1. Mbeni diskur so a sara na ngoi ti mbeni kota bungbi na ngu 1935 asara nyen na ndö ti mbeni maseka-koli?

MBENI sewa ti aWamandango Bible ayeke lani dä. A-Wamandango Bible ayeke iri ti aTémoin ti Jéhovah ti ândö. Na yâ ti sewa ni, mo yeke wara amolenge-koli ota na amolenge-wali use. Babâ na mama ti ala afa na ala ti sara na Jéhovah Nzapa nga ti mû tapande ti Jésus Christ. Mbeni molenge ti ala ti koli ni ayeke lani na ngu 18 na ngoi so lo wara batême na ngu 1926. Legeoko tongana tanga ti aWamandango Bible kue ti ngoi ni kâ, maseka-koli so ayeke be-ta-zo so ayeke te lani mapa nga ayeke nyon vin ngu oko oko na ngoi ti Kobe ti Seigneur. Ye oko, pensé ti lo na ndö ti beku ti lo achangé na ngoi so lo mä kpengba diskur so li ni ayeke “Azo mingi mingi.” Joseph Rutherford amû lani diskur so na ngu 1935 na mbeni kota bungbi so a sara ni na Washington, D.C., na États-Unis. Nyen la a fa lani na ngoi ti kota bungbi so?

2. Pendere tâ tënë wa la Ita Rutherford afa lani na yâ ti diskur ti lo?

² Na yâ ti diskur ti Ita Rutherford, lo fa azo so ayeke “azo mingi mingi,” so a sara tënë ti ala na Apocalypse 7:9. Juska ti si na ngoi ni so, aWamandango Bible apensé lani so azo mingi mingi ayeke use groupe ti azo so ayeke gue na yayu me so ayeke be-ta-zo kue ape. Ita Rutherford asara kua na Bible ti fa ndani so azo mingi mingi ayeke pëpe azo so a soro ala ti duti na fini na yayu, me ala yeke ambeni taba ti Christ * so ayeke  sö kuâ ande na ngoi ti “kota ye ti vundu” ti duti na fini lakue lakue na ndö ti sese (Apoc. 7:14). Jésus atene: “Mbi yeke na ambeni taba so ayeke ti gbagba so pëpe. Ala nga kue, a lingbi mbi ga na ala na yâ ni; ala yeke mä go ti mbi, na ala yeke ga kundu oko ti ataba na gbe ti berger oko.” (Jean 10:16). Ambeni taba, so ayeke aTémoin ti Jéhovah so ayeke be-ta-zo, ayeke na beku ti duti na fini lakue lakue na yâ ti Paradis na ndö ti sese (Mat. 25:31-33, 46). Zia e bâ tongana nyen la fini mango yâ ti tâ tënë ti Bible so achangé lani fini ti azo ti Jéhovah mingi, so na popo ni mo yeke wara ita-koli so ayeke na ngu 18 so.—Ps. 97:11; aProv. 4:18.

3-4. Na ngoi ti kota bungbi ti ngu 1935, nyen la azo saki mingi ahinga na ndö ti beku ti ala? Ngbanga ti nyen?

³ Azo so ague na kota bungbi so ayeke lani na ngia mingi na ngoi so wamungo diskur ni ahunda ala, atene: “Pardon, azo kue so ayeke na beku ti duti na fini lakue lakue na ndö ti sese apeut ti luti na nduzu?” Mbeni ita-koli so ague lani na kota bungbi so atene so lo bâ lani so wungo ti azo so aluti na nduzu ahon ndambo ti wungo ti azo so ayeke dä. Na pekoni, Ita Rutherford atene: “Bâ! Azo mingi mingi!” Na pekoni, azo kue adekongo na ngia. Azo so aluti na nduzu aga ti bâ so a soro ala ti gue na yayu ape. Ala hinga lani so Nzapa asoro ala ape na lege ti yingo ti lo. Na ndade ni, azo 840 awara batême na kota bungbi so, mingi ti ala ayeke lani ambeni taba.

⁴ Na peko ti diskur so, maseka-koli so e sara tënë ti lo fade nga na azo saki mingi azia ti te mapa na ti nyon vin na ngoi ti Kobe ti Seigneur. Mbeni ita-koli asara terê ti lo kete, lo fa apensé ti lo so ague oko na ti aita mingi, lo tene: “Ndangba ngoi so mbi te mapa na mbi nyon vin ti Mémorial ayeke na ngu 1935. Mbi ga lani ti bâ so Jéhovah asoro mbi pëpe na lege ti yingo vulu ti lo ti gue na yayu, me mbi yeke na beku ti duti na fini na ndö ti sese na ti mû maboko ti sara si a ga paradis.” (aRom. 8:16, 17; 2 aCor. 1:21, 22). Ngbene ye na ngoi ni so ti ga na ni, wungo ti azo mingi mingi angbâ ti gue na li ni nga ala yeke sara kua maboko na maboko na tanga ti azo so a soro ala ti gue na yayu so angbâ na sese.

5. Jéhovah abâ azo so azia lege ti tengo mapa na nyongo vin ti Mémorial tongana nyen?

⁵ Tongana nyen la Jéhovah abâ azo so azia lege ti tengo mapa na nyongo vin ti Mémorial na peko ti ngu 1935? Ka tongana laso mbeni Témoin so awara batême awe abâ so lo doit ti te mapa na ti nyon vin ti Kobe ti Seigneur, me ambeni ngoi na pekoni lo ga ti hinga so ti tâ tënë ni a soro lo ti gue na yayu ape? (1 aCor. 11:28). Ambeni ita ate mapa na anyon vin ni ndali ti so ala hinga nzoni ape beku wa la ala yeke na ni. Me tongana ala yeda na faute ti ala, na ala zia lege ti tengo mapa na nyongo vin ni nga ala ngbâ ti sara na Jéhovah be-ta-zo, lo yeke diko ala biani na popo ti ambeni taba. Atâa so ala yeke te mapa na ala yeke nyon vin ni ape, ala ngbâ ti ga na Mémorial ndali ti so ala bâ na nene ni mingi ye so Jéhovah na Jésus asara ndali ti ala.

6. Nyen la Jésus amû yanga na a-ange ti sara?

⁶ So kota ye ti vundu ayeke si fafadeso, tongana e sara lisoro na ndö ti ambeni ye so Apocalypse chapitre 7 atene na ndö ti aChrétien so a soro ala ti gue na yayu nga na azo mingi mingi so ayeke ambeni taba, a yeke kpengba e. Jésus amû yanga na a-ange ti  ngbâ ti gbu apupu osio ti futingo ye. Ala doit ti ngbâ ti gbu apupu so ti tene a ya na ndö ti sese ape juska a kpo nzoroko na ndö ti lê ti aChrétien kue so a soro ala ti gue na yayu, so ti tene juska Jéhovah atene so ala yeke be-ta-zo (Apoc. 7:1-4). A yeke futa aita ti Christ so a soro ala ti gue na yayu ndali ti dutingo be-ta-zo ti ala na lege so ala yeke ga agbia na aprêtre legeoko na lo na yayu (Apoc. 20:6). Jéhovah, Jésus nga na a-ange ayeke duti ande na ngia mingi na ngoi so azo 144 000 so a soro ala ti gue na yayu ayeke wara ande futa ti ala.

7. Tongana ti so a fa na Apocalypse 7:9, 10, azo wa la Jean abâ ala na yâ ti vision? Na ngoi so lo bâ ala, nyen la ala yeke sara? (Bâ foto ti couverture ni.)

⁷ Na peko ti so Jean asara tënë ti azo 144 000, so ayeke agbia na aprêtre, lo bâ mbeni ye so apika bê mingi, “azo mingi mingi” so asö kuâ na Harmaguédon. Nde na kozo groupe ni, wungo ti azo ti use groupe ni ayeke mingi ahon ti kozo groupe ni, nga a fa wungo ti ala ape. (Diko Apocalypse 7:9, 10.) So ala “yü yongoro vuru bongo” afa so ala ‘kpe terê ti ala si mbeni saleté ti dunia’ ti Satan ‘andu ala pëpe’ na ala ngbâ be-ta-zo na Nzapa nga na Christ (Jacq. 1:27). Ala dekongo ala tene so a sö ala ndali ti ye so Jéhovah na Jésus, Molenge ti taba ti Nzapa, asara ndali ti ala. Nga, so amaboko ti keke ti mbûrü ayeke na tïtî ala afa so ala yeke na ngia so Jéhovah azia Jésus Gbia.—Bâ Jean 12:12, 13.

8. Apocalypse 7:11, 12 afa na e nyen na ndö ti sewa ti Jéhovah so ayeke na yayu?

⁸ Diko Apocalypse 7:11, 12. Na ngoi so ala so ayeke na yayu abâ azo mingi mingi, ala sara ye tongana nyen? Jean abâ so acréature kue so ayeke na yayu ayeke na kota ngia nga ala gonda Nzapa na ngoi so ala bâ azo mingi mingi. Sewa ti Jéhovah so ayeke na yayu ayeke duti ande na ngia mingi ti bâ gango tâ tënë ti vision so na ngoi so azo mingi mingi ayeke sigi ande na yâ ti kota ye ti vundu.

9. Ti gue oko na Apocalypse 7:13-15, nyen la azo mingi mingi ayeke sara laso?

⁹ Diko Apocalypse 7:13-15. Jean atene so azo mingi mingi “[asukula] yongoro bongo ti ala na ala sara si avuru na yâ ti mênë ti Molenge ti taba ni.” Ye so aye ti fa so ala yeke na nzoni conscience nga so bê ti Jéhovah anzere na ala (És. 1:18). Ala yeke aChrétien so amû terê ti ala na Nzapa nga ala wara batême, ala yeke na kpengba mabe na sandaga ti Jésus nga ala yeke na songo na Jéhovah (Jean 3:36; 1 Pi. 3:21). Tongaso, ala lingbi ti luti na devant ti trône ti Nzapa ti “sara na lo kusala so ayeke nzoni-kue bï na lâ” ge na sese na yâ ti lacour ti temple ti lo ti yingo. Même laso, ala la ayeke sara kota mbage ti kua ti fango tënë ti Royaume na ti sarango adisciple, na ala yapu na ni, ndali ti so Royaume ti Nzapa ayeke kota ye mingi na ala.—Mat. 6:33; 24:14; 28:19, 20.

10. Nyen la azo mingi mingi ayeke na kite na ndö ni ape? Zendo wa la ala yeke bâ ande gango tâ tënë ni?

¹⁰ Azo mingi mingi so asigi na yâ ti kota ye ti vundu ayeke na kite ape so Nzapa ayeke ngbâ ti bâ lege ti ala, ndali ti so “Lo so aduti na ndö ti trône ni ayeke gbara ande tente ti lo na ndö ti ala.” Zendo so ambeni taba ayeke ku kungo ti bâ gango tâ tënë ni ayeke ga ande tâ tënë kue. Zendo ni atene: “[Nzapa ayeke] mbô ande ngu ti lê kue na lê ti ala, kuâ ayeke duti ande dä mbeni pëpe; mua, wala toto, wala pasi ayeke duti dä mbeni pëpe.”—Apoc. 21:3, 4.

11-12. (a) Tongana ti so a fa na Apocalypse 7:16, 17, anzoni ye wa la ayeke ku azo mingi mingi? (b) Nyen la ambeni taba alingbi ti sara na ngoi ti Mémorial? Ngbanga ti nyen?

¹¹ Diko Apocalypse 7:16, 17. Même laso,  nzara ayeke sara ambeni wakua ti Jéhovah ndali ti so ala yeke na nginza mingi ape ti vo na kobe so ala bezoin ni wala ndali ti akpale so wusuwusu so ayeke na yâ ti kodro nga na bira aga na ni. A kanga ambeni ndali ti mabe ti ala. Ye oko, azo mingi mingi ayeke na ngia mingi ndali ti so ala hinga so na peko ti so ala sö kuâ na ngoi so a futi sioni dunia so, ala yeke wara ande lakue gbâ ti kobe ti tengo ni nga na gbâ ti kobe ti yingo. Na ngoi so Jéhovah ayeke futi ande sioni dunia ti Satan, lo yeke sara kue ti bata azo mingi mingi si ngonzo ti lo, so ayeke tongana “ngangu ndowa”, asara sioni na ala ape. Na peko ti kota ye ti vundu, Jésus ayeke fa lege na azo so asö kuâ, so ayeke na ndö ti sese, ti gue na “ali ti ngu so ayeke mû fini [ti lakue lakue] na zo.” Bâ si: Azo mingi mingi ayeke na mbeni beku so ayeke pendere mingi. Na popo ti azo milliard mingi so avivre na sese na angoi nde nde kue, peut-être gï azo mingi mingi la ayeke kui ande lâ oko ape.—Jean 11:26.

¹² Ambeni taba ayeke na mbeni beku so ayeke pendere mingi so ala kiri singila na Jéhovah na Jésus ndali ni. Atâa so Jéhovah asoro ala ti vivre na yayu ape, lo ye ala mingi tongana ti so lo ye aChrétien so lo soro ala ti gue na yayu. A-Chrétien so a soro ala ti gue na yayu nga na ambeni taba alingbi ti gonda Nzapa na Christ. Mbeni lege so ala lingbi ti sara ni ayeke ti ga na Dango bê na kuâ ti Christ.

13-14. Ngbanga ti nyen la a lingbi aChrétien kue ague na Mémorial?

¹³ Na yâ ti angu so ahon ade ti ninga ape, tongana mo mû azo saki oko, zo oko la ate mapa na anyon vin ti Mémorial. Na yâ ti acongrégation mingi, zo oko ate mapa wala anyon vin ni ape. Mingi ti azo so aga na Mémorial ayeke na beku ti ngbâ na ndö ti sese. Ka ngbanga ti nyen la ala ga na bungbi so? Raison so apusu ala ti ga ayeke oko na ti azo so aga na mariage ti mbeni kamarade ti ala. Ala ga ndali ti so ala ye ti fa so ala ye couple ni nga ala ye ti mû maboko na ala. Legeoko nga, ambeni taba aga na Mémorial ndali ti so ala ye ti fa so ala ye Christ nga na ala so a soro ala ti gue na yayu na ala ye ti mû maboko na ala. Ala ga nga ti fa so ala kiri singila ndali ti sandaga so Jésus amû so amû lege na ala ti duti na fini lakue lakue na ndö ti sese.

 ¹⁴ Mbeni kota raison so ambeni taba aga na Mémorial ayeke ti fa so ala mä yanga ti Jésus. Na ngoi so Jésus na abazengele be-ta-zo ti lo ate Kobe ti Seigneur ti kozoni, lo tene na ala: “Ala ngbâ ti sara ye so ti dabe ti ala na mbi.” (1 aCor. 11:23-26). Tongaso, ala ngbâ ti ga na Mémorial na ngoi kue so ambeni Chrétien so a soro ala ti gue na yayu angbâ na sese. Nga, ambeni taba atisa azo kue ti ga na Mémorial legeoko na ala.

15. Nyen la e lingbi ti sara ti gonda Nzapa nga na Christ na ngoi ti Mémorial?

¹⁵ Na ngoi ti Mémorial, lege azi na e ti gonda Nzapa nga na Christ na lege ti bia nga na sambela. Diskur so ayeke mû na ngu so ayeke: “Kiri singila ndali ti ye so Nzapa na Christ asara ndali ti mo.” A yeke sara ande si e kiri singila mingi na Jéhovah na Christ. Mapa na vin so a yeke hon na ni ayeke dabe ti e na terê ti Jésus nga na mênë ti lo. E yeke dabe ti e ande so Jéhovah azia si Molenge ti lo akui na place ti e tongaso si e wara fini (Mat. 20:28). Azo kue so aye Babâ ti e ti yayu na Molenge ti lo ayeke ga ande na Mémorial.

16. Na alege wa la aChrétien so a soro ala ti gue na yayu nga na ambeni taba ayeke oko?

¹⁶ Na ambeni lege, aChrétien so a soro ala ti gue na yayu nga na ambeni taba ayeke oko. Jéhovah aye ambeni ahon ambeni ape. Jéhovah abâ ala kue na nene ni. Lo futa oko ngere, so ti tene fini ti Molenge ti lo so lo ye lo mingi, ti vo aChrétien so a soro ala ti gue na yayu nga na ambeni taba. Kangbi so ayeke na popo ti ala ayeke so beku ti ala ayeke nde nde. A lingbi ala kue angbâ be-ta-zo na Nzapa na Christ (Ps. 31:23). Girisa nga ape so Jéhovah amû yingo vulu ti lo na zo oko oko alingbi na ye so zo ni abezoin ni atâa a soro zo ni ti gue na yayu wala lo yeke mbeni taba.

17. Nyen la aChrétien so a soro ala ti gue na yayu ayeke ku ni kungo?

¹⁷ A-Chrétien so a soro ala ti gue na yayu, a dü ala dungo na beku ti gue na yayu ape. Nzapa la amû na ala beku so. Ala yeke gbu li na ndö ti beku ti ala, ala sambela ndali ni nga ala yeke ku kungo ti wara futa ti ala na yayu. Ala hinga ape terê so ala yeke wara ande na yayu ayeke duti tongana nyen (aPhil. 3:20, 21; 1 Jean 3:2). Atâa so kue, ala yeke ku kungo ti wara terê na Jéhovah, Jésus, a-ange nga na amba ti ala aChrétien so ague na yayu awe nga ti duti na ala na yâ ti Royaume ti yayu.

18. Nyen la ambeni taba ayeke ku ni kungo?

¹⁸ Ambeni taba ayeke ku kungo ti duti na fini lakue lakue na ndö ti sese. Nzara ti bê ti azo kue la (Zo-ti. 3:11). Ala yeke ku kungo  ngoi so ala lingbi ti mû maboko ti sara si sese kue aga Paradis. Ala yeke ku kungo ngoi so ala yeke leke ada ti ala, ala yeke fâ ayaka ti ala, ala yeke bata amolenge ti ala nga ala na amolenge ti ala ayeke duti na nzoni seni (És. 65:21-23). Ala yeke ku kungo ti fono ti bâ ando nde nde na ndö ti sese, ti bâ ahoto, agbako nga na angu-ingo, na ti manda ye na ndö ti aye kue so Jéhovah acréé. Me ye so amû na ala ngia ahon aye kue ayeke so ala hinga so songo ti ala na Jéhovah ayeke ngbâ lakue ti kpengba.

19. Mémorial amû lege na e oko oko kue ti sara nyen? Na ngu so, e yeke sara ni lawa?

¹⁹ Jéhovah amû na awakua ti lo oko oko kue so amû terê ti ala na lo mbeni pendere beku ti kekereke (Jér. 29:11). Mémorial ti kuâ ti Christ ayeke mbeni kpengba ngoi ti tene e oko oko kue e gonda Nzapa na Christ ndali ti ye so ala sara ndali ti e so amû lege na e ti duti na fini lakue lakue. Mémorial ayeke kota ahon abungbi kue so atâ Chrétien ayeke sara ngu oko oko. E yeke sara ande ni na samedi, lango 27 ti mars, ngu 2021 na peko ti lindango ti lâ. Na ngu so, azo mingi ayeke wara ande lege ti ga na kpengba bungbi so sân ti tene mbeni ye akanga lege na ala. Ambeni ayeke ga atâa so a kanga lege na ala. Ambeni ayeke sara ni na da ti kanga. Jéhovah, Jésus, a-ange, nga na aChrétien so a soro ala so ayeke na yayu awe ayeke bâ ande e na ngoi so e yeke sara Mémorial. Tongaso, nzoni Mémorial na acongrégation, agroupe nga na azo kue!