1. Ngbanga ti nyen la lango ti Mémorial ayeke lango so ayeke kota mingi na yâ ti ngu ni? (Luc 22:​19, 20).

 NA AWAKUA ti Jéhovah, lango ti Dango bê na kuâ ti Christ ayeke lango so ayeke kota mingi na yâ ti ngu ni. A yeke gï oko ye so Jésus amû yanga na adisciple ti lo ti sara ni la. (Diko Luc 22:​19, 20.) E yeke ku kungo ti sara Mémorial ndali ti araison mingi. Zia e bâ ambeni.

2. Ambeni raison wa la ndali ni e yeke ku kungo ti sara Mémorial?

² Mémorial a-aidé e ti bâ tongana nyen la ye so a futa ti zi azo ayeke kota mingi. A dabe ti e na aye so e peut ti sara ti kiri singila ndali ti sandaga ti Jésus (2 aCor. 5:​14, 15). A mû nga lege na e ti “wa terê na popo ti e,” e na aita ti e (aRom. 1:12). Ngu oko oko, gbâ ti aita so aga na bungbi encore ape ayeke ga. Bê ti ambeni apusu même ala ti kiri na Jéhovah ndali ti so a yamba ala nzoni. Ye so gbâ ti azo so aga abâ nga amä apika bê ti ala na ala yeda ti komanse ti manda Bible. Aye so kue asara si Mémorial ayeke kota ye mingi na lê ti e. 

3. Tongana nyen la Mémorial asara si sewa ti e ti aita na yâ ti dunia kue ayeke beoko? (Bâ nga afoto.)

³ Gbu li nga na ndö ti fason so Mémorial asara si sewa ti e ti aita na yâ ti dunia kue ayeke beoko. A-Témoin ti Jéhovah ayeke bungbi ti sara Mémorial na peko ti so lâ alinda na ando nde nde na yâ ti dunia. E kue e yeke mä mbeni diskur so afa so ye so a futa ti zi azo ayeke kota ye mingi. E yeke he abia ti sepela use, a yeke hon na mapa nga na vin nga e yeke tene “amen” na bê ti e kue na hunzingo ti asambela osio. Na yâ ti l’heure 24 tongaso, acongrégation kue ayeke sara a-oko ye so. Imaginé ngia so Jéhovah na Jésus ayeke  na ni tongana ala bâ e na yâ ti dunia kue, e yeke gonda ala tongaso.

4. Nyen la e yeke bâ na yâ ti article so?

⁴ Na yâ ti article so, e yeke kiri tënë na ahunda so: Tongana nyen la e peut ti leke bê ti e ndali ti Mémorial? Tongana nyen la e peut ti aidé azo ti bâ nzoni na lege ni? Tongana nyen la e peut ti aidé aita so ayeke ga na bungbi encore ape? Kiringo tënë na ahunda so ayeke aidé e ti leke terê ti e ndali ti kota lango so.

TONGANA NYEN LA E PEUT TI LEKE BÊ TI E NDALI TI MÉMORIAL?

5. (a) Ngbanga ti nyen la a yeke nzoni e gbu li na ndö ti ye so a futa ti zi azo, so ayeke ye ti ngangu ngere? (Psaume 49:​7, 8). (b) Vidéo Jésus akui ngbanga ti nyen? afa na mo nyen?

⁵ Mbeni kota ye so e peut ti sara ti leke bê ti e ndali ti Mémorial ayeke ti gbu li na ndö ti fini ti Jésus Christ so lo mû na sandaga ti zi azo, so ayeke ye ti ngangu ngere. Mbeni ye so e peut ti sara ti zi terê ti e na gbe ti siokpari nga na kuâ ayeke dä ape. (Diko Psaume 49:​7, 8; bâ nga vidéo Jésus akui ngbanga ti nyen?) a Tongaso, Jéhovah aleke lani ti tene Jésus amû fini ti lo ti sö e. Jéhovah na Jésus asara kota sacrifice (aRom. 6:23). Tongana e gbu li mingi na ndö ti ye so Jéhovah na Jésus asara sacrifice ni ndali ti e, e yeke kiri singila mingi ndali ti ye so a futa ti zi azo. E yeke bâ ambeni ye so ayeke ngangu mingi na Jéhovah na Jésus so ala yeke nduru ti sara ndali ti e. Me kozoni, ye so a futa ti zi azo ayeke nyen?

6. Ye so a futa ti zi azo ayeke nyen? Ngbanga ti nyen la Jésus adoit lani ti futa ni?

⁶ Ye so a futa ti zi azo ayeke ngere so a futa ti kiri ti vo mbeni ye. Adam ayeke lani mbilimbili-kue na ngoi so a créé lo. Na ngoi so lo sara siokpari, lo sara si lo na amolenge ti lo kue aperdre beku ti fini ti lakue lakue. Ti vo ye so Adam aperdre ni, Jésus amû fini ti lo so ayeke mbilimbili-kue na sandaga. Na ngoi so Jésus ayeke lani na sese, lo “sara siokpari oko pëpe, na a wara tënë ti handango zo na yanga ti lo pëpe.” (1 Pi. 2:22). Na ngoi so Jésus akui, lo yeke lani mbilimbili-kue tongana ti so Adam ayeke lani mbilimbili-kue kozo ti sara siokpari. Tongaso, sandaga ti fini ti Jésus apeut ti vo ye so Adam aperdre ni.—1 aCor. 15:45; 1 Tim. 2:6.

7. Ambeni tara wa la Jésus awara lani na ngoi so lo yeke na sese?

⁷ Na ngoi so Jésus ayeke lani na sese, lo mä yanga ti Jéhovah na yâ ti aye kue même na ngoi so a yeke ngangu ti sara ni. Jésus ayeke lani molenge so ayeke mbilimbili-kue na babâ na mama ti lo ayeke mbilimbili-kue ape, me lo mä yanga ti ala (Luc 2:51). Na maseka ti lo, lo doit lani ti dö sese na amba ti lo so peut-être apusu lo ti ke yanga ti babâ na mama ti lo wala ti duti be-ta-zo na Jéhovah ape. So lo ga kota zo, lo doit lani ti dö sese na Satan Zabolo so apusu lo ti sara siokpari nga so atene même na lo polele ti sara ye so Jéhovah ake (Mat. 4:​1-11). Satan aleke lani na bê ti lo ti pusu Jésus ti sara siokpari tongaso si lo futa pëpe ye so a futa ti zi azo.

8. Ambeni tara nde wa la Jésus agbu ngangu dä?

⁸ Na ngoi ti fango tënë ti Jésus na sese, lo gbu lani ngangu na yâ ti ambeni tara nde. Awato ti lo asara lani aye ti ngangu na lo nga ala gi ti fâ lo (Luc 4:​28, 29; 13:31). Lo doit lani ti kanga bê na adisciple ti lo so asara afaute (Marc 9:​33, 34). Na ngoi so a yeke fâ lani ngbanga na li ti lo, a sara pasi na lo  nga a he lo. Lo bâ pasi ngangu nga a fâ lo tongana mbeni sioni zo (aHéb. 12:​1-3). Lo doit lani ti gbu ngangu na yâ ti ndangba tara so sân ti tene Jéhovah abata lo. b—Mat. 27:46.

9. Sandaga so Jésus amû apusu e ti sara nyen? (1 Pierre 1:8).

⁹ A yeke polele so Jésus abâ lani pasi mingi ti mû ye so a futa ti zi azo. Tongana e gbu li na ndö ti asacrifice kue so Jésus ayeke nduru ti sara ndali ti e, a pusu e ti ye lo mingi.—Diko 1 Pierre 1:8.

10. Sacrifice wa la Jéhovah asara ti mû ye so a futa ti zi azo?

¹⁰ Nyen la Jéhovah ayeke lani nduru ti sara sacrifice ni tongaso si Jésus amû ye so a futa ti zi azo? Jéhovah na Jésus ayeke lani na kpengba songo so apeut ti duti na popo ti mbeni babâ na molenge (aProv. 8:30). Na ngoi so Jéhovah ayeke bâ lani Jésus ayeke gbu ngangu na yâ ti gbâ ti atara na ndö ti sese, a sara lo tongana nyen? Kite ayeke dä ape so a son Jéhovah lani mingi so lo bâ a sara ye na Molenge ti lo na lege ni ape, a ke lo nga lo bâ pasi.

11. Mû mbeni tapande ti fa vundu so asara Jéhovah na ngoi so a fâ Jésus.

¹¹ Ababâ na amama kue so aperdre mbeni molenge ti ala ahinga tongana nyen la a sara zo vundu mingi. E yeke na kpengba mabe na zingongo ti akuâ, me e yeke sara lakue vundu na ngoi so e perdre mbeni zo so e ye lo mingi. Tapande so a-aidé e ti comprendre vundu so asara lani Jéhovah na ngoi so lo bâ Molenge ti lo so lo ye lo mingi abâ pasi nga akui na lango 14 ti Nisan ti ngu 33. c—Mat. 3:17.

12. Nyen la e peut ti sara na yâ ti ayenga so aga kozo na Mémorial?

¹² A komanse laso juska na Mémorial, gi ti manda ye mingi na ndö ti ye so a futa ti zi azo na ngoi ti mandango ye mo wani wala na sewa. Sara kua na Mbeti ti sarango na recherche ndali ti aTémoin ti Jéhovah wala na ambeni mbeti ti hinga ye mingi na ndö ti ye so a futa ti zi azo. d Sara nga kue ti mû peko ti kapa ti dikongo Bible ti Mémorial so ayeke na yâ ti Mbeti ti bungbi: Kusala ti e nga na gigi ti e ti Chrétien. Na lango ti Mémorial, girisa nga ape ti bâ kapa ti Vorongo Nzapa na  ndapre so ayeke nde. Tongana e leke bê ti e ndali ti Mémorial, e peut ti aidé nga azo ti bâ nzoni dä.—Esdras 7:10.

AIDÉ AZO TI BÂ NZONI DÄ

13. Kozo ye so e peut ti sara ti aidé azo ti bâ nzoni na lege ti Mémorial ayeke nyen?

¹³ Tongana nyen la e peut ti aidé azo ti bâ nzoni na lege ti Mémorial? Kozo ye ni ayeke ti tisa ala. Na ndö ti so e yeke tisa azo na ngoi ti fango tënë, e peut ti sû iri ti azo so e ye ti tisa ala. A peut ti duti afami ti e, amba ti e ti place ti kua, ti ekole nga na ambeni zo so e hinga ala. Même tongana e yeke na mbeti ti tisango ndo so a imprimé ni mingi ape, e peut ti tokua lien ni na azo. E hinga ape azo oke la apeut ti ga.—Zo-ti. 11:6.

14. Mû mbeni tapande so afa so a yeke kota ye ti tisa azo.

¹⁴ Tongana mo tisa mbeni zo na Mémorial, a peut ti sara si lo ye mingi ti ga. Li ti mbeni ita-wali, so koli ti lo ayeke Témoin ape, akpe so koli ti lo atene na lo so lo na lo ayeke gue na Mémorial. Li ti lo akpe ngbanga ti nyen? Ngbanga ti so fani mingi lo hunda na lo ti ga na Mémorial, me lo ga lâ oko ape. Ngbanga ti nyen la ti so ni so lo yeda ti gue na Mémorial? Lo tene: “Mbeni zo amû na mbi mbeti ti tisango ndo.” A yeke mbeni ancien ti ndo ni so lo na lo ahinga terê la amû ni na lo. Lo ga na Mémorial ti ngu ni so nga na ti angu mingi na pekoni.

15. Nyen la e ye ti girisa ape tongana e yeke tisa azo ti ga na Mémorial?

¹⁵ Girisa ape so azo so e tisa ala apeut ti duti na ahunda, mbilimbili tongana ade ala sara mbeni bungbi ti e lâ oko ape. Tongaso, e peut ti gbu li na ndö ti ahunda so ala yeke na ni na e leke terê ti e ti kiri tënë na ni (aCol. 4:6). Na tapande, ambeni zo apeut ti hunda terê ti ala: ‘A yeke sara bungbi ni tongana nyen?’ ‘Bungbi ni ayeke ninga ngbonga oke?’ ‘Bongo wa la a yeke nzoni mbi yü?’ ‘Mbi doit ti futa mbeni ye si mbi lï?’ ‘A yeke ro nginza na tïtî azo kâ?’ Tongana e tisa mbeni zo na Mémorial, e peut ti hunda lo, e tene: “Mo yeke na mbeni hunda?” na  pekoni e kiri tënë na ahunda so peut-être lo yeke na ni. E peut ti sara kua na avidéo Dabe ti mo na kuâ ti Jésus nga na E yeke sara abungbi ti e tongana nyen? ti aidé zo ni ti hinga tongana nyen la e yeke sara abungbi ti e. Ye ti manda 28 ti buku Ngbâ na fini lakue lakue! asara nga tënë ti gbâ ti anzoni ye so e peut ti fa ni na lo.

16. Ambeni hunda nde wa la azo so aga na Mémorial apeut ti duti na ni?

¹⁶ Na peko ti so afini zo so aye ti hinga ye na ndö ti tâ tënë aga na Mémorial, ala peut ti duti na ambeni hunda. Peut-être ala ye ti hinga ndani so gï kete wungo ti azo la ate mapa nga anyon vin, wala ndani so zo oko asara ni ape. Ala peut nga ti hunda e yeke sara Mémorial fani oke na yâ ti ngu oko. Ala peut nga ti gi ti hinga wala e yeke sara abungbi ti e kue tongaso. Atâa so a kiri tënë na mingi ti ahunda so na yâ ti diskur ti Mémorial, peut-être azo so aga fini fini aye ti hinga ye mingi na ndö ni. Article so ayeke na ndö ti jw.org so li ni ayeke “Pourquoi les Témoins de Jéhovah célèbrent-ils le Repas du Seigneur différemment des autres religions ?” apeut ti aidé e ti kiri tënë na ambeni hunda so. E ye ti sara ye kue so e peut ti sara, kozo na Mémorial, na ngoi ni nga na pekoni, ti aidé azo so ayeke “nduru ti yeda na tënë ni” ti bâ nzoni na lege ti Mémorial.—Kus. 13:48.

AIDÉ AITA SO AYEKE GA NA BUNGBI ENCORE APE

17. Tongana nyen la a-ancien apeut ti aidé aita so ayeke ga na bungbi encore ape? (Ézéchiel 34:​12, 16).

¹⁷ Na ngoi ti Mémorial, tongana nyen la a-ancien apeut ti aidé aita so ayeke ga na bungbi encore ape? Fa so mo pensé na ala. (Diko Ézéchiel 34:​12, 16.) Kozo na Mémorial, sara kue ti sara vizite na ala. Fa na ala so mo ye ala nga mo ye ti mû maboko na ala na lege kue so mo peut. Tisa ala ti ga na Mémorial. Tongana ala ga, yamba ala na ngia. Na peko ti Mémorial, ngbâ ti sara vizite na aita so e ye ala mingi so nga sara kue ti aidé ala ti kiri na Jéhovah.—1 Pi. 2:25.

18. Tongana nyen la e kue e peut ti aidé aita so ayeke ga na bungbi encore ape? (aRomain 12:10).

 ¹⁸ E kue na yâ ti congrégation e peut ti aidé aita so ayeke ga na bungbi encore ape so aga na Mémorial. E peut ti sara ni tongana nyen? E peut ti sara ni na lege so e sara ye na ala na ndoye, na nzoni bê nga e ne ala. (Diko aRomain 12:10.) Girisa ape so a peut ti duti ngangu na ala ti kiri ti komanse ti ga na bungbi. Peut-être ala sara mbeto ti tënë so aita apeut ti tene na ala wala na ndö ti ala. e Tongaso, hunda na ala ape atënë so apeut ti zia kamene na lê ti ala wala so apeut ti son ala (1 aThes. 5:11). Aita so ayeke amba ti e aChrétien. E yeke na ngia ti tene e na ala e kiri e voro Jéhovah.—Ps. 119:176; Kus. 20:35.

19. Tongana e dabe ti e na kuâ ti Jésus, anzoni ye wa la e yeke wara?

¹⁹ E kiri singila mingi na Jésus so ahunda na e ti dabe ti e na kuâ ti lo ngu oko oko nga e comprendre ndani so a yeke kota ye mingi ti sara ni. Tongana e sara ni, e na amba ti e, e yeke bâ nzoni dä na alege mingi (És. 48:​17, 18). E yeke ye Jéhovah na Jésus mingi. E yeke fa so e bâ na nene ni ye so ala sara ndali ti e. E yeke ga nduru mingi na aita ti e. E peut nga ti aidé ambeni zo ti hinga tongana nyen la ala nga kue apeut ti wara anzoni ye so ye so a futa ti zi azo aga na ni. Tongaso, zia e sara ye kue so e peut ti sara ti leke terê ti e ndali ti lango ti Mémorial ti ngu so, so ayeke kota lango mingi na yâ ti ngu ni.