bon ti lo ayeke na li ti e. Me, tongana Jéhovah apardonné e, a yeke mo bâ mo tene lo zi bon ni na li ti e, tongana lo sara ni ape bon ni ayeke kono. Lo hunda na e ape ti futa asiokpari so lo pardonné ni awe. Legeoko tongana ti so bê ti mbeni zo ayeke dë tongana a zi bon na li ti lo, bê ti e ayeke dë tongana Jéhovah apardonné e.

11. Tongana Bible atene “a zi” asiokpari ti e, a ye ti tene nyen la? (Kusala 3:19).

¹¹ Jéhovah ayeke zi abon so ayeke na li ti e wala asiokpari ti e nga lo yeke mbô ni. (Diko Kusala 3:19.) Na tapande, imaginé so a sû na mbeti wungo ti bon so ayeke na li ti mo so mo doit ti payé me mbeni zo abarré ni. Ye oko, wungo ti nginza ni angbâ na gbe ti ye so lo barré ni na a peut ti bâ ni. Me ti mbô mbeni ye ayeke ti lo nde. Ti mä yâ ti tapande so, a yeke nzoni e girisa ape so encre so azo ayeke sara na kua ândö, a yeke ngangu ape ti mbô ni na ngu. Mbeni zo apeut ti mû chiffon so lo mouillé na ngu lo mbô na mbeti ni. Tongaso, tongana “a zi” bon na li ti mbeni zo, bon ni ayeke dä encore ape. Azo apeut ti bâ ape wungo ti bon ni so a sû ni lani. A yeke mo bâ mo tene bon ayeke na li ti lo lâ oko ape. E kiri singila mingi na Jéhovah so e hinga so tongana lo pardonné asiokpari ti e, a yeke mo bâ mo tene e sara ni lâ oko ape.—Ps. 51:9.

12. Nyen la e manda na lege ti tapande ti mbinda so ane so ahonde mbeni ye?

¹² Jéhovah asara kua na mbeni tapande nde ti fa tongana nyen la lo yeke zi asiokpari ti e biani biani. Lo tene: “Mbi yeke mbô akengo ndia ti mo, tongana ti so mbinda ahonde mbeni ye. Mbi yeke mbô siokpari ti mo, tongana ti so mbinda so ane ahonde mbeni ye.” (És. 44:22). Tongana Jéhovah apardonné e, a yeke mo bâ mo tene lo sara kua na mbinda so ane ti honde akengo ndia ti e tongaso si a bâ ni ape.

13. Tongana Jéhovah apardonné asiokpari ti mo ayeke sara mo tongana nyen?

¹³ Nyen la atapande so afa na e? Tongana Jéhovah apardonné asiokpari ti e, a yeke nzoni ape ti ngbâ ti bâ so tënë ayeke na li ti e ndali ni na yâ ti tanga ti gigi ti e. Na lege ti mênë ti Jésus Christ, lo zi abon so ayeke na  li ti e biani biani awe. Tongana Jéhovah apardonné mbeni siokpari, a yeke mo bâ mo tene zo ni asara ni lâ oko ape. Tongana e sara siokpari na e changé bê ti e, a yeke tongaso la Jéhovah ayeke pardonné e.

JÉHOVAH ASARA SI E KIRI E DUTI NA NZONI SONGO NA LO

14. Ngbanga ti nyen la e peut ti duti na confiance so Jéhovah ayeke pardonné e kue kue kue? (Bâ nga afoto.)

¹⁴ Tongana Jéhovah apardonné e, e peut ti duti sûr so e yeke kiri ti ga akamarade ti lo. A aidé e ti bâ so tënë ayeke lakue na li ti e ape. E bezoin ape ti sara mbeto so bê ti Jéhovah angbâ lakue ti son na terê ti e nga lo yeke gi mbeni lege ti punir e. Lo yeke sara ni lâ oko ape. Tongana Jéhovah atene lo pardonné e, e peut ti sara confiance na lo. Jéhovah atene lani na prophète Jérémie, atene: “Mbi yeke pardonné sioni ti ala nga mbi yeke dabe ti mbi na siokpari ti ala encore ape.” (Jér. 31:34). Bazengele Paul atene oko tënë so tongana lo tene: “Mbi yeke dabe ti mbi na asiokpari ti ala encore ape.” (aHéb. 8:12). Tënë so aye mbilimbili ti tene nyen?

15. Na lege wa la Jéhovah ayeke dabe na asiokpari ti e encore ape?

¹⁵ Na yâ ti Bible, tënë “dabe” aye lakue ape ti sara tënë ti mbeni zo so angbâ ti pensé na mbeni ye so apassé ândö. Me a peut ti sara tënë ti mbeni zo so angbâ ti sara mbeni ye. Sioni zo so a kanga lani lo na ndö ti keke na terê ti Jésus ahunda mbeni ye na Jésus, lo tene: “Jésus, dabe ti mo na mbi tongana mo lï na yâ ti Royaume ti mo.” (Luc 23:​42, 43). Lo yeke hunda lani na Jésus ti sara mbeni ye ndali ti lo na ngoi ni so. Kiringo tënë ti Jésus afa so lo yeke sara ande mbeni ye ndali ti lo: lo yeke zingo sioni zo so na kuâ. Tongaso, tongana Jéhovah atene lo yeke dabe ti lo na asiokpari ti e encore ape, lo ye ti tene so lo yeke sara mbeni ye na e ndali ni ape. Lo yeke punir ande e mbeni lâ ape ndali ti asiokpari ti e so lo pardonné ni awe.

16. Bible ahaka e na azo wa?

 ¹⁶ Bible asara kua na mbeni tapande nde ti aidé e ti comprendre liberté so zo ayeke wara na peko ti tâ pardon. Bible atene so, so e yeke mbilimbili-kue ape e yeke “angbâa ti siokpari”. Me grâce na pardon ti Jéhovah, e yeke tongana angbâa so “a zi ala na gbe ti siokpari awe”. (aRom. 6:​17, 18; Apoc. 1:5). Tongana e hinga so Jéhovah apardonné e awe, e peut ti duti na ngia tongana ti mbeni ngbâa so a zi lo awe.

17. Tongana nyen la e yeke wara sava tongana Nzapa apardonné e? (Ésaïe 53:5).

¹⁷ Diko Ésaïe 53:5. Bible atene so, so e yeke awasiokpari, e yeke tongana azo so ayeke na mbeni kobela so ayeke gue ti fâ ala. Me grâce na ye so a futa ti zi azo so Jéhovah amû na lege ti Molenge ti lo, lo sava e (1 Pi. 2:24). Tongana e sara siokpari, e buba songo ti e na Jéhovah. Me grâce na ye so a futa ti zi azo, lo peut ti pardonné e nga e peut ti kiri ti duti na nzoni songo na lo. Legeoko tongana ti so terê ti mbeni zo so a sava ngangu kobela na terê ti lo ayeke nzere mingi, e nga kue terê ti e ayeke nzere mingi na ngoi so a sava e na lege ti yingo nga e kiri e zia ngia na bê ti Jéhovah grâce na pardon ti lo.

ANZONI YE TI PEKO TI PARDON TI JÉHOVAH

18. Nyen la atapande so Bible afa na ndö ti pardon ti Jéhovah afa na e nyen? (Bâ nga encadré “Fason so Jéhovah ayeke pardonné na e.”)

¹⁸ Nyen la atapande so Bible afa na ndö ti pardon ti Jéhovah afa na e nyen? Tongana Jéhovah apardonné e, lo yeke pardonné e kue kue kue nga biani biani. A mû lege na e ti duti na nzoni songo na Babâ ti e ti yayu. Na oko ngoi ni, e girisa ape so tâ pardon ayeke mbeni cadeau. Ndoye ti Jéhovah nga na kota nzobe ti lo la apusu lo ti pardonné e azo so siokpari ayeke na terê ti e. A yeke pëpe mbeni ye so azo ayeke na droit ti hunda ni.—aRom. 3:24.

19. (a) Nyen la e doit ti kiri singila na Jéhovah ndali ni? (aRomain 4:8). (b) Nyen la e yeke bâ na yâ ti article ti peko?

¹⁹ Diko aRomain 4:8. E kue e doit ti kiri singila mingi na Jéhovah so ayeke Nzapa ti “tâ pardon”. (Ps. 130:4). Ye oko, ti tene Jéhovah apardonné e, e doit ti sara mbeni ye so ayeke kota mingi. Mä tënë so Jésus atene: “Tongana ala pardonné afaute ti azo pëpe, Babâ ti ala ayeke pardonné ande afaute ti ala nga pëpe.” (Mat. 6:​14, 15). Tongaso, e doit ti mû tapande ti Jéhovah na e pardonné amba ti e. Me e peut ti sara ni tongana nyen? Article ti peko ayeke fa na e ni.