1. Nyen la aga na li ti mo tongana mo yeke pensé na Jéhovah?

 ESKÊ mo tara lâ oko awe ti imaginé Jéhovah ayeke tongana nyen? Tongana mo yeke sambela lo, image wa la aga na li ti mo? Atâa so e peut ti bâ Jéhovah ape, Bible afa lo na alege nde nde. A tene so Jéhovah ayeke “lâ nga na vala” nga lo yeke “mbeni wâ so ayeke gbi ye kue kue kue.” (Ps. 84:11; aHéb. 12:29). Na yâ ti mbeni vision, Ézéchiel afa so Jéhovah ayeke tongana tênë ti saphir, mbeni wen so aza nga mbeni arc-en-ciel so aza ngangu (Ézéch. 1:​26-28). Ambeni ye so afa na ndö ti Jéhovah apika bê ti e mingi wala asara même e mbeto.

2. Nyen la apeut ti sara si a yeke ngangu na e ti ga nduru na Jéhovah?

² So e bâ Jéhovah ape, a peut ti duti ngangu na e ti yeda so lo ye e. Ambeni zo apensé so Jéhovah apeut lâ oko ti ye ala ape ndali ti aye so ala vivre ni ândö. Peut-être ala yeke na mbeni babâ so aye ala lâ oko ape. Jéhovah acomprendre e nga ndani so a peut ti duti ngangu na e ti ga nduru na lo. Ti aidé e, lo fa na e apendere sarango ye ti lo na yâ ti Bible.

3. Ngbanga ti nyen la a yeke nzoni e gbu li nzoni na ndö ti ndoye ti Jéhovah?

³ Tënë ndoye afa na e ye na ndö ti Jéhovah nzoni mingi. Bible atene so “Nzapa ayeke ndoye.” (1 Jean 4:8). Ndoye la apusu lo ti sara ye kue so lo sara. Ndoye ti Nzapa ayeke mingi nga ayeke ngangu mingi, a sara si lo fa ni même na azo so aye lo ape (Mat. 5:​44, 45). Na yâ ti  article so, e yeke gbu li nzoni na ndö ti Jéhovah nga na ndoye ti lo. Tongana e manda ye mingi na ndö ti Nzapa, e yeke ye lo mingi.

JÉHOVAH AYE E MINGI

4. So Jéhovah ayeke tâ na ndoye mingi a sara mo tongana nyen? (Bâ nga foto.)

⁴ “Jéhovah ayeke tâ na ndoye mingi.” (Jacq. 5:11). Na yâ ti Bible, lo haka terê ti lo na mbeni mama so aye bébé ti lo mingi (És. 66:​12, 13). Imaginé mbeni mama so na ndoye ayeke bâ lege ti kete molenge ti lo. Lo zia lo na ndö ti gere ti lo, lo sara tënë na lo yeke. Tongana lo toto wala mbeni ye ason lo, lo yeke sara kue ti mû na lo ye so lo bezoin ni. Tongana mbeni ye ason e, e peut ti hinga biani so Jéhovah aye e. Mbeni zo ti sungo psaume atene: “Na ngoi so agingo bê ahon ndö ti mbi, mo dë bê ti mbi nga mo sara si mbi duti na siriri.”—Ps. 94:19.

5. Tâ ndoye ti Jéhovah aga na mo ye ti nzoni wa?

⁵ Jéhovah ayeke be-ta-zo (Ps. 103:8). Tongana e sara mbeni ye so ayeke na lege ni ape, lo ngbâ ti ye e. Fani mingi azo ti Israël ason bê ti Jéhovah, me tongana ala changé bê ti ala lo dë bê ti ala na atënë so, lo tene: “Mo ga lani ye so ngere ni ayeke kota mingi na lê ti mbi; azo ane mo, nga mbi ye mo mingi.” (És. 43:​4, 5). Ndoye ti Nzapa achangé ape. E peut lakue ti zia bê ti e na ni. Même tongana e sara mbeni kota siokpari, Jéhovah ayeke dö e ti zia ape. Tongana e changé bê ti e na e kiri na Jéhovah, e yeke bâ so lo ngbâ lakue ti ye e. Lo mû zendo so “lo yeke pardonné zo kue kue kue.” (És. 55:7). Bible atene so pardon so ayeke ga na e ‘angoi ti kiringo ti wara ngangu so alondo na Jéhovah’.—Kus. 3:19.

6. Zacharie 2:8 afa na e nyen na ndö ti Jéhovah?

⁶ Diko Zacharie 2:8. So Jéhovah aye e, hio lo yeke comprendre atënë ti bê ti e nga lo ye mingi ti bata e. Tongana e yeke na vundu, lo nga kue lo yeke na vundu. Tongaso, a yeke na lege ni so e peut ti sambela, e tene: “Bata mbi tongana vuko lê ti mo.” (Ps. 17:8). Lê ayeke son ka hio tongana mbeni ye andu ni, nga a yeke mbage ti terê ti zo so lo bâ ni na nene ni mingi. Tongaso, tongana Jéhovah ahaka e na vuko lê ti lo, a yeke mo bâ mo tene lo yeke tene: ‘Zo kue so asara sioni na ala, azo ti mbi, asara sioni na ye so mbi bâ na nene ni mingi.’

7. Ngbanga ti nyen la e bezoin ti duti na confiance mingi so Jéhovah andoye e?

 ⁷ Jéhovah aye ti tene mo hinga na bê ti mo kue so lo ye mo. Me lo hinga so ndali ti aye so asi na e ândö, e peut ti hunda terê ti e wala lo peut ti ye e. Wala e peut ti wara akpale laso so asara si e yeke sûr ape so Jéhovah aye e. Nyen la ayeke sara si e yeke na confiance mingi so Jéhovah andoye e? Ti hinga tongana nyen la Jéhovah afa so lo ye Jésus, aChrétien so a soro ala ti gue na yayu nga na e kue ayeke sara si e yeke na confiance mingi so Jéhovah aye e.

FASON SO JÉHOVAH AFA SO LO YE E

8. Ngbanga ti nyen la Jésus ahinga na bê ti lo kue so Babâ ti lo aye lo?

⁸ Jéhovah na Molenge ti lo ayeke ndo oko ahon azo kue. Teti angu milliard mingi so ala yeke na terê ti mba na yayu, ala ga nduru mingi na mba nga ala ye terê mingi. Jéhovah afa polele so lo ye Jésus tongana ti so e diko na Matthieu 17:5. Jéhovah apeut lani gï ti tene: ‘So ayeke zo so bê ti mbi anzere na mbage ti lo.’ Me lo ye ti tene e hinga so lo ye Jésus mingi, tongaso lo iri lo “Molenge ti mbi, lo so mbi ndoye lo mingi”. Jéhovah apika kate na ndö ti Jésus nga na ndö ti ye so lo yeke nduru ti sara (aÉph. 1:7). Nga, Jésus ayeke na kite oko ape so Babâ ti lo aye lo. Lo hinga na gbe ti bê ti lo so Jéhovah aye lo. Fani mingi lo tene so lo hinga so Babâ ti lo aye lo.—Jean 3:35; 10:17; 17:24.

9. Tënë wa la afa ndoye ti Jéhovah na mbage ti aChrétien so a soro ala ti gue na yayu? Fa ndani so mo tene tongaso. (aRomain 5:5).

⁹ Jéhovah afa nga so lo ye aChrétien so a soro ala ti gue na yayu. (Diko aRomain 5:5.) Bâ so a sara kua na tënë “a tuku.” Mbeni mbeti afa ni tongana mbeni ye so “aga na ndö ti e tongana ngu so ayeke sua.” Tapande so afa pendere mingi so Jéhovah aye mingi aChrétien so a soro ala ti gue na yayu. A-Chrétien so ahinga so ‘Nzapa andoye ala’. (Jude 1). Bazengele Jean afa tënë ti bê ti ala tongana lo tene: “Bâ mara ti ndoye so Babâ ni afa na mbage ti e so ma, si a lingbi ti iri e amolenge ti Nzapa!” (1 Jean 3:1). Eskê Jéhovah aye gï aChrétien so a soro ala ti gue na yayu? Ên-ën! Jéhovah afa so lo ye e kue.

10. Kota ye wa la Jéhovah asara so afa so lo ye mo?

¹⁰ Kota ye wa la Jéhovah asara so afa so lo ye mo? Lo mû ye so a futa ti zi azo. Na lege ni Jéhovah afa mbeni ndoye so mara ni ayeke dä ape (Jean 3:16; aRom. 5:8). Jéhovah amû Molenge ti lo so lo ye lo mingi, lo zia lo ti kui ndali ti azo kue tongaso si a pardonné asiokpari ti e nga e peut ti ga akamarade ti Lo (1 Jean 4:10). Tongana e gbu li mingi na ndö ti ye so Jéhovah na Jésus afuta, e peut ti comprendre nzoni mingi tongana nyen la ala ye e oko oko kue mingi (aGal. 2:20). A mû pëpe ye so a futa ti zi azo gï ti lingbi na ye so mbilimbili ti Jéhovah ahunda. Me a yeke mbeni cadeau so a mû ni na ndoye. Jéhovah afa so lo ye e mingi na lege so lo mû Jésus, so lo ye lo mingi, na sandaga. Jéhovah azia si Molenge ti lo abâ pasi nga akui ndali ti e.

11. Nyen la e manda na lege ti Jérémie 31:3?

¹¹ Tongana ti so e bâ fade, Jéhovah aye e nga lo fa na e so lo ye e mingi. (Diko Jérémie 31:3.) Jéhovah agboto e na mbage ti lo ndali ti so lo ye e. (Bâ Deutéronome 7:​7, 8.) Mbeni ye wala mbeni zo so apeut ti kangbi e na ndoye ti lo ayeke dä ape (aRom. 8:​38, 39). So mo hinga ni, a sara mo tongana nyen? Diko Psaume 23 na bâ so, so David ahinga so Jéhovah aye lo nga abâ lege ti lo asara lo tongana nyen nga apeut ti sara e kue tongana nyen.

 SO JÉHOVAH AYE E ASARA MO TONGANA NYEN?

12. Na nduru tënë, Psaume 23 afa nyen?

¹² Diko Psaume 23:​1-6. Na Psaume 23, David afa confiance so lo yeke na ni so Jéhovah aye lo nga abâ lege ti lo nzoni. Lo fa kpengba songo ti kamarade so ayeke na popo ti lo na Jéhovah so lo iri lo Berger ti lo. David abâ so sioni ayeke si na lo ape ndali ti so lo zia Jéhovah afa lege na lo nga lo zia bê ti lo kue na Lo. David ahinga so Jéhovah ayeke fa ndoye ti lo na lo lâ oko oko na yâ ti fini ti lo. Nyen la asara si lo yeke na mara ti confiance so?

13. Ngbanga ti nyen la David ahinga na bê ti lo kue so Jéhovah ayeke bâ lege ti lo?

¹³ “Ye oko ayeke manke mbi pëpe.” David abâ so Jéhovah abâ lege ti lo nzoni ndali ti so lakue lo yeke mû na lo aye so lo bezoin ni. David ahinga nga so Jéhovah ayeke kamarade ti lo nga so lo nzere na lê ti lo. Ndani la lo hinga na bê ti lo kue so atâa nyen la asi, Jéhovah ayeke ngbâ ti mû na lo aye kue so lo bezoin ni. So David ahinga so Jéhovah aye lo nga ayeke bâ lege ti lo, a aidé lo ti gi bê ti lo ape me ti duti na ngia nga na siriri.—Ps. 16:11.

14. Nyen la Jéhovah apeut ti sara ti bâ lege ti e na ndoye?

¹⁴ Na ndoye Jéhovah ayeke bâ lege ti e, mbilimbili tongana asioni ye asi na e. Claire, a so asara kua na Béthel ahon ngu 20, ahinga pëpe tongana nyen ti aidé afami ti lo na ngoi so ala wara angangu kpale na peko ti terê. Tension abi babâ ti lo, a bi mbeni ita ti lo ti wali na gigi, kete buze ti sewa ti ala atï nga ala perdre da ti ala. Tongana nyen la na ndoye Jéhovah afa so lo bâ lege ti ala? Claire atene: “Jéhovah abâ si lakue azo ti sewa ti mbi awara ye so ala bezoin ni lâ oko oko. Fani mingi, Jéhovah  amû na e ye même mingi ahon ti so e bezoin ni. Mbi gbu li fani mingi na ndö ti angoi so Jéhovah a-aidé e na mbi yeke girisa lâ oko ape ndoye so lo fa na mbage ti e. Ti dabe ti mbi na angoi so a-aidé mbi ti ngbâ ti gbu ngangu na yâ ti akpale.”

15. Ngbanga ti nyen la bê ti David adë? (Bâ nga foto.)

¹⁵ “Lo dë bê ti mbi.” Na ambeni ngoi, vundu ahon ndö ti David ndali ti akpale kue so lo wara (Ps. 18:​4-6). Me so Jéhovah aye lo nga abâ lege ti lo adë bê ti lo. Jéhovah ague na kamarade ti lo so afatigué kue so na “ando so pere ayeke dä mingi” nga na “ando so ngu ayeke dä nzoni si [lo] wu terê ti [lo].” Ye so asara si David awara ngangu nga lo ngbâ ti sara na Jéhovah na ngia.—Ps. 18:​28-32.

16. Ndoye ti Jéhovah adë bê ti mo tongana nyen?

¹⁶ Legeoko nga laso, “a yeke ngbanga ti tâ ndoye so Jéhovah ayeke na ni, si e hunzi kue pëpe” na ngoi so e wara akpale (Toto ti Jér. 3:22; aCol. 1:11). Bâ tapande ti Rachel. Na ngoi so COVID-19 ayeke mû ndo, vundu ahon ndö ti lo ndali ti so koli ti lo adö lo azia nga azia ti sara na Jéhovah. Nyen la Jéhovah asara ndali ti lo? Lo tene: “Jéhovah asara si mbi hinga so a ye mbi. Lo sara si akamarade ti mbi aga aduti na terê ti mbi, ala ga na mbi kobe, ala tokua amessage nga na aversê so akpengba mbi, ala he ngia na mbi nga ala yeke dabe ti mbi lakue so Jéhovah ayeke bâ lege ti mbi. Mbi kiri singila lakue na Jéhovah so lo mû na mbi kota sewa ti aita so ndoye ayeke na popo ti ala.”

17. Ngbanga ti nyen la David ‘asara mbeto ti ye ti sioni ape’?

¹⁷ “Mbi sara mbeto ti ye ti sioni pëpe, ndali ti so mo yeke na terê ti mbi.” Fani mingi, fini ti David ayeke na yâ ti kpale nga awato ti lo mingi ayeke angangu zo. Me ndoye ti Jéhovah asara si lo bâ so lo yeke nzoni nga abata lo. David abâ so Jéhovah ayeke na lo na angoi kue na asara si bê ti lo adë. Tongaso, lo peut ti he bia, lo tene: “[Jéhovah azi] mbi na yâ ti aye kue so amû mbeto na mbi.” (Ps. 34:4). Mbeto ahon tâ ndö ti David, me ndoye ti Jéhovah ayeke ngangu ahon mbeto so asara lo.

18. So mo hinga so Jéhovah aye mo apeut ti kpengba mo tongana nyen na ngoi so mbeto asara mo?

¹⁸ So e hinga so Jéhovah aye e apeut ti kpengba e tongana nyen na ngoi so e tingbi na aye so asara e mbeto? Susi, mbeni ita-wali so  ayeke pionnier, afa ye so asara lo na koli ti lo na ngoi so molenge ti ala ti koli afâ terê ti lo, lo tene: “Tongana mbeni ngangu sioni ye asi na mo, a yeke sara mo nzoni oko ape nga mo yeke bâ so mo yeke na ngangu ti sara ye encore ape. Me so Jéhovah aye e mingi asara si e bâ so sioni ye ayeke si na e ape.” Rachel, so e sara tënë ti lo fade, adabe ti lo, atene: “Na mbeni bï, vundu ahon ndö ti mbi, mbi gi bê ti mbi mingi nga mbeto asara mbi, na mbi toto na Jéhovah. Gï na lê ni lê ni, lo dë bê ti mbi na lo mû na mbi siriri, tongana ti so mbeni mama asara na bébé ti lo, na mbi tï mbi lango. Mbi yeke girisa ngoi ni so lâ oko ape.” Tasos, mbeni ancien, asara ngu osio na da ti kanga ndali ti so lo ke ti sara kua ti turugu. Tongana nyen la lo bâ so Jéhovah aye lo nga abâ lege ti lo? Lo tene: “Jéhovah amû na mbi aye kue so mbi bezoin ni nga lo zia ambeni na ndö ni. A sara si mbi yeke na confiance mingi so mbi peut ti zia bê ti mbi kue na lo. Nga, na lege ti yingo ti Jéhovah, lo sara si mbi yeke na ngia atâa so da ti kanga ayeke mbeni ndo so vundu asara zo dä mingi. Ye so a-aidé mbi ti bâ so tongana mbi sara confiance na Jéhovah mingi, mbi yeke bâ so lo ye mbi mingi. Tongaso, mbi ga pionnier permanent na ngoi so mbi ngbâ na kanga.”

GA NDURU NA NZAPA TI MO SO ASARA YE NA NZONI BÊ

19. (a) Tongana e hinga so Nzapa aye e, e yeke sambela lo tongana nyen? (b) Na popo ti atënë so Jéhovah atene ti fa so lo ye e, ti so wa la andu bê ti mo mingi? (Bâ encadré “ Atënë so a-aidé e ti bâ so Jéhovah aye e mingi.”)

¹⁹ Aye so asi na aita so e sara tënë ni afa so Jéhovah, “Nzapa ti ndoye” ayeke na e (2 aCor. 13:11). Lo bi bê na ndö ti e oko oko kue. E hinga na bê ti e kue so “tâ ndoye ti Lo angoro [e] kue.” (Ps. 32:10). Tongana e gbu li mingi na ndö ti afason so lo fa so lo ye e, lo yeke ga tâ zo na lê ti e na e yeke bâ so e yeke nduru mingi na lo. E peut ti sambela lo sân mbeto na ti fa na lo so e bezoin ndoye ti lo mingi. E peut ti fa na lo agingo bê ti e kue, ndali ti so e hinga biani so lo comprendre e nga lo ye mingi ti aidé e.—Ps. 145:​18, 19.

20. Tongana nyen la ndoye ti Jéhovah agboto e na mbage ti lo?

²⁰ Legeoko tongana ti so e ye ti duti na terê ti mbeni wâ na ngoi so dê asara, ndoye ti Jéhovah agboto e na mbage ti lo. Ndoye ti Jéhovah ayeke ngangu mingi nga ayeke nzoni mingi. Tongaso, duti na ngia ndali ti so Jéhovah aye mo. Nga, so lo ye e, zia e kue e tene: “Mbi ye Jéhovah.”—Ps. 116:1.