1-2. Nyen la apika bê mingi so asi lani na lango ti Pentecôte ti ngu 33?

MBENI groupe ti adisciple 120 tongaso abungbi na yâ ti mbeni kubu ti mbeni da na nduzu. A yeke lani na dimanche na ndapre na Jérusalem, lango ti Pentecôte ti ngu 33 (Kus. 1:13-15; 2:1). Ambeni lango kozo, Jésus amû lani yanga na adisciple ti lo ti ngbâ na Jérusalem ndali ti so ala yeke wara mbeni matabisi so ayeke kota mingi (Kus. 1:4, 5). Nyen la asi na pekoni?

² “Mo ye ti bâ, mbeni toto ti ye tongana ti pupu so aya ngangu alondo na yayu” adescend. Toto ti ye so amû yâ ti da ni kue. Na pekoni, “aye tongana akete wâ” aga aduti na li ti adisciple, na “ala kue asi na yingo vulu”. (Kus. 2:2-4). Jéhovah atuku yingo vulu ti lo na ndö ti adisciple so na mbeni lege so apika bê mingi (Kus. 1:8). Ala ga akozo zo so a soro ala na lege ti yingo vulu * na so a mû na ala beku ti komande legeoko na Jésus na yayu.

3. Ngbanga ti nyen la azo so ayeke lani dä na lango ti Pentecôte ayeke na kite ape so a soro ala na lege ti yingo vulu?

³ Tongana mo yeke lani oko ti adisciple so abungbi na yâ ti kubu so ayeke na nduzu na lango ni so, mo yeke girisa ni lâ oko ape. Mbeni ye so ayeke tongana kete wâ aga aduti na ndö ti li  ti mo, na mo komanse ti sara tënë na ambeni yanga ti kodro nde (Kus. 2:5-12). Mo yeke na kite oko ape so a soro mo na lege ti yingo vulu. Me azo kue so a soro ala na lege ti yingo vulu, eskê a yeke soro ala na mbeni lege so apika bê mingi nga na même fason? Ên-ën. E hinga tongana nyen?

4. Eskê a soro lani akozo Chrétien ti gue na yayu kue na même fason? Fa ndani so mo tene tongaso.

⁴ Zia e gbu li na ndö ti ngoi so a lingbi ti soro mbeni zo ti gue na yayu. A yeke pëpe gï groupe ti aChrétien 120 tongaso la a soro ala na lege ti yingo vulu na Pentecôte ti ngu 33. Na pekoni na yâ ti lango ni so, ambeni zo 3 000 tongaso awara nga yingo vulu so Jésus amû zendo ni. A soro ala na ngoi ti batême ti ala (Kus. 2:37, 38, 41). Me na yâ ti angu so aga na pekoni, a soro aChrétien ti gue na yayu kue gï na ngoi ti batême ti ala ape. A soro azo ti Samarie ti gue na yayu ambeni ngoi na peko ti batême ti ala (Kus. 8:14-17). Nga fason so a soro na Corneille na azo ti da ti lo ti gue na yayu ayeke tâ nde mingi. A soro ala même kozo na batême ti ala.—Kus. 10:44-48.

5. Ti gue oko na 2 aCorinthien 1:21, 22, nyen la ayeke passé tongana a soro mbeni zo na lege ti yingo vulu?

⁵ Zia e bâ nga ye so ayeke si na ngoi so a soro mbeni zo na lege ti yingo vulu ti gue na yayu. Na ngoi so Jéhovah asoro ambeni zo pan, a lingbi ti duti ngangu na ala ti yeda na ni. Ala lingbi ti hunda terê ti ala: ‘Ngbanga ti nyen la Nzapa asoro mbi?’ Peut-être ambeni ayeke hunda terê ti ala tongaso ape. Atâa ye ni ayeke so wa, bazengele Paul afa ye so ayeke si na azo kue so a soro ala ti gue na yayu, lo tene: “Na lege ti lo nga, na peko ti so ala mä na bê awe, a kpo mbeni nzoroko na terê ti ala, * yingo vulu so a mû zendo ni ândö; a yeke yingo vulu so la si afa na e kozo atene e yeke wara ande héritage ti e ni biani.” (aÉph. 1:13, 14). Tongaso, Jéhovah asara kua na yingo vulu ti lo ti fa na aChrétien so polele so lo soro ala. Na lege so, yingo vulu ayeke “ye so afa atene ye so ayeke ga ayeke si biani” [wala mbeni zendo],  lo mû ni na ala ti fa na ala biani so, na yâ ti angoi so ayeke ga, ala yeke duti ande na fini ti lakue lakue na yayu me pëpe na ndö ti sese.—Diko 2 aCorinthien 1:21, 22.

6. Nyen la a lingbi mbeni Chrétien so a soro lo ti gue na yayu asara ti wara futa ti lo na yayu?

⁶ Tongana a soro mbeni zo ti gue na yayu, eskê a ye ti tene so nyen na nyen lo yeke gue na yayu? Ên-ën. Lo hinga biani so a soro lo ti gue na yayu. Ye oko, a lingbi lo girisa wango so ape: “Aita, ala sara ngangu kue ti sara si iringo so a iri na ala nga sorongo so a soro na ala aduti tâ ye biani; ndali ti so tongana ala ngbâ ti sara aye so, ala yeke tï ande lâ oko pëpe.” (2 Pi. 1:10). Tongaso, même tongana a soro mbeni Chrétien na lege ti yingo vulu, wala a iri lo ti gue na yayu, lo yeke wara futa ti lo gï tongana lo ngbâ be-ta-zo.—aPhil. 3:12-14; aHéb. 3:1; Apoc. 2:10.

7. Azo so a soro ala ti gue na yayu ahinga tongana nyen so a soro ala?

⁷ Me zo ayeke hinga tongana nyen so a soro lo ti gue na yayu? Kiringo tënë ni asigi polele na ya ti atënë so Paul atene na aChrétien ti Rome so “a iri ala ti duti azo so ayeke nzoni-kue”. Lo tene na ala, lo tene: “Ala wara lani pëpe mbeni yingo ti dutingo ngbâa so asara si ala kiri aduti na mbeto, me ala wara lani mbeni yingo so Nzapa amû ti mû ala ti ga amolenge ti lo. Na lege ti yingo so, e dekongo, e tene: ‘Abba, Babâ!’ Yingo wani legeoko na yingo ti e afa so e yeke amolenge ti Nzapa.” (aRom. 1:7; 8:15, 16). Tongaso, na lege ti yingo vulu ti Nzapa, lo fa polele na azo so a soro ala ti gue na yayu so lo soro ala ti gue kâ.—1 aThes. 2:12.

8. Tongana nyen la 1 Jean 2:20, 27 afa so aChrétien so a soro ala ti gue na yayu ayeke pëpe na bezoin ti tene mbeni zo atene na ala so a soro ala?

⁸ Jéhovah asara si azo so lo soro ala ti gue na yayu ayeke na kite oko ape na yâ ti li ti ala nga na yâ ti bê ti ala. (Diko 1 Jean 2:20, 27.) Biani, aChrétien so a soro ala ti gue na yayu abezoin ti tene Jéhovah afa ye na ala na lege ti congrégation tongana tanga ti aita kue. Me ala yeke pëpe na bezoin ti tene mbeni zo atene na ala so a soro ala ti gue na yayu. Jéhovah asara kua na yingo vulu ti lo, so ayeke ngangu ahon angangu kue ti dunia, ti fa na ala polele so lo soro ala ti gue na yayu.

9. Tongana ti so a fa na aÉphésien 1:18, na ngoi so a soro mbeni zo ti gue na yayu, changement wa la ayeke si na lo?

⁹ A yeke ngangu na mingi ti awakua ti Jéhovah laso ti hinga ye so asi na mbeni zo na ngoi so Nzapa asoro lo ti gue na yayu. A yeke na lege ni ndali ti so a soro ala ape. Nzapa acréé azo ti duti na fini ti lakue lakue na ndö ti sese, me pëpe na yayu (Gen. 1:28; Ps. 37:29). Me Jéhovah asoro ambeni zo ti duti na fini na yayu. Tongaso, na ngoi so lo soro ala, lo changé beku ti ala nga na fason so ala yeke pensé na ni kue tongaso si ala ku kungo ti vivre na yayu.—Diko aÉphésien 1:18.

10. Tënë “a kiri a dü” zo aye ti tene nyen? (Bâ nga kete tënë na gbe ni.)

¹⁰ Na ngoi so a soro aChrétien na lege ti yingo vulu, “a kiri a dü” ala, wala “yayu la adü” ala. * Jésus afa nga lani so a yeke ngangu ti tene mbeni zo so a soro lo ti gue na yayu afa na mbeni zo so a soro lo ape tongana nyen la lo hinga so “a kiri a dü lo,” wala tongana nyen  la “yingo adü lo.”—Jean 3:3-8; kete tënë na gbe ni.

11. Fa tongana nyen la fason so mbeni zo ayeke pensé na ni ayeke changé na ngoi so a soro lo ti gue na yayu.

¹¹ Tongana nyen la fason so aChrétien ayeke pensé na ni ayeke changé na ngoi so a soro ala ti gue na yayu? Kozo ti tene Jéhovah asoro aChrétien so ti gue na yayu, beku ti duti na fini ti lakue lakue na ndö ti sese anzere na ala mingi. Ala yeke ku lani kungo ngoi so Jéhovah ayeke zi asioni ye kue nga lo yeke sara si sese aga mbeni paradis. Peut-être ala yeke pensé lani na ndö ti yambango mbeni zo ti sewa ti ala wala mbeni kamarade ti ala so akui. Me na peko ti so a soro ala ti gue na yayu, pensé ti ala achangé. Ngbanga ti nyen? Ala komanse ape ti pensé so ti duti na fini ti lakue lakue na ndö ti sese anzere na ala encore ape. Pensé ti ala achangé ape ndali ti so vundu asara ala wala ala bâ pasi mingi. Gï hio tongaso ala bâ ape so dutingo na fini ti lakue lakue na ndö ti sese ayeke fatigué zo. Me Jéhovah asara kua na yingo vulu ti lo ti changé fason so ala pensé na ni nga na beku so ala ye ni mingi.

12. Ti gue oko na 1 Pierre 1:3, 4, beku ti aChrétien so a soro ala ti gue na yayu asara ala tongana nyen?

¹² Mbeni zo so a soro lo ti gue na yayu alingbi ti bâ so lo kpa ape ti wara kota pasa so. Me lo yeke na kite oko ape so Jéhovah asoro lo. Tongana lo yeke gbu li na ndö ti beku ti lo ti dutingo na fini na yayu, lo yeke na ngia mingi nga lo kiri singila mingi ndali ni.—Diko 1 Pierre 1:3, 4.

13. A-Chrétien so a soro ala ti gue na yayu abâ dutingo na fini na ndö ti sese tongana nyen?

¹³ Tongaso, ye so aye ti tene so aChrétien so a soro ala ti gue na yayu aye ti kui? Bazengele Paul akiri tënë na hundango ndo so. Lo haka terê ti ala na tente na lo tene: “Biani, e so e yeke na yâ ti tente so, e yeke dema, na ye ahon ndö ti e awe; ndali ti so e ye pëpe ti zi da ni so na terê ti e, me e ye ti yü mbeni da ni so, si fini amene ye so ayeke kui kuingo.” (2 aCor. 5:4). Ti duti na fini na ndö ti sese afatigué aChrétien so ape, nga ala ye pëpe ti kui hio. Me a nzere na ala ti duti na fini nga ala ye ti sara na Jéhovah lâ oko oko na terê ti azo ti sewa ti ala nga na akamarade ti ala. Ye oko, atâa nyen la ala yeke sara, ala yeke pensé lakue na pendere beku ti kekereke so ala yeke na ni.—1 aCor. 15:53; 2 Pi. 1:4; 1 Jean 3:2, 3; Apoc. 20:6.

14. Aye wa la afa pëpe so a soro mbeni zo na lege ti yingo vulu?

¹⁴ Peut-être mo yeke hunda terê ti mo wala a soro mo na lege ti yingo vulu. Tongana a yeke tongaso, gbu li na ndö ti akota hundango ndo so: Mo ye mingi ti sara ye so bê ti Jéhovah aye? Mo bâ so mo yapu mingi na kua ti fango tënë? Mo ye mingi ti manda Bible nga ti hinga nda ti “aye ti Nzapa so ndani alï mingi”? (1 aCor. 2:10). Mo bâ so Jéhovah asara si mo wara apendere ye ti nzoni na yâ ti kua ti fango tënë? Mo bâ so mo yeke na kota kua ti mû maboko na azo ti hinga ye na ndö ti Nzapa? Mo bâ ambeni ye so afa na mo so Jéhovah amû maboko na mo na yâ ti aye mingi na yâ ti fini ti mo? Tongana mo kiri tënë EN na ahundango ndo so, a ye ti fa so a iri mo fadeso awe ti gue na yayu? Ên-ën, a yeke tongaso ape. Ngbanga ti nyen? Ngbanga ti so awakua ti Nzapa kue alingbi ti pensé tongaso, atâa a soro ala ti gue na yayu wala pëpe. Nga, na lege ti yingo vulu ti Jéhovah, lo lingbi ti mû maboko na awakua ti lo kue ti sara aye so, atâa beku ti ala ayeke so wa. Me tongana mo yeke hunda terê ti mo wala a soro mo na lege ti yingo vulu, so mo yeke hunda terê ti mo so afa so a  soro mo ti gue na yayu ape. Azo so Jéhovah airi ala ti gue na yayu ayeke hunda terê ti ala hundango ape. Ala hinga ni.

15. E hinga tongana nyen so a yeke pëpe azo kue so awara yingo ti Nzapa la a soro ala ti gue na yayu?

¹⁵ Mo yeke wara na yâ ti Bible gbâ ti atapande ti azo ti mabe so awara lani yingo vulu; me ala yeke lani na beku ti gue na yayu ape. Yingo vulu afa lani lege na David (1 Sam. 16:13). Yingo vulu amû lani maboko na lo ti mä yâ ti aye so ndani alï mingi na ndö ti Jéhovah nga a fa lege na lo ti sû ambeni mbage ti Bible (Marc 12:36). Atâa so kue, bazengele Pierre atene so David “amonté na yayu pëpe”. (Kus. 2:34). Jean Baptiste ‘asi lani singo na yingo vulu’. (Luc 1:13-16). Jésus atene lani so mbeni zo so ayeke kota ahon Jean ayeke dä ape, me na pekoni lo tene so Jean ayeke duti na yâ ti Royaume ti yayu ape (Mat. 11:10, 11). Jéhovah asara lani kua na yingo vulu ti lo ti mû na akoli so ngangu ti sara aye so apika bê mingi, me lo soro ala na lege ti yingo vulu so ti duti na fini na yayu ape. So aye ti fa so azo so a soro ala ti komande na yayu ayeke be-ta-zo mingi ahon ala? Ên-ën. A ye gï ti fa so Jéhovah ayeke kiri na ala na fini na yâ ti Paradis na ndö ti sese.—Jean 5:28, 29; Kus. 24:15.

16. Futa wa la mingi ti awakua ti Nzapa ayeke ku ni laso kungo?

¹⁶ Gbâ ti awakua ti Nzapa so ayeke na sese laso ayeke na beku ti duti na fini na yayu ape. Legeoko tongana ti Abraham, Sara, David, Jean Baptiste nga na akoli na awali mingi ti ândö, ala yeke ku kungo ti duti na fini na ndö ti sese na gbe ti Royaume ti Nzapa.—aHéb. 11:10.

17. Ahundango ndo wa la e yeke kiri tënë na ni na yâ ti article ti peko?

¹⁷ So ambeni Chrétien so a soro ala ti gue na yayu angbâ na popo ti e laso, ambeni hundango ndo alondo (Apoc. 12:17). Na tapande, a lingbi azo so a soro ala ti gue na yayu abâ terê ti ala tongana nyen? Tongana mbeni zo na yâ ti congrégation ti mo akomanse ti te mapa na ti nyon vin na ngoi ti Dango bê na kuâ ti Christ, a lingbi mo sara ye na mbage ti lo tongana nyen? Ka tongana wungo ti azo so atene a soro ala ti gue na yayu angbâ ti gue na li ni, a lingbi mo gi bê ti mo? E yeke kiri tënë na ahundango ndo so na yâ ti article ti peko.