1-2. Ngbanga ti nyen la e yeke sara Mémorial ngu oko oko?

 A SARA nduru na ngu 2000 awe, Jésus amû lani fini ti lo ndali ti e, na a zi lege na e ti wara fini ti lakue lakue. Na bï so na ndade ni Jésus akui, lo hunda na adisciple ti lo ti dabe na sacrifice so lo sara na lege so ala sara mbeni bungbi so ayeke simple, so na ngoi ni ala yeke sara kua na mapa nga na vin.—1 aCor. 11:23-26.

² E yeke sara ye alingbi na commandement ti Jésus so ndali ti so e ye lo mingi (Jean 14:15). Ngu oko oko, na yâ ti ayenga so aga kozo na Mémorial nga na pekoni, e yeke fa so e kiri singila na lo ndali ti ye so lo sara ndali ti e na lege so e mû ngoi ti sambela nga ti gbu li na ndö ti ye so kuâ ti lo aye ti tene ndali ti azo. E yeke nga na ngia ti fa tënë mingi, ti tisa gbâ ti azo ti tene ala ga e na ala e sara bungbi so, so ayeke kota mingi so. Biani, e leke na bê ti e ti tene e zia pëpe si mbeni ye akanga lege na e ti sara Mémorial.

3. Nyen la e yeke bâ na yâ ti article so?

³ Na yâ ti article so, e yeke bâ aye ota so awakua ti Jéhovah asara ti sara kue ti dabe na kuâ ti Jésus: (1) ala sara Mémorial tongana ti so Jésus afa na ala ti sara, (2) ala tisa azo ti ga na Mémorial nga (3) ala sara Mémorial atâa na yâ ti angangu kpale.

4. Ahunda wa la a yeke kiri tënë na ni ngu oko oko na ngoi ti Mémorial? Ngbanga ti nyen la ti hinga kiringo tënë na ahunda so ayeke kota ye mingi na e? (Luc 22:19, 20).

⁴ Ngu oko oko na ngoi ti Mémorial, e yeke mä ka mbeni diskur so akiri tënë polele na ambeni hunda. E hinga ndani so azo abezoin ti tene a futa mbeni ye ti zi ala nga tongana nyen la kuâ ti zo oko apeut ti kanga ndö ti siokpari ti azo mingi. A yeke dabe ti e na ye so mapa na vin ayeke tapande ni nga azo wa la adoit ti te ni nga ti nyon ni. (Diko Luc 22:19, 20.) E yeke gbu nga li na ndö ti anzoni ye so azo so ayeke na beku ti wara fini na ndö ti sese ayeke wara ni (És. 35:5, 6; 65:17, 21-23). A yeke nzoni e bâ atâ tënë so tongana senge ye ape. Azo milliard mingi ahinga atâ tënë so ape nga ala hinga ape tongana nyen la sandaga ti Jésus ayeke kota ye mingi. Ala yeke sara nga Mémorial tongana ti so Jésus afa ape. Ngbanga ti nyen?

5. Na peko ti kuâ ti mingi ti abazengele, azo akomanse ti dabe na kuâ ti Jésus tongana nyen?

⁵ Kete na peko ti so mingi ti abazengele ti Jésus akui, aChrétien ti wataka alï na yâ ti congrégation (Mat. 13:24-27, 37-39). Ala yeke tene atënë so ala “ba yâ ni kirikiri ti gboto na adisciple na peko ti ala.” (Kus. 20:29, 30). Mbeni tënë so a “ba yâ ni kirikiri”, so aChrétien ti wataka akomanse ti fa ni, ayeke so Jésus amû lani ape fini ti lo “gï fani oko biani biani awe ti yô asiokpari ti azo mingi”, tongana ti so Bible atene, me lo doit ti mû fini ti lo na sandaga fani mingi (aHéb. 9:27, 28). Laso, azo mingi amä na bê na fango ye ti wataka so. Ala yeke gue na eglize yenga oko oko, ti ambeni, ala yeke gue lango oko oko ti dabe ti ala na sandaga ti Jésus so aCatholique airi ni “Messe ti Sacrifice.” b Ambeni bungbi ti vorongo nzapa ayeke dabe na kuâ ti Jésus fani mingi ape, me amembre ti ala ahinga nzoni ape nda ti sandaga ti Jésus. Ambeni apeut ti hunda terê ti ala: ‘Eskê kuâ ti Jésus aye biani ti tene so a peut ti pardonné asiokpari ti mbi?’ Ngbanga ti nyen la ala yeke hunda tënë so? Ngbanga ti so azo asara si ala yeda so a peut ti pardonné asiokpari ti ala na lege ti kuâ ti Jésus ape. Tongana nyen la atâ disciple ti Jésus a-aidé azo ti hinga nda ti sandaga ti Jésus nga na nzoni lege ti dabe na kuâ ti lo?

6. Na ngu 1872, nyen la mbeni groupe ti aWamandango Bible ahinga?

⁶ Na hunzingo ti angu 1800, mbeni groupe ti aWamandango Bible, so Charles Taze Russell amû li ni dä, akomanse ti manda Bible nzoni. Ala ye lani ti hinga nzoni nda ti sandaga ti Jésus nga tongana nyen la a yeke nzoni a dabe na ni. Na ngu 1872, ala comprendre so Jésus amû ye so a futa ti zi azo kue. Ala bata ye so ala manda so gï ndali ti ala wani ape. Me, ala sara si azo ahinga ni na lege ti ambeti, ambeti-sango nga na apériodique. Kete na pekoni, tongana ti akozo Chrétien, ala komanse ti bungbi fani oko na yâ ti ngu oko oko ti sara Mémorial.

7. Tongana nyen la e yeke bâ nzoni na lege ti gingo nda ti ye ti akozo Wamandango Bible so?

⁷ Laso, e yeke bâ nzoni na lege ti gingo nda ti ye so aChrétien so agi asara angu mingi awe. Na lege wa? Jéhovah a-aidé e ti comprendre nda ti sandaga ti Jésus nga na ye so a yeke sara ndali ti e nga na azo kue (1 Jean 2:1, 2). E hinga nga so Bible atene beku ayeke use ndali ti azo so azia ngia na bê ti Nzapa:  ambeni ayeke wara fini so alingbi ti hinga kuâ pëpe na yayu nga ambeni kutu mingi ayeke wara fini ti lakue lakue na ndö ti sese. Tongana e bâ tongana nyen la Jéhovah aye e mingi nga tongana nyen la e bâ nzoni mingi na lege ti sandaga ti Jésus, e yeke ga nduru mingi na Jéhovah (1 Pi. 3:18; 1 Jean 4:9). Tongaso, legeoko tongana ti aita ti e ti ândö so ayeke be-ta-zo, e yeke tisa azo ti tene ala ga e na ala e sara Mémorial tongana ti so Jésus afa.

8. Nyen la awakua ti Jéhovah asara ti tisa azo na Mémorial? (Bâ foto.)

⁸ Awakua ti Jéhovah ayeke tisa azo na Mémorial asara angu mingi awe. Na ngu 1881, a hunda na aita na États-Unis ti bungbi na yâ ti da ti mbeni ita na Allegheny, na Pennsylvanie, ti sara kota bungbi so. Na pekoni, congrégation oko oko asara Mémorial ti lo. Na ngu 1940, a tene na awafango tënë so ala peut ti tisa azo kue ti territoire ti ala so aye ti hinga tâ tënë. Na ngu 1960, ti kozoni, Béthel atokua na acongrégation ambeti ti tisango ndo. Ngbene ye na ngoi ni so ti ga na ni, a kangbi ambeti ti tisango ndo na Mémorial milliard mingi. Ngbanga ti nyen la e yeke mû ngoi mingi ti tisa azo nga e yeke sara effort ti sara ni?

9-10. Azo wa la ayeke bâ nzoni na lege ti effort so e yeke sara ti tisa azo na Mémorial? (Jean 3:16).

⁹ Mbeni raison so ndali ni e yeke tisa azo ti tene ala ga e na ala e sara Mémorial ayeke so e ye ti tene azo so aga ti kozoni ahinga tâ tënë na ndö ti ye so Jéhovah na Jésus asara ndali ti e kue. (Diko Jean 3:16.) E ye ti tene aye  so ala mä nga ala bâ na ngoi ti Mémorial apusu ala ti ye ti manda ye mingi nga ti ga awakua ti Jéhovah. Me ambeni zo nde apeut nga ti bâ nzoni tongana ala ga na Mémorial.

¹⁰ E yeke tisa nga azo so ayeke sara na Jéhovah encore ape. E yeke sara tongaso ti dabe ti ala so Nzapa angbâ ti ye ala. Ala mingi ayeda na tisango ndo ti e, na e yeke na ngia mingi ti bâ ala. Gango na Mémorial adabe ti ala tongana nyen la ala yeke lani na ngia mingi ti sara na Jéhovah. Bâ tapande ti Monica. c Lo komanse ti kiri ti fa tënë na ngoi so COVID-19 amû ndo. Na peko ti so lo ga na Mémorial na ngu 2021, lo tene: “Mémorial so ayeke tâ nde mingi na mbi. Ti kozoni na yâ ti ngu 20, mbi wara lege ti fa tënë na azo nga ti tisa ala na Mémorial. Mbi sara kue ti tisa azo ndali ti so mbi kiri singila mingi na Jéhovah nga na Jésus ndali ti ye so ala sara ndali ti mbi.” (Ps. 103:1-4). Atâa azo ayeda na tisango ndo ti e wala pëpe, e yeke sara kue ti tisa ala na Mémorial, na e hinga so Jéhovah abâ na nene ni a-effort ti e.

11. Tongana nyen la Jéhovah asara tufa na ndö ti a-effort so e sara ti tisa azo na Mémorial? (Aggée 2:7).

¹¹ Jéhovah asara tufa mingi na ndö ti a-effort so e sara ti tisa azo na Mémorial. Na ngu 2021, atâa akpale so COVID-19 aga na ni, ti kozoni wungo ti azo so asara Mémorial asi 21367603. Wungo ni so ahon wungo ti aTémoin ti Jéhovah fani use na ndambo tongaso. Me gï wungo ti azo la agbu bê ti Jéhovah ape. Lo pensé na zo oko oko kue (Luc 15:7; 1 Tim. 2:3, 4). E hinga biani so, na ngoi so e yeke mû mbeti ti tisango ndo na azo, Jéhovah ayeke aidé e ti wara ala so aye ti hinga lo.—Diko Aggée 2:7.

12. Nyen la apeut ti sara si a yeke ngangu na e ti sara Mémorial? (Bâ foto.)

¹² Jésus atene lani so na lâ ti nda ni, e yeke wara akpale mingi, na tapande, kangango lege ti azo ti sewa, sarango ye ti ngangu na zo, bira, kobela so amû ndo nga na ambeni kpale nde (Mat. 10:36; Marc 13:9; Luc 21:10, 11). Na ambeni ngoi, akpale so asara si a yeke ngangu na e ti sara bungbi ti dango bê na kuâ ti Jésus. Nyen la aita ti e asara ti hon ndö ti akpale so nga Jéhovah a-aidé ala tongana nyen?

13. So Artem asara ye na mbeto ape nga lo leke na bê ti lo ti sara Mémorial na da ti kanga, Jéhovah asara tufa na ndö ti lo tongana nyen?

¹³ Na da ti kanga. Aita ti e so a kanga ala ndali ti mabe ti ala ayeke sara ye so ala peut ti sara ti sara Mémorial. Bâ tapande ti Artem. Na ngu 2020, na yâ ti ayenga so aga kozo na Mémorial nga na pekoni, a zia lo na yâ ti mbeni cellule ti da ti kanga so a yeke kanga ka azo oku na yâ ni. Atâa so lo yeke na kanga, lo wara ambeni ye so lo peut ti sara kua na ni tongana mapa na vin ti Mémorial, nga lo leke ti sara diskur ti Mémorial ndali ti lo wani. Me amba ti lo azo ti kanga ni ayeke nyon manga nga ala yeke tene sioni yanga mingi. Nyen la lo sara? Lo hunda ala wala ala peut ti zia ti tene sioni yanga nga ti nyon manga gï l’heure oko. Li ti lo akpe so amba ti lo ni ayeda ti nyon manga ape wala ti tene sioni yanga ape na ngoi ti Mémorial ni. Artem atene: “Mbi hunda ala ti fa na ala ye na ndö ti Mémorial.” Atâa so ala tene ala ye pëpe ti mä tënë na ndö ni, na peko ti so ala bâ Artem ayeke sara Mémorial nga ala mä diskur so lo mû, ala hunda na lo ye kue na ndö ni.

14. A-effort wa la awakua ti Jéhovah asara ti sara Mémorial atâa so COVID-19 amû ndo?

 ¹⁴ COVID-19 so amû ndo. Na ngoi so COVID-19 amû ndo, awakua ti Jéhovah apeut ti bungbi ndo oko ti sara Mémorial ape. Me ye so akanga lege na ala ape ti sara Mémorial. d Acongrégation so ayeke na Internet asara Mémorial na lege ti vidéoconférence. Me ka ti azo kutu mingi so ayeke na Internet ape? Na yâ ti ambeni kodro, a leke ti tene azo amä diskur ni na télé wala na radio. Na ndö ni, afiliale a-enrégistré diskur ni na ayanga ti kodro ahon 500, tongaso si même azo so ayeke na ando so ayo apeut ti sara Mémorial. Aita-koli ague na a-enrégistrement ni na ando so aita abezoin ni dä.

15. Nyen la mo manda na lege ti tapande ti mbeni wamandango Bible so iri ti lo Sue?

¹⁵ Kangango lege ti azo ti sewa. Ti ambeni zo, kota kpale so apeut ti kanga lege na ala ti sara Mémorial ayeke kangango lege ti azo ti sewa ti ala. Bâ tapande ti mbeni wamandango Bible so iri ti lo Sue. Na ngu 2021, na lango so na ndade ni a yeke sara Mémorial, Sue atene na ita so ayeke manda Bible na lo so  ndali ti so azo ti sewa ti lo akanga lege na lo, lo yeke wara ande lege ti sara Mémorial ape. Ita ni adiko na lo Luc 22:44. Na pekoni, ita ni afa na lo so tongana e wara akpale, a yeke nzoni e mû tapande ti Jésus na lege so e sambela Jéhovah nga e zia bê ti e kue na lo. Na ndade ni, Sue aleke mapa na vin ni nga lo bâ kapa ti Vorongo Nzapa na ndapre so ayeke nde na ndö ti jw.org. Na lakui ni, na ngoi so lo yeke na yâ ti chambre ti lo lo oko, lo mä diskur ti Mémorial ni na téléphone. Na pekoni, Sue atokua message na ita so ayeke manda Bible na lo, lo tene: “Biri, mo kpengba mbi mingi. Mbi sara ye kue so mbi peut ti sara ti sara Mémorial, na Jéhovah a-aidé mbi. Mbi hinga ape tongana nyen ti fa ngia ti bê ti mbi nga na singila ti bê ti mbi.” Eskê mo pensé so Jéhovah apeut ti aidé mo tongana mo wara mara kpale so?

16. Ngbanga ti nyen la e yeke na confiance so Jéhovah ayeke sara ande tufa na ndö ti a-effort so e yeke sara ti ga na Mémorial? (aRomain 8:31, 32).

¹⁶ Jéhovah abâ na nene ni mingi a-effort so e yeke sara ti sara bungbi ti dango bê na kuâ ti Jésus. E peut ti duti sûr so lo yeke sara tufa na ndö ti e tongana e fa so e kiri singila na lo ndali ti ye so lo sara ndali ti e. (Diko aRomain 8:31, 32.) Tongaso, zia e leke na bê ti e ti ga na Mémorial na ngu so nga ti sara ye kue so e peut ti sara ti fa tënë mingi na yâ ti ayenga so aga kozo na Mémorial nga na pekoni.