Marie na koli ti lo Jean a avivre na mbeni kodro so gbâ ti azo ti Philippines aga dä ti sara kua, na a nzere na ala ti fa tënë na ala. Na ngoi so COVID-19 amû ndo, Marie akomanse ti manda Bible na azo so ayeke na kodro so lo yeke dä nga na azo so ayeke na ambeni kodro nde. Lo sara ni tongana nyen?

Marie ayeke hunda na zo oko oko so lo manda Bible na lo, lo tene: “Eskê mo hinga mbeni zo so aye ti manda Bible?” Tongana zo ni atene en, lo yeke hunda lo, lo tene: “Mo peut ti aidé mbi ti wara terê na lo?” Fani mingi, ti hunda senge hunda so aga na anzoni ye. Ngbanga ti nyen? Ngbanga ti so mingi ni, azo so aye aye so ala manda na yâ ti Bible aye ti fa ni na afami nga na akamarade ti ala. Tongaso, nyen la apassé na peko ti so Marie ahunda tënë so?

Jasmine, mbeni zo so Marie amanda lani Bible na lo, a-aidé lo ti wara terê na azo osio so aye ti manda Bible. Christine, mbeni oko ti ala, aye étude ti lo mingi asara si lo hunda na Marie ti sara ni lege use na yâ ti yenga oko. Na ngoi so Marie ahunda lo wala lo hinga mbeni zo so aye ti manda Bible, lo tene: “En, mbi yeke aidé mo ti wara terê na akamarade ti mbi.” Ayenga mingi ape na pekoni, Christine afa na Marie akamarade ti lo osio so aye ti manda Bible. Na pekoni, Christine afa na lo ambeni kamarade ti lo ni nde, na ambeni na popo ti ala amû na Marie iri ti ambeni zo so aye ti manda Bible.

Christine aye lani nga ti tene afami ti lo na Philippines amanda Bible. Tongaso, lo sara tënë ni na Andréa, molenge ti lo ti wali. Na tongo nda ni, Andréa apensé lo tene: ‘A-Témoin ti Jéhovah ayeke mbeni secte, ala mä na bê na Jésus ape nga ala sara kua gï na Testament ti Giriri.’ Me na peko ti so lo manda Bible gï fani oko, lo ga ti bâ so lo yeke na raison ape. Na ngoi ti étude ti lo, lo yeke tene ka: “Tongana Bible atene tënë tongaso, andâ a yeke tâ tënë.”

A si na mbeni ngoi, Andréa afa na Marie akamarade ti lo use nga na mbeni mba ti lo ti place ti kua so ala ye ti manda Bible. Nga, sân ti tene Marie ahinga, Angela, omba ti Andréa so lê ti lo akanga, ayeke mä étude ti ala ni. Mbeni lâ, Angela ahunda na Andréa ti hunda Marie ti manda na lo Bible. Angela aye ye so lo manda so mingi. Na yâ ti nze oko, lo bata gbâ ti aversê ti Bible na li na lo ye ti sara étude ti lo lege osio na yâ ti yenga oko. Andréa a-aidé lo ti komanse ti sara bungbi lakue na lege ti vidéoconférence.

Na ngoi so Marie ahinga so Josué, koli ti Christine ayeke lakue nduru na terê ti Christine  na ngoi ti étude ni, Marie ahunda na lo wala lo ye ti manda nga Bible ni. Josué atene: “Mbi yeke mä gï ala, me mbi ye ti tene mo hunda na mbi atënë ape; tongana mo sara ni, mbi yeke sigi.” Gï na yâ ti akozo penze-ngbonga oku ti étude ni, lo hunda gbâ ti atënë ahon Christine, na lo nga kue lo ye ti manda Bible.

Gï senge hundango tënë so Marie ahunda asara si gbâ ti azo amanda Bible. Lo leke ti tene ambeni Témoin amanda Bible na mingi ti azo so. Marie akomanse ti manda Bible na azo 28 so ayeke na yâ ti akodro osio.

Jasmine, kozo zo so Marie amanda Bible na lo so e sara tënë ti lo fade, awara batême na avril 2021. Christine awara batême na mai 2022 na lo kiri na Philippines na terê ti afami ti lo. Ambeni wamandango Bible use so Christine afa lani ala na Marie awara nga batême. Anze mingi ape na pekoni, Angela awara batême na lo yeke laso pionnier permanent. Josué, koli ti Christine, molenge ti ala Andréa nga na ambeni wamandango Bible ni angbâ ti gue na li ni.

Na ngoi ti akozo Chrétien, nzoni tënë amû ndo hio na popo ti azo ti sewa nga na akamarade (Jean 1:​41, 42a; Kus. 10:​24, 27, 48; 16:​25-33). Hunda na azo so mo yeke manda Bible na ala nga na azo so tâ tënë agbu bê ti ala tënë so: “Eskê mo hinga mbeni zo so aye ti manda Bible?” Tongana mo hunda senge hunda so, peut-être mo nga kue mo yeke wara gbâ ti azo so aye ti manda Bible.