1-2. Akpale wa la awakua ti Jéhovah mingi awara? Akpale so alingbi ti sara nyen na ndö ti ala?

GBU li na ndö ti atapande ota so: A wara na terê ti mbeni ita-koli so ade maseka mbeni kobela so asara si lo yeke fatigué gï fatiguengo. Mbeni ita-koli so asara kua ngangu so ngu ti lo ahon 50 aperdre kua ti lo, lo sara kue ti wara mbeni kua ni, me kue gbä. Mbeni ita-wali mbakoro so ayeke be-ta-zo abâ so lo lingbi ti sara aye mingi ape na yâ ti kua ti Jéhovah tongana ti so lo yeke sara kozo.

² Tongana mo yeke na mbeni mara ti kpale so, peut-être mo yeke bâ so mo yeke ye oko encore ape. Aye so alingbi ti sara si mo yeke na ngia encore ape, mo bâ so mo ne encore ape nga alingbi ti ga na kpale na yâ ti songo ti mo na azo.

3. Satan nga na azo so ayeke sara ye tongana lo abâ fini ti azo tongana nyen?

³ Bango ndo ti azo ti dunia so na ndö ti fini ti zo ayeke tongana ti Satan. Satan asara ye na azo lakue mo bâ mo tene ala yeke ye oko ape. Na sioni bê lo tene na Ève so lo yeke wara liberté tongana lo ke yanga ti Nzapa atâa so Satan ahinga nzoni mingi so ye ti peko ni ayeke kuâ. Satan ayeke lakue na komandema na ndö ti abungbi ti dengo buze, ti poroso nga na ndö ti abungbi ti vorongo nzapa ti wataka ti dunia so. Tongaso, li ti e akpe ape so gbâ ti azo ti dengo buze, ti poroso nga na ti akota zo ti nzapa abâ nga fini ti azo na nene ni ape nga ala ne azo ape.

4. Nyen la e yeke bâ na yâ ti article so?

 ⁴ Ye oko, Jéhovah aye ti lo ti tene e bâ so e ne nga lo yeke mû maboko na e na ngoi so e wara ambeni kpale so alingbi ti sara si e bâ so e yeke ye oko ape (Ps. 73:26; aRom. 12:3). Article so ayeke fa tongana nyen la Jéhovah ayeke mû maboko na e na yâ ti aye so: (1) Na ngoi so terê ti e ason, (2) na ngoi so e yeke na kpale ti nginza nga (3) na ngoi so gango mbakoro asara si e bâ so e lingbi ti sara mbeni nzoni ye na yâ ti kua ti Jéhovah ape. Me zia e bâ kozoni ndani so e lingbi ti duti na confiance so Jéhovah abâ e oko oko kue na nene ni.

5. Nyen la afa na mo so Jéhovah abâ azo na nene ni?

⁵ Atâa so a créé e na fuku ti sese, ngere ti e ayeke kota mingi ahon ngere ti fuku ti sese so zo alingbi ti fû na yâ ti maboko ti lo (Gen. 2:7). Gbu li kete na ndö ti ambeni raison so ndali ni e hinga so Jéhovah abâ e na nene ni. Lo créé azo na ngangu ti duti na asarango ye so lo yeke na ni (Gen. 1:27). So lo sara tongaso, lo sara si e yeke kota mingi ahon tanga ti aye kue so lo créé na ndö ti sese, lo zia e ti bâ lege ti sese nga na anyama.—Ps. 8:4-8.

6. Mbeni ye nde wa la afa na e so Jéhovah abâ azo so ayeke mbilimbili-kue ape na nene ni?

⁶ Même na peko ti so Adam asara siokpari, Jéhovah angbâ ti bâ azo na nene ni. Lo bâ e na nene ni mingi ni la lo mû Jésus, Molenge ti lo so lo ye lo mingi, tongana ye so a futa ti zi e na yâ ti siokpari (1 Jean 4:9, 10). Grâce na ye so a futa ti zi azo, Jéhovah ayeke zingo azo so akui ndali ti siokpari ti Adam, lo yeke zingo “azo ti mbilimbili na azo so ayeke mbilimbili pëpe.” (Kus. 24:15). Bible afa so e yeke ye ti ngangu ngere na lê ti lo atâa terê ti e ason, e yeke wayere wala e yeke mbakoro.—Kus. 10:34, 35.

7. Ndali ti ambeni raison nde wa la awakua ti Jéhovah ayeda so lo bâ ala na nene ni?

⁷ E yeke na ambeni raison nde ti yeda so Jéhovah abâ e na nene ni. Lo gboto e na mbage ti lo nga lo bâ lani fason so e sara na ye na ngoi so e mä nzoni tënë (Jean 6:44). Na ngoi so e komanse ti ga lani nduru na Jéhovah, lo kue lo ga nduru na e (Jacq. 4:8). Jéhovah amû nga ngoi nga lo sara ngangu ti fa ye na e, ye so afa so lo bâ e na nene ni mingi. Lo hinga asarango ye ti e oko oko kue nga lo hinga ye so e lingbi ti sara ti ga nzoni mingi ahon ti kozo. Nga lo yeke fa lege na e ndali ti so lo ye e (aProv. 3:11, 12). Aye so afa polele so Jéhovah abâ e na nene ni.

8. Tongana nyen la atënë so ayeke na Psaume 18:27-29 alingbi ti sara ngangu na ndö ti bango ndo ti e na ndö ti akpale ti e?

⁸ Ambeni zo abâ so Gbia David ayeke lani na anzoni sarango ye ape, me lo hinga lani so Jéhovah aye lo nga ayeke mû lani maboko na lo. So lo hinga ni tongaso asara ngangu na ndö ti bango ndo ti lo na ndö ti ye so asi na lo (2 Sam. 16:5-7). Tongana e yeke na vundu wala e wara akpale, Jéhovah alingbi ti mû maboko na e ti duti na mbeni bango ndo so ayeke nde nga ti hon ndö ti aye kue so akanga lege na e. (Diko Psaume 18:27-29.) Tongana Jéhovah amû maboko na e, mbeni ye apeut ti kanga lege na e ape ti sara na lo na ngia (aRom. 8:31). Zia e bâ fadeso ambilimbili kpale ota so, so na yâ ni a yeke kota ye ti tene e girisa ape so Jéhovah aye e nga lo bâ e na nene ni.

9. Kobela alingbi ti sara si e duti na bango ndo wa na ndö ti e wani?

⁹ Tongana terê ti e ason alingbi ti sara e vundu mingi na asara si e bâ so zo oko abezoin e ape. Peut-être kamene ayeke sara e tongana azo abâ so e lingbi ti sara ambeni ye ape wala e  bezoin mungo maboko ti azo. Même tongana azo ahinga ape so terê ti e ason, peut-être e yeke sara ngangu ti hon ndö ti kamene so asara e ndali ti so e lingbi pëpe ti sara aye so e yeke sara kozo. Na angoi ti vundu tongaso, Jéhovah ayeke kpengba e. Na lege wa?

10. Ti gue oko na aProverbe 12:25, nyen la alingbi ti mû maboko na e na ngoi so terê ti e ason?

¹⁰ Tongana terê ti e ason, mbeni “nzoni tënë” alingbi ti kpengba e. (Diko aProverbe 12:25.) Jéhovah atene na e anzoni tënë na yâ ti Bible so adabe ti e so e yeke ye ti ngangu ngere na lê ti lo atâa terê ti e ason (Ps. 31:19; 41:3). Tongana e diko atënë so, so a sû ni na gbe ti yingo ti Nzapa so, wala même e kiri e diko ni, Jéhovah ayeke mû maboko na e ti hon ndö ti vundu so asara e na ngoi so terê ti e ason.

11. Tongana nyen la Jéhovah amû lani maboko na mbeni ita-koli?

¹¹ Bâ tapande ti Jorge. Na ngoi so Jorge ade lani maseka, lo wara mbeni ngangu kobela so ague na li ni hio nga asara si lo bâ so lo yeke ye oko ape. Jorge atene: “Mbi leke lani terê ti mbi ape ndali ti ye so kobela ni ayeke sara na ndö ti mbi wala ndali ti kamene so asara mbi ngbanga ti kobela ni so agboto lê ti azo na ndö ti mbi. Na ngoi so kobela ni ayeke ga lani sioni sioni, mbi pensé na ndö ti fason so gigi ti mbi ayeke changé. Vundu ahon ndö ti mbi, na mbi voro yanga na Jéhovah ti mû maboko na mbi.” Jéhovah amû lani maboko na lo tongana nyen? Lo tene: “Ndali ti so a yeke lani ngangu na mbi ti zia li ti mbi na ndö ti mbeni ye, a wa mbi ti diko kete wungo ti aversê ti Psaume so afa tongana nyen la Jéhovah abâ lege ti awakua ti lo. Mbi kiri mbi diko aversê so lâ oko oko, na mbi bâ so a dë bê ti mbi. Na nda ni, azo akomanse ti bâ so mbi yeke he ngia ahon ti kozo. Ala tene même so nzoni bango ndo ti mbi akpengba ala. Mbi hinga so Jéhovah  akiri tënë na asambela ti mbi. Lo mû maboko na mbi ti changé fason so mbi bâ na mbi wani. Mbi komanse ti zia li ti mbi na ndö ti atënë so Bible atene na ndö ti fason so lo bâ na mbi atâa so terê ti mbi ason.”

12. Tongana terê ti mo ayeke son, nyen la mo lingbi ti sara ti wara mungo maboko ti Jéhovah?

¹² Tongana terê ti mo ayeke son, duti na confiance so Jéhovah ahinga ye so ayeke si na mo so. Voro yanga na lo ti mû maboko na mo ti duti na nzoni bango ndo na ndö ti ye so asi na mo. Na pekoni, gi atënë ti dengo bê so Jéhovah azia na yâ ti Bible ndali ti mo. Zia li ti mo na ndö ti aversê so afa so Jéhovah abâ awakua ti lo na nene ni mingi. Tongana mo sara ni, mo yeke bâ so Jéhovah asara nzoni na awakua ti lo so ayeke be-ta-zo.—Ps. 84:11.

13. Tongana mbeni mokonzi ti sewa aperdre kua ti lo alingbi ti sara lo tongana nyen?

¹³ Amokonzi ti sewa oko oko kue aye ti mû na azo ti sewa ti ala aye so ala bezoin ni. Me a lingbi ti si so mbeni ita-koli aperdre kua ti lo atâa so lo sara mbeni ye ti sioni ape. Lo sara ngangu kue ti wara mbeni kua, me kue gbä. Ye so alingbi ti sara si lo bâ so lo yeke ye oko ape. Tongana lo zia li ti lo na ndö ti azendo ti Jéhovah alingbi ti mû maboko na lo tongana nyen?

14. Ndali ti araison wa la Jéhovah ayeke sara ye alingbi na azendo ti lo?

¹⁴ Jéhovah ayeke sara ye lakue alingbi na azendo ti lo (Jos. 21:45; 23:14). Lo sara ni ndali ti araison mingi. Mbeni raison ni ayeke so tongana lo sara ni ape nzoni iri ti lo ayeke buba. Jéhovah amû zendo ti bâ lege ti awakua be-ta-zo ti lo, na lo bâ so lo doit ti sara ni (Ps. 31:1-3). Na ndö ni, Jéhovah ahinga so, so e yeke mbage ti sewa ti lo, tongana lo bâ lege ti e ape, vundu ayeke sara e. Lo mû zendo ti mû na e aye so e bezoin ni ti vivre nga na aye so e  bezoin ni ti ngbâ ti sara na lo be-ta-zo, na ye oko ayeke kanga lege na lo ape ti sara ye alingbi na zendo so.—Mat. 6:30-33; 24:45.

15. (a) Kpale wa la akozo Chrétien awara lani? (b) Psaume 37:18, 19 asara si e yeke na confiance na nyen?

¹⁵ Tongana e girisa ape ndani so Jéhovah ayeke sara ye alingbi na azendo ti lo, e lingbi ti duti na confiance so lo yeke mû maboko na e na ngoi so a yeke ngangu na e ti wara nginza so e bezoin ni. Gbu li na ndö ti tapande ti akozo Chrétien. Na ngoi so a sara lani aye ti ngangu mingi na congrégation so ayeke na Jérusalem, ‘adisciple ni kue akangbi kirikiri, gï abazengele la si angbâ.’ (Kus. 8:1). Gbu li na ndö ti kpale ti peko ni: kpale ti nginza. Peut-être aChrétien aperdre lani ada ti ala nga na akua wala abuze ti ala. Ye oko, Jéhovah azia lani ala ape, nga ala perdre ngia ti ala ape (Kus. 8:4; aHéb. 13:5, 6; Jacq. 1:2, 3). Jéhovah amû lani maboko na aChrétien be-ta-zo so, nga lo yeke mû maboko na e.—Diko Psaume 37:18, 19.

16. Nyen la alingbi ti sara si e pensé so Jéhovah abâ na nene ni ape vorongo so e yeke voro na lo?

¹⁶ Na ngoi so e yeke ga mbakoro, peut-être e yeke komanse ti bâ so e lingbi ti sara kua ti Jéhovah mingi ape. Peut-être Gbia David ayeke lani na mara ti gingo bê so na ngoi so lo yeke ga mbakoro (Ps. 71:9). Tongana nyen la Jéhovah alingbi ti mû maboko na e?

17. Nyen la e lingbi ti manda na lege ti ye so asi na ita-wali Jheri?

¹⁷ Gbu li na ndö ti ye so asi na mbeni ita-wali so iri ti lo Jheri. A tisa lo lani na mbeni bungbi so a sara na Da ti Royaume ti fa na aita tongana nyen ti bâ lege ti ada so a leke ni ti sara kua ti Jéhovah dä, me lo ye lani ti gue ape. Lo tene: “Mbi yeke mbakoro, mbi yeke wali-mua nga mbi yeke na mbeni kode so Jéhovah alingbi ti  sara kua na ni ape. Mbi yeke ye oko ape.” Na bï so na ndade ni a yeke sara bungbi ni, lo zi bê ti lo kue na Jéhovah na yâ ti sambela. Na ngoi so lo si na Da ti Royaume na ndade ni, lo ngbâ ti gi bê ti lo wala lo doit ti duti biani dä. Na ngoi ti fango ye ni, mbeni ita-koli so ayeke fa ye ni atene so kota kode so e yeke na ni ayeke ti yeda na bê ti e wani ti tene Jéhovah afa ye na e. Jheri atene: “Mbi tene: ‘Mbi yeke na kode ni so.’ Tongana mbi bâ so Jéhovah ayeke kiri tënë na sambela ti mbi, mbi komanse ti toto. Lo yeke dë lani bê ti mbi so mbi yeke na mbeni ye ti ngangu ngere ti mû na lo nga lo ye ti fa ye na mbi.” Tongana Jheri apensé na ye so asi so, lo tene: “Na ngoi so mbi gue na bungbi ni, mbeto asara mbi, mbi découragé nga vundu asara mbi. Na ngoi so bungbi ni ahunzi, mbi yeke na confiance, mbi kpengba nga mbi bâ so a bâ mbi na nene ni.”

18. Tongana nyen la Bible afa so Jéhovah angbâ ti bâ na nene ni vorongo so e yeke voro na lo na ngoi so e yeke ga mbakoro?

¹⁸ Na ngoi so e yeke ga mbakoro, kite ayeke dä ape so Jéhovah ayeke lakue na kua ti mû na e (Ps. 92:12-15). Jésus afa lani so atâa e lingbi ti sara aye mingi ape wala e bâ so ngangu so e sara ayeke mingi ape, Jéhovah abâ na nene ni ye kue so e lingbi ti sara na yâ ti kua ti lo (Luc 21:2-4). Tongaso, zia li ti mo na ndö ti aye so mo peut ti sara. Na tapande, mo lingbi ti fa tënë na ndö ti Jéhovah, ti sambela ndali ti aita ti mo nga ti wa aita ti ngbâ be-ta-zo. A yeke pëpe ndali ti aye so mo lingbi ti sara la Jéhovah abâ mo tongana mba ti lo wakua, me a yeke ndali ti so mo yeda na bê ti mo wani ti mä yanga ti lo.—1 aCor. 3:5-9.

19. A-Romain 8:38, 39 asara si e hinga nyen?

¹⁹ E kiri singila mingi so e yeke voro Jéhovah, mbeni Nzapa so abâ biani na nene ni azo so ayeke sara na lo. Lo créé e ti sara ye so bê ti lo aye, na a yeke tâ vorongo Nzapa la asara si e yeke na ngia (Apoc. 4:11). Atâa so peut-être dunia so abâ so e yeke ye oko ape, Jéhovah abâ e tongaso ape (aHéb. 11:16, 38). Tongana e découragé ndali ti so terê ti e ason, e yeke na kpale ti nginza wala e yeke mbakoro, zia e girisa ape so ye oko alingbi ti kangbi e pëpe na ndoye ti Babâ ti e ti yayu.—Diko aRomain 8:38, 39.