ARTICLE TI MANDANGO NI 8
BIA 130 Pardonné zo
Tongana nyen la e peut ti pardonné amba ti e tongana Jéhovah?
“Gï tongana ti so Jéhovah apardonné ala na bê ti lo kue, ala nga ala sara tongaso.”—ACOL. 3:13.
KOTA TËNË TI ARTICLE NI
Article so ayeke sara tënë na ndö ti aye so e peut ti sara ti pardonné mbeni zo so ason bê ti e.
1-2. (a) Na ngoi wa la a peut ti duti ngangu mingi ti pardonné mbeni zo? (b) Tongana nyen la Denise afa so lo pardonné zo?
ESKÊ a yeke ngangu na mo ti pardonné azo? A yeke ngangu na mingi ti e ti pardonné mbeni zo, mbilimbili tongana zo ni atene mbeni tënë wala lo sara mbeni ye so ason e mingi. Ye oko, e peut ti hon ndö ti songo bê ti e nga ti pardonné azo. Na tapande, bâ ye so asi na Ita-wali Denise a so apardonné mbeni ye so ayeke ngangu mingi na zo ti pardonné ni. Na ngu 2017, Denise na azo ti sewa ti lo alondo ti sara vizite na kota ndokua ti aTémoin ti Jéhovah so a zi yanga ni fini fini. Na ngoi so ala yeke kiri, mbeni zo ti kpengo na oto so a yeke ngangu na lo ti fa lege na oto ti lo ni apika oto ti ala. Denise ahinga terê ti lo encore ape na yâ ti accident ni. Na ngoi so lo zingo, lo mä so amolenge ti lo awara kota kä nga koli ti lo Brian akui. Tongana Denise apensé na ngoi ni so, lo tene: “Mbi découragé kue nga li ti mbi aga kirikiri.” Na pekoni, lo mä so zo ti kpengo na oto ni anyon sämba wala drogue ape wala mbeni ye agboto lê ti lo ape, tongaso Denise asambela ti wara siriri.
2 A gbu lani zo so apika ala so a gue na lo na ngbanga ndali ti so lo pika zo na kuâ. Tongana a bâ so tënë ayeke na li ti lo a yeke kanga lo. Ye oko, kota zo ti da-ngbanga ni atene na Denise so tënë so lo yeke tene la ayeke mû lege ti fâ ngbanga na li ti koli ni. Denise atene: “So mbi doit ti kiri ti sara tënë na ndö ti ngoi so ayeke tâ sioni mingi na yâ ti gigi ti mbi, a yeke mo bâ mo tene mbeni zo azi lê ti kä ti mbi na lo tuku gbâ ti ingo na lê ni.” Ambeni yenga na pekoni, Denise ague na da-ngbanga ti fa ye so asi na lê ti zo so asara si sewa ti lo awara kota vundu. Tënë ti nyen la lo tene? Denise ahunda na juge ni ti sara nzoni bê na koli ni. b Na ngoi so lo hunzi ti sara tënë, juge ni atï na toto. Lo tene: “Na yâ ti ngu 25 kue so mbi sara kua ti juge, lâ oko mbi mä mara ti tënë tongaso ape. Lâ oko mbi mä sewa ti azo so asara sioni na ala avoro yanga na mbi ti sara nzoni bê na zo so asara sioni na ala ape. Lâ oko mbi mä tënë ti ndoye nga na ti pardon na yanga ti ala ape.”
3. Nyen la apusu lani Denise ti pardonné koli so?
3 Nyen la a-aidé lani Denise ti pardonné koli so? Lo gbu lani li na ndö ti pardon ti Jéhovah (Mi. 7:18). Tongana e kiri singila mingi na Jéhovah so apardonné e, a yeke pusu e ti pardonné azo.
4. Nyen la Jéhovah aye ti tene e sara? (aÉphésien 4:32).
4 Jéhovah aye ti tene e pardonné azo gï tongana ti so lo pardonné e na bê ti lo kue. (Diko aÉphésien 4:32.) Lo yeke ku ti tene e duti nduru ti pardonné azo so ason bê ti e (Ps. 86:5; Luc 17:4). Na yâ ti article so, e yeke bâ aye ota so ayeke aidé e ti pardonné zo mingi.
TONGANA BÊ TI MO ASON, SARA SANKA NI APE
5. Ti gue oko na aProverbe 12:18, tongana mbeni zo ason bê ti e apeut ti sara e tongana nyen?
5 Bê ti e apeut ti son mingi ndali ti tënë so mbeni zo atene wala mbeni ye so lo sara, mbilimbili tongana zo ni ayeke kota kamarade ti e wala fami ti e (Ps. 55:12-14). Na ambeni ngoi, ye ni apeut ti son e mo bâ mo tene a kpo e na zembe. (Diko aProverbe 12:18.) E peut ti gi ti sara sanka ti bê ti e so ason. Me sarango tongaso apeut ti duti tongana ti so a kpo e na zembe na e zia zembe ni angbâ na lê ti kä ni. Legeoko nga, kä so ayeke na bê ti e alingbi pëpe ti mü tongana e sara sanka ni.
6. Tongana mbeni zo ason bê ti e, e peut ti sara ye tongana nyen?
6 Tongana mbeni zo ason bê ti e, kozo ye so e yeke sara ka ayeke ti sara ngonzo. Bible atene so e peut ti sara ngonzo. Ye oko, Bible agboto mê ti e ti zia ape si ngonzo ahon ndö ti e (Ps. 4:4; aÉph. 4:26). Ngbanga ti nyen? Ngbanga ti so, mingi ni, ye so ayeke na bê ti e ayeke pusu e ti sara ye. A yeke ngangu ti tene ngonzo aga na nzoni ye (Jacq. 1:20). Girisa ape so ngonzo ayeke sara ka zo, me zo la ayeke soro ti ngbâ ti sara ngonzo.
Ngonzo ayeke sara ka zo, me zo la ayeke soro ti ngbâ ti sara ngonzo
7. Ambeni pensé wa la e peut ti wara tongana mbeni zo ason bê ti e?
7 Tongana a sara ye na e na lege ni ape, e peut ti wara ambeni pensé nde. Na tapande, mbeni ita-wali so iri ti lo Anne atene: “Na ngoi so mbi de lani molenge, papa ti mbi adö mama ti mbi azia na lo sara mariage na wali so abata mbi. Mbi bâ so a dö mbi a zia. Na ngoi so ala dü amolenge, mbi bâ so place ti mbi ayeke dä encore ape. Na ngoi so mbi yeke kono, mbi bâ so a ye mbi ape.” Mbeni ita-wali so iri ti lo Georgette afa tënë ti bê ti lo na ngoi so koli ti lo ayeke be-ta-zo na lo ape. Lo tene: “E yeke lani akamarade ngbene ye so e de kete. E sara kua ti pionnier legeoko. Bê ti mbi ason mingi.” Mbeni ita-wali so iri ti lo Naomi atene: “Mbi pensé lâ oko ape so koli ti mbi ayeke son bê ti mbi. Tongaso, na ngoi so lo tene na mbi so lo yeke bâ porno na hondengo ni, mbi bâ so lo handa mbi nga lo kä mbi.”
8. (a) Ambeni raison wa la ndali ni a yeke nzoni e pardonné azo? (b) Anzoni ye wa la e yeke wara tongana e pardonné azo? (Bâ encadré “ Ka tongana mbeni zo asara mbeni ye na e so ayengi e ngangu?”)
8 E lingbi ape ti kanga lege na azo ti tene mbeni tënë wala ti sara mbeni ye na e, me e peut ti soro ye so e yeke sara na devant ti ye so azo asara na e. Mingi ni, nzoni ye ti sara ayeke ti pardonné azo ni. Ngbanga ti nyen? Ngbanga ti so e ye Jéhovah na lo ye ti tene e pardonné azo. Tongana e ngbâ ti sara ngonzo nga e pardonné azo ape, e peut ti sara mbeni ye ti buba nga e peut ti sara sioni na e wani (aProv. 14:17, 29, 30). Bâ tapande ti Ita-wali Christine. Lo tene: “Tongana bê ti mbi ason, mbi yeke he ngia mingi ape. Mbi yeke te nzoni kobe ape. Mbi yeke lango nzoni ape nga a yeke ngangu na mbi ti hon ndö ti ngonzo ti mbi; ye so asara si mbi yeke sara ye na koli ti mbi nga na ambeni zo nzoni ape.”
9. Ngbanga ti nyen la a yeke nzoni e bata ngonzo na bê ape?
9 Même tongana zo so ason bê ti e ahunda pardon ape, e peut ti sara si ye so lo sara aga na e kpale mingi ape. Na lege wa? Georgette, so e sara tënë ti lo fade, atene: “A mû lani ngoi, me mbi zia ti sara ngonzo na terê ti ngbene koli ti mbi. A sara si mbi wara tâ siriri.” Tongana e bata ngonzo na bê ti e ape, ngonzo ayeke sara sioni na e ape. E yeke sara nga nzoni na e, so ti tene, e yeke zia ti pensé na ndö ti tënë ni nga e yeke kiri ti duti na ngia (aProv. 11:17). Ka tongana e hinga so bê ti e ason, me e yeke nduru ti pardonné zo ni ape?
AYE TI SARA TI ZIA LEGE TI NGONZO
10. Ngbanga ti nyen la e bezoin ngoi ti zia ti sara ngonzo? (Bâ nga afoto.)
10 Nyen la apeut ti aidé mo ti zia ti sara ngonzo? Mbeni ye ni ayeke ti zia ngoi ahon. Tongana mbeni zo awara kota kä si a yeke soigné ni, ngoi ayeke hon si kä ni amü. Legeoko nga, ti pardonné zo na bê kue apeut ti mû ngoi.—Zo-ti. 3:3; 1 Pi. 1:22.
Tongana e wara mbeni kä, e bezoin ti soigné ni nzoni nga ngoi ayeke hon si a mü, a yeke nga tongaso tongana mbeni zo ason bê ti e (Bâ paragraphe 10)
11. Tongana nyen la sambela apeut ti aidé mo ti pardonné zo?
11 Sambela Jéhovah, hunda lo ti aidé mo ti pardonné azo. c Anne, so e sara tënë ti lo fade, afa tongana nyen la sambela a-aidé lo. Lo tene: “Mbi hunda lani na Jéhovah ti pardonné e oko oko kue na yâ ti sewa ni ndali ti tënë so e tene wala ye so e sara so ayeke na lege ni ape. Na pekoni, mbi tokua lettre na papa ti mbi nga na fini wali ti lo, mbi tene na ala so mbi pardonné ala awe.” Anne atene so a yeke lani kete ye ape ti sara ni. Me lo tene: “Mbi yeke na beku so, so mbi gi ti mû tapande ti pardon ti Jéhovah ayeke pusu papa ti mbi na wali ti lo ti manda ye mingi na ndö ti lo.”
12. Ngbanga ti nyen la a yeke nzoni e sara confiance na Jéhovah me na atënë ti bê ti e ape? (aProverbe 3:5, 6).
12 Sara confiance na Jéhovah me na atënë ti bê ti mo ape. (Diko aProverbe 3:5, 6.) Jéhovah ahinga lakue ye so ayeke nzoni mingi ndali ti e (És. 55:8, 9). Lo yeke hunda nga na e lâ oko ape ti sara mbeni ye so ayeke sara sioni na e. Tongaso, tongana lo wa e ti pardonné azo, e peut ti hinga biani so sarango ni ayeke ga na nzoni ye na e (Ps. 40:4; És. 48:17, 18). Me tongana e sara confiance na atënë ti bê ti e, e peut lâ oko ti pardonné zo ape (aProv. 14:12; Jér. 17:9). Naomi, so e sara tënë ti lo fade, atene: “Na tongo nda ni, mbi bâ lani so mbi doit pëpe ti pardonné koli ti mbi so ayeke bâ porno. Mbi sara lani mbeto so lo yeke kiri ti sara sioni na mbi wala lo yeke girisa so ye so lo sara ason mbi mingi. Na mbi tene so Jéhovah acomprendre mbi. Me mbi ga ti bâ so, so Jéhovah acomprendre mbi aye ti tene ape so lo yeda na apensé ti mbi ni. Lo hinga atënë ti bê ti mbi nga a mû ngoi ti tene bê ti mbi adë, me lo ye nga ti tene mbi pardonné koli ti mbi.” d
GI TI DUTI NA NZONI BANGO NDO
13. Ti gue oko na aRomain 12:18-21, nyen la e bezoin ti sara?
13 Tongana e pardonné mbeni zo so ason bê ti e ngangu, e ye pëpe ti sara tënë na ndö ti ye so apassé, me a ngbâ gï ge ape. Tongana zo ni ayeke mba ti e Chrétien, ye so e yeke gi ayeke ti kiri ti duti na siriri na lo (Mat. 5:23, 24). Ahon ti sara ngonzo, a yeke nzoni e sara ye na nzoni bê nga e pardonné zo ni. (Diko aRomain 12:18-21; 1 Pi. 3:9.) Nyen la apeut ti aidé e ti sara ni?
14. Nyen la a yeke nzoni e gi ti sara? Ngbanga ti nyen?
14 A yeke nzoni e gi ti bâ zo so ason bê ti e tongana ti so Jéhovah abâ lo. Jéhovah asoro ti bâ gï anzoni ye so azo asara (2 Chron. 16:9; Ps. 130:3). Mingi ni, ye so e yeke gi na mbage ti azo e yeke bâ ni, atâa a yeke nzoni ni wala sioni ni. Tongana e yeke gi ti bâ gï anzoni sarango ye ti azo, a yeke duti ngangu na e ape ti pardonné ala. Na tapande, Ita-koli Jarrod atene: “A yeke ngangu na mbi ape ti pardonné mbeni ita tongana mbi gbu li na ndö ti gbâ ti anzoni ye so mbi ye na mbage ti lo ahon ti pensé na ndö ti faute so lo sara so ason bê ti mbi.”
15. Ngbanga ti nyen la a peut ti duti nzoni ti tene na zo so ason bê ti mo so mo pardonné lo awe?
15 Mbeni ye so ayeke kota ye ti pensé ti sara ni ayeke ti tene na zo so ason bê ti mo so mo pardonné lo awe. Ngbanga ti nyen? Mä tënë so Naomi, so e sara tënë ti lo fade, atene: “Koli ti mbi ahunda lani mbi, atene: ‘Mo pardonné mbi awe?’ Na ngoi so mbi zi yanga ti mbi ti tene na lo ‘mbi pardonné mo,’ mbi peut ti tene ni ape. Mbi ga ti bâ so ade mbi pardonné lo na yâ ti bê ti mbi ape. Ambeni ngoi na pekoni, mbi wara lege ti tene na lo kpengba tënë so: ‘Mbi pardonné mo awe.’ Na ngoi so mbi pardonné koli ti mbi, ngu ti lê ti lo asigi. Li ti mbi akpe ti bâ tongana nyen la bê ti lo adë nga mbi wara siriri ti bê. Na peko ti ye so, mbi kiri mbi sara confiance na lo nga e kiri e ga akota kamarade.”
16. Nyen la mo manda na ndö ti pardon?
16 Jéhovah aye ti tene e pardonné azo (aCol. 3:13). Atâa so kue, a peut ti duti ngangu na e ti pardonné amba ti e. Me tongana ngonzo asara e, zia e sara sanka ni ape nga e sara effort ti hon ndö ni; tongana e sara tongaso e peut ti pardonné amba ti e. Sarango tongaso apeut ti sara si e kiri e duti na nzoni bango ndo.—Bâ encadré “ Aye ota ti sara ti pardonné azo.”
GBU LI NA NDÖ TI ANZONI YE TI PEKO TI PARDON
17. Tongana e pardonné zo, nzoni ti nyen la e yeke wara na pekoni?
17 E yeke na araison mingi ti pardonné zo. Zia e bâ ambeni. Kozoni, e yeke sara ye tongana Babâ ti e Jéhovah so ayeke sara nzoni bê na zo nga e yeke zia ngia na bê ti lo (Luc 6:36). Use ni, e yeke fa so e kiri singila mingi na Jéhovah so apardonné e (Mat. 6:12). Ota ni, e yeke duti na nzoni seni nga songo ti e na azo ayeke ngbâ ti kpengba.
18-19. Tongana e pardonné mbeni zo, ye ti peko ni apeut ti duti nyen?
18 Tongana e pardonné azo, anzoni ye so e ku terê ti e na ni ape apeut ti si. Na tapande, bâ ye so asi na Denise, so e sara tënë ti lo fade. Koli so apika lani ala so aleke ti fâ terê ti lo na peko ti ngbanga ni, me Denise ahinga ni ape. Ye oko, so Denise apardonné lo andu bê ti lo mingi asara si lo yeda ti tene aTémoin ti Jéhovah amanda Bible na lo.
19 E peut ti bâ so ti pardonné mbeni zo ayeke mbeni ye so ayeke ngangu mingi na e ti sara, me a peut nga ti duti mbeni ye so ayeke ga na anzoni ye mingi (Mat. 5:7). Tongaso, zia e sara ye kue so e peut ti sara ti pardonné zo tongana Jéhovah.
BIA 125 Ngia na ala so ayeke sara nzoni bê!
a A changé ambeni iri ni.
b Tongana mara ti ye tongaso asi, Chrétien oko oko la adoit ti mû desizion na ndö ti ye so lo yeke sara.
c Bâ na ndö ti jw.org vidéo ti ambeni bia nde “Pardonnons-nous les uns aux autres,” “Aide-moi à pardonner” nga na “E kiri akamarade.”
d Atâa so bango porno ayeke sioni nga ayeke son bê ti wali wala koli so asara mariage, a yeke pëpe mbeni raison so Bible ayeda na ni so ndali ni zo apeut ti sara divorce.
