TËNË ti Grec so a kiri peko ni na puse ti mbarata na yâ ti Mbeti ti Nzapa ti fini dunia apeut ti sara tënë ti mara ti apuse ti mbarata nde nde (Kus. 8:​28, 29, 38). Ye oko, na bango ni zo ti Éthiopie so ayeke kpe lani na mbeni puse ti mbarata so akono ahon mbeni kete puse ti mbarata ti aturugu wala ti kpengo na loro. Bâ ambeni raison so ndali ni e tene tongaso.

Zo ti Éthiopie ni ayeke lani mbeni kota zo so ague na mbeni yongoro voyage. Lo yeke lani “mbeni zo ti komande so asara kua na gbe ti Candace, gbia-wali ti Éthiopie. Lo yeke na ndö ti amosoro kue ti gbia-wali ni.” (Kus. 8:27). Éthiopie ti lani abungbi Soudan ti laso nga na mbage ti sud ti Égypte ti laso. Atâa so peut-être koli so avoyagé na oko puse ti mbarata na yâ ti voyage ni kue ape, lo doit lani ti duti na gbâ ti akungba so lo bezoin ni ndali ti yongoro voyage so. Ambeni puse ti mbarata so a sara kua na ni na ngoi ti akozo Chrétien ti yô na azo ayeke na aroue osio nga li ni ayeke dä. Mbeni mbeti (Acts—An Exegetical Commentary) atene: “A peut ti zia gbâ ti akungba na yâ ti mara ti apuse so, azo ayeke duti na yâ ni nzoni nga peut-être a peut ti voyagé na ni ayo.”

Zo ti Éthiopie ni ayeke diko lani mbeti na ngoi so Philippe aga na terê ti lo. Bible atene: “Philippe ayeke mû loro na terê ti puse ni na lo mä [kota zo ni] so ayeke diko mbeti ti prophète Ésaïe ni na kota go.” (Kus. 8:30). A leke apuse ti mbarata so ti mû loro ngangu na ngoi ti voyage ape. So apuse so ayeke kpe yeke amû lege na kota zo ni ti diko mbeti nga amû lege na Philippe ti mû loro ti wara ni.

Zo ti Éthiopie ni ‘avoro yanga na Philippe ti monté na yâ ti puse ni na ti duti na terê ti lo.’ (Kus. 8:31). Apuse so a yeke sara na mandako ti loro, zo ti kpengo na ni ayeke luti. Me ti apuse so a leke ndali ti voyage, place ayeke dä ti tene kota zo ni na Philippe aduti.

Ndali ti tënë so Kusala chapitre 8 atene nga na aye so mbaï afa, ade aninga ape na yâ ti ambeti ti e, e yeke bâ foto ti kota zo ti Éthiopie so ayeke na yâ ti kota puse me pëpe na yâ ti kete puse ti aturugu wala ti kpengo na loro.