MO HINGA mbeni ita so ague na kodoro-wande ti fa tënë na ndo so bezoin ti awafango tënë ti Royaume ayeke dä mingi? E yeke tene ka so aita tongaso ayeke mû maboko mingi. Mo hunda tere ti mo lâ oko awe: ‘Nyen la apusu ala ti gue na kodoro-wande? Tongana nyen la ala leke tere ti ala ndali ti mara kua so? Mbi kue mbi lingbi ti sara ni?’ Biani, nzoni lege ti wara akiringo tënë ni ayeke ti sara lisoro na aita ni. Zia e sara ni.

Nyen la apusu mo ti komanse ti gbu li na ndo ti fango tënë na kodoro-wande na ndo so bezoin ayeke dä mingi? Amy, so ayeke na ngu 35 tongaso, so alondo na États-Unis, atene: “Teti angu mingi, mbi gbu li lani na ndo ti fango tënë na kodoro-wande, me mbi bâ mbi tene mbi lingbi lâ oko ti sara ni ape. Nyen la asara si lo changé bango ndo ti lo?” Lo tene: “Na ngu 2004, mbeni ita-koli na wali ti lo so ayeke fa tënë na Bélize atene na mbi ti gue na ndo ti ala ti fa tënë ndali ti nze oko. Mbi gue lani nga mbi ye ni mingi! Ngu oko na pekoni, mbi quitté mbi gue na Ghana ti fa tënë kâ tongana pionnier.”

A sara ambeni ngu tongaso awe, Stephanie, so aga nduru fadeso na ngu 30, so alondo nga na États-Unis, abâ dutingo ti lo nzoni nga lo tene: ‘Mbi yeke na nzoni seni nga mbi yeke na mbeni sewa ti bâ lege ni ape. Biani, mbi lingbi ti sara na Jéhovah mingi ahon ti fadeso.’ Nzoni gbungo li ti lo so apusu lo ti gue na Ghana ti fa tënë mingi. Ita Filip na wali ti lo Ida alondo na Danemark, ala use kue ayeke na ngu 50 tongaso nga ala yeke apionnier. Ala sara lani nzara mingi ti gue na mbeni territoire so bezoin ti awafango tënë ayeke dä mingi. Ala gi alege kue ti wara ye so ala sara nzara ni. Filip atene: “Na ngoi so lege ni azi na e, a yeke lani mo bâ mo tene Jéhovah atene na e: ‘ala gue!’” Na ngu 2008, ala gue na Ghana na ala fa tënë kâ ahon ngu ota tongaso.

Hans na wali ti lo Brook, asara kua ti pionnier asara angu 30 tongaso na États-Unis. Na ngu 2005, ala mû maboko na akpale so asi na peko ti katrina, mbeni kota  pupu so aga na ngu si abuba aye na yâ ti kodoro. Na pekoni, ala mû iri ti ala ti mû maboko na kua ti lekengo ada so andu kua ti Jéhovah, me a iri ala dä ape. Hans atene: “Na pekoni, na ngoi ti mbeni kota bungbi, e mä mbeni diskur so afa so Gbia David asara ye lani alingbi na tënë so a tene lo la lo yeke leke temple ape, tongaso lo changé ye so lo leke na bê ti lo ti sara so. Tënë so amû maboko na e ti bâ so ayeke na lege ni ti tene zo achangé akua ti Nzapa so lo leke na bê ti lo ti sara ni.” (1 Chron. 17:1-4, 11, 12; 22:5-11). Brook akiri atene: “Jéhovah aye lani ti tene e pika mbeni yanga-da nde.”

Na peko ti so, Hans na wali ti lo Brook amä tënë ti apendere ye so asi na akamarade ti ala so asara kua ti fango tënë na ambeni kodoro, a pusu ala ti tara ti sara kua ti pionnier na kodoro-wande. Na ngu 2012, ala gue na Ghana, kâ ala fa tënë teti anze osio na ala mû maboko na mbeni congrégation ti awambongi. Atâa so a lingbi ala kiri lani na États-Unis, aye so asi na ala na yâ ti kua ti fango tënë na Ghana, asara si nzara ti ala ti ngbâ ti zia Royaume na kozo ndo na yâ ti gigi ti ala akiri akono. Na pekoni, ala mû nga lani maboko na kua ti lekengo da ti mbeni filiale na Micronésie.

Tongana nyen la mo leke tere ti mo lani ti fa tënë na ndo so bezoin ti awafango tënë ayeke dä mingi? Stephanie * atene: “Mbi sara recherche na yâ ti a-article ti Tour ti Ba Ndo so asara tënë na ndo ti fango tënë na ando so bezoin ti awafango tënë ayeke dä mingi. Nga mbi yeke sara lisoro na ndo tënë ti nzara ti mbi ti fa tënë na kodoro-wande so na a-ancien ti congrégation ti mbi, na surveillant ti circonscription nga na wali ti lo. Na ndo ni kue, fani mingi mbi yeke fa tënë ti ye so mbi leke na bê ti sara so na yâ ti sambela na Jéhovah.” Na oko ngoi ni, Stephanie aduti na aye mingi na yâ ti gigi ti lo ape, si amû lege na lo ti bata mbeni nginza nde ti tene amû maboko na lo ti wara na aye so lo yeke na bezoin ni ti sara na kua ti fango tënë ni na kodoro-wande.

Hans atene: “E sambela Jéhovah ti fa lege na e ndali ti so e ye ti gue na ndo  so lo la lo fa na e. E zia nga na yâ ti sambela ti e ni mbilimbili lango so e ye ti sara ye so e leke na bê ti sara.” Ita-koli ni na wali ti lo atokua alettre na afiliale osio. Na pekoni, ala wara mbeni nzoni kiringo tënë ti filiale ti Ghana, ala gue kâ, na ala pensé ti sara nze use. Hans atene: “Anzere na e mingi ti sara kua na yâ ti congrégation ni, ye so asara si e gboto yâ ti lango so e sara kâ.”

George na wali ti lo Adria, so ayeke na ngu 30 tongaso alondo na Canada, ala girisa ape so Jéhovah ayeke zia tufa na ndo ti anzoni desizion, me pëpe gi na ndo ti anzoni bibe. Ala sara ye kue so a lingbi ala sara ti si na ye so ala leke na bê ti ala ti sara. Ala sara lisoro na mbeni ita-wali so ayeke fa tënë na ndo so bezoin ayeke dä mingi na Ghana na ala hunda gbâ ti tënë na lo. Nga, ala sû mbeti na filiale ti Canada nga na ti Ghana. Adria atene: “Na ndo ni, e sara kue ti duti na aye mingi ape na yâ ti gigi ti e, e sara ni même ahon ti so e sara kozo.” Adesizion so amû lege na ala ti quitté ti gue na Ghana na ngu 2004.

Akpale wa la mo tingbi na ni lani na peko ti so mo quitté mo gue na mbeni kodoro-wande? Mo hon ndo ni tongana nyen? Ti Amy, kozo kpale so lo wara ayeke nzara ti kodoro ti lo. Lo tene: “Aye kue ti yâ ti kodoro ni so ayeke nde na ti so mbi habitué na ni na kodoro ti mbi.” Nyen la amû maboko na lo? Lo tene: “So afami ti mbi ayeke iri ka mbi ti fa so ala bâ na nene ni mingi kua so mbi yeke sara so, amû maboko na mbi mingi ti ngbâ ti bata na li ndani so mbi gue kâ. Na pekoni, mbi na ala e komanse ti sara lisoro na lege ti vidéo na ndo ti Internet. Teti so mbi na fami ti mbi e lingbi ti bâ tere, mbi bâ so ala yeke yongoro mingi na mbi ape.” Amy afa so, so lo sara kamarade na mbeni  ita-wali so ngu ti lo ague na li ni amû maboko na lo ti hinga ye na ndo ti angobo nde nde ti sarango ye ti azo ni. Lo tene: “Kamarade ti mbi so aga lani zo so mbi yeke gue na ndo ti lo na ngoi kue so mbi bezoin mungo maboko ti hinga ndani so azo ni ayeke sara ye na ambeni lege nde. Na lege ti mungo maboko ti lo, mbi hinga ye so mbi peut ti sara nga ye so mbi peut ti kpe ni. Aye ni so la asara si mbi ngbâ ti wara ngia na yâ ti kua ti fango tënë so mbi yeke sara ka.”

George na wali ti lo Adria afa so na ngoi so ala si pan na Ghana, ala bâ so dutingo ti azo ni kâ angbâ na peko mingi. Adria atene: “Ahon ti sukula bongo na machine, e sukula ni na yâ ti aseau. Ti tö kobe ayeke ninga mingi ahon ti so e yeke sara kozo. Me ambeni ngoi na pekoni, aye so ala bâ tongana ngangu kpale so aga biani tongana mbeni fini ye na ala.” Brook atene: “Atâa akpale so e apionnier e wara, e yeke na ngia na yâ ti fini ti e. Na ngoi so e dabe ti e na aye kue so asi, so akpengba e, a yeke tongana mbeni pendere pot ti fleur ti souvenir so e bâ ni na nene ni mingi.”

Ngbanga ti nyen la mo hunda na ambeni zo nga ti sara mara ti kua ti Royaume so? Stephanie atene: “Anzere mingi ti fa tënë na yâ ti mbeni territoire so mo wara azo so ayeke na nzara mingi ti hinga tâ tënë asara si ala ye ti tene mo manda Bible na ala lâ na lâ. Ti gue ti fa tënë na ando so bezoin ti awafango tënë ayeke dä mingi, a yeke mbeni oko ti apendere desizion so mbi mû ni na yâ ti gigi ti mbi.” Na ngu 2014, Aaron asara mariage na Stephanie, nga laso ala yeke sara kua na filiale ti Ghana.

Christine, mbeni pionnier so ayeke na ngu 30 na Allemagne, a tene: “A yeke tâ mbeni pendere ye mingi.” Lo fa tënë na Bolivie kozo si lo gue na Ghana. Lo tene: “So mbi duti ayo na afami ti mbi, mbi tourné lakue na mbage ti Jéhovah ti mû maboko na mbi. Mbi ga nduru mingi na lo ahon ti kozo. Mbi bâ nga tongana nyen la awakua ti Jéhovah aduti biani beoko na popo ti ala. Kua ti fango tënë so asara si gigi ti mbi aga nzoni.” Ade ti ninga ape, Gideon asara mariage na Christine nga ala use kue angbâ ti sara kua ti fango tënë na Ghana.

Filip na wali ti lo Ida afa na e ye so ala sara lani ti mû maboko na azo so ala manda Bible na ala ti gue na li ni. Ala tene: “E yeke manda ka Bible na azo 15 wala ahon, me e ngbâ gi na azo 10 si e lingbi ti fa ye na ala nzoni.” Ye ti nzoni wa la azo so amanda Bible ni awara? Filip atene: “Mbi manda Bible na mbeni maseka-koli so iri ti lo ayeke Michael. Lo yeke manda ye ni lâ na lâ nga lo yeke leke étude ti lo nzoni, ye so asara si e hunzi buku Bible afa gi na yâ ti nze oko. Na pekoni, lo ga mbeni wafango tënë so ade ti wara batême ape. Na kozo lango so lo sigigi na fango tënë, lo hunda mbi, lo tene: ‘Eskê mo peut ti mû maboko na mbi ti sara a-étude ti mbi?’ Mbi bâ lo bê ti mbi adö. Michael atene so lo komanse ti manda Bible na azo ota kozo awe nga lo bezoin mungo maboko ti sara na a-étude ni.” Teti so bezoin ti awafango ye ayeke mingi, a sara si même azo so angbâ ti manda Bible ayeke fa tënë ti Bible na azo.

Amy afa tongana nyen la hio lo ga ti bâ so kota bezoin ti awafango tënë ayeke dä, lo tene: “Kete na peko ti so mbi si na Ghana, e fa tënë na yâ ti mbeni kete kodoro nga e gi awambongi. E wara gi oko ape, me e wara ala miombe na yâ ti kete kodoro oko.” Na ngoi ni so, Eric asara mariage na Amy, nga ala use kue ayeke sara kua ti pionnier spécial. Ala sara bungbi na yâ ti mbeni congrégation ti awambongi ti mû maboko na awambongi 300 tongaso, so ayeke awafango tënë nga na ambeni wambongi ti yâ ti kodoro ni so ayeda na tâ tënë. Ti George na wali ti lo Adria, fango tënë na Ghana amû lege na ala ti hinga aye so a lingbi zo asara kozo ti ga missionnaire. So ngia si ala yeke na ni na ngoi so a tisa ala ti gue na klase 126 ti Ekole ti Galaad! Laso, ala yeke missionnaire na Mozambique.

A mû ngia na bê mingi ti bâ so gbâ ti azo so alondo na akodoro nde nde ayeke sara kua ngangu na tere ti aita ti yâ ti kodoro so si ala kö lê ti kobe (Jean 4:35). Yenga oko oko na yâ ti ngu oko oko, azo 120 tongaso ayeke wara batême na Ghana. Tongana ti aita 17 so ague na ndo so bezoin ti awafango tënë ayeke dä mingi na Ghana, ndoye ti Jéhovah apusu awafango tënë saki mingi na yâ dunia ti mû tere ti ala wani na nzoni bê ti sara ye. Ala yeke fa tënë na ando so bezoin ti awafango tënë ayeke dä mingi. Kite ayeke dä ape so, mara ti avolontaire so azia ngia na bê ti Jéhovah.—Ps. 110:3; aProv. 27:11.